လံာ်ဒၤနံးယ့လး 1 - Sgaw Karen Common Bible

စီၤဒၤနံးယ့လးဒီးအတံၤသကိးတဖၣ်အပူ ( ၁:၁-၆:၂၈ ) ပှၤသူၣ်ဘီၣ်သးစၢ်တဖၣ်လၢစီၤနဘူၤကးန့စၢ်အနီပူၤ

¹ လၢကီၢ်ယူဒၤအပူၤဖဲစီၤပၤစီၤယဟိၤယါကံၣ်ပၢတၢ်သၢနံၣ်တနံၣ် န့ၣ်ကီၢ်ဘၤဘူၤလိၣ်အစီၤပၤစီၤနဘူၤကးန့စၢ်ဟဲကဝီၤဃာ်ဝ့ၢ် ယရူၤရှလ့ၣ်ဒီးဒုးတၢ်ဒ်သိးကမၤန့ၢ်အီၤန့ၣ်လီၤ.

² ဒီးယွၤဟ့ၣ်လီၤကွံာ်ကီၢ်ယူဒၤအစီၤပၤစီၤယဟိၤယါကံၣ်ဆူအစု ပူၤဃုာ်ဒီးတၢ်လုၢ်ဒိၣ်ပှ့ၤဒိၣ်တနီၤလၢယွၤအတၢ်လုၢ်ဟံၣ်အပူၤ န့ၣ်လီၤ. ဒီးက့ၤဖီၣ်န့ၢ်ဝဲပှၤယူဒၤဖိတနီၤဆူကီၢ်ၡံနၢ်ဒီးပာ်ဝဲလီခီ ထူလီခီစ့တဖၣ်န့ၣ်, လၢအကစၢ်တဖၣ်အဟံၣ်အတၢ်ပာ်ဖှိၣ် အလီၢ်ပူၤန့ၣ်လီၤ.

³ ဒီးစီၤပၤနဘူၤကးန့စၢ်ဟ့ၣ်လီၤအကလုၢ်ဆူအပဒိၣ်ခိၣ်ကျၢၢ် စီၤအၤၡပနးဒ်သိးကဃုထၢန့ၢ်ပှၤသးစၢ်တနီၤလၢအမ့ၢ် စီၤလိၣ်စီၤပၤဒီးပဒိၣ်ပပှၢ်အဒူၣ်ဖိထၢဖိလၢပှၤအံၣ်စရ့လးဖိ လၢအဘၣ်တၢ်စိာ်မၢကဲကုၢ်အီၤတဖၣ်အကျါန့ၣ်လီၤ.

⁴ ပှၤသးစၢ်တဖၣ်အံၤကဘၣ်မ့ၢ်ပှၤဒိၣ်တၢ်ဂ့ၤ, ပှၤအိၣ်ဒီးတၢ်ကူၣ်တၢ်ဆး, ပှၤအိၣ်ဒီးတၢ်သ့ၣ်ညါ, ပှၤမၤလိန့ၢ်တၢ်ချ့, ဒီးမဲၣ်သူမဲၣ်ဂီၤတအိၣ်ဘၣ် လၢအလိၤဒ်သိးကကြၢးဒီးတၢ်ဖံးတၢ်မၤလၢစီၤလိၣ် စီၤပၤအနီပူၤအဂီၢ်န့ၣ်လီၤ. စီၤအၤၡပနးကဘၣ် သိၣ်လိအဝဲသ့ၣ်လၢကသ့ဖး, သ့ကွဲးကီၢ်ဘၤဘူၤလိၣ်အကျိာ် ဒီးအလံာ်အလဲၢ်န့ၣ်လီၤ.

⁵ ဒီးစီၤပၤမၤလိာ်တ့ၢ်စ့ၢ်ကီးလၢပှၤသးစၢ်တဖၣ်အံၤကဘၣ်တၢ်ဒုး အီၣ်ဒုးအီအီၤကိးနံၤဒဲးတမံၤဃီဒ်စီၤပၤအတၢ်အီၣ်ဒီးစပံး ထံလၢစီၤပၤအီဝဲတဖၣ်အသိးန့ၣ်လီၤ. တုၤတၢ်သိၣ်လိမၤယုၤ အဝဲသ့ၣ်သၢနံၣ်ဝံၤအလီၢ်ခံန့ၣ်ကဘၣ်တၢ်ပာ်ဖျါထီၣ်အီၤဆူ စီၤပၤအမဲာ်ညါန့ၣ်လီၤ.

⁶ ပှၤလၢအဘၣ်တၢ်ဃုထၢတ့ၢ်အီၤတဖၣ်အကျါန့ၣ်မ့ၢ်ဝဲစီၤဒၤနံးယ့လး, စီၤဃနၤနယၤ, စီၤမံၡအ့လးဒီးစီၤဧစၤရယၤန့ၣ်လီၤ. အဝဲသ့ၣ်ခဲလၢာ်န့ၣ်ဟဲထီၣ်လၢယူဒၤအဒူၣ်အပူၤလီၤ.

⁷ စီၤပၤအပဒိၣ်ခိၣ်ကျၢၢ်ဟ့ၣ်က့ၤအဝဲသ့ၣ်လၢအမံၤအသီဒီး စီၤဒၤနံးယ့လးဘၣ်တၢ်ကိးအီၤလၢစီၤဘ့ၤလးတၡါစၢ်, စီၤဃနၤနယၤန့ၣ်လၢစီၤၡၤဒရး, စီၤမံၡအ့လးန့ၣ်လၢစီၤမ့ၤ ၡး, ဒီးစီၤဧစၤရယၤန့ၣ်လၢစီၤဧဘ့ၤဒနကိၤန့ၣ်လီၤ.

⁸ စီၤဒၤနံးယ့လးပာ်လီၤအသးလၢအသုတမၤဘၣ်အၢလီၤအသး ခီဖျိတၢ်အီၣ်စီၤပၤအတၢ်အီၣ်ဒီးအီစပံးထံလၢစီၤပၤအီဝဲဘၣ် အဃိ, ဃ့ကညးဝဲစီၤအၤၡပနးလၢကမၤစၢၤအီၤ,

⁹ ဒီးကစၢ်ယွၤမၤတ့ၢ်ဝဲဒ်သိးစီၤအၤၡပနးကသူၣ်အိၣ်သးအိၣ် စီၤဒၤနံးယ့လးန့ၣ်လီၤ.

¹⁰ ဘၣ်ဆၣ်ဒီးစီၤအၤၡပနးပျံၤဘၣ်စီၤပၤသတးဒီးစံးဘၣ်စီၤဒၤနံးယ့လး, စီၤပၤစံၣ်ညီၣ်တဲာ်တၢ်လၢသုကဘၣ်အီၣ်ဒီးအီဝဲတဖၣ်လီၤ. သုမ့ၢ်တဖျါပှဲၤဂံၢ်ပှဲၤဘါထဲသိးဒီးပှၤသးစၢ်အဂၤတဖၣ်န့ၣ်, စီၤပၤကမၤသံကွံာ်ယၤလီၤ.

¹¹ မၤသးဒ်န့ၣ်ဒီးစီၤဒၤနံးယ့လးလဲၤဆူပှၤအခိၣ်လၢစီၤအၤၡပနးပာ် လီၤအီၤဒ်သိးအကကွၢ်ထွဲအဝဲဒီးအတံၤသကိးသၢဂၤအအိၣ် ဒီးစံးဝဲ,

¹² မၤကွၢ်ပှၤထဲအသီတဆံတက့ၢ်. ဟ့ၣ်ပှၤတၢ်ဒိးတၢ်လၣ်တဖၣ် လၢပကအီၣ်ဒီးထံလၢပကအီအဂီၢ်တက့ၢ်.

¹³ အန့ၣ်ဝံၤဒီးထိၣ်သတြီၤကွၢ်ပဝဲဒီးပှၤသးစၢ်တဖၣ်လၢအအီၣ် စီၤပၤအတၢ်အီၣ်တၢ်အီတဖၣ်တက့ၢ်. ဒီးပာ်လီၤနတၢ်စံၣ်ညီၣ်တဲာ်ဒ်ပအိၣ် ဖျါလၢနမဲာ်ညါအသိးန့ၣ်တက့ၢ်.

¹⁴ လၢတၢ်န့ၣ်အဃိအဝဲဘၣ်သူၣ်ဘၣ်သးဒီးပျဲအဝဲသ့ၣ်ဒီးမၤကွၢ် အီၤအသီတဆံန့ၣ်လီၤ.

¹⁵ တုၤတၢ်ဆၢကတီၢ်ပှဲၤထီၣ်ဒီးအဝဲသ့ၣ်ဖျါအိၣ်ဆူၣ်အိၣ်ချ့ဒီး အဂံၢ်အဘါဆူၣ်န့ၢ်ဒံးပှၤအဂၤခဲလၢာ်လၢအအီၣ်တ့ၢ်စီၤပၤ အတၢ်အီၣ်တၢ်အီန့ၣ်လီၤ.

¹⁶ စးထီၣ်ဖဲန့ၣ်, ပှၤအခိၣ်လၢအကွၢ်ထွဲတၢ်အီၣ်န့ၣ်ဟံးထီၣ်ကွံာ် တၢ်အီၣ်အဝံၣ်ဒီးစပံးထံလၢကဘၣ်အီဝဲန့ၣ်ဒီးဟ့ၣ်အဝဲသ့ၣ်လၢ တၢ်ဒိးတၢ်လၣ်တဖၣ်န့ၣ်လီၤ.

¹⁷ ကစၢ်ယွၤဟ့ၣ်လီၤတ့ၢ်ပှၤသးစၢ်လွံၢ်ဂၤန့ၣ်လၢတၢ်သ့ၣ်ညါဒီး တၢ်သ့တၢ်ဘၣ်ဘၣ်ဃးဒီးကယဲၢ်တၢ်မၤလိမၤဒိးဒီးတၢ်ဆိ ကမိၣ်အဒိၣ်အယိာ်အတၢ်ကူၣ်သ့န့ၣ်လီၤ. လၢတၢ်န့ၣ်တဖၣ်န့ၣ် အမဲာ်ညါကစၢ်ယွၤဟ့ၣ်လီၤတ့ၢ်စီၤဒၤနံးယ့လးတၢ်သ့တၢ်ဘၣ် လၢကတဲဖျါတၢ်ထံၣ်လၢညါခီဒီးတၢ်မံမီၢ်တဖၣ်အခီပညီ န့ၣ်လီၤ.

¹⁸ လၢသၢနံၣ်အကတၢၢ်ဒ်စီၤပၤပာ်လီၤတ့ၢ်တၢ်ဆၢကတီၢ်အသိးန့ၣ် စီၤအၤၡပနးလဲၤဆှၢထီၣ်ပှၤသးစၢ်ခဲလၢာ်ဆူစီၤပၤနဘူၤကးန့စၢ် အမဲာ်ညါန့ၣ်လီၤ.

¹⁹ ဒီးစီၤပၤကတိၤတ့ၢ်တၢ်ဒီးအဝဲသ့ၣ်ခဲလၢာ်ဒီးစီၤဒၤနံးယ့လး, စီၤဃနၤနယၤ, စီၤမံၡအ့လးဒီးစီၤဧစၤရယၤထုးန့ၢ်တ့ၢ် စီၤပၤအသးဒိၣ်န့ၢ်ဒံးပှၤအဂၤတဂၤလၢ်လၢ်န့ၣ်လီၤ. လၢတၢ်န့ၣ်အဃိအဝဲသ့ၣ်ဘၣ်တၢ်ဂံၢ်ဃုာ်အီၤလၢပှၤကူၣ်လိာ် တၢ်တဖၣ်အကျါလၢစီၤပၤအနီပူၤန့ၣ်လီၤ.

²⁰ ဒီးကယဲၢ်တၢ်ဂ့ၢ်တမံၤလၢ်လၢ်ဘၣ်ဃးတၢ်ကူၣ်သ့ဒီးတၢ်သ့ၣ် ညါနၢ်ပၢၢ်လၢစီၤပၤသံကွၢ်အီၤန့ၣ်ထံၣ်ဘၣ်ဝဲလၢပှၤလွံၢ်ဂၤအံၤ နၢ်ပၢၢ်ဝဲဂ့ၤန့ၢ်ဒံးပှၤဖးတၢ်ဟဲဝံဟဲစိာ်ဒီးပှၤသ့တၢ်အူတၢ် သမူတဂၤလၢ်လၢ်လၢအထံအကီၢ်ဒီဘ့ၣ်ညါအပူၤန့ၣ်, အစးတဆံဒၣ်လဲာ်လီၤ.

²¹ စီၤဒၤနံးယ့လးမၤဒံးတၢ်လၢစီၤပၤအနီပူၤန့ၣ်တုၤလၢစီၤပၤ စီၤကိရ့ၣ်, ပၤရၣ်အစီၤပၤဖးဒိၣ်လၢအဟဲဒုးန့ၢ်ကီၢ်ဘၤဘူၤလိၣ်, ပၢတၢ်အခီၣ်ထံးတနံၣ်န့ၣ်လီၤ.