လံာ်ပှၤစံၣ်တဲၤတဲလီၤတၢ် 10 - Sgaw Karen Common Bible

¹ သၣ်ဘုလါအသံတဖၣ်န့ၣ်, မၤနၢအုၣ်သိနၢမူဒီပလီသ့လီၤ. ဒီးတၢ်သူၣ်တထံသးတဆးတစဲးတြူာ်ကွံာ်တၢ်ကူၣ်သ့အဒိၣ် ကတၢၢ်သ့လီၤ.

² ပှၤကူၣ်တၢ်သ့တဂၤမၤတၢ်လၢအဘၣ်ဒီးပှၤဟးဂီၤဖိတဂၤမၤတၢ်လၢ အကမၣ်န့ၣ်မ့ၢ်တၢ်လၢအညီနူၢ်မၤအသးလီၤ.

³ အတၢ်သူၣ်တထံသးတဆးန့ၣ်ကမ့ၢ်တၢ်အိၣ်ဖျါတြၢၤကလာ်ဒၣ်လဲာ်လၢပှၤ သမှံၤတဖၣ်လၢအဘၣ်သဂၢၢ်လိာ်အသးဒီးအီၤလၢကျဲဒီဘိညါအမဲာ် ညါန့ၣ်လီၤ. အဝဲပျဲပှၤကိးဂၤသ့ၣ်ညါအီၤလၢအဝဲမ့ၢ်ပှၤအမၢးဖိတဂၤန့ၣ် လီၤ.

⁴ ပှၤပၢနၤတဂၤမ့ၢ်သးဒိၣ်ဘၣ်နၤဒီး, ဟးထီၣ်လၢနလီၢ်တဂ့ၤ. နမ့ၢ်ပာ်နသးခုၣ်ခုၣ်မုာ်မုာ်ဒီးတၢ်ကမၣ်လၢအဒိၣ်အမုၢ်တဖၣ်ဘၣ် တၢ်ပျၢ်ဖျဲးအီၤကသ့န့ၣ်လီၤ.

⁵ လၢဟီၣ်ခိၣ်အံၤအပူၤ, ယထံၣ်တ့ၢ်တၢ်စံၣ်ညီၣ်တတီတမံၤ, တၢ်စံၣ်ညီၣ်တတီလၢအဘၣ်တၢ်မၤအီၤလၢပှၤပၢတၢ်တဖၣ်လီၤ.

⁶ ပှၤအသူၣ်တထံသးတဆးတဖၣ်ဘၣ်တၢ်ဟ့ၣ်လီၤအီၤလၢတၢ်စိကမီၤ အလီၢ်အလၤတဖၣ်, ဖဲပှၤထူးပှၤတီၤတဖၣ်ဘၣ်တၢ်ကွၢ်ကပာ်ကွံာ်အီၤ န့ၣ်လီၤ.

⁷ ယထံၣ်ဘၣ်ကုၢ်တဖၣ်လၢကသ့ၣ်လိၤ, ဖဲပှၤတူၢ်ဒိၣ်ကီၤဒိၣ်တဖၣ်လဲၤ တၢ်လၢအခီၣ်ဒ်ကုၢ်အသိးအခါန့ၣ်လီၤ.

⁸ နမ့ၢ်ခူၣ်လီၤတၢ်ပူၤတပူၤဒီး, နလီၤတဲာ်နုာ်လၢအပူၤလီၤ. နမ့ၢ်ဘၢၣ်ဖျိတၢ်အဒူၣ်ဒီး, ဂုၢ်သ့ၣ်တဘိကအ့ၣ်နၤလီၤ.

⁹ နမ့ၢ်မၤတၢ်လၢတၢ်ခူၣ်လၢၢ်အလီၢ်ဒီး, လၢၢ်တဖၣ်ကမၤဘၣ်ဒိဘၣ်ထံး နၤလီၤ. နမ့ၢ်ဖျးသ့ၣ်ဖးဒိၣ်ဒီး, နကဘၣ်ဒိ ဘၣ်ထံးဖဲနမၤအီၤအခါလီၤ.

¹⁰ နကွါအကနၣ်မ့ၢ်လူၤဒီးနမ့ၢ်တကျ့အီၤဘၣ်ဒီး, နကဘၣ်မၤတၢ်ဆူၣ်ဒိၣ်တက့ၢ်ဖဲနသူအီၤလီၤ. တၢ်ကတဲာ်ကတီၤဆိမ့ၢ်တၢ်သးဆးဒိၣ်တက့ၢ်လီၤ.

¹¹ နမ့ၢ်ပျဲဂုၢ်သ့ၣ်အ့ၣ်ဆိနၤဒီး, တၢ်သ့ၣ်ညါရဲၢ်န့ၢ်ဂုၢ်သ့ၣ်တဘိ န့ၣ်အဘျုးတအိၣ်လၢနဂီၢ်နီတမံၤဘၣ်.

¹² တၢ်လၢပှၤကူၣ်တၢ်သ့တဂၤစံးဝဲန့ၣ်ဟဲစိာ်န့ၢ်အီၤတၢ်လၤ ကပီၤလီၤ. မ့မ့ၢ်ပှၤအမၢးတဂၤန့ၣ်, အတၢ်ကတိၤဒၣ်ဝဲတဖၣ်မၤဟးဂီၤအီၤလီၤ.

¹³ အဝဲစးထီၣ်ဒီးပှၤအမၢးအကျိာ်ဒီးလဲၤကတၢၢ်ဝဲလၢတၢ်ပျုၢ် အကျိာ်န့ၣ်လီၤ.

¹⁴ ပှၤဟးဂီၤဖိကတိၤတၢ်တဆိတ့ၢ်ဝဲဘၣ်. တၢ်မနုၤကမၤအသးဆူညါ လဲၣ်န့ၣ်, ပှၤတသ့ၣ်ညါနီတဂၤဘၣ်. ဒီးပသံဝံၤတၢ်မနုၤကမၤအသးလဲၣ်န့ၣ်, ပှၤတဲပှၤတသ့နီတဂၤဘၣ်.

¹⁵ ထဲပှၤအမၢးတဂၤဂၤဧိၤကမၤလီၤဘှံးလီၤတီၤအသးလၢတၢ်မၤတုၤ ဒၣ်လဲာ်တဃုထံၣ်ကျဲလၢကက့ၤကဒါက့ၤဆူအဟံၣ်ဘၣ်န့ၣ်လီၤ.

¹⁶ ထံကီၢ်တဘ့ၣ်အိၣ်လၢတၢ်ကိၢ်တၢ်ဂီၤအပူၤဖဲစီၤပၤမ့ၢ်ပှၤသးစၢ် တဂၤဒီးအခိၣ်အနၢ်တဖၣ်အီၣ်တၢ်အီတၢ်တဲာ်နၤန့ၣ်လီၤ.

¹⁷ ဘၣ်ဆၣ်ဒီးထံကီၢ်တဘ့ၣ်အဘူၣ်အတီၢ်ဂ့ၤဝဲဖဲအအိၣ်ဒီးအစီၤပၤ တဂၤလၢအမၤတၢ်စံၣ်ညီၣ်နီၤဖးဒၣ်ဝဲ, ဒီးခိၣ်နၢ်တဖၣ်လၢအအီၣ်တၢ်ဘၣ်ဆၢဘၣ်ကတီၢ်ဒီးပၢၤအသးဒီးတအီ မူၤအသးဘၣ်န့ၣ်လီၤ.

¹⁸ ဖဲပှၤကညီတဂၤကၢၣ်ကဲၣ်ဆိးတုၤဒၣ်လဲာ်ကဘှီဂ့ၤက့ၤအဟံၣ်ခိၣ် ဒုးန့ၣ်, တၢ်ကလီၤစီၤဒီးဟံၣ်ကလီၤပှီၢ်ဝဲလီၤ.

¹⁹ အီၣ်တၢ်အီတၢ်မၤသူၣ်ဖှံသးညီနၤဒီးစပံးထံမၤသးဖှံထီၣ် နၤလီၤ. ဘၣ်ဆၣ်စ့မ့ၢ်တအိၣ်ဘၣ်ဒီးနမၤတၢ်န့ၣ်တန့ၢ်နီတမံၤဘၣ်.

²⁰ ဒုၣ်ဒွဲၣ်စီၤပၤကသွံဒံဒၣ်လဲာ်တဂ့ၤ. ဒီးလၢနလီၢ်မံဒၢးတၢ် လီၢ်တဒၢဒၣ်လဲာ်, ကတိၤဒုၣ်ဒွဲၣ်ပှၤထူးပှၤတီၤတဂ့ၤ. ထိၣ်တဘ့ၣ်ကစိာ်ဘၣ်ဖုးတၢ်ကစီၣ်ဒီးတဲဘၣ်အဝဲသ့ၣ်တၢ်လၢနစံး ကတိၤအီၤန့ၣ်လီၤ.