လံာ်သိၣ်လီၤသီလီၤတၢ် 24 - Sgaw Karen Common Bible

တၢ်မၤလီၤဖှၣ်ဒီးတၢ်ဒိးတ့ဒိးဖျီကဒါက့ၤ

¹ ပစံးဒၣ်ကလိာ်ပှၤပိာ်ခွါတဂၤဒိးတ့ဒိးဖျီအသးဒီးပိာ်မုၣ်တဂၤ, ဒီးလၢခံန့ၣ်အဝဲပာ်လီၤအသးလၢအတသးလီလၢၤအီၤဘၣ်, မ့ၢ်လၢ အဝဲထံၣ်ဘၣ်အမါမၤကမၣ်တၢ်လၢအလီၤမဲာ်ဆှးတမံၤ လၢတဘၣ်သူၣ်ဘၣ်သးအီၤအဃိန့ၣ်လီၤ. လၢတၢ်န့ၣ်အဃိအဝဲကွဲးလံာ်လီၤဖှၣ်တဖၣ် ဒီးဟ့ၣ်လီၤအီၤ, ဒီးမၢအဟးထီၣ်ကွံာ်လၢဟံၣ်န့ၣ်လီၤ.

² အန့ၣ်တစုပစံးဒၣ်ကလိာ်ပိာ်မုၣ်န့ၣ်ဖျီအသးဒီးပိာ်ခွါအဂၤ တဂၤန့ၣ်လီၤ.

³ ဒီးပိာ်ခွါတဂၤအံၤစ့ၢ်ကီးပာ်လီၤအသးလၢအတသးလီလၢၤအီၤဘၣ်, အဃိအဝဲကွဲးလံာ်လီၤဖှၣ်တဖၣ်, ဒီးမၢအဟးထီၣ်ကွံာ်လၢအဟံၣ်န့ၣ်လီၤ. ဒီးပစံးဒၣ်ကလိာ်အဝၤ ခံဂၤတဂၤအံၤသံကွံာ်ဝဲလီၤ.

⁴ လၢတၢ်ဂ့ၢ်ခံမံၤလၢာ်အပူၤန့ၣ်အဝဲအဝၤအခီၣ်ထံးတဂၤဖျီက့ၤ ကဒီးအသးဒီးအီၤတသ့ဘၣ်. အဝဲကဘၣ်ပာ်အီၤဒ်ပှၤတကဆှီဘၣ်တဂၤအသိးန့ၣ်လီၤ. အဝဲမ့ၢ်ဖျီကဒီးအသးဒီးပိာ်မုၣ်န့ၣ် ဒီးကကဲထီၣ်တၢ်ထီဒါကစၢ်ယွၤန့ၣ်လီၤ. သုတဘၣ်မၤတၢ်ဒဲးဘးလၢအလီၤပျံၤလီၤဖုးဒ်န့ၣ်တကလုာ်လၢကီၢ် လၢယွၤသုကစၢ်ယွၤဟ့ၣ်လီၤသုအပူၤန့ၣ်ဘၣ်.

တၢ်သိၣ်တၢ်သီအကလုာ်ကလုာ်

⁵ ဖဲပိာ်ခွါတဂၤဒိးတ့ဒိးဖျီအသးဝံၤသီသီန့ၣ်, တၢ်တဘၣ်မၢဆူၣ်အဝဲနုာ်လီၤဆူသုးပူၤမ့ၢ်ဂ့ၤ, ကမျၢၢ်အတၢ်ဖံးတၢ်မၤအဂၤတမံၤမံၤအပူၤမ့ၢ်ဂ့ၤန့ၣ်ဘၣ်. တၢ်ကဘၣ်ပျဲပူၤဖျဲးအီၤလၢတၢ်မၤအမူအဒါဒီတနံၣ်ညါဒ်သိးအဝဲ ကအိၣ်လၢဟံၣ်ဒီးမၤသူၣ်ဖှံသးညီအမါကသ့ဝဲအဂီၢ်န့ၣ်လီၤ.

⁶ တုၤသုဒုးလိၢ်လီၤပှၤတဂၤလၢတၢ်တမံၤမံၤန့ၣ်, ဟံးန့ၢ်အဝဲအဆၢၣ်ဂူာ်လၢၢ်လၢအဂံၢ်ဘျဲးဘုခ့ဒ်တၢ်ဟ့ၣ်ကီၤအသိးတဂ့ၤ. တၢ်အံၤကဟံးန့ၢ်ကွံာ်အဝဲအဟံၣ်ဖိဃီဖိအကျဲလၢ အကတဲာ်ကတီၤတၢ်အီၣ်တၢ်အီဒ်သိးကမူဝဲအဂီၢ်န့ၣ်လီၤ.

⁷ ပှၤတဂၤလၢ်လၢ်လၢအစိာ်ဟုၣ်ကွံာ်အပှၤအံၣ်စရ့လးဖိကဒဲကဒဲ ဒီးဒုးကဲထီၣ်အီၤလၢအကုၢ်အပှၤမ့တမ့ၢ်ဆါလီၤကွံာ်အီၤဆူ ကုၢ်အလီၢ်န့ၣ်, ကဘၣ်တၢ်မၤသံအီၤန့ၣ်လီၤ. လၢကျဲဒ်အံၤအသိးန့ၣ်သုကမၤပူၤဖျဲးသုသးဒီးတၢ်အၢတၢ်သီ အံၤန့ၣ်လီၤ.

⁸ ဖဲသုဘၣ်တၢ်ဆါအၢလီၤပျံၤတမံၤအခါန့ၣ်, မၤလီၤတံၢ်လၢသု ကမၤတၢ်လီၤတံၢ်လီၤဆဲးဒ်တၢ်လၢပှၤလ့ၤဝံဖိအပှၤလုၢ်တၢ်အခိၣ် တဖၣ်တဲဘၣ်သုန့ၣ်တက့ၢ်. ဒီးပိာ်ထွဲတၢ်သိၣ်လိနဲၣ်ယုၤတဖၣ် လၢယဟ့ၣ်လီၤတ့ၢ်အဝဲသ့ၣ်န့ၣ်တက့ၢ်.

⁹ သ့ၣ်နီၣ်ထီၣ်က့ၤတၢ်လၢယွၤသုကစၢ်ယွၤမၤဘၣ်တ့ၢ်နီၢ်မံးရယၣ် ဖဲသုဟးထီၣ်လၢကီၢ်အဲၤကူပတူးအခါန့ၣ်တက့ၢ်.

¹⁰ ဖဲသုဒုးလိၢ်လီၤပှၤတဂၤလၢတၢ်တမံၤမံၤန့ၣ်, လဲၤနုာ်ဆူအဝဲ အဟံၣ်ပူၤဒ်သိးသုကဟံးန့ၢ်အဆ့ဖးထီလၢအကဟ့ၣ်သုဒ်လၢတၢ်အုၣ် ကီၤအသိးန့ၣ်တဂ့ၤ.

¹¹ အိၣ်ခိးတ့ၢ်လၢတၢ်ချၢဒ်သိးအဝဲကဟဲစိာ်ဝဲဒီးဟ့ၣ်လီၤသု အဂီၢ်တက့ၢ်.

¹² အဝဲမ့မ့ၢ်ပှၤဖှီၣ်ဖိယာ်ဖိတဂၤဒီး, ဟံးဃာ်ဆ့ကၤန့ၣ်လၢမုၢ် နၤအခါတဂ့ၤ.

¹³ ဟ့ၣ်က့ၤအီၤကိးမုၢ်ဟါဒဲးဒ်သိးအဝဲကမံဝဲလၢအပူၤအဂီၢ်န့ၣ် တက့ၢ်. တုၤနုၤတစုအဝဲကစံးဘျုးစံးဖှိၣ်သု, ဒီးသုကကဲထီၣ်တၢ်သးခုလၢယွၤသုကစၢ်ယွၤအဂီၢ်န့ၣ်လီၤ.

¹⁴ ဒီးတၢ်ခ့တၢ်ပှၤဒိးလဲအသးတဂၤလၢအဖှီၣ်ဒီးလိၣ်ဘၣ်တၢ်မၤစၢၤ, လၢအမ့ၢ်သုပှၤအံၣ်စရ့လးဖိကဒဲကဒဲမ့ၢ်ဂ့ၤ, ပှၤတခီဘီမုၢ်ဖိလၢအအိၣ်ဆိးလၢသုဝ့ၢ်တဖျၢၣ်ဖျၢၣ်အပူၤမ့ၢ်ဂ့ၤန့ၣ်, လီအီၣ်အီၤတဂ့ၤ.

¹⁵ ကိးမုၢ်နံၤဒဲးတချုးလၢမုၢ်လီၤနုာ်ဒံးဘၣ်န့ၣ်ဟ့ၣ်အီၤ အဘူးအလဲလၢမုၢ်တနံၤန့ၣ်အဂီၢ်တက့ၢ်. အဝဲလိၣ်ဘၣ်တိၢ်န့ၣ်ဒီးမုၢ်လၢ်ဒိးန့ၢ်ဘၣ်တၢ်အဃိန့ၣ်လီၤ. သုမ့ၢ်တဟ့ၣ်အဘူးအလဲဘၣ်ဒီး, အဝဲကကိးထီၣ်ထီဒါသုဆူယွၤအအိၣ်, ဒီးသုကအိၣ်ဒီးတၢ်ကမၣ် လၢတၢ်ဒဲးဘးအဃိန့ၣ်လီၤ.

¹⁶ လၢတၢ်ကမၣ်တဖၣ်လၢဖိတဖၣ်မၤအီၤအဃိန့ၣ်, မိၢ်ပၢ်တဖၣ်တၢ်တဘၣ်မၤသံအီၤဘၣ်. ဒီးလၢတၢ်ကမၣ်တဖၣ်လၢမိၢ်ပၢ်တဖၣ်မၤအီၤအဃိန့ၣ်ဖိတဖၣ်တၢ်တဘၣ်မၤသံအီၤဘၣ်. ပှၤတဂၤကဘၣ်တၢ်မၤသံအီၤထဲဒၣ်လၢအနီၢ်ကစၢ်ဒၣ်ဝဲမၤတၢ်ကမၣ်အဃိန့ၣ်လီၤ.

¹⁷ ဟံးန့ၢ်ကွံာ်ပှၤတခီဘီမုၢ်ဖိတဖၣ်ဒီးပှၤဖိၣ်ဃဲတဖၣ်အတၢ်ခွဲးတၢ်ယာ်တဂ့ၤ, ဒီးဟံးန့ၢ်ကွံာ်ပှၤမုၣ်ကမဲတဂၤအဆ့ဖးထီဒ်တၢ်အုၣ်ကီၤအသိး လၢတၢ်ဒုးလိၢ်တမံၤအဂီၢ်တဂ့ၤ.

¹⁸ သ့ၣ်နီၣ်ထီၣ်က့ၤလၢသုမ့ၢ်တ့ၢ်ကုၢ်တဖၣ်လၢကီၢ်အဲၤကူပတူး အပူၤဒီးလၢယွၤသုကစၢ်ယွၤမၤထူၣ်ဖျဲးထီၣ်သုန့ၣ်တက့ၢ်. လၢတၢ်န့ၣ်အဃိယဟ့ၣ်လီၤသုလၢတၢ်မၤလိာ်အံၤန့ၣ်လီၤ.

¹⁹ ဖဲသုထၢဖှိၣ်က့ၤသုဘုဧိၤဟုဧိၤတဖၣ်, ဒီးသုဘုဧိၤဟု ဧိၤလၢသုကူးအီၤဝံၤအိၣ်လီၤတဲာ်ဒံးလၢ သုတဟဲက့ၤစိာ်ဘၣ်အီၤန့ၣ်, လဲၤကဒါက့ၤဒီးဟံးန့ၢ်အီၤတဂ့ၤ. တၢ်န့ၣ်ကဘၣ်တၢ်ပာ်တ့ၢ်အီၤလၢ ပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်ဒီးပှၤ မုၣ်ကမဲတဖၣ်အဂီၢ်ဒ်သိးယွၤသုကစၢ်ယွၤကဆိၣ်ဂ့ၤသုလၢ ကယဲၢ်တၢ်လၢသုမၤအီၤတမံၤလၢ်လၢ်အပူၤန့ၣ်လီၤ.

²⁰ ဖဲသုဒဲးက့ၤသ့ၣ်စၤယံးအသၣ်တဖၣ်တဘျီဝံၤန့ၣ်က့ၤကဒါက့ၤ ဒီးဟံးန့ၢ်တၢ်လၢအအိၣ်လီၤတဲာ်တဖၣ်တဂ့ၤ. တၢ်တဖၣ်န့ၣ်ကမ့ၢ်လၢပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်ဒီးပှၤမုၣ်ကမဲတဖၣ်အဂီၢ်န့ၣ်လီၤ.

²¹ ဒီးဖဲသုဒဲးက့ၤသုစပံးသၣ်တဖၣ်ဝံၤတဘျီန့ၣ်, က့ၤဒဲးကဒါက့ၤတၢ်လၢစပံးမုၢ်တဖၣ်အအိၣ်ခံဘျီတဘျီတဂ့ၤ. စပံးသၣ်တဖၣ်လၢအအိၣ်လီၤတဲာ်န့ၣ်ကမ့ၢ်လၢပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်, ဒီးပှၤမုၣ်ကမဲတဖၣ်အဂီၢ်န့ၣ်လီၤ.

²² သးပ့ၤနီၣ်ကွံာ်နီတဘျီလၢသုမ့ၢ်တ့ၢ်ကုၢ်တဖၣ်လၢကီၢ်အဲၤကူ ပတူးအပူၤန့ၣ်တဂ့ၤ, လၢတၢ်န့ၣ်အဃိယဟ့ၣ်လီၤသုတၢ်မၤလိာ်အံၤန့ၣ်လီၤ.