လံာ်သိၣ်လီၤသီလီၤတၢ် 4 - Sgaw Karen Common Bible

စီၤမိၤၡ့မၢန့ၢ်ဆီၣ်ခံပှၤအံၣ်စရ့လးဖိ လၢကစူၢ်တၢ်အဂီၢ်

¹ အန့ၣ်ဝံၤဒီးစီၤမိၤၡ့စံးဘၣ်ပှၤဂီၢ်မုၢ်, “စူၢ်ကယဲၢ်တၢ်ဘူၣ်တၢ်ဘါအတၢ်သိၣ်တၢ်သီခဲလၢာ်လၢယသိၣ်လိတ့ၢ် သုန့ၣ်တက့ၢ်. ဒီးသုကမူဒီးမၤန့ၢ်ကီၢ်လၢယွၤ, သုမိၢ်ပၢ်ဖံဖုလၢပျၢၤတဖၣ်အကစၢ်ယွၤဟ့ၣ်လီၤသုန့ၣ်လီၤ.

² မၤအါထီၣ်တၢ်လၢယမၤလိာ်တ့ၢ်သုနီတမံၤတဂ့ၤ. ဒီးထုးကွံာ်တၢ်နီတမံၤတဂ့ၤ. စူၢ်ယွၤ, သုကစၢ်ယွၤအတၢ်မၤ လိာ်တဖၣ်လၢယဟ့ၣ်လီၤသုန့ၣ်တက့ၢ်.

³ သုနီၢ်ကစၢ်ဒၣ်သုဝဲထံၣ်ဘၣ်တ့ၢ်တၢ်တဖၣ်လၢယွၤမၤတ့ၢ်ဝဲလၢ ကစၢၢ်ပဧိၢ်အဒီခိၣ်န့ၣ်လီၤ. ဖဲန့ၣ်အဝဲမၤဟးဂီၤကွံာ်ပှၤကိးဂၤဒဲးလၢအဘူၣ်ထီၣ်ဘါထီၣ် ဘဧၤလး,

⁴ မ့မ့ၢ်သုဝဲတဖၣ်လၢအသူၣ်တီသးရၤဒီးယွၤ, သုကစၢ်ယွၤန့ၣ်မူဒံးဝဲတုၤမဆါတနံၤအံၤန့ၣ်လီၤ.

⁵ ယသိၣ်လိတ့ၢ်သုလၢကယဲၢ်တၢ်ဘူၣ်တၢ်ဘါအတၢ်သိၣ်တၢ်သီ ခဲလၢာ်, ဒ်ယွၤ, ပကစၢ်ယွၤတဲဘၣ်ယၤလၢယကဘၣ်မၤအီၤအသိးန့ၣ် လီၤ. စူၢ်အီၤလၢကီၢ်တဘ့ၣ်လၢသုကလဲၤနုာ်ဒုးဒီးမၤန့ၢ်အီၤအပူၤ န့ၣ်တက့ၢ်.

⁶ စူၢ်အီၤလၢတၢ်သူၣ်တီသးရၤအပူၤ, ဒီးတၢ်အံၤကဒုးနဲၣ်ပှၤ ကလုာ်ဂၤအပှၤဂီၢ်မုၢ်တဖၣ်လၢသုကူၣ်တၢ်သ့ဆံးအါလဲၣ်န့ၣ်လီၤ. ဖဲအဝဲသ့ၣ်နၢ်ဟူဘၣ်ကယဲၢ်တၢ်ဘူၣ်တၢ်ဘါအတၢ်သိၣ်တၢ်သီ တဖၣ်အံၤအဂ့ၢ်န့ၣ်အဝဲသ့ၣ်ကစံးဝဲ, (တၢ်ကူၣ်သ့ဒီးတၢ်သ့ၣ်ညါ နၢ်ပၢၢ်လၢအအိၣ်ဒီးပှၤကလုာ်ဖးဒိၣ်တကလုာ်အံၤ, မ့ၢ်တၢ်လၢအဒိၣ်နီၢ်မးလဲၣ်.)

⁷ ပှၤကလုာ်ဂၤကဒိၣ်ထဲလဲၣ်ထဲလဲၣ်န့ၣ်, တအိၣ်ဘၣ်ဒီးကစၢ်တဂၤလၢ အအိၣ်ဘူးမးဒီးအဝဲသ့ၣ်, ဖဲအဝဲသ့ၣ်လိၣ်ဘၣ်အီၤအခါဒ်ယွၤ, ပကစၢ်ယွၤအိၣ်ဘူးဒီးပှၤအသိးန့ၣ်ဘၣ်. ဖဲပကိးထီၣ်လၢတၢ်မၤစၢၤအဂီၢ်တဘျီလၢ်လၢ်န့ၣ်, အဝဲစံးဆၢပှၤန့ၣ်လီၤ.

⁸ ပှၤကလုာ်ဂၤကဒိၣ်ထဲလဲၣ်ထဲလဲၣ်န့ၣ်, တအိၣ်ဘၣ်ဒီးတၢ်ဘူၣ်တၢ်ဘါ အတၢ်သိၣ်တၢ်သီတဖၣ်လၢအတီဝဲဘၣ်ဝဲဒ်တၢ်သိၣ်တၢ်သီ တဖၣ်လၢယသိၣ်လိတ့ၢ်သုတနံၤအံၤန့ၣ်ဘၣ်.

⁹ အိၣ်ဒီးတၢ်ပလီၢ်သူၣ်ပလီၢ်သးတက့ၢ်. လၢသးသမူဒီတစိၤညါ န့ၣ်, တၢ်လၢသုထံၣ်ဘၣ်အီၤလၢသုမဲာ်ချံဒၣ်သုအံၤမၤလီၤတံၢ်လၢသု တသးပ့ၤနီၣ်ကွံာ်အီၤဘၣ်န့ၣ်တက့ၢ်. တဲဘၣ်သုဖိသုလံၤတဖၣ်,

¹⁰ ဘၣ်ဃးဒီးမုၢ်တနံၤလၢသုဆၢထၢၣ်လၢယွၤကစၢ်ယွၤအမဲာ်ညါလၢ ကစၢၢ်စံၤနါအဂ့ၢ်, ဖဲအဝဲဒၣ်စံးဘၣ်ယၤ, ကိးဖှိၣ်ပှၤဂီၢ်မုၢ်တက့ၢ်. ယအဲၣ်ဒိးလၢအဝဲသ့ၣ်ကနၢ်ဟူဘၣ်တၢ်လၢယကစံးယဲ, ဒ်သိးအဝဲသ့ၣ်ကမၤလိစူၢ်ယၤလၢအသးသမူဒီတစိၤညါ, ဒီးဒ်သိးအဝဲသ့ၣ်ကသိၣ်လိတၢ်တမံၤဃီဒ်န့ၣ်အသိးဆူအဖိအလံၤ တဖၣ်န့ၣ်လီၤ.

¹¹ တဲဘၣ်သုဖိတဖၣ်လၢသုလဲၤဒီးဆၢထၢၣ်လၢကစၢၢ်အခီၣ်ထံးဒ်လဲၣ်, ဖဲကစၢၢ်န့ၣ်ဘၣ်တၢ်ကးဘၢအီၤလၢမ့ၣ်အူလုၣ်အတၢ်အၢၣ်ဖးတီၣ်တဖၣ် ဒီးမ့ၣ်အူကပျီၤထီၣ်ဆူမူကပိာ်လိၤန့ၣ်တက့ၢ်.

¹² တဲဘၣ်အဝဲသ့ၣ်လၢယွၤကတိၤတ့ၢ်တၢ်ဒီးသုလၢမ့ၣ်အူအကျါဒ်လဲၣ်, သုနၢ်ဟူဘၣ်အဝဲကတိၤတၢ်ဒ်လဲၣ်, ဘၣ်ဆၣ်ဒီးသုတထံၣ်ဘၣ်အက့ၢ် အဂီၤနီတမံၤဘၣ်အဂ့ၢ်န့ၣ်တက့ၢ်.

¹³ အဝဲတဲဘၣ်သုတၢ်လၢသုဘၣ်မၤအီၤဒ်သိးသုကတိၢ်န့ၢ်ဖံးဃာ်တၢ် အၢၣ်လီၤအီလီၤလၢအဝဲမၤတ့ၢ်ဝဲဒီးသုလၢအမ့ၢ်သုကဘၣ်စူၢ်တၢ် မၤလိာ်အထံၣ်တဆံ, လၢအဝဲကွဲးလီၤတ့ၢ်ဝဲလၢလၢၢ်ဘ့ၣ်ဘၣ်ခံဘ့ၣ်အလိၤန့ၣ်လီၤ.

¹⁴ ယွၤတဲဘၣ်ယၤလၢယကဘၣ်သိၣ်လိသုကယဲၢ်တၢ်ဘူၣ်တၢ်ဘါတၢ်သိၣ်တၢ် သီခဲလၢာ်လၢသုကဘၣ်စူၢ်အီၤ, လၢကီၢ်တဘ့ၣ်လၢသုကလဲၤနုာ်ဒုးအီၤဒီးမၤန့ၢ်အီၤအပူၤန့ၣ်လီၤ.

တၢ်ဟ့ၣ်ပလီၢ်ထီဒါတၢ်ဘါတၢ်ဂီၤတၢ်ဖီၣ်

¹⁵ ဖဲယွၤကတိၤတ့ၢ်တၢ်ဒီးသုလၢမ့ၣ်အူအကျါလၢကစၢၢ်စံၤနါအလိၤ န့ၣ်, သုတထံၣ်အဝဲအက့ၢ်အဂီၤနီတမံၤဘၣ်. လၢသုတၢ်ဂ့ၤဒၣ်သုဝဲအဂီၢ်န့ၣ်, အန့ၣ်တစုမၤလီၤတံၢ်လၢ,

¹⁶ သုတမၤဘၣ်တၢ်ဒဲးဘးခီဖျိတၢ်မၤထီၣ်တၢ်ဂီၤတမံၤလၢသုကစၢ် ဒၣ်သုဝဲအဂီၢ်, တၢ်ဂီၤလၢအအိၣ်ဒီးက့ၢ်ဂီၤတခါခါလၢအမ့ၢ်, ပိာ်ခွါမ့ၢ်ဂ့ၤ, ပိာ်မုၣ်မ့ၢ်ဂ့ၤ,

¹⁷ ဆၣ်ဖိကီၢ်ဖိမ့ၢ်ဂ့ၤ, ထိၣ်မ့ၢ်ဂ့ၤ,

¹⁸ တၢ်အစွါအစွဲမ့ၢ်ဂ့ၤ, ညၣ်မ့ၢ်ဂ့ၤ, အဂီၤန့ၣ်ဘၣ်တက့ၢ်.

¹⁹ ပျဲသုဒိးဘၣ်တၢ်လ့ပစီသုလၢသုကဘူၣ်ထီၣ်ဘါထီၣ်ဒီးမၤတၢ် တဖၣ်လၢသုထံၣ်ဘၣ်အီၤလၢမူကပိာ်လိၤလၢအမ့ၢ်, မုၢ်, လါဒီးဆၣ်တဖၣ်, အတၢ်န့ၣ်တဂ့ၤ. ယွၤဟ့ၣ်လီၤတၢ်တဖၣ်အံၤ လၢကယဲၢ်ပှၤဂီၢ်မုၢ်အဂၤတဖၣ်အဂီၢ်ဒ်သိးကဘူၣ်ထီၣ်ဘါထီၣ်ဝဲန့ၣ်လီၤ.

²⁰ မ့မ့ၢ်, သုမ့ၢ်ပှၤဂီၢ်မုၢ်လၢအဝဲအုၣ်က့ၤခီၣ်က့ၤဝဲလၢကီၢ် အဲၤကူပတူးတခီ, လၢဖၣ်ကပူၤလၢအကဲၤကပျီၤအပူၤန့ၣ်လီၤ. အဝဲထုးထီၣ်ကွံာ်သုဒ်သိးကဒုးကဲထီၣ်သုလၢအပှၤဂီၢ်မုၢ်ဒ်သု မ့ၢ်တၢ်တနံၤအံၤအသိးန့ၣ်လီၤ.

²¹ လၢသုဃိန့ၣ်, ယွၤသုကစၢ်ယွၤသးဒိၣ်ဘၣ်ယၤ, ဒီးဘိးဘၣ်သ့ၣ်ညါထီၣ်ဝဲသမှံၤသပှၢ်လၢယတဘၣ်လဲၤခီဂာ်ထံကျိ ယၢ်ဒ့ၣ်ဒ်သိးယကလဲၤနုာ်ဆူကီၢ်တဘ့ၣ်လၢအအိၣ်ဒီးဟီၣ်ခိၣ်ညၣ် ထ့ၣ်အဂ့ၤ, လၢအဝဲဟ့ၣ်လီၤသုအပူၤဘၣ်န့ၣ်လီၤ.

²² ယကသံလၢကီၢ်အံၤအပူၤဒီးတခီဂာ်ဘၣ်ထံကျိနီတစုဘၣ်. မ့မ့ၢ်, သုဝဲသ့ၣ်အံၤဘူးတ့ၢ်မးလၢသုကခီဂာ်ဘၣ်အီၤဒီးမၤ န့ၢ်ကီၢ်လၢဟီၣ်ခိၣ်ညၣ်ထ့ၣ်ဂ့ၤဝဲန့ၣ်လီၤ.

²³ မၤလီၤတံၢ်လၢသုတသးပ့ၤနီၣ်ဘၣ်တၢ်အၢၣ်လီၤအီလီၤလၢယွၤ, သုကစၢ်ယွၤမၤတ့ၢ်ဒီးသုဘၣ်န့ၣ်တက့ၢ်. စူၢ်အဝဲအကလုၢ်, လၢသုတမၤဘၣ်တၢ်ဂီၤတၢ်ဖီၣ်နီတမံၤမံၤလၢသုဂီၢ်ဒၣ်သုဝဲဘၣ်,

²⁴ မ့ၢ်လၢ, ယွၤ, သုကစၢ်ယွၤန့ၣ်မၤအသးဒ်မ့ၣ်အူလၢအကဲၤကပျီၤ အသိးအဃိန့ၣ်လီၤ. အဝဲမ့ၢ်ကစၢ်ယွၤတဂၤလၢအသးက့ၣ်တၢ်န့ၣ်လီၤ.

²⁵ ဖဲသုအိၣ်လၢကီၢ်န့ၣ်အပူၤဖးယံာ်ဒီးသုအိၣ်ဒီးသုဖိတဖၣ် ဒီးသုလံၤတဖၣ်လံဒၣ်လဲာ်န့ၣ်, မၤတၢ်ဒဲးဘၣ်ခီဖျိတၢ်မၤတၢ်ဂီၤတၢ်ဖီၣ်တခါလၢအိၣ်ဒီး အက့ၢ်အဂီၤတမံၤလၢသုဂီၢ်နီတစုတဂ့ၤ. အအံၤမ့ၢ်တၢ်အၢတၢ်သီလၢယွၤအမဲာ်ညါဒီးတၢ်န့ၣ်ကမၤဒိၣ်ထီၣ် အဝဲအသးန့ၣ်လီၤ.

²⁶ ယကိးထီၣ်မူခိၣ်ဒီးဟီၣ်ခိၣ်ဒ်တၢ်အုၣ်အသးတဖၣ်လၢအထီဒါသု တနံၤအံၤလၢသုမ့ၢ်တစူၢ်ဘၣ်ယၤဘၣ်ဒီး, တယံာ်ဘၣ်န့ၣ်သုကဟါမၢ်ကွံာ်လၢကီၢ်တဘ့ၣ်အံၤအပူၤန့ၣ်လီၤ. သုတအိၣ်ဆိးဘၣ်ယံာ်ယံာ်ထၢထၢလၢကီၢ်တဘ့ၣ်အံၤလၢအအိၣ်လၢထံ ကျိယၢ်ဒ့ၣ်အဘးခီအပူၤလၢ, ဘူးတ့ၢ်မးလၢသုကမၤန့ၢ်အီၤလံန့ၣ်ဘၣ်. သုကဘၣ်တၢ်မၤဟးဂီၤ သုလၢာ်လၢာ်ဆ့ဆ့န့ၣ်လီၤ.

²⁷ ယွၤကမၤလီၤပြံလီၤပြါသုဆူပှၤကလုာ်ဂၤတဖၣ်အကျါ, ဖဲထဲဒၣ်ပှၤစှၤဂၤဧိၤလၢသုကျါကအိၣ်မူလီၤတဲာ်တ့ၢ်ဝဲဒၣ် န့ၣ်လီၤ.

²⁸ ဖဲန့ၣ်သုကမၤကစၢ်တဖၣ်, လၢအဘၣ်တၢ်တ့အီၤလၢပှၤကညီအစုတဖၣ်အတၢ်, ကစၢ်တဖၣ်လၢအဘၣ်တၢ်မၤအီၤလၢသ့ၣ်ဒီးလၢၢ်, ကစၢ်တဖၣ်လၢအထံၣ်တၢ် မ့ၢ်ဂ့ၤ, နၢ်ဟူတၢ်မ့ၢ်ဂ့ၤ, အီၣ်တၢ်အီတၢ်မ့ၢ်ဂ့ၤတသ့ဘၣ်. အီၣ်တၢ်မ့ၢ်ဂ့ၤ, နၢတၢ်မ့ၢ်ဂ့ၤ, တသ့ဘၣ်န့ၣ်လီၤ.

²⁹ ဖဲန့ၣ်သုကဃုယွၤ, သုကစၢ်ယွၤ, ဒီးသုမ့ၢ်ဃုအီၤလၢသုသးဒီဖျၢၣ်န့ၣ်သုကထံၣ်န့ၢ်အီၤလီၤ.

³⁰ ဖဲသုအိၣ်လၢတၢ်ကီတၢ်ခဲအပူၤ, ဒီးကယဲၢ်တၢ်ကိးမံၤအံၤဟဲ ဘၣ်သုဒီး, အန့ၣ်တစုလၢခံကတၢၢ်သုကဃၣ်ကဒါက့ၤသုသးဆူယွၤ အအိၣ်ဒီးစူၢ်အီၤန့ၣ်လီၤ.

³¹ အဝဲမ့ၢ်ကစၢ်ယွၤတဂၤလၢအသူၣ်ကညီၤသးကညီၤတၢ်လီၤ. အဝဲတပာ်လီၤတဲာ်ကွံာ်သုမ့ၢ်ဂ့ၤ, မၤဟးဂီၤသုမ့ၢ်ဂ့ၤဘၣ်. ဒီးအဝဲတသးပ့ၤနီၣ်တၢ်အၢၣ်လီၤအီလီၤလၢအနီၢ်ကစၢ်ဒၣ်ဝဲ မၤတ့ၢ်ဒီးသုမိၢ်ပၢ်ဖံဖုလၢပျၢၤတဖၣ်န့ၣ်ဘၣ်.

³² ဃုကွၢ်တၢ်မၤအသးလၢအလဲၤပူၤကွံာ်, တချုးဒံးဘၣ်လၢသုအိၣ်ဖျဲၣ်ထီၣ်ဒံးအကတီၢ်ဘၣ်, ဃုကွၢ်ကဒါက့ၤအီၤတုၤဆူတၢ်ဆၢကတီၢ်, ဖဲကစၢ်ယွၤတ့လီၤပှၤကညီလၢဟီၣ်ခိၣ်ချၢန့ၣ်တက့ၢ်. ဃုကွၢ်ဟီၣ်ခိၣ်ဒီဘ့ၣ်ညါတက့ၢ်. မ့ၢ်တၢ်အဒိၣ်အမုၢ်ထဲသိးအံၤတမံၤမံၤမၤတ့ၢ်အသးလၢညါတဘျီ ဘျီဧါ. မ့ၢ်ပှၤတဂၤဂၤနၢ်ဟူဘၣ်တ့ၢ်တၢ်ဒ်သိးအံၤတမံၤမံၤန့ၣ်တစုစု ဧါ.

³³ ပှၤဂီၢ်မုၢ်လၢအနၢ်ဟူဘၣ်ယွၤကတိၤတၢ်ဒီးအီၤလၢမ့ၣ်အူအပူၤ ဒီးအိၣ်မူဘၣ်ဒံးဝဲဒ်သုအသိးန့ၣ်မ့ၢ်အအိၣ်ဧါ.

³⁴ ဒ်ယွၤ, သုကစၢ်ယွၤမၤတ့ၢ်တၢ်လၢသုဂီၢ်လၢကီၢ်အဲၤကူပတူး အပူၤအသိးန့ၣ်, မ့ၢ်ကစၢ်လၢအလဲၤဒီးထုးထီၣ်ကွံာ်ပှၤဂီၢ်မုၢ်တဖုလၢပှၤအဂၤ တကလုာ်အကျါဒီးဒုးကဲထီၣ်အီၤလၢအတၢ်ဒၣ်ဝဲဘူၣ်န့ၣ်ကအိၣ်တဂၤ ဂၤဧါ. သုထံၣ်ဘၣ်အဝဲသူတ့ၢ်အတၢ်စိတၢ်ကမီၤဒီးတၢ်ဂံၢ်တၢ်ဘါဖးဒိၣ် လၢသုမဲာ်ချံဒၣ်သုဝဲလီၤ. အဝဲဒုးလီၤဘၣ်တၢ်ဆါသံသတြိာ်ဒီးတၢ်ဒုးတၢ်ယၤ, မၤတ့ၢ်တၢ်လီၤလးတဖၣ်ဒီးတၢ်လီၤကမၢကမၣ်တဖၣ်ဒီးဒုးအိၣ်ထီၣ် တၢ်လီၤပျံၤလီၤဖုးတဖၣ်လၢကမၤအသးန့ၣ်လီၤ.

³⁵ ယွၤဒုးနဲၣ်တ့ၢ်တၢ်အံၤမ့ၢ်ဒ်သိးကအုၣ်အသးလၢသုမဲာ်ညါလၢထဲ အဝဲတဂၤဧိၤမ့ၢ်ကစၢ်ယွၤဒီးကစၢ်အဂၤတအိၣ်ဘၣ်အဂ့ၢ်န့ၣ်လီၤ.

³⁶ အဝဲပျဲသုနၢ်ဟူဘၣ်အကလုၢ်လၢမူခိၣ်ဒ်သိးအဝဲသိၣ်သီနဲၣ်ယုၤ သုကသ့ဝဲန့ၣ်လီၤ. ဒီးဖဲအံၤလၢဟီၣ်ခိၣ်ချၢအံၤန့ၣ်အဝဲပျဲသုထံၣ်ဘၣ်အမ့ၣ်အူ စီဆှံ, ဒီးအဝဲကတိၤတၢ်ဒီးသုလၢတၢ်န့ၣ်အပူၤလီၤ.

³⁷ မ့ၢ်လၢအအဲၣ်ဘၣ်သုမိၢ်ပၢ်ဖံဖုလၢပျၢၤတဖၣ်အဃိ, အဝဲဃုထၢသုဒီးခီဖျိလၢအဝဲအစိကမီၤဖးဒိၣ်န့ၣ်အဝဲအနီၢ် ကစၢ်ဒၣ်ဝဲထုးထီၣ်သုလၢကီၢ်အဲၤကူပတူးအပူၤန့ၣ်လီၤ.

³⁸ တုၤသုလဲၤထီၣ်ဒုးတၢ်န့ၣ်အဝဲနီၣ်ထီၣ်ကွံာ်ပှၤကလုာ်တဖၣ်လၢ အဒိၣ်န့ၢ်သု, ဒီးအဂံၢ်အဘါဆူၣ်န့ၢ်သုဒ်သိးအဝဲကဟဲကိးနုာ်သုဒီးဟ့ၣ်လီၤ သုလၢအဝဲသ့ၣ်အထံအကီၢ်, ကီၢ်တဘ့ၣ်လၢအမ့ၢ်ဒၣ်သုတၢ်ဒ်တနံၤအံၤအသိးန့ၣ်လီၤ.

³⁹ မၤသးဒ်န့ၣ်ဒီး, သ့ၣ်နီၣ်ထီၣ်မုၢ်တနံၤအံၤဒီးသးပ့ၤနီၣ်အီၤ နီတစုတဂ့ၤ. ယွၤန့ၣ်မ့ၢ်ကစၢ်ယွၤလၢမူခိၣ်ဒီးလၢဟီၣ်ခိၣ်အံၤန့ၣ်လီၤ. ကစၢ်အဂၤတအိၣ်ဘၣ်.

⁴⁰ စူၢ်ကယဲၢ်အဝဲအတၢ်ဘူၣ်တၢ်ဘါအတၢ်သိၣ်တၢ်သီခဲလၢာ်လၢယဟ့ၣ်လီၤ သုတနံၤအံၤ, ဒီးတၢ်ကိးမံၤဒဲးကလဲၤအသးဂ့ၤဂ့ၤဘၣ်ဘၣ်လၢသုဒီးသုစၢၤ သုသွဲၣ်တဖၣ်အဂီၢ်န့ၣ်လီၤ. သုကအိၣ်ဆိးဘၣ်ဒံးဆူညါလၢကီၢ်တဘ့ၣ်အံၤအပူၤလၢယွၤ, သုကစၢ်ယွၤဟ့ၣ်လီၤသုဒ်သိးကမ့ၢ်သုတၢ်အစိၤစိၤအဃၣ်ဃၣ်အဂီၢ် န့ၣ်လီၤ.”

တၢ်ပူၤဖျဲးအဝ့ၢ်တဖၣ်လၢထံကျိယၢ်ဒ့ၣ် အမုၢ်ထီၣ်

⁴¹ အန့ၣ်ဝံၤဒီးစီၤမိၤၡ့ပာ်လီၤဆိဝ့ၢ်သၢဝ့ၢ်လၢထံကျိယၢ် ဒ့ၣ်အမုၢ်ထီၣ်တခီ,

⁴² ဖဲပှၤတဂၤမ့ၢ်မၤသံဘၣ်ဖုးပှၤတဂၤလၢတမ့ၢ်ဘၣ်အဒုၣ်အဒါလၢတၢ် တတိာ်သူၣ်ပာ်သးအပူၤဃ့ၢ်ပူၤဖျဲးအသးဒီးအိၣ်ဘံၣ်အိၣ်ဘၢဝဲ ကသ့အဂီၢ်န့ၣ်လီၤ. အဝဲဃ့ၢ်ပူၤဖျဲးအသးဆူဝ့ၢ်တဖၣ်န့ၣ်အကျါတဝ့ၢ်သ့ဝဲဒီးတဘၣ် တၢ်မၤသံဘၣ်အီၤဘၣ်.

⁴³ လၢပှၤရူၤဘ့ၣ်ဖိအဒူၣ်အဂီၢ်န့ၣ်, ဝ့ၢ်ဘ့စ့ၢ်လၢအမ့ၢ်ဝ့ၢ်အိၣ် လၢပှၢ်မုၢ်ကနၢ, လၢတၢ်လူၢ်ခိၣ်ထိးန့ၣ်လီၤ. လၢပှၤကးဖိအဒူၣ်အဂီၢ်န့ၣ်, ဝ့ၢ်ရၤမိးမ့ၢ်ဝ့ၢ်လၢအအိၣ်လၢကီၢ် ကံးလဧးလီၢ်ကဝီၤအပူၤန့ၣ်လီၤ. ဒီးလၢပှၤမနၤၡ့ၤဖိအဒူၣ်အဂီၢ်, မ့ၢ်ဝ့ၢ်ကိလၣ်အိၣ်ဝဲလၢကီၢ် ဘၤၡၣ်အလီၢ်ကဝီၤအပူၤန့ၣ်လီၤ.

တၢ်ကတိၤဆှၢနုာ်လၢတၢ်ဟ့ၣ်လီၤကစၢ်ယွၤ အတၢ်သိၣ်တၢ်သီအဂီၢ်

⁴⁴ စီၤမိၤၡ့ဟ့ၣ်လီၤကစၢ်ယွၤအတၢ်ဘူၣ်တၢ်ဘါအတၢ်သိၣ်တၢ်သီ တဖၣ်ဒီးတၢ်သိၣ်လိသီလိတဖၣ်ဆူကီၢ်အံၣ်စရ့လးအပှၤဂီၢ်မုၢ် အအိၣ်န့ၣ်လီၤ.

⁴⁵ အဝဲဟ့ၣ်လီၤအဝဲသ့ၣ်လၢတၢ်ဘူၣ်တၢ်ဘါအတၢ်သိၣ်တၢ်သီ တဖၣ်အံၤဖဲအဝဲသ့ၣ်ဟးထီၣ်လၢကီၢ်အဲၤကူပတူးဝံၤအလီၢ်ခံ, ဒီးအဝဲသ့ၣ်အိၣ်လၢထံကျိယၢ်ဒ့ၣ်အမုၢ်ထီၣ်တၢ်တြီၤပူၤ, လၢအအိၣ်ကွၢ်ဆၢညါလိာ်သးဒီးဝ့ၢ်ဘ့ၤသပဧိၢ်အကတီၢ်န့ၣ်လီၤ.

⁴⁶ တၢ်လီၢ်အံၤအိၣ်ဝဲလၢပှၤဧၣ်မိၣ်ဖိတဖၣ်အစီၤပၤစီၤစံဃိၣ်လၢ အပၢတၢ်လၢဝ့ၢ်ဃ့ၡဘိၣ်, အလီၢ်ကဝီၤပူၤန့ၣ်လီၤ. စီၤမိၤၡ့ဒီးကီၢ်အံၣ်စရ့လးအပှၤဂီၢ်မုၢ်မၤနၢၤကွံာ်အီၤဖဲ အဝဲသ့ၣ်ဟးထီၣ်ကွံာ်လၢကီၢ်အဲၤကူပတူးပူၤအခါန့ၣ်လီၤ.

⁴⁷ အဝဲသ့ၣ်မၤန့ၢ်အဝဲအကီၢ်ဒီးကီၢ်ဘၤၡၣ်အစီၤပၤစီၤဧိာ်, လၢအမ့ၢ်ပှၤဧၣ်မိၣ်ဖိအစီၤပၤအဂၤတဂၤအကီၢ်လၢအအိၣ်လၢထံကျိ ယၢ်ဒ့ၣ်အမုၢ်ထီၣ်တခီန့ၣ်လီၤ.

⁴⁸ ကီၢ်အံၤလဲၢ်ဝဲစးထီၣ်လၢဝ့ၢ်ဧရိၤဧ့ၢ်, လၢအအိၣ်လၢထံကျိ အၤနိၣ်ကၢၢ်နံၤဒီးလဲၤဆူကလံၤစိးတခီဒီတကျိၤတုၤဆူကစၢၢ် စံရယိၣ်လၢအမ့ၢ်ဃ့ရမိၣ်န့ၣ်လီၤ.

⁴⁹ ကီၢ်န့ၣ်အိၣ်စ့ၢ်ကီးဒီးကယဲၢ်လီၢ်ကဝီၤလၢထံကျိယၢ်ဒ့ၣ် အမုၢ်ထီၣ်တခီ, ယံၤဝဲလၢကလံၤထံးတခီတုၤဆူပီၣ်လဲၣ်သံ, ဒီးလၢမုၢ်ထီၣ်တကပၤန့ၣ်တုၤဆူကစၢၢ်ပံးစကၤအခီၣ်ထံးန့ၣ်လီၤ.