လံာ်သိၣ်လီၤသီလီၤတၢ် 8 - Sgaw Karen Common Bible

ကီၢ်အဂ့ၤတဘ့ၣ်လၢတၢ်ကဘၣ်မၤန့ၢ်အီၤ

¹ စူၢ်ကယဲၢ်တၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢယဟ့ၣ်လီၤသုတနံၤ အံၤလၢတၢ်သူၣ်တီသးရၤအပူၤဒ်သိးသုကမူ, အါထီၣ်လၢနီၣ်ဂံၢ်ဒီးမၤန့ၢ်ကီၢ်တဘ့ၣ်လၢယွၤအၢၣ်လီၤတ့ၢ်လၢ ကဟ့ၣ်လီၤဝဲဆူသုမိၢ်ပၢ်ဖံဖုလၢပျၢၤတဖၣ်န့ၣ်တက့ၢ်.

² သ့ၣ်နီၣ်ထီၣ်လၢယွၤ, သုကစၢ်ယွၤဆှၢတ့ၢ်သုဒ်လဲၣ်လၢတၢ်လဲၤကျဲ ဖးယံၤခီဖျိပှၢ်မုၢ်ကနၢလၢအပူၤကွံာ်အနံၣ်လွံၢ်ဆံ, ဒုးကွၢ်ဆၢၣ်မဲာ်သုတၢ်မၤကွၢ်အကီအခဲတဖၣ်ဒ်သိးအဝဲကသ့ၣ်ညါ ဘၣ်ဝဲလၢသုပာ်လီၤသုသးလၢသုကမၤတၢ်မနုၤ, ဒီးမ့ၢ်သုကစူၢ်အဝဲအတၢ်မၤလိာ်တဖၣ်ကစီဒါဧါ, အဂ့ၢ်န့ၣ်တက့ၢ်.

³ အဝဲဒုးသူၣ်ဝံၤသၣ်စ့ၤသု, အန့ၣ်ဝံၤဒီးဟ့ၣ်လီၤကိၣ်မၤနၤလၢ သုကအီၣ်အဂီၢ်, တၢ်အီၣ်လၢသုဝဲဒီးသုမိၢ်ပၢ်ဖံဖုလၢပျၢၤတဖၣ်တအီၣ်တ့ၢ်ဘၣ် ဝဲလၢညါနီတစုဘၣ်န့ၣ်လီၤ. အဝဲမၤတ့ၢ်တၢ်အံၤဒ်သိးကသိၣ်သုလၢ, ပှၤကညီတမူဝဲထဲ လၢအအီၣ်ကိၣ်အဃိဧိၤဘၣ်. မ့မ့ၢ်မူဝဲလၢတၢ်အကလုၢ်ကထါလၢ အထီၣ်ဖျဲးလၢယွၤအထးခိၣ်ကိးထံၣ်ဒဲးန့ၣ်လီၤ.

⁴ လၢအနံၣ်လွံၢ်ဆံအတီၢ်ပူၤအံၤသုတၢ်ကူတၢ်သိးတဖၣ်တလီၢ်လံၤဖီ ဃးမ့ၢ်ဂ့ၤသုခီၣ်တဖၣ်တညိးထီၣ်မ့ၢ်ဂ့ၤဘၣ်န့ၣ်လီၤ.

⁵ သ့ၣ်နီၣ်လၢယွၤ, သုကစၢ်ယွၤဘှီက့ၤဒီးစံၣ်ညီၣ်သုဒ်ပၢ်တဂၤ သိၣ်သီကတိၤအဖိတဖၣ်အသိးန့ၣ်တက့ၢ်.

⁶ ဒီးလၢတၢ်န့ၣ်အဃိ, မၤဒ်ယွၤမၤလိာ်တ့ၢ်သုအသိးန့ၣ်တက့ၢ်. အိၣ်မူဒ်အဝဲအတၢ်ဘူၣ်တၢ်ဘါအတၢ်သိၣ်တၢ်သီတဖၣ်အသိးဒီးအိၣ်ဒီး တၢ်ယူးယီၣ်ပာ်ကဲအီၤန့ၣ်တက့ၢ်.

⁷ ယွၤ, သုကစၢ်ယွၤန့ၣ်ဟဲစိာ်နုာ်သုဆူကီၢ်တဘ့ၣ်လၢအပှဲၤဒီး ဟီၣ်ခိၣ်ညၣ်ထ့ၣ်အဂ့ၤ, လၢအမ့ၢ်ကီၢ်တဘ့ၣ်လၢအအိၣ်ဒီးထံကျိတဖၣ်, ထံထီၣ်ပၢၢ်တဖၣ်, ထံကျိဖိလၢဟီၣ်ခိၣ်လာ်ခီ လၢအပုာ်ထီၣ်ယွၤလီၤဆူတၢ်လူၢ်တၢ်တြီၤတဖၣ်အပူၤန့ၣ်လီၤ.

⁸ မ့ၢ်ကီၢ်တဘ့ၣ်လၢအဟ့ၣ်ထီၣ်ဘုကၠူၣ်ဒီးဘုမုယီၤ, စပံးသၣ်တဖၣ်, ချၢၣ်ဒၢတဖၣ်, သလဲသၣ်တဖၣ်, သ့ၣ်စၤယံးအသၣ်တဖၣ်ဒီးကနဲစီန့ၣ် လီၤ.

⁹ ဖဲန့ၣ်သုတသၣ်ဝံၤလီၤဒိနီတစုမ့ၢ်ဂ့ၤ, တၢ်လိၣ်တအိၣ်လၢၤနီ တစုမ့ၢ်ဂ့ၤဘၣ်. လၢအလၢၢ်တဖၣ်အပူၤန့ၣ်အိၣ်ဒီးထးဒီးလၢအတၢ် လူၢ်တဖၣ်န့ၣ်သုခူၣ်ထီၣ်တိၢ်ဘီသ့ဝဲဒၣ်လီၤ.

¹⁰ သုကအိၣ်ဒီးကယဲၢ်တၢ်လၢသုအဲၣ်ဒိးအီၣ်, ဒီးသုကစံးဘျုး ယွၤ, သုကစၢ်ယွၤလၢအဟ့ၣ်လီၤတ့ၢ်သုကီၢ်လၢအပှဲၤဒီးဟီၣ်ခိၣ်ညၣ်ထ့ၣ် အဂ့ၤအဃိန့ၣ်လီၤ.

တၢ်ဟ့ၣ်ပလီၢ်တဖၣ်ထီဒါတၢ်သးပ့ၤနီၣ်ယွၤ

¹¹ မၤလီၤတံၢ်လၢ, သုတသးပ့ၤနီၣ်ဘၣ်ယွၤ, သုကစၢ်ယွၤဘၣ်န့ၣ်တ က့ၢ်. လီၤတိၢ်ကွံာ်လၢတၢ်စူၢ်ကယဲၢ်အဝဲအတၢ်ဘူၣ်တၢ်ဘါအတၢ်သိၣ်တၢ်သီ လၢယဟ့ၣ်လီၤသုလၢမုၢ်မဆါတနံၤအံၤန့ၣ်တဂ့ၤ.

¹² ဖဲသုအိၣ်ဒီးကယဲၢ်တၢ်လၢသုအဲၣ်ဒိးအီၣ်အီၤ, ဒီးသူၣ်ထီၣ်လံ ဟံၣ်ဂ့ၤဃီဘၣ်တဖၣ်လၢသုကအိၣ်ဆိးလၢအပူၤအဂီၢ်,

¹³ ဒီးဖဲသုဂီၤဘုၣ်ဂီၤဖံးဒီးသိတဖၣ်, သုစ့ဒီးသုထူဒီး ကယဲၢ်သုတၢ်စုလီၢ်ခီၣ်ခိၣ်တဖၣ်အါထီၣ်ဂီၢ်ထီၣ်လံန့ၣ်,

¹⁴ ဒ်သိးသုသုတပာ်ထီၣ်ထီသုသးတဂ့ၤ, ဒီးသုတသးပ့ၤနီၣ်ကွံာ် ယွၤသုကစၢ်ယွၤလၢအမၤပူၤမၤဖျဲးသုလၢကီၢ်အဲၤကူပတူးဖဲ သုမ့ၢ်ကုၢ်တဖၣ်တဂ့ၤအဂီၢ်န့ၣ်မၤလီၤတံၢ်သုသးတက့ၢ်.

¹⁵ အဝဲဆှၢခီဖျိသုလၢပှၢ်မုၢ်ကနၢဖးလဲၢ်ဒီးလီၤပျံၤလီၤဖုး အပူၤ, ဖဲဂုၢ်တဖၣ်လၢအအိၣ်ဒီးအစုၣ်အၢဒီးပတ့ၤချဲးတဖၣ်အိၣ်ဝဲန့ၣ် လီၤ. လၢကီၢ်လၢအဃ့ထီဒီးထံတအိၣ်ဘၣ်တကီၢ်အပူၤန့ၣ်, အဝဲဒုးယွၤလီၤထံလၢလၢၢ်အကျၢၤနီၢ်နီၢ်အပူၤလၢသုဂီၢ်န့ၣ် လီၤ.

¹⁶ လၢပှၢ်မုၢ်ကနၢအပူၤန့ၣ်အဝဲဟ့ၣ်သုကိၣ်မၤနၤလၢသုကအီၣ်အီၤအ ဂီၢ်, ဒီးတၢ်အီၣ်လၢသုမိၢ်ပၢ်ဖံဖုလၢပျၢၤတဖၣ်တအီၣ်ဘၣ်တ့ၢ်နီတစု ဘၣ်န့ၣ်လီၤ. အဝဲဆှၢလီၤတၢ်ကီတၢ်ခဲတဖၣ်လၢသုဖီခိၣ်လၢကမၤကွၢ်သုအဂီၢ် ဒ်သိးလၢအကတၢၢ်န့ၣ်, အဝဲဆိၣ်ဂ့ၤသုလၢတၢ်အဂ့ၤတဖၣ်ကသ့ဝဲအဂီၢ်န့ၣ်လီၤ.

¹⁷ လၢတၢ်န့ၣ်အဃိ, သုတဘၣ်ဆိကမိၣ်ထီၣ်နီတစုလၢသုမၤထူးထီၣ် တီၤထီၣ်သုသးလၢသုနီၢ်ကစၢ်ဒၣ်ဝဲ, အတၢ်စိကမီၤဒီးတၢ်ဂံၢ်တၢ်ဘါဒၣ်ဝဲအပူၤန့ၣ်တဂ့ၤ.

¹⁸ သ့ၣ်နီၣ်ထီၣ်က့ၤလၢပှၤလၢအဟ့ၣ်လီၤသုတၢ်စိတၢ်ကမီၤလၢသု ကထူးထီၣ်တီၤထီၣ်န့ၣ်မ့ၢ်ယွၤ, သုကစၢ်ယွၤန့ၣ်တက့ၢ်. အဝဲမၤတၢ်အံၤမ့ၢ်လၢအဝဲအသူၣ်တီသးရၤဒံးဝဲဒီး အတၢ်အၢၣ်လီၤအီလီၤလၢအမၤတ့ၢ်ဝဲဒီးသုမိၢ်ပၢ်ဖံဖုလၢပျၢၤတဖၣ်တုၤ မုၢ်မဆါတနံၤအံၤအဃိန့ၣ်လီၤ.

¹⁹ သးပ့ၤနီၣ်ကွံာ်ယွၤ, သုကစၢ်မ့ၢ်ဂ့ၤ, ဃၣ်ကွံာ်သုသးဆူ ကစၢ်အဂၤတဖၣ်အအိၣ်လၢတၢ်ဘူၣ်ထီၣ်ဘါထီၣ်အီၤဒီးမၤအတၢ်အဂီၢ် မ့ၢ်ဂ့ၤန့ၣ်နီတစုတဂ့ၤ. သုမ့ၢ်မၤဒီး, အန့ၣ်တစု, ယဟ့ၣ်ပလီၢ်သုမုၢ်မဆါတနံၤအံၤလၢသုကဘၣ်တၢ်မၤဟးဂီၤကွံာ်သု သပှၢ်ကတၢၢ်န့ၣ်လီၤ.

²⁰ သုမ့ၢ်တစူၢ်ယွၤဘၣ်ဒီး, အန့ၣ်တစု, သုကဘၣ်တၢ်မၤဟးဂီၤကွံာ် သုဒ်သိးဒၣ်ပှၤကလုာ်တဖၣ်လၢအဝဲကမၤဟးဂီၤကွံာ်ဝဲ, ဖဲသုလဲၤ ဒုးတၢ်အခါန့ၣ်လီၤ.