လံာ်တၢ်ဟးထီၣ်ကွံာ် 22 - Sgaw Karen Common Bible

ယူဒၤတၢ်သိၣ်တၢ်သီဘၣ်ဃး ဒီးတၢ်ဟ့ၣ်လိးက့ၤ

¹ ပှၤတဂၤမ့ၢ်ဟုၣ်န့ၢ်ကျီၢ်မိၢ်တဒုမ့ၢ်ဂ့ၤ, သိတဒုမ့ၢ်ဂ့ၤဒီး မၤသံအီၤမ့ၢ်ဂ့ၤ, ဆါကွံာ်အီၤမ့ၢ်ဂ့ၤန့ၣ်အဝဲကဘၣ်ဟ့ၣ်က့ၤကျီၢ် မိၢ်ယဲၢ်ဒုလၢကျီၢ်မိၢ်တဒုအဂီၢ်ဒီးသိလွံၢ်ဒုလၢသိတဒု အဂီၢ်လီၤ.

² အဝဲကဘၣ်ဟ့ၣ်တၢ်အပှ့ၤလၢတၢ်လၢအဟုၣ်န့ၢ်ဝဲအဂီၢ်န့ၣ်လီၤ. အဝဲအတၢ်မ့ၢ်တအိၣ်နီတမံၤဘၣ်ဒီးကဘၣ်တၢ်ဆါလီၤကွံာ် အီၤဒ်ကုၢ်တဂၤအသိးလၢတၢ်ကလိးတၢ်လၢအဟုၣ်တ့ၢ်ဝဲ တမံၤန့ၣ်အပှ့ၤအဂီၢ်လီၤ.

³ ဆၣ်ဖိကီၢ်ဖိလၢဘၣ်တၢ်ဟုၣ်န့ၢ်အီၤတဒုန့ၣ်မ့မ့ၢ်ကျီၢ်မိၢ် တဒုမ့ၢ်ဂ့ၤ, ကသ့ၣ်ယီၤတဒုမ့ၢ်ဂ့ၤ, သိတဒုမ့ၢ်ဂ့ၤဒီး, မ့ၢ်ဘၣ်တၢ်ထံၣ်န့ၢ်အီၤမူဒံးလၢအတၢ်ဖိတၢ်လံၤအကျါန့ၣ်, အဝဲကဘၣ်လိးက့ၤတၢ်ခံစးန့ၣ်လီၤ.

⁴ တၢ်ဘျၣ်တဂၤမ့ၢ်ဘၣ်တၢ်ဖီၣ်န့ၢ်အီၤဖဲအဘၢၣ်ဖျိဟံၣ်တဖျၢၣ်လၢ မုၢ်နၤခါဒီးမ့ၢ်ဘၣ်တၢ်မၤသံအီၤန့ၣ်, ပှၤလၢအမၤသံအီၤတဂၤန့ၣ်အတၢ်ကမၣ်တအိၣ်လၢအမၤသံတၢ် အဃိဘၣ်. ဘၣ်ဆၣ်ဒီးတၢ်မၤအသးအံၤမ့မ့ၢ်လၢမုၢ်ဆါခီဒီးပှၤမၤသံ တၢ်တဂၤန့ၣ်အတၢ်ကမၣ်အိၣ်ဝဲလၢအမၤသံတၢ်အဃိလီၤ.

⁵ ပှၤတဂၤမ့ၢ်ဒုးအီၣ်အဆၣ်ဖိကီၢ်ဖိအတၢ်လၢပျီတဘ့ၣ်အပူၤမ့ တမ့ၢ်လၢအစပံးလီၢ်တလီၢ်အပူၤဒီးအဝဲသ့ၣ်မ့ၢ်ထူၣ်ဖျဲးဒီးမ့ၢ် လဲၤနုာ်အီၣ်ကွံာ်ပှၤအဂၤတဂၤအတၢ်မုၢ်တၢ်ဘိလၢအမဲထီၣ်လၢ အပျီပူၤန့ၣ်ဂ့ၤလၢတၢ်မၢအဝဲဟ့ၣ်လိးက့ၤဝဲတၢ်မုၢ်တၢ်ဘိလၢအပျီ ဒၣ်ဝဲမ့တမ့ၢ်အစပံးလီၢ်ဒၣ်ဝဲအပူၤန့ၣ်လီၤ.

⁶ ပှၤတဂၤမ့ၢ်စးထီၣ်ဒွဲၣ်တၢ်လၢအပျီပူၤဒီးမ့ၣ်အူမ့ၢ်ခီဂာ် ဆူပှၤအဂၤတဂၤအပျီပူၤဒီး, အီၣ်ကွံာ်ဘုဧိၤဟုဧိၤလၢအမဲထီၣ်, မ့တမ့ၢ်ဘုလၢတၢ်ကူးအီၤဝံၤဝဲဒီးတၢ်ပာ်ဖှိၣ်အီၤန့ၣ်, ပှၤလၢအစးထီၣ်ဒွဲၣ်မ့ၣ်အူတဂၤ, ကဘၣ်လိးက့ၤတၢ်လၢတၢ်ဟးဂီၤ အဂီၢ်လီၤ.

⁷ ပှၤတဂၤမ့ၢ်ဘၣ်သူၣ်ဘၣ်သးလၢကပၢၤဃးန့ၢ်ပှၤအဂၤတဂၤအတိၢ်မ့ၢ် ဂ့ၤ, တၢ်လုၢ်ဒိၣ်ပှ့ၤဒိၣ်အဂၤတဖၣ်မ့ၢ်ဂ့ၤ, ဒီးတၢ်တဖၣ်န့ၣ်မ့ၢ်ဘၣ်တၢ် ဟုၣ်ကွံာ်အီၤလၢအဝဲအဟံၣ်ပူၤဒီးတၢ်ဘျၣ်န့ၣ်မ့ၢ်ဘၣ်တၢ်ထံၣ် န့ၢ်အီၤဒီးတၢ်ဘျၣ်ကဘၣ်လိးက့ၤဝဲခံစးလီၤ.

⁸ ဘၣ်ဆၣ်ဒီးတၢ်ဘျၣ်မ့ၢ်တဘၣ်တၢ်ထံၣ်န့ၢ်အီၤဘၣ်ဒီးပှၤတဂၤလၢအဘၣ် သူၣ်ဘၣ်သးလၢကပၢၤတၢ်န့ၣ်ကဘၣ်တၢ်ဟဲစိာ်အီၤဆူတၢ်ဘူၣ်ထီၣ်ဘါ ထီၣ်အလီၢ်ဒီးဖဲန့ၣ်အဝဲကဘၣ်ဆိၣ်လီၤအသးလၢအဝဲတဟုၣ်ပှၤအဂၤ အတၢ်စုလီၢ်ခီၣ်ခိၣ်ဘၣ်လီၤ.

⁹ တၢ်အ့ၣ်လိာ်ဆိးက့လိာ်အကွီၢ်ကိးမံၤဒဲးလၢအဘၣ်ဃးဒီးတၢ်စု လီၢ်ခီၣ်ခိန့ၣ်, မ့ၢ်အိၣ်ဃုာ်ဒီးဂီၤဘုၣ်ဂီၤဖံး, ကသ့ၣ်ယီၤ, သိ, တၢ်ကူတၢ်သိး, မ့တမ့ၢ်တၢ်အဂၤတမံၤမံၤလၢအလီၤမၢ်အဂ့ၢ်န့ၣ်, ပှၤခံဂၤလိာ်လၢအစံးလၢမ့ၢ်အတၢ်န့ၣ်, ကဘၣ်တၢ်လဲၤကိးအီၤဆူ တၢ်ဘူၣ်ထီၣ်ဘါထီၣ်အလီၢ်လီၤ. ပှၤတဂၤလၢကစၢ်ယွၤပာ်ဖျါထီၣ်လၢအတၢ်ကမၣ်အိၣ်န့ၣ်ကဘၣ်လိးက့ၤ ပှၤအဂၤတဂၤန့ၣ်အတၢ်ခံစးလီၤ.

¹⁰ ပှၤတဂၤမ့ၢ်ဘၣ်သူၣ်ဘၣ်သးလၢကပၢၤဃးပှၤအဂၤတဂၤအကသ့ၣ်ယီၤ, ကျီၢ်မိၢ်, သိမ့တမ့ၢ်ဆၣ်ဖိကီၢ်ဖိအဂၤလၢအဂီၢ်ဒီးဆၣ်ဖိကီၢ် ဖိတဒုန့ၣ်မ့ၢ်သံဝဲမ့တမ့ၢ်ဘၣ်ဒိဘၣ်ထံးမ့တမ့ၢ်ဘၣ်တၢ်ဂုာ် န့ၢ်အီၤဒီးတၢ်အုၣ်သးမ့ၢ်တအိၣ်ဘၣ်နီတမံၤန့ၣ်,

¹¹ ပှၤတဂၤန့ၣ်ကဘၣ်လဲၤဆူတၢ်ဘူၣ်ထီၣ်ဘါထီၣ်အလီၢ်ဒီးဆိၣ်လီၤအသး လၢအတဟုၣ်န့ၢ်ဘၣ်ပှၤအဂၤတဂၤန့ၣ်အတၢ်ဘၣ်လီၤ. ဆၣ်ဖိကီၢ်ဖိတဒုန့ၣ်မ့ၢ်တဘၣ်တၢ်ဟုၣ်အီၤဒီးအကစၢ်ကဘၣ်တူၢ်လိာ် တၢ်လီၤမၢ်ဒီးပှၤအဂၤတဂၤန့ၣ်ဘၣ်ဟ့ၣ်လိးက့ၤတၢ်အလီၢ်တအိၣ်ဘၣ်လီၤ.

¹² ဘၣ်ဆၣ်ဒီးဆၣ်ဖိကီၢ်ဖိတဒုန့ၣ်မ့ၢ်ဘၣ်တၢ်ဟုၣ်န့ၢ်အီၤဒီးပှၤ တဂၤန့ၣ်ကဘၣ်လိးက့ၤတၢ်အပှ့ၤဆူအကစၢ်အအိၣ်န့ၣ်လီၤ.

¹³ မ့ၢ်ဘၣ်တၢ်မၤသံအီၤလၢဆၣ်ဖိကီၢ်ဖိအမံၤတဖၣ်ဒီး, ပှၤတဂၤန့ၣ်ကဘၣ်ဟဲက့ၤစိာ်တၢ်အိၣ်လီၤတဲာ်တဖၣ်လၢတၢ်အုၣ်သး အဂီၢ်လီၤ. အဝဲလိးက့ၤတၢ်လၢအဘၣ်တၢ်မၤသံအီၤလၢဆၣ်ဖိကီၢ်ဖိ အမံၤတဖၣ်အဃိအလီၢ်တအိၣ်ဘၣ်.

¹⁴ ပှၤတဂၤမ့ၢ်ဒိးလဲဆၣ်ဖိကီၢ်ဖိတဒုလၢပှၤအဂၤတဂၤအအိၣ်ဒီး မ့ၢ်ဘၣ်ဒိဆါမ့ၢ်ဂ့ၤသံမ့ၢ်ဂ့ၤဖဲအကစၢ်တအိၣ်ဘၣ်အကတီၢ်န့ၣ်ပှၤ ဒိးလဲတၢ်တဂၤအံၤကဘၣ်လိးက့ၤတၢ်အပှ့ၤလီၤ.

¹⁵ ဘၣ်ဆၣ်ဒီးတၢ်မ့ၢ်မၤအသးဖဲအကစၢ်အမဲာ်ညါဒီးပှၤတဂၤန့ၣ်လိး က့ၤတၢ်အလီၢ်တအိၣ်ဘၣ်. မ့မ့ၢ်ဆၣ်ဖိကီၢ်ဖိတဒုလၢတၢ်ဒိးလဲအီၤအိၣ်ဒီးအဘူးအလဲ အဃိဒီးတၢ်လီၤမၢ်န့ၣ်တူာ်ကွံာ်ဝဲဒၣ်လၢတၢ်ဒိးလဲအပှ့ၤန့ၣ်လီၤ.

ယူဒၤအတၢ်သိၣ်တၢ်သီတဖၣ် လၢအဘၣ်ထွဲဒီးတၢ်သကဲးပဝး ဒီးတၢ်ဘူၣ်တၢ်ဘါ

¹⁶ ပှၤတဂၤမ့ၢ်ကလံာ်န့ၢ်မုၣ်လိၤဘိတဂၤလၢတဘၣ်တၢ်အဲၣ်တီဒံးဘၣ် ဒီး, အဝဲကဘၣ်ဟ့ၣ်တလးမူးပိာ်မုၣ်အပှ့ၤလၢပိာ်မုၣ်ဖိန့ၣ်အဂီၢ်ဒီး ဟံးန့ၢ်အီၤဒ်အမါအသိးလီၤ.

¹⁷ ဘၣ်ဆၣ်ဒီးလၢအဝဲကဖျီအသးဒီးပိာ်မုၣ်ဖိအဂီၢ်, ပိာ်မုၣ်ဖိအပၢ်မ့ၢ်ဂ့ၢ်လိာ်ဝဲန့ၣ်အဝဲကဘၣ်လိးက့ၤတိၢ်ထဲသိး ဒီးတလးမူးပိာ်မုၣ်တဂၤအပှ့ၤလၢမုၣ်လိၤဘိအဂီၢ်, ဆူအပၢ်အအိၣ်န့ၣ်လီၤ.

¹⁸ ပိာ်မုၣ်တဂၤလၢ်လၢ်လၢအမၤတၢ်မၤကဒါမဲာ်န့ၣ်မၤသံကွံာ်အီၤ တက့ၢ်.

¹⁹ ပိာ်ခွါတဂၤလၢ်လၢ်လၢအမံဃုာ်ဒီးဆၣ်ဖိကီၢ်ဖိတဒုန့ၣ်မၤသံကွံာ်အီၤတက့ၢ်.

²⁰ ပှၤတဂၤလၢ်လၢ်လၢအလုၢ်တၢ်ပာ်တၢ်ဆူကစၢ်အဂုၤအဂၤတဂၤလၢ်လၢ် အအိၣ်လၢယၤ, ယွၤအမဲာ်ညါန့ၣ်, စံၣ်ညီၣ်သံကွံာ်အီၤတက့ၢ်.

²¹ မၤတရီတပါမ့တမ့ၢ်မၤနးမၤဖှီၣ်ပှၤတခီဘီမုၢ်ဖိတဂၤန့ၣ်တဂ့ၤ. သ့ၣ်နီၣ်ထီၣ်လၢသုမ့ၢ်တ့ၢ်ပှၤတခီဘီမုၢ်ဖိတဖၣ်လၢကီၢ် အဲၤကူပတူးအပူၤန့ၣ်တက့ၢ်.

²² မၤတရီတပါဒီးမၤနးမၤဖှီၣ်မုၣ်ကမဲမ့ၢ်ဂ့ၤ, ဖိၣ်ဃဲမ့ၢ်ဂ့ၤနီတဂၤတဂ့ၤ.

²³ သုမ့ၢ်မၤဒီးဖဲအဝဲသ့ၣ်ကိးထီၣ်ယၤယွၤအံၤလၢတၢ်မၤစၢၤ အဂီၢ်န့ၣ်ယကစံးဆၢအဝဲသ့ၣ်,

²⁴ ဒီးယကသးဒိၣ်ထီၣ်ဒီးမၤသံကွံာ်သုလၢတၢ်ဒုးတၢ်ယၤန့ၣ်လီၤ. သုမါတဖၣ်ကကဲထီၣ်မုၣ်ကမဲ, ဒီးသုဖိတဖၣ်ကကဲထီၣ်ပှၤလၢအပၢ် တအိၣ်န့ၣ်လီၤ.

²⁵ သုမ့ၢ်ဟ့ၣ်လိၢ်လီၤစ့ဆူယပှၤဂီၢ်မုၢ်လၢအဖှီၣ်အယာ်တဂၤလၢ်လၢ် န့ၣ်မၤသုသးဒ်ပှၤလိၢ်လီၤအီၣ်စ့တဖၣ်အသိးဒီးမၢဆူၣ်အီၤလၢ ကဟ့ၣ်စ့အအ့ၣ်တဂ့ၤ.

²⁶ သုမ့ၢ်ဟံးန့ၢ်ဆ့ကၤဖးဒိၣ်လၢပှၤတဂၤဂၤအအိၣ်ဒ်တၢ်အၢၣ်လီၤ အီလီၤတမံၤလၢအဝဲကဘၣ်လိးက့ၤတၢ်အဂီၢ်ဒီး, တချုးလၢမုၢ်လီၤနုာ်န့ၣ်သုကဘၣ်ဟ့ၣ်က့ၤအီၤလီၤ.

²⁷ အဂ့ၢ်ဒ်အံၤ, တၢ်န့ၣ်မ့ၢ်တၢ်လုးဘၢထဲတမံၤဧိၤလၢကမၤလၢၤအီၤ အဂီၢ်န့ၣ်လီၤ. တၢ်အဂၤမနုၤကအိၣ်လၢအဝဲကမံလုးဝဲအဂီၢ်လဲၣ်. ဖဲအဝဲကိးထီၣ်ယၤလၢတၢ်မၤစၢၤအဂီၢ်ဒီး, ယကစံးဆၢအီၤလီၤ. အဂ့ၢ်ဒ်အံၤ, ယသူၣ်ကညီၤသးကညီၤတၢ်လီၤ.

²⁸ ကတိၤအၢတၢ်ဘၣ်ဃးဒီးကစၢ်ယွၤအဂ့ၢ်တဂ့ၤ. ဒီးဆိၣ်အၢသုပှၤဂီၢ်မုၢ်အခိၣ်အနၢ်တဂၤတဂ့ၤ.

²⁹ ဟ့ၣ်ယၤတၢ်လုၢ်မၤဘူၣ်တဖၣ်လၢသုဘုဧိၤဟုဧိၤအကျါ, သုစပံးထံ, ဒီးသုသ့ၣ်စၤယံးအသိအကျါ, ဖဲအကတီၢ်ဘၣ်ဝဲန့ၣ်တက့ၢ်. ဟ့ၣ်ယၤလၢသုဖိဝဲၢ်ကိပိာ်ခွါတဖၣ်န့ၣ်တက့ၢ်.

³⁰ ဟ့ၣ်ယၤသုဂီၤဘုၣ်ဂီၤဖံး, ဒီးသုသိတဖၣ်အဖိဝဲၢ်ကိတက့ၢ်. ပျဲတၢ်အဝဲၢ်ကိအဖါန့ၣ်အိၣ်ဒီးအမိၢ်နွံသီဒီးဃိးသီတသီ န့ၣ်လုၢ်ထီၣ်ပာ်ထီၣ်ဆူယအိၣ်တက့ၢ်.

³¹ သုမ့ၢ်ယပှၤဂီၢ်မုၢ်လီၤ. မၤသးဒ်န့ၣ်ဒီးဆၣ်ဖိကီၢ်ဖိတဒုလၢ် လၢ်အဖံးအညၣ်လၢအဘၣ်တၢ်မၤသံအီၤလၢဆၣ်ဖိကီၢ်ဖိအမံၤတဖၣ်န့ၣ် အီၣ်အီၤတဂ့ၤ. အခိၣ်တလိာ်ဟ့ၣ်ဒုးအီၣ်ထွံၣ်တဖၣ်တက့ၢ်.