လံာ်သိၣ်လီၤသီလီၤတၢ် 33 - Sgaw Karen Common Bible

စီၤမိၤၡ့ဆိၣ်ဂ့ၤအံၣ်စရ့လးအဒူၣ်တဖၣ်

¹ တၢ်တဖၣ်အံၤမ့ၢ်တၢ်ဆိၣ်ဂ့ၤတဖၣ်လၢကစၢ်ယွၤအပှၤကညီ စီၤမိၤၡ့တဲဖျါထီၣ်ဝဲလၢကီၢ်အံၣ်စရ့လးအပှၤဂီၢ်မုၢ်အဂီၢ် တချုးလၢအဝဲသံဒံးဘၣ်န့ၣ်လီၤ.

² ယွၤဟဲဝဲလၢကစၢၢ်စံၣ်နါတခီ, အဝဲဟဲထီၣ်ဝဲဒ်မုၢ်အသိးလၢ ကီၢ်အဒိၣ်အဖီခိၣ်, ဒီးကပီၤထီၣ်ဝဲလၢအပှၤဂီၢ်မုၢ်အလိၤလၢကစၢၢ်ပၤရၣ်အဒီခိၣ် န့ၣ်လီၤ. ကလူးအဂၤတကလးအိၣ်ဒီးအီၤလၢအစုထွဲတကပၤ ဒ်မ့ၣ်အူလၣ်လၢအကဲၤကပီၤဝဲတခါအသိးန့ၣ်လီၤ.

³ ယွၤအဲၣ်အပှၤဂီၢ်မုၢ် ဒီးဒီဒၣ်အိၣ်ပှိၤပှၤတဖၣ်လၢအဘၣ်ဃးဒီးအီၤန့ၣ်လီၤ. လၢတၢ်န့ၣ်အဃိ, ပတီၤလီၤလၢအခီၣ်မဲာ်ညါ, ဒီးစူၢ်အဝဲအတၢ်မၤလိာ်တဖၣ်န့ၣ်လီၤ.

⁴ ပစူၢ်ယူဒၤအတၢ်သိၣ်တၢ်သီလၢစီၤမိၤၡ့ဟ့ၣ်လီၤပှၤ, လၢအမ့ၢ်ပပှၤကလုာ်အတၢ်စုလီၢ်ခီၣ်ခိၣ်အထူးအတီၤကတၢၢ်န့ၣ်လီၤ.

⁵ ယွၤကဲထီၣ်က့ၤအဝဲအပှၤဂီၢ်မုၢ်အံၣ်စရ့လးအစီၤပၤ, ဖဲအဝဲသ့ၣ်အဒူၣ်တဖၣ်ဒီးအခိၣ်အနၢ်တဖၣ်ပာ်ဖှိၣ်ထီၣ်အသးတပူၤဃီ န့ၣ်လီၤ.

⁶ စီၤမိၤၡ့ကတိၤတၢ်ဘၣ်ဃးဒီးရူၤဘ့ၣ်အဒူၣ်အဂ့ၢ်စံးဝဲ, “အဝဲသ့ၣ်အပှၤဂီၢ်မုၢ်အနီၣ်ဂံၢ်မ့ၢ်စှၤဘၣ်ဆၣ်, မ်ရူၤဘ့ၣ်သုတသံကွံာ်နီတစုတဂ့ၤ.”

⁷ ဘၣ်ဃးဒီးယူဒၤအဒူၣ်အဂ့ၢ်န့ၣ်, အဝဲစံးဝဲ, “ယွၤဧၢ, ကနၣ်အဝဲသ့ၣ်အတၢ်ကိးထီၣ်လၢတၢ်မၤစၢၤအဂီၢ်, ပာ်ဖှိၣ်ကဒါက့ၤအဝဲသ့ၣ်တပူၤဃီဒီးဒူၣ်အဂၤ တဖၣ်တက့ၢ်. ဒုးတၢ်လၢအဝဲသ့ၣ်အဂီၢ်, ယွၤဧၢ, ဒီးမၤစၢၤအဝဲသ့ၣ်ထီဒါအဒုၣ်အဒါတဖၣ်န့ၣ်တက့ၢ်.”

⁸ ဘၣ်ဃးဒီးလ့ၤဝံအဒူၣ်အဂ့ၢ်န့ၣ်, အဝဲစံးဝဲ, “နဲဒၣ်, ယွၤဧၢ, လီၣ်ဖျါထီၣ်နတၢ်ဘၣ်နသးလၢအူရံၣ်ဒီးတူမံၣ်, ခီဖျိပှၤလ့ၤဝံဖိတဖၣ်လၢအမ့ၢ်နခ့နပှၤတဖၣ်လၢအသူၣ်တီသးရၤ န့ၣ်တက့ၢ်. နဒုးလီၤဘၣ်အဝဲသ့ၣ်လၢတၢ်မၤကွၢ်အပူၤဖဲမးစၤ ဒီးအုၣ်တ့ၢ်နသးလၢအဝဲသ့ၣ်အဂီၢ်ဒ်ပှၤတဖၣ်အသိးဖဲထံမရံၤဘါ န့ၣ်လီၤ.

⁹ အဝဲသ့ၣ်ဒုးနဲၣ်အတၢ်သးတီဒိၣ်ထီၣ်ဒီးနၤဒိၣ်န့ၢ်ဒံးအတၢ်သးတီဒီးအမိၢ်အပၢ်တဖၣ်, အဒီပုၢ်ဝဲၢ်ခွါတဖၣ်ဒီးအဖိတဖၣ်မ့ၢ်ဂ့ၤန့ၣ်လီၤ. အဝဲသ့ၣ်စူၢ်တ့ၢ်နတၢ်မၤလိာ်တဖၣ်, ဒီးအိၣ်ဒီးတၢ်သူၣ်တီသးရၤဒီးနတၢ်အၢၣ်လီၤအီလီၤန့ၣ်လီၤ.

¹⁰ အဝဲသ့ၣ်ကသိၣ်လိနပှၤဂီၢ်မုၢ်လၢကစူၢ်ယူဒၤအတၢ်သိၣ်တၢ်သီ, လၢနဟ့ၣ်လီၤန့ၣ်လီၤ. အဝဲသ့ၣ်ကလုၢ်ထီၣ်တၢ်လုၢ်တၢ်ပာ်တဖၣ်လၢနတၢ်လုၢ်လီၢ်အဖီခိၣ်န့ၣ်လီၤ.

¹¹ ယွၤဧၢ, မၤစၢၤအဝဲသ့ၣ်အဒူၣ်လၢကဒိၣ်ထီၣ်ဆူၣ်ထီၣ်တက့ၢ်. ဘၣ်သူၣ်ဘၣ်သးဒီးတၢ်လၢအဝဲသ့ၣ်မၤဝဲန့ၣ်တက့ၢ်. ဆီၣ်တံၢ်လီၤသဘှံးကွံာ်အဝဲသ့ၣ်အဒုၣ်အဒါတဖၣ်ခဲလၢာ်တက့ၢ်. ပျဲအဝဲသ့ၣ်ဆၢထၢၣ်ကဒါက့ၤလၢၤနီတစုတဂ့ၤ.”

¹² ဘၣ်ဃးဒီးဘံၣ်ယၤမံၣ်အဒူၣ်အဂ့ၢ်န့ၣ်အဝဲစံးဝဲ, “အအံၤမ့ၢ်ဒူၣ်လၢယွၤအဲၣ်အီၤဒီးဒီဒၣ်အိၣ်ပှိၤအီၤန့ၣ်လီၤ. အဝဲအိၣ်ခိးကဟုကယာ်အဝဲသ့ၣ်ကိးဆၢကိးကတီၢ်ဒဲး, ဒီးအဝဲအိၣ်ဝဲဆိးဝဲလၢအဝဲသ့ၣ်အကျါန့ၣ်လီၤ.”

¹³ ဘၣ်ဃးဒီးယိၤသးအဒူၣ်အဂ့ၢ်န့ၣ်, အဝဲစံးဝဲ, “မ်ယွၤဆိၣ်ဂ့ၤအဝဲသ့ၣ်အထံအကီၢ်ဒီးတၢ်ဟဲစူၤလၢထးခီ, အိၣ်ဃုာ်ဒီးထံတဖၣ်လၢဟီၣ်ခိၣ်လာ်န့ၣ်တက့ၢ်.

¹⁴ မ်အဝဲသ့ၣ်အကီၢ်ကဘၣ်ဆိၣ်ဂ့ၤဝဲဒီးတၤသၣ်တဖၣ်လၢမုၢ်ဒုးမံထီၣ်အီၤ, ထူးတီၤဝဲဒီးတၢ်အကတီၢ်တကတီၢ်စုာ်စုာ်အတၤသၣ်အဂ့ၤကတၢၢ်တဖၣ် န့ၣ်တက့ၢ်.

¹⁵ မ်အဝဲသ့ၣ်အတၢ်လူၢ်လၢပျၢၤတဖၣ်ကပှဲၤလုၣ်ကွံာ်ဒီးတၤသၣ်အဂ့ၤကတၢၢ်တဖၣ်တက့ၢ်.

¹⁶ မ်အဝဲသ့ၣ်အကီၢ်ကပှဲၤဝဲဒီးကယဲၢ်တၢ်လၢအဂ့ၤခဲလၢာ်, ဘၣ်တၢ်ဆိၣ်ဂ့ၤလၢယွၤ လၢအကတိၤလီၤတၢ်လၢသ့ၣ်တၤဆှုၣ် လၢမ့ၣ်အူအီၣ်အီၤအပူၤတဂၤအတၢ်ဂ့ၤတၢ်ဝါတက့ၢ်. မ်တၢ်ဆိၣ်ဂ့ၤတဖၣ်အံၤကလီၤဘၣ်လၢယိၤသး အဒူၣ်အလိၤ, မ့ၢ်လၢအဝဲမ့ၢ်ပှၤခိၣ်ပှၤနၢ်လၢအဒီပုၢ်ဝဲၢ်ခွါတဖၣ်အကျါအဃိန့ၣ်တက့ၢ်.

¹⁷ စီၤယိၤသးအိၣ်ဒီးဂီၤဖံးဖါတဒုအတၢ်ဂံၢ်တၢ်ဘါ, ဂီၤဖံးဖါလၢအရၢၢ်အစၢၢ်တစုအနၢၤတဖၣ်လီၤ. အဝဲအနၢၤတဖၣ်န့ၣ်မ့ၢ်ဒ်မနၤၡ့ၣ်အကထိတဖၣ် ဒီးအ့ဖရဲၣ်အကလးတဖၣ်အသိးန့ၣ်လီၤ. အဝဲဘျၢၣ်ပှၤကလုာ်တဖၣ်လၢနၢၤတဖၣ်န့ၣ်, ဒီးဆီၣ်လီၤကွံာ်အဝဲသ့ၣ်တုၤလၢဟီၣ်ခိၣ်အကတၢၢ်တဖၣ်န့ၣ်လီၤ.”

¹⁸ ဘၣ်ဃးဒီးစဘူလိၣ်ဒီးယံးစၣ်ကၣ်အဒူၣ်တဖၣ်အဂ့ၢ်န့ၣ်, အဝဲစံးဝဲ, “မ်စဘူလိၣ်ထူးထီၣ်တီၤထီၣ်လၢအတၢ်မၤကူၣ်မၤကၤလၢပီၣ်လဲၣ်ပူၤ, ဒီးမ်ယံးစၣ်ကၣ်အတၢ်ထူးတၢ်တီၤအါထီၣ်ဝဲလၢ ဟံၣ်တက့ၢ်.

¹⁹ အဝဲသ့ၣ်ကွဲမုာ်ပှၤတခီဘီမုၢ်ဖိတဖၣ်ဆူအဝဲသ့ၣ်အကစၢၢ်ဒီး လုၢ်ထီၣ်တၢ်လုၢ်တၢ်ပာ်တဖၣ်လၢအတီဝဲဘၣ်ဝဲဖဲန့ၣ်လီၤ. အဝဲသ့ၣ်မၤန့ၢ်အတၢ်ထူးတၢ်တီၤတဖၣ်လၢပီၣ်လဲၣ်, ဒီးလၢမဲးလၢအအိၣ်လၢပီၣ်လဲၣ်ကၢၢ်နံၤန့ၣ်လီၤ.”

²⁰ ဘၣ်ဃးဒီးကးအဒူၣ်အဂ့ၢ်န့ၣ်, အဝဲစံးဝဲ, “စံးထီၣ်ပတြၢၤကစၢ်ယွၤတဂၤလၢအဟ့ၣ်လီၤတ့ၢ်အဝဲသ့ၣ်အတၢ် အိၣ်ဝဲဆိးဝဲအလီၢ်လၢအလဲၢ်န့ၣ်တက့ၢ်. စီၤကးအိၣ်ခိးတၢ်ဒ်ခ့ယုၢ်တဒုအသိးလၢကအ့ၣ်ဖှီကွံာ်တၢ်အစု တီၤတခီမ့ၢ်ဂ့ၤ, တၢ်အခိၣ်ဖံးတခါမ့ၢ်ဂ့ၤအဂီၢ်န့ၣ်လီၤ.

²¹ အဝဲသ့ၣ်ဟံးန့ၢ်ကီၢ်အတၢ်လီၢ်အဂ့ၤကတၢၢ်လၢအဂီၢ်ဒၣ်ဝဲ, ခိၣ်နၢ်တဂၤအတၢ်နီၤဟ့ၣ်ဘၣ်တၢ်ဟ့ၣ်လီၤအီၤဆူအဝဲသ့ၣ်အအိၣ်န့ၣ် လီၤ. အဝဲသ့ၣ်စူၢ်တ့ၢ်ယွၤအတၢ်မၤလိာ်တဖၣ်ဒီးတၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဖဲကီၢ်အံၣ်စရ့လးအခိၣ်အနၢ်တဖၣ်ပာ်ဖှိၣ်အသး တပူၤဃီအခါန့ၣ်လီၤ.”

²² ဘၣ်ဃးဒီးဒၣ်အဒူၣ်အဂ့ၢ်န့ၣ်အဝဲစံးဝဲ, “ဒၣ်မ့ၢ်ခ့ယုၢ်ဖိတဒု, အဝဲစံၣ်ထီၣ်ဝဲလၢကီၢ်ဘၤၡၣ်အပူၤန့ၣ်လီၤ.”

²³ ဘၣ်ဃးဒီးနးသၤလံအဒူၣ်အဂ့ၢ်န့ၣ်အဝဲစံးဝဲ, “နးသၤလံဘၣ်ဆိၣ်ဂ့ၤဝဲထူးထူးတီၤတီၤလၢယွၤအတၢ်ကွၢ်မဲာ် အဂ့ၤအဃိ, အဝဲသ့ၣ်အကီၢ်လဲၤတုၤဃီၤဝဲဆူပီၣ်လဲၣ်ကၤလံၤလါအကလံၤထံး န့ၣ်လီၤ.”

²⁴ ဘၣ်ဃးဒီးအၤၡ့ၢ်အဒူၣ်အဂ့ၢ်န့ၣ်အဝဲစံးဝဲ, “အၤၡ့ၢ်ဘၣ်ဆိၣ်ဂ့ၤဒိၣ်န့ၢ်ဒံးဒူၣ်အဂၤတဖၣ်တက့ၢ်လီၤ. မ်အဝဲကမ့ၢ်အဒီပုၢ်ဝဲၢ်ခွါတဖၣ်အတၢ်ဘၣ်သူၣ်ဘၣ်သး, ဒီးမ်အကီၢ်ထူးတီၤဝဲဒီးသ့ၣ်စၤယံးအထူၣ်တဖၣ် န့ၣ်တက့ၢ်.

²⁵ မ်အဝဲအဝ့ၢ်တဖၣ်ဘၣ်တၢ်ဒီဒၣ်အီၤလၢထးတြဲၤ ဖးဒိၣ်တဖၣ်, ဒီးမ်အဝဲအိၣ်မူထီဘိလၢတၢ်ဘံၣ်တၢ်ဘၢအပူၤ န့ၣ်တက့ၢ်.”

²⁶ ကီၢ်အံၣ်စရ့လးအပှၤဂီၢ်မုၢ်ဧၢ, ယွၤအဂၤတဒ်သိးဘၣ်သုကစၢ်ယွၤဘၣ်. အဝဲဒိးတၢ်ခီဖျိကွံာ်မူကပိာ်လိၤလၢတၢ်ကဟုကညီၢ်အပူၤ, ဒိးတၢ်ခီဖျိကွံာ်တၢ်အၢၣ်တဖၣ်လၢကဟဲမၤစၢၤသုအဂီၢ်န့ၣ်လီၤ.

²⁷ ထီဘိကစၢ်ယွၤမ့ၢ်သုတၢ်အိၣ်တဒၢအလီၢ်, အဝဲအစုတီၤအထူအယိာ်တဖၣ် မ့ၢ်တၢ်လၢအမၤစၢၤသုန့ၣ်လီၤ. အဝဲနီၣ်ထီၣ်ဟီထီၣ်ကွံာ်သုဒုၣ်သုဒါတဖၣ်ဖဲသုလဲၤထီၣ် ဒုးတၢ် ဒီးတဲဘၣ်သုလၢသုကမၤဟးဂီၤကွံာ်အဝဲသ့ၣ်ခဲလၢာ်န့ၣ်လီၤ.

²⁸ လၢတၢ်န့ၣ်အဃိ, စီၤယၤကိာ်အစၢၤအသွဲၣ်တဖၣ်အိၣ်ဝဲ ဆိးဝဲလၢတၢ်ဃူတၢ်မုာ်အပူၤ, အိၣ်ပူၤအိၣ်ဖျဲးဝဲလၢကီၢ် တဘ့ၣ်လၢအပှဲၤဒီးဘုဧိၤဟုဧိၤဒီးစပံးထံအပူၤ, ဖဲပစီၤထံလၢမူကပိာ်လိၤတဖၣ်မၤဘၣ်စီၣ်ဟီၣ်ခိၣ်န့ၣ်လီၤ.

²⁹ အံၣ်စရ့လးဧၢ, နဘၣ်ဆိၣ်ဂ့ၤနဲဆံးဒိၣ်လဲၣ်. ပှၤဒ်သိးသု, ပှၤတကလုာ်လၢအဘၣ်တၢ်အုၣ်က့ၤခီၣ်က့ၤအီၤလၢယွၤ န့ၣ်, တအိၣ်ဝဲဒၣ်ဘၣ်. ယွၤအနီၢ်ကစၢ်ဒၣ်ဝဲမ့ၢ်သုကတီၤဒီးသုနးလၢအကဒီသဒၢသုဒီး ဟ့ၣ်သုတၢ်မၤနၢၤန့ၣ်လီၤ. သုဒုၣ်သုဒါတဖၣ်ကဟဲဃ့ကညးသုလၢတၢ်မၤစၢၤအဂီၢ် ဒီးသုကယီၢ်တံၢ်လီၤကွံာ်အဝဲသ့ၣ်န့ၣ်လီၤ.