လံာ်ပှၤစံၣ်တဲၤတဲလီၤတၢ် 11 - Sgaw Karen Common Bible

တၢ်လၢပှၤကူၣ်တၢ်သ့တဂၤမၤဝဲ

¹ ကွံာ်နကိၣ်လၢထံဖံးခိၣ်တက့ၢ်. အါနံၤအါသီဒီးနကထံၣ်န့ၢ် က့ၤအီၤလီၤ.

² ဟ့ၣ်နီၤဖးတၢ်လၢကျဲနွံဘိမ့တမ့ၢ်ဃိးဘိအပူၤဒၣ်လဲာ်တ က့ၢ်. အဂ့ၢ်ဒ်အံၤ, တၢ်အၢမနုၤအကမၤအသးလၢဟီၣ်ခိၣ်ချၢလဲၣ်န့ၣ်နတသ့ၣ်ညါဘၣ်.

³ သ့ၣ်တထူၣ်မ့ၢ်လီၤတကူၢ်ဆူလဲၣ်ဂ့ၤဆူလဲၣ်ဂ့ၤန့ၣ်တမ့ၢ်တၢ်အမိၢ် ပှၢ်ဘၣ်. ကအိၣ်မံလီၤဒၣ်ဖဲအလီၤတကူၢ်ဝဲအလီၢ်လီၤ. တုၤတၢ်အၢၣ်တဖၣ်ပှဲၤဝဲဒီး, တၢ်ဟဲစူၤလီၤလီၤ.

⁴ ကွၢ်စဲကလံၤန့ၣ်ဒီးနတသူၣ်ဘၣ်ဖျးဘၣ်တၢ်နီတဘျီဘၣ်. ကွၢ်စူၢ်တၢ်အၢၣ်တဖၣ်ဒီးနတကူးဘၣ်တၢ်နီတစုဘၣ်.

⁵ ကစၢ်ယွၤမၤတၢ်ကိးမံၤဒဲးဒီးတၢ်လၢအမၤဝဲန့ၣ်ဒ်နတနၢ်ပၢၢ်သး သမူအသီဟဲအိၣ်ထီၣ်ဝဲလၢပိာ်မုၣ်တဂၤအဒၢလီၢ်ပူၤအသိး, နနၢ်ပၢၢ်အီၤတသ့ဘၣ်.

⁶ သူၣ်လီၤဖျးလီၤတၢ်လၢမုၢ်ဂီၤဒီးလၢမုၢ်ဟါစ့ၢ်ကီးတက့ၢ်. အဂ့ၢ်ဒ်အံၤ, ကဒိၣ်ထီၣ်ဂ့ၤဂ့ၤခဲလၢာ်ဧါ, မ့တမ့ၢ်, ကဂ့ၤတနီၤ, တဂ့ၤတနီၤဧါန့ၣ်, နတသ့ၣ်ညါနီတစုဘၣ်.

⁷ တၢ်သူၣ်ခုသးခုလၢမုၢ်ဆါအတၢ်ကပီၤအတၢ်မုာ်သူၣ်မုာ်သးအပူၤ န့ၣ်မ့ၢ်တၢ်ဂ့ၤဝဲလီၤ.

⁸ သ့ၣ်ညါတၢ်ဘျုးလၢနအိၣ်မူဘၣ်ကိးနံၣ်ဒဲးအဃိတက့ၢ်. နအိၣ်မူယံာ်ထဲလဲၣ်ဂ့ၤထဲလဲၣ်ဂ့ၤ, သ့ၣ်နီၣ်ထီၣ်က့ၤလၢတၢ်ခံး အမုၢ်နံၤတဖၣ်ကအိၣ်အါမးတက့ၢ်. တၢ်တအိၣ်ဘၣ်နီတမံၤလၢတၢ်ကမုၢ်လၢ်ကွၢ်စိအီၤဆူညါန့ၣ်ဘၣ်.

တၢ်ဟ့ၣ်ကူၣ်ပှၤသးစၢ်တဖၣ်

⁹ ပှၤသးစၢ်သ့ၣ်ဧၢ, မုာ်လၤလၢနတၢ်မ့ၢ်ပှၤသးစၢ်အဃိတက့ၢ်. ဖဲနသးစၢ်ဒံးအခါအံၤန့ၣ်, သူၣ်ဖှံသးညီတက့ၢ်. မၤတၢ်လၢနအဲၣ်ဒိးမၤဒီးလူၤထွဲနသးအတၢ်ဆၢန့ၢ်ဘၣ်တက့ၢ်. ဘၣ်ဆၣ်သ့ၣ်နီၣ်ထီၣ်က့ၤလၢကစၢ်ယွၤကစံၣ်ညီၣ်နၤလၢတၢ်လၢနမၤ အီၤတမံၤဂ့ၤတမံၤဂ့ၤအဃိတက့ၢ်.

¹⁰ ပျဲတၢ်တမံၤဂ့ၤတမံၤဂ့ၤမၤကိၢ်မၤဂီၤဒီးမၤဆူးမၤဆါနၤတဂ့ၤ. တမ့ၢ်လၢနကအိၣ်သးစၢ်ဘၣ်ယံာ်ယံာ်ဘၣ်.