လံာ်သိၣ်လီၤသီလီၤတၢ် 6 - Sgaw Karen Common Bible

တၢ်မၤလိာ်ဖးဒိၣ်

¹ တၢ်တဖၣ်အံၤမ့ၢ်ကယဲၢ်တၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢယွၤ, သုကစၢ်ယွၤမၤလိာ်ယၤဒ်သိးယကသိၣ်လိသီလိန့ၣ်လီၤ. စူၢ်အီၤလၢကီၢ်တဘ့ၣ်လၢသုကလဲၤနုာ်လီၤဒီး မၤန့ၢ်အီၤအပူၤန့ၣ်တက့ၢ်.

² ဖဲသုအိၣ်မူဒံးအဖၢမုၢ်န့ၣ်သုဝဲဒီးသုစၢၤသုသွဲၣ်တဖၣ် ကဘၣ်ယူးယီၣ်ယွၤ, သုကစၢ်ယွၤ, ဒီးစူၢ်ကယဲၢ်အဝဲအတၢ်ဘူၣ်တၢ်ဘါအတၢ်သိၣ်တၢ်သီတဖၣ် လၢယဟ့ၣ်လီၤသုဒ်သိးသုကအိၣ်ဆိးဒီးမူဘၣ်လၢကီၢ်န့ၣ်အပူၤ ယံာ်ယံာ်ထၢထၢအဂီၢ်န့ၣ်လီၤ.

³ ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, ဒိကနၣ်တၢ်တဖၣ်န့ၣ်, ဒီးစူၢ်အီၤတက့ၢ်. အန့ၣ်တစု, တၢ်ခဲလၢာ်ကလဲၤအသးဂ့ၤဂ့ၤဘၣ် ဘၣ်လၢသုဂီၢ်, ဒီးသုကကဲထီၣ်ပှၤတကလုာ်ဖးဒိၣ်ဒီးအိၣ်ဆိးလၢကီၢ်တဘ့ၣ်အပူၤ လၢအထူးအတီၤဒီးပှဲၤဝဲဒီးဟီၣ်ခိၣ်ညၣ်ထ့ၣ်အဂ့ၤ, ဒ်ယွၤ, ပမိၢ်ပၢ်ဖံဖုလၢပျၢၤတဖၣ်အကစၢ်ယွၤအၢၣ်လီၤတ့ၢ်ဝဲ အသိးန့ၣ်လီၤ.

⁴ ကီၢ်အံၣ်စရ့လးဧၢ, သ့ၣ်နီၣ်ထီၣ်တၢ်အံၤတက့ၢ်. ယွၤ, ဒီးထဲယွၤတဂၤဧိၤမ့ၢ်ပကစၢ်ယွၤန့ၣ်လီၤ.

⁵ အဲၣ်ယွၤ, နကစၢ်ယွၤလၢနသးဒီဖျၢၣ်ညါဒီးနတၢ်ကူၣ်တၢ်ဆးခဲလၢာ် ဒီးနဂံၢ်နဘါခဲလၢာ်တက့ၢ်.

⁶ သးပ့ၤနီၣ်ကွံာ်တၢ်မၤလိာ်တဖၣ်အံၤလၢယဟ့ၣ်လီၤသုလၢမုၢ်မဆါ တနံၤအံၤနီတစုတဂ့ၤ.

⁷ သိၣ်လိသီလိသုဖိသုလံၤတဖၣ်န့ၣ်တက့ၢ်. ဖဲသုအိၣ်လၢဟံၣ် ဒီးဖဲသုအိၣ်လၢတၢ်လီၢ်အယံၤ, ဖဲသုအိၣ်ဘှံးဒီးဖဲသုမၤ တၢ်အခါန့ၣ်, ယၢၤထီၣ်ကဒါက့ၤအီၤတက့ၢ်.

⁸ စၢထီၣ်အီၤလၢသုစုဒုၣ်တဖၣ်အလိၤဒီးဖျီၣ်ထီၣ်အီၤလၢသုခိၣ် တိသၣ်တဖၣ်အလိၤဒ်တၢ်မၤသ့ၣ်နီၣ်ထီၣ်တၢ်တမံၤအသိးတက့ၢ်.

⁹ ကွဲးလီၤအီၤလၢသုဟံၣ်တဖၣ်အပဲတြီဖးဒိၣ်အထူၣ်တဖၣ်အလိၤဒီး လၢတြဲၤတဖၣ်အလိၤန့ၣ်တက့ၢ်.

တၢ်ဟ့ၣ်ပလီၢ်ထီဒါတၢ်တစူၢ်တၢ်

¹⁰ ဒ်ယွၤ, သုကစၢ်ယွၤအၢၣ်လီၤတ့ၢ်သုပၢ်ဖးဒိၣ်လၢပျၢၤတဖၣ်လၢ အမ့ၢ်စီၤအၤဘြၤဟၣ်, စီၤအံၤစဲးဒီးစီၤယၤကိာ်အသိး, အဝဲကဟ့ၣ်လီၤသုလၢကီၢ်တဘ့ၣ်လၢအအိၣ်ဒီးဝ့ၢ်ဖးဒိၣ်လၢအထူး အတီၤတဖၣ်, လၢသုတသူၣ်ထီၣ်ဘှီထီၣ်တ့ၢ်အီၤဘၣ်န့ၣ်လီၤ.

¹¹ ဟံၣ်တဖၣ်ကပှဲၤဝဲဒီးတၢ်အပီးအလီအဂ့ၤတဖၣ်လၢသုတဒၢနုာ်တ့ၢ် အီၤဘၣ်, ဒီးထံပူၤတဖၣ်လၢသုတခူၣ်လီၤဘၣ်အီၤန့ၣ်ကအိၣ်ဝဲ, ဒီးစပံးလီၢ်တဖၣ်, သ့ၣ်စၤယံးအတၤသၣ်လီၢ်တဖၣ်, လၢသုတသူၣ်လီၤဘၣ်အီၤန့ၣ်လီၤ. ဖဲယွၤဆှၢသုဆူကီၢ်အံၤအ ပူၤ, ဒီးသုအိၣ်ဒီးကယဲၢ်တၢ်လၢသုအဲၣ်ဒိးအီၣ်အီၤန့ၣ်,

¹² ပာ်သူၣ်ပာ်သးသပှၢ်ပှၢ်လၢသုတသးပ့ၤနီၣ်ဘၣ်ယွၤလၢအအုၣ်က့ၤခီၣ် က့ၤသုလၢကီၢ်အဲၤကူပတူးအပူၤ, ဖဲသုမ့ၢ်တ့ၢ်ကုၢ်တဖၣ်ဘၣ်န့ၣ်တဂ့ၤ.

¹³ ယူးယီၣ်ယွၤ, သုကစၢ်ယွၤ, ဘူၣ်ထီၣ်ဘါထီၣ်ထဲအဝဲဒၣ်ဧိၤ, ဒီးမၤသုတၢ်အၢၣ်လီၤတဖၣ်ထဲလၢအဝဲတဂၤဧိၤအမံၤအပူၤန့ၣ်တ က့ၢ်.

¹⁴ ဘူၣ်ထီၣ်ဘါထီၣ်ကစၢ်အဂၤတဖၣ်, လၢအမ့ၢ်ပှၤဂီၢ်မုၢ်အိၣ်လၢသု ဃၢၤတဖၣ်အကစၢ်တဖၣ်န့ၣ်နီတဂၤတဂ့ၤ.

¹⁵ သုမ့ၢ်ဘူၣ်ထီၣ်ဘါထီၣ်ကစၢ်အဂၤတဖၣ်ဒီး, ယွၤအတၢ်သးဒိၣ်ကဟဲထီ ဒါသုဒ်မ့ၣ်အူအသိး, ဒီးကမၤဟးဂီၤကွံာ်သုလၢာ်လၢာ်ဆ့ဆ့မ့ၢ်လၢယွၤ, သုကစၢ်ယွၤလၢအအိၣ်ဒီးသုအံၤမ့ၢ်ကစၢ်တဂၤလၢအသးက့ၣ်တၢ်အဃိ န့ၣ်လီၤ.

¹⁶ သုတလ့ပစီယွၤ, သုကစၢ်ယွၤဒ်သုမၤတ့ၢ်အီၤလၢဝ့ၢ်မးစၤအပူၤ အသိးန့ၣ်တဂ့ၤ.

¹⁷ စူၢ်ကယဲၢ်တၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢအဝဲဟ့ၣ်လီၤတ့ၢ် သုန့ၣ်သပှၢ်ကတၢၢ်တက့ၢ်.

¹⁸ တၢ်လၢယွၤစံးဝဲလၢအမ့ၢ်အတီဒီးဂ့ၤန့ၣ်မၤအီၤတက့ၢ်. ဒီးတၢ်ခဲလၢာ်ကလဲၤအသးဂ့ၤဂ့ၤဘၣ်ဘၣ်လၢသုဂီၢ်လီၤ. ကီၢ်လၢအပှဲၤဒီးဟီၣ်ခိၣ်ညၣ်ထ့ၣ်အဂ့ၤလၢယွၤအၢၣ်လီၤတ့ၢ်သု မိၢ်ပၢ်ဖံဖုလၢပျၢၤတဖၣ်န့ၣ်, သုလဲၤနုာ်မၤန့ၢ်ကသ့ဝဲ,

¹⁹ ဒီးသုကနီၣ်ထီၣ်ကွံာ်သုဒုၣ်သုဒါတဖၣ်ဒ်အဝဲအၢၣ်လီၤတ့ၢ်ဝဲ အသိးန့ၣ်လီၤ.

²⁰ လၢမုၢ်နံၤတဖၣ်လၢကဟဲအပူၤန့ၣ်, သုဖိတဖၣ်ကသံကွၢ်သု, ဘၣ်မနုၤလၢယွၤ, ပကစၢ်ယွၤမၤလိာ်တ့ၢ်ပှၤလၢပဘၣ်စူၢ်ကယဲၢ်အဝဲ အတၢ်ဘူၣ်တၢ်ဘါအတၢ်သိၣ်တၢ်သီတဖၣ်အံၤန့ၣ်လဲၣ်.

²¹ အန့ၣ်ဒီး, တဲဘၣ်အဝဲသ့ၣ်, ပမ့ၢ်တ့ၢ်ကီၢ်အဲၤကူပတူးအစီၤပၤ အကုၢ်တဖၣ်ဒီးယွၤအုၣ်က့ၤခီၣ်က့ၤပှၤ, ခီဖျိအဝဲအစိကမီၤဖးဒိၣ်န့ၣ်လီၤ.

²² လၢပမဲာ်ချံဒၣ်ဝဲန့ၣ်ပထံၣ်ဘၣ်အဝဲမၤတၢ်လီၤလးတဖၣ်ဒီးမၤ ပျံၤမၤဖုးပှၤအဲၤကူပတူးဖိတဖၣ်, ဒီးအဝဲသ့ၣ်အစီၤပၤဒီးကယဲၢ်အပဒိၣ်ပပှၢ်တဖၣ်န့ၣ်လီၤ.

²³ အဝဲမၤထူၣ်ဖျဲးပှၤလၢကီၢ်အဲၤကူပတူးဒ်သိးကဟဲစိာ်ပှၤဖဲ အံၤဒီးဟ့ၣ်လီၤပှၤလၢကီၢ်အံၤဒ်အဝဲအၢၣ်လီၤတ့ၢ်ပမိၢ်ပၢ်ဖံ ဖုလၢပျၢၤတဖၣ်, လၢအကမၤဝဲအသိးန့ၣ်လီၤ.

²⁴ အန့ၣ်ဝံၤဒီး, ယွၤပကစၢ်ယွၤ, မၤလိာ်ပှၤလၢပကစူၢ်ကယဲၢ်အဝဲအတၢ် ဘူၣ်တၢ်ဘါအတၢ်သိၣ်တၢ်သီတဖၣ်အံၤဒီးအိၣ်ဒီးတၢ်ယူးယီၣ်အီၤ န့ၣ်လီၤ. ပမ့ၢ်မၤအီၤဒီးအဝဲကအံးထွဲကွၢ်ထွဲပပှၤကလုာ်ထီဘိဒီးဒုး ဘီၣ်ထီၣ်ညီထီၣ်အီၤန့ၣ်လီၤ.

²⁵ ပမ့ၢ်စူၢ်တၢ်ကိးမံၤဒဲးလၢယွၤမၤလိာ်တ့ၢ်ပှၤတဖၣ်လၢတၢ်သူၣ် တီသးရၤအပူၤန့ၣ်ဒီးအဝဲကဘၣ်သူၣ်ဘၣ်သးပှၤန့ၣ်လီၤ.