လံာ်သိၣ်လီၤသီလီၤတၢ် 22 - Sgaw Karen Common Bible

¹ သုမ့ၢ်ထံၣ်ဘၣ်သုပှၤအံၣ်စရ့လးဖိကဒဲကဒဲတဂၤအဂီၤဖံးမ့တ မ့ၢ်, သိမ့ၢ်ဂ့ၤထူၣ်ဖျဲးကွံာ်ဒီး, ကွၢ်ကပာ်ကွံာ်အီၤတဂ့ၤ. က့ၤစိာ်ကဒါက့ၤအီၤဆူအကစၢ်အအိၣ်တက့ၢ်.

² ဘၣ်ဆၣ်ဒီး, အကစၢ်မ့ၢ်အိၣ်ဆိးလၢတၢ်လီၢ်ဖးယံၤမ့တမ့ၢ်, သုမ့ၢ်တသ့ၣ်ညါအကစၢ်ဘၣ်ဒီး, အန့ၣ်တစု, က့ၤစိာ်အီၤဆူ သုဟံၣ်တက့ၢ်. တုၤအကစၢ်ဟဲလူၤကွၢ်ဃုက့ၤအီၤဒီး, ဟ့ၣ်က့ၤအကစၢ်တက့ၢ်.

³ မၤတၢ်တမံၤဃီဒ်န့ၣ်, ဖဲသုမ့ၢ်ထံၣ်ဘၣ်ကသ့ၣ်ယီၤတဒု, ဆ့ကၤတဘ့ၣ်မ့တမ့ၢ်တၢ်အဂၤတမံၤမံၤလၢအလီၤမၢ်န့ၢ်သု ပှၤအံၣ်စရ့လးဖိကဒဲကဒဲန့ၣ်တက့ၢ်.

⁴ ဖဲသုပှၤအံၣ်စရ့လးဖိကဒဲကဒဲတဂၤအကသ့ၣ်ယီၤ မ့တမ့ၢ်အဂီၤဖံးမိၢ်လီၤဃံၤဝဲန့ၣ်, ကွၢ်ကပာ်အီၤတဂ့ၤ, မၤစၢၤအီၤဒ်သိးအဝဲဒုးဆၢထၢၣ်က့ၤကဒီး အဆၣ်ဖိကီၢ်ဖိကန့ၢ်ဝဲန့ၣ်တက့ၢ်.

⁵ ပှၤပိာ်မုၣ်တဘၣ်ကူသိးပှၤပိာ်ခွါအတၢ်ကူတၢ်သိး, ဒီးပှၤပိာ်ခွါတဖၣ်တဘၣ်ကူသိးပှၤပိာ်မုၣ်အတၢ်ကူတၢ်သိးဘၣ်. ယွၤ, သုကစၢ်ယွၤသးဟ့ပှၤဂီၢ်မုၢ်လၢအမၤတၢ်ဒ်န့ၣ်အသိးတဖၣ် လီၤ.

⁶ သုမ့ၢ်ထံၣ်ဘၣ်ဖုးထိၣ်အသွံတခါလၢသ့ၣ်တထံးအလိၤမ့ၢ်ဂ့ၤ, လၢဟီၣ်ခိၣ်လိၤမ့ၢ်ဂ့ၤအိၣ်ဒီးထိၣ်မိၢ်လၢအဟုဃးအဒံၣ်တဖၣ်မ့ တမ့ၢ်အိၣ်ဒီးအဖိဆံးတဖၣ်န့ၣ်, သုတဘၣ်ဖီၣ်န့ၢ်ထိၣ်မိၢ်န့ၣ်ဘၣ်.

⁷ သုဖီၣ်န့ၢ်ထိၣ်ဖိတဖၣ်သ့ဝဲ, မ့မ့ၢ်သုကဘၣ်ပျဲဟးကွံာ်ထိၣ်မိၢ်န့ၣ်, ဒ်သိးသုတၢ်အိၣ်မူကအိၣ်ကၢအိၣ်ခိးဒီးဘီၣ်ထီၣ်ညီထီၣ်အဂီၢ် န့ၣ်လီၤ.

⁸ ဖဲသုဘှီထီၣ်ဟံၣ်အသီတဖျၢၣ်န့ၣ်, မၤလီၤတံၢ်လၢသု ကဒူၣ်ဝးတရံးဟံၣ်ခိၣ်ဒုးအထိးနါဒီးထးဘိတက့ၢ်. အန့ၣ်ဒီး, ပှၤတဂၤဂၤမ့ၢ်လီၤတဲာ်ဒီးသံန့ၣ်, သုမူသုဒါတအိၣ်ဘၣ်လီၤ.

⁹ သူၣ်လီၤဖျးလီၤတၢ်မုၢ်တၢ်ဘိအဂၤတမံၤမံၤတပူၤဃီဖဲစံာ်ပျီ လၢသုသူၣ်လီၤစပံးမုၢ်တဖၣ်န့ၣ်တဂ့ၤ. သုမ့ၢ်မၤဒ်န့ၣ်ဒီး, သုကဘၣ်တၢ်တြီမၤတံာ်တာ်သုလၢသုကသူဘၣ်စပံးသၣ်တဖၣ်မ့ၢ်ဂ့ၤ တၢ်မုၢ်တၢ်ဘိအဂၤအတၢ်ဟ့ၣ်ထီၣ်မ့ၢ်ဂ့ၤန့ၣ်လီၤ.

¹⁰ လၢသုကထဲၣ်တၢ်အဂီၢ်န့ၣ်, ထီထီၣ်ဂီၤဖံးဖါတဒုဃုာ်ဒီးကသ့ၣ် ယီၤတဒုတဂ့ၤ.

¹¹ ကူသိးတၢ်ကူတၢ်သိးလၢတၢ်မၤအီၤခီဖျိတၢ်ထါဃါဃုာ်သိဆူၣ် ဒီးလုၣ်န့ၣ်တဂ့ၤ.

¹² ဆးန့ၢ်တၢ်အနွံတဖၣ်လၢသုကူသုသိးတဖၣ်အနၢၣ်လွံၢ်နၢၣ်အလိၤတက့ၢ်.

ယူဒၤအတၢ်သိၣ်တၢ်သီတဖၣ်လၢအဘၣ်ဃးဒီးတၢ်ကဆှီထီၣ်က့ၤလၢတၢ်မံဃုာ်အိၣ်ဃုာ်

¹³ ပစံးဒၣ်ကလိာ်, ပှၤတဂၤဒိးတ့ဒိးဖျီအသးဒီးပိာ်မုၣ်ဖိတဂၤ ဒီးလၢခံအဝဲပာ်လီၤအသးလၢအဝဲတအဲၣ်ဒိးပိာ်မုၣ်ဖိန့ၣ်လၢၤ ဘၣ်လီၤ.

¹⁴ လၢတၢ်န့ၣ်အဃိ, အဝဲဒုးအိၣ်ထီၣ်တၢ်ပာ်ဒ့ၣ်ပာ်ကမၣ်ကဘျံးကဘျၣ် တဖၣ်ထီဒါပိာ်မုၣ်န့ၣ်, ဒီးလိာ်ဘၢလိာ်ကွီၢ်အီၤလၢအတမ့ၢ်ဘၣ်ပှၤမုၣ်ကနီၤတဂၤဖဲအဝဲသ့ၣ်ဒိးတ့ဒိးဖျီအသးအခါန့ၣ်လီၤ.

¹⁵ တၢ်မ့ၢ်ကဲထီၣ်အသးဒ်အံၤန့ၣ်, ပိာ်မုၣ်ဖိအမိၢ်အပၢ်တဖၣ်ကဘၣ်စိာ် ထီၣ်တၢ်တ့တၢ်ဖျီအလီၢ်မံဒါလၢအဘၣ်အၢဒီးတၢ်သွံၣ်, လၢအအုၣ်အသးလၢပိာ်မုၣ်ဖိန့ၣ်မ့ၢ်ပှၤမုၣ်ကနီၤတဂၤ, ဒီးအဝဲသ့ၣ်ကဘၣ်ဒုးနဲၣ်အီၤလၢကွီၢ်ဘျီၣ်ပူၤဆူဝ့ၢ်အပှၤခိၣ် ပှၤနၢ်တဖၣ်န့ၣ်လီၤ.

¹⁶ ပိာ်မုၣ်ဖိအပၢ်ကစံးဘၣ်အဝဲသ့ၣ်ဒ်အံၤ, ‘ယဟ့ၣ်လီၤတ့ၢ်ယဖိမုၣ် ဆူပှၤတဂၤအံၤလၢတၢ်တ့တၢ်ဖျီအပူၤ, ဒီးခဲအံၤအဝဲတအဲၣ်ဒိးအီၤလၢၤဘၣ်.

¹⁷ အဝဲပာ်ဒ့ၣ်ပာ်ကမၣ်ကဘျံးကဘျၣ်ထီဒါအီၤ, စံးဝဲလၢပိာ်မုၣ်ဖိ န့ၣ်တမ့ၢ်ပှၤမုၣ်ကနီၤတဂၤဖဲအဝဲဒိးတ့ဒိးဖျီအသးဒီးအီၤ အခါဘၣ်လီၤ. ဘၣ်ဆၣ်ဖဲအံၤတၢ်အုၣ်အသးအိၣ်ဝဲလၢယဖိမုၣ်မ့ၢ်ပှၤမုၣ်ကနီၤတဂၤန့ၣ်လီၤ. ကွၢ်ဃီၤသွံၣ်လၢအဘၣ်အၢလၢတၢ်တ့တၢ်ဖျီအလီၢ်မံဒါအလိၤတက့ၢ်.

¹⁸ အန့ၣ်ဝံၤဒီး, ဝ့ၢ်အပှၤခိၣ်ပှၤနၢ်တဖၣ်ကဘၣ်ဖီၣ်ဝၤတဂၤန့ၣ်ဒီး တီၢ်အီၤန့ၣ်လီၤ.

¹⁹ အဝဲကဘၣ်အီၣ်လိးစ့ၢ်ကီးအီၤစ့အဘ့ၣ်တကယၤဒီးဟ့ၣ်စ့ န့ၣ်ဆူပိာ်မုၣ်ဖိအပၢ်, မ့ၢ်လၢပှၤတဂၤန့ၣ်ဟဲစိာ်တၢ်မဲာ်ဆှး ဆူ ပှၤအံၣ်စရ့လးမုၣ်ဖိတဂၤအအိၣ်အဃိန့ၣ်လီၤ. အါန့ၢ်အန့ၣ်ပိာ်မုၣ်ဖိန့ၣ်ကဘၣ်မ့ၢ်ထွဲဒံးဒၣ်အဝဲအမါဒီးဖဲ အဝဲ အိၣ်မူဒံးအဖၢမုၢ်န့ၣ်မၤလီၤဖှၣ်အသးဒီးပိာ်မုၣ်ဖိန့ၣ်တသ့ဝဲနီတစုဘၣ်.

²⁰ မ့မ့ၢ်တၢ်ပာ်ဒ့ၣ်ပာ်ကမၣ်န့ၣ်မ့ၢ်ဘၣ်ဝဲတီဝဲဒီးတၢ်အုၣ်အသး မ့ၢ်တအိၣ်နီတမံၤလၢပိာ်မုၣ်ဖိန့ၣ်မ့ၢ်ပှၤမုၣ်ကနီၤတဂၤဘၣ်ဒီး,

²¹ အန့ၣ်တစု, အဝဲသ့ၣ်ကဘၣ်ကိးထီၣ်ကွံာ်အီၤလၢအဝဲအပၢ်အဟံၣ်အကျဲစၢၤ, တၢ်လီၢ်ဖဲအဝဲအဝ့ၢ်အပှၤပိာ်ခွါတဖၣ်ကဘၣ်ကွံာ်သံအီၤလၢလၢၢ် န့ၣ်လီၤ. အဝဲမၤတ့ၢ်တၢ်လီၤမဲာ်ဆှးတမံၤလၢပပှၤဂီၢ်မုၢ်အကျါ ခီဖျိမံဃုာ်အိၣ်ဃုာ်တ့ၢ်ဒီးပှၤပိာ်ခွါတချုးဒံးလၢအဝဲဒိးတ့ဒိးဖျီအသးဘၣ်, ဖဲအဝဲအိၣ်ဆိးဒံးဒၣ်လၢအပၢ်အဟံၣ်အခါအဃိန့ၣ်လီၤ. လၢကျဲဒ်အံၤန့ၣ်သုကပူၤဖျဲးဒီးတၢ်အၢတၢ်သီအံၤန့ၣ်လီၤ.

²² ပိာ်ခွါတဂၤမ့ၢ်ဘၣ်တၢ်ဖီၣ်န့ၢ်အီၤလၢအမံဃုာ်ဒီးပှၤအဂၤတဂၤ အမါအဃိန့ၣ်, အဝဲသ့ၣ်ခံဂၤလိာ်ကဘၣ်တၢ်မၤသံကွံာ်အီၤန့ၣ်လီၤ. လၢကျဲဒ်သိးအံၤန့ၣ်သုကပူၤဖျဲးဒီးတၢ်အၢတၢ်သီ အံၤန့ၣ်လီၤ.

²³ ပစံးဒၣ်ကလိာ်, ပှၤပိာ်ခွါတဂၤဘၣ်တၢ်ဖီၣ်န့ၢ်အီၤလၢဝ့ၢ်တဖျၢၣ်အပူၤ, လၢအမံဃုာ်အိၣ်ဃုာ်ဒီးပှၤပိာ်မုၣ်ဖိတဂၤလၢအမၤတ့ၢ်တၢ်တ့တၢ် ဖျီအတၢ်အၢၣ်လီၤဆူပှၤအဂၤတဂၤအဃိန့ၣ်လီၤ.

²⁴ သုကဘၣ်ထုးထီၣ်ကွံာ်အဝဲသ့ၣ်ဆူဝ့ၢ်အချၢဒီးကွံာ်သံအီၤလၢလၢၢ်န့ၣ်လီၤ. ပိာ်မုၣ်ဖိန့ၣ်ကဘၣ်သံဝဲမ့ၢ်လၢအဝဲတကိးထီၣ်ဃ့လၢတၢ်မၤစၢၤအဂီၢ်, ဖဲအဝဲအိၣ်ဒၣ်လၢဝ့ၢ်တဖျၢၣ်အပူၤ, တၢ်လီၢ်ဖဲအဝဲကိးပှၤနၢ်ဟူအီၤသ့ဝဲအဃိန့ၣ်လီၤ. ဒီးပိာ်ခွါန့ၣ်ကဘၣ်သံဝဲမ့ၢ်လၢအမံဃုာ်အိၣ်ဃုာ်ဒီးပိာ်မုၣ် ဖိတဂၤလၢအမၤတၢ်တ့တၢ်ဖျီအတၢ်အၢၣ်လီၤဝံၤလံအဃိန့ၣ်လီၤ. လၢကျဲဒ်အံၤန့ၣ်သုကပူၤဖျဲးဒီးတၢ်အၢတၢ်သီၤအံၤန့ၣ်လီၤ.

²⁵ ပစံးဒၣ်ကလိာ်ပှၤပိာ်ခွါတဂၤကမၤဆူၣ်မၤစိးပိာ်မုၣ်ဖိတဂၤလၢ အမၤတ့ၢ်တၢ်တ့တၢ်ဖျီအတၢ်အၢၣ်လီၤဆူပှၤအဂၤတဂၤဝံၤလံ, လၢအဝ့ၢ်အချၢန့ၣ်လီၤ. အန့ၣ်တစု, ထဲပိာ်ခွါတဂၤဧိၤကဘၣ်တၢ်မၤသံကွံာ်အီၤလီၤ.

²⁶ တၢ်တဘၣ်မၤပိာ်မုၣ်ဖိသၣ်န့ၣ်လၢတၢ်နီတမံၤဘၣ်, မ့ၢ်လၢအဝဲတမၤတ့ၢ်တၢ်ဒဲးဘးတမံၤလၢကြၢးဘၣ်သံဝဲဘၣ်အဃိန့ၣ်လီၤ. ကွီၢ်အံၤမ့ၢ်ဒၣ်တၢ်တမံၤဃီဒီးပှၤပိာ် ခွါတဂၤဖဲအထီဒါဘၣ်ပှၤပိာ်ခွါအဂၤတဂၤဒီးမၤသံအီၤန့ၣ်လီၤ.

²⁷ ပှၤပိာ်ခွါတဂၤန့ၣ်မၤဆူၣ်မၤစိးပိာ်မုၣ်ဖိတဂၤလၢအမၤတၢ်တ့ တၢ်ဖျီအတၢ်အၢၣ်လီၤဝံၤလံလၢဝ့ၢ်အချၢ, ဒီးပိာ်မုၣ်ဖိကိးထီၣ်လၢ တၢ်မၤစၢၤအဂီၢ်ဒၣ်လဲာ်, ပှၤတအိၣ်နီတဂၤလၢကမၤစၢၤအီၤန့ၣ်ဘၣ်.

²⁸ ပစံးဒၣ်ကလိာ်ပှၤပိာ်ခွါတဂၤဘၣ်တၢ်ဖီၣ်န့ၢ်အီၤလၢအမၤဆူၣ်မၤ စိးပိာ်မုၣ်ဖိတဂၤလၢအတမၤဘၣ်ဒံးတၢ်တ့တၢ်ဖျီအတၢ်အၢၣ်လီၤ ဘၣ်လီၤ.

²⁹ အဝဲကဘၣ်ဟ့ၣ်တၢ်အပှ့ၤလၢပိာ်မုၣ်ဖိသၣ်န့ၣ်အဂီၢ်ဆူအပၢ်အအိၣ်စ့ညၣ်အဘ့ၣ်ယဲၢ်ဆံ, ဒီးပိာ်မုၣ်ဖိသၣ်ကဘၣ်ကဲထီၣ်အဝဲအမါလီၤ. အဂ့ၢ်ဒ်အံၤအဝဲဖီၣ်ဆူၣ်ပိာ်မုၣ်ဖိသၣ်န့ၣ်ဒ်သိးကအိၣ်ဃုာ်ဝဲအဃိလီၤ. လၢအတၢ်အိၣ်မူ ဒီတစိၤညါန့ၣ်, အဝဲမၤလီၤဖှၣ်အသးဒီးပိာ်မုၣ်ဖိသၣ်န့ၣ်တသ့ နီတစုဘၣ်. အဝဲကဘၣ်ဟ့ၣ်စ့အဘ့ၣ်ယဲၢ်ဆံဒ်တလးမူးပိာ်မုၣ်အပှ့ၤအသိးဆူ ပိာ်မုၣ်ဖိအပၢ်အအိၣ်, ဒီးပိာ်မုၣ်ဖိန့ၣ်ကဘၣ်ကဲထီၣ်အဝဲအ မါ, မ့ၢ်လၢအဝဲမၤဆူၣ်တ့ၢ်အီၤလၢကမံဃုာ်အိၣ်ဃုာ်ဒီးအီၤအဂီၢ် အဃိန့ၣ်လီၤ. ဖဲအဝဲအိၣ်မူဒံးဝဲအဆၢကတီၢ်န့ၣ်ပာ်မၢ်ကွံာ်ပိာ်မုၣ်ဖိန့ၣ် တသ့နီတစုဘၣ်.

³⁰ ပှၤတဘၣ်မၤမဲာ်ဆှးအပၢ်နီတဂၤခီဖျိမံဃုာ်အိၣ်ဃုာ်ဒီးအဝဲ အပၢ်အမါတဖၣ်အကျါတဂၤဂၤအဃိန့ၣ်ဘၣ်.