လံာ်သိၣ်လီၤသီလီၤတၢ် 16 - Sgaw Karen Common Bible

ဘူၣ်လဲၤကပာ်

¹ မၤလၤကပီၤယွၤသုကစၢ်ယွၤခီဖျိတၢ်မၤဘူၣ်လဲၤကပာ်လၢလါအါ ဘံာ်အပူၤန့ၣ်တက့ၢ်. လၢလါန့ၣ်အပူၤအမုၢ်တနံၤန့ၣ်, အဝဲမၤထူၣ်ဖျဲးသုလၢကီၢ်အဲၤကူပတူးန့ၣ်လီၤ.

² လဲၤဆူတၢ်ဘူၣ်ထီၣ်ဘါထီၣ်အလီၢ်တတီၤဒီးဖဲန့ၣ်မၤသံသုသိ အကျါတဒုမ့တမ့ၢ်သုဂီၤဘုၣ်ဂီၤဖံးအကျါတဒုလၢဘူၣ်လဲၤကပာ် အတၢ်အီၣ်အဂီၢ်လၢတၢ်မၤလၤကပီၤယွၤသုကစၢ်အဂီၢ်န့ၣ်တက့ၢ်.

³ ဖဲသုအီၣ်တၢ်အီၣ်အံၤန့ၣ်, အီၣ်ကိၣ်လၢအဘၣ်တၢ်မၤအီၤဒီးကိၣ်မံၣ်န့ၣ်တဂ့ၤ. လၢနွံသီအတီၢ်ပူၤန့ၣ်သုကဘၣ်အီၣ်ကိၣ်လၢတၢ်တမၤ အီၤဒီးကိၣ်မံၣ်ဘၣ်, ဒ်သုမၤအီၤဖဲသုဟးထီၣ်လၢကီၢ်အဲၤကူပတူး အပူၤချ့ဒံးချ့ဒူးအသိးန့ၣ်လီၤ. အီၣ်ကိၣ်အံၤတက့ၢ်. တၢ်န့ၣ်ကဘၣ်တၢ်ကိးအီၤလၢတၢ်နးတၢ်ဖှီၣ်အကိၣ်, ဒ်သိးဒီးဖဲသုအိၣ်မူအဆၢကတီၢ်န့ၣ်သုကသ့ၣ်နီၣ်ထီၣ်က့ၤမုၢ် တနံၤဖဲသုဟးထီၣ်လၢကီၢ်အဲၤကူပတူးအပူၤ, လၢအမ့ၢ်တၢ်နးတၢ်ဖှီၣ်အလီၢ်န့ၣ်လီၤ.

⁴ လၢနွံသီအတီၢ်ပူၤန့ၣ်, ပှၤလၢအအိၣ်လၢသုကီၢ်ပူၤတဘၣ်အိၣ်ဒီး ကိၣ်မံၣ်လၢအဟံၣ်ပူၤနီတဂၤဘၣ်. ဒီးဆၣ်ဖိကီၢ်ဖိလၢအဘၣ်တၢ်မၤသံအီၤအညၣ်လၢမုၢ်နံၤအဆိကတၢၢ် တနံၤအမုၢ်တဟါန့ၣ်ကဘၣ်တၢ်အီၣ်အီၤလၢတနၤဃီအတီၢ်ပူၤန့ၣ်လီၤ.

⁵ မၤသံဘူၣ်လဲၤကပာ်အဆၣ်ဖိကီၢ်ဖိတဖၣ်ဖဲဒၣ်တၢ်ဘူၣ်ထီၣ်ဘါထီၣ် အလီၢ်တတီၤဧိၤဒီးတမ့ၢ်ဘၣ်လၢတၢ်လီၢ်အဂၤ, လၢကီၢ်လၢယွၤ, သုကစၢ်ယွၤဟ့ၣ်လီၤသုန့ၣ်ဘၣ်.

⁶ မၤအီၤဖဲမုၢ်လီၤနုာ်အကတီၢ်, တကတီၢ်ဃီဖဲမုၢ်တနံၤလၢသုဟး ထီၣ်တ့ၢ်လၢကီၢ်အဲၤကူပတူးအပူၤန့ၣ်တက့ၢ်.

⁷ ချီတၢ်ညၣ်ဒီးအီၣ်အီၤဖဲတၢ်ဘူၣ်ထီၣ်ဘါထီၣ်အလီၢ်တတီၤန့ၣ်တ က့ၢ်. ဒီးမုၢ်ဆ့ၣ်ထီၣ်တနံၤန့ၣ်က့ၤကဒါက့ၤဆူဟံၣ်တက့ၢ်.

⁸ မၤကဒီးဆူညါဃုသီန့ၣ်သုဘၣ်အီၣ်ကိၣ်လၢတဘၣ်တၢ်မၤအီၤဒီး ကိၣ်မံၣ်ဘၣ်န့ၣ်လီၤ. ဒီးလၢနွံသီတသီန့ၣ်အိၣ်ဖှိၣ်ရိဖှိၣ်လၢတၢ်ဘူၣ်ထီၣ်ဘါထီၣ် ယွၤသုကစၢ်ယွၤအဂီၢ်, ဒီးတၢ်လၢမုၢ်နံၤအဝဲန့ၣ်မၤတၢ်နီတမံၤတဂ့ၤ.

ဘူၣ်တၢ်ကူးက့ၤဝံၤအကတီၢ်

^9-10 ဂံၢ်နွံနွံစးထီၣ်လၢသုစးထီၣ်ကူးဘုဧိၤဟုဧိၤ, ဝံၤဒီးမၤတၢ်ကူးက့ၤဝံၤအကတီၢ်အဘူၣ်လၢတၢ်မၤလၤကပီၤယွၤသု ကစၢ်ယွၤအဂီၢ်ခီဖျိတၢ်ဟဲစိာ်န့ၢ်အီၤတၢ်သးအိၣ်အတၢ်မၤဘူၣ်, ကၢကီၣ်သဃီၤဒီးတၢ်ဆိၣ်ဂ့ၤလၢအဟ့ၣ်တ့ၢ်သုန့ၣ်တက့ၢ်.

¹¹ သူၣ်ခုသးခုလၢအမဲာ်ညါ, ဃုာ်ဒီးသုဖိတဖၣ်, သုကုၢ်သုပှၤတဖၣ်ဒီးပှၤလ့ၤဝံဖိတဖၣ်, ပှၤတခီဘီမုၢ်ဖိတ ဖၣ်, ပှၤဖိၣ်ဃဲတဖၣ်, ဒီးပှၤမုၣ်ကမဲတဖၣ်လၢအအိၣ်ဆိးလၢသုဝ့ၢ်တဖၣ်ပူၤန့ၣ်တက့ၢ်. မၤတၢ်အံၤဖဲတၢ်ဘူၣ်ထီၣ်ဘါထီၣ်အလီၢ်တတီၤန့ၣ်တက့ၢ်.

¹² မၤလီၤတံၢ်လၢသုစူၢ်တၢ်မၤလိာ်တဖၣ်အံၤတက့ၢ်. သးပ့ၤနီၣ်လၢသုမ့ၢ်တ့ၢ်ကုၢ်တဖၣ်လၢကီၢ်အဲၤကူပတူးအပူၤန့ၣ် တဂ့ၤ.

ဘူၣ်ဒဲ

¹³ တုၤသုယီၢ်သုဘုဧိၤဟုဧိၤခဲလၢာ်ဒီးသုစံၢ်လီၤသုစပံးသၣ် တဖၣ်ဝံၤခဲလၢာ်န့ၣ်မၤဘူၣ်ဒဲလၢနွံသီအတီၢ်ပူၤတက့ၢ်.

¹⁴ သူၣ်ခုသးခုလၢဘူၣ်ပူၤဃုာ်ဒီးသုဖိတဖၣ်, သုကုၢ်သုပှၤတဖၣ်ဒီးပှၤလ့ၤဝံဖိတဖၣ်, ပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်, ဒီးပှၤမုၣ်ကမဲတဖၣ်လၢအအိၣ်ဆိးလၢဝ့ၢ်တဖၣ်အပူၤတက့ၢ်.

¹⁵ မၤလၤကပီၤယွၤသုကစၢ်ယွၤခီဖျိတၢ်မၤဘူၣ်အံၤလၢနွံသီ အတီၢ်ပူၤဖဲတၢ်ဘူၣ်ထီၣ်ဘါထီၣ်အလီၢ်တတီၤတက့ၢ်. သူၣ်ခုသးခုတက့ၢ်. အဂ့ၢ်ဒ်အံၤ, ယွၤဆိၣ်ဂ့ၤတ့ၢ်သုတၢ်ကူး က့ၤဒီးသုတၢ်မၤန့ၣ်လီၤ.

¹⁶ ကယဲၢ်ပှၤပိာ်ခွါခဲလၢာ်လၢသုပှၤကလုာ်အကျါကဘၣ်ဟဲ ဘူၣ်ထီၣ်ဘါထီၣ်ယွၤတနံၣ်သၢဘျီဖဲတၢ်ဘူၣ်ထီၣ်ဘါထီၣ်အလီၢ်တတီၤ, ဖဲဘူၣ်လဲၤကပာ်အကတီၢ်, ဘူၣ်တၢ်ကူးက့ၤအကတီၢ်, ဒီးဘူၣ်ဒဲအကတီၢ်န့ၣ်လီၤ.

¹⁷ ပှၤတဂၤဘၣ်တဂၤစုာ်စုာ်ကဘၣ်ဟဲစိာ်တၢ်ဟ့ၣ်တမံၤ, ဒ်အဝဲမၤသ့အသိး, ကၢကီၣ်သဃီၤဒီးတၢ်ဆိၣ်ဂ့ၤလၢယွၤသုကစၢ် ယွၤဟ့ၣ်လီၤအီၤန့ၣ်လီၤ.

တၢ်စံၣ်ညီၣ်တီအတၢ်ပၢတၢ်ဆှၢ

¹⁸ ဃုထၢပာ်လီၤပှၤစံၣ်ညီၣ်ကွီၢ်တဖၣ်ဒီးပဒိၣ်ပပှၢ်အဂၤတဖၣ်လၢ ကယဲၢ်ဝ့ၢ်တဖၣ်အပူၤလၢယွၤသုကစၢ်ယွၤဟ့ၣ်လီၤသုန့ၣ်တက့ၢ်. ပှၤတဖၣ်န့ၣ်ကဘၣ်စံၣ်ညီၣ်ပှၤဂီၢ်မုၢ်တအိၣ်ဘၣ်ဒီးတၢ်ကွၢ်မဲာ်ဘၣ် န့ၣ်လီၤ.

¹⁹ တၢ်စံၣ်ညီၣ်တတီတဘၣ်အိၣ်ဒီးအဝဲသ့ၣ်မ့ၢ်ဂ့ၤ, အဝဲသ့ၣ်တဘၣ်အိၣ်ဒီးတၢ်ကွၢ်မဲာ်မ့ၢ်ဂ့ၤလၢအတၢ်စံၣ်ညီၣ်တဖၣ် အပူၤဘၣ်. ဒီးအဝဲသ့ၣ်တဘၣ်တူၢ်လိာ်ခိၣ်ဖးလာ်ဆှိးဘၣ်. အဂ့ၢ်ဒ်အံၤ, ခိၣ်ဖးတဖၣ်န့ၣ်မၤဘျီၣ်ပှၤကူၣ်သ့ဒီးပှၤတီပှၤလိၤတဖၣ်အမဲာ်, ဒီးဒုးကဲထီၣ်အဝဲသ့ၣ်လၢပှၤဟ့ၣ်လီၤတၢ် စံၣ်ညီၣ်လၢအတတီတဖၣ်န့ၣ်လီၤ.

²⁰ ထီဘိမၤတၢ်တီတီလိၤလိၤဒီးစံၣ်ညီၣ်တီတၢ်ဒ်သိးသုကမၤန့ၢ် ကီၢ်န့ၣ်လၢယွၤသုကစၢ်ဟ့ၣ်သုဒီးကအိၣ်ဆိးထွဲဘၣ်ဒံးဖဲန့ၣ် အဂီၢ်တက့ၢ်.

²¹ ဖဲသုမၤတၢ်လုၢ်လီၢ်တခါလၢယွၤသုကစၢ်ယွၤအဂီၢ်န့ၣ်, ပာ်လီၤကစၢ်မုၣ်အၡ့ရၤအတၢ်ပနီၣ်လၢတၢ်မၤအီၤလၢသ့ၣ်တခါဖဲ အကပၤတဂ့ၤ.

²² ဒီးပာ်လီၤလၢၢ်ထူၣ်လၢတၢ်ဘါထီၣ်တၢ်ဂီၤတၢ်ဖီၣ်အဂီၢ်နီတခါတဂ့ၤ. ယွၤသးဟ့အဝဲသ့ၣ်န့ၣ်လီၤ.