မၤတၢ် 1 - Sgaw Karen Common Bible

¹ စီၤသီးဖံၤလူးဧၢ, လၢယလံာ်အခီၣ်ထံးတဘ့ၣ်အပူၤ, ယကွဲးတၢ်ဘၣ်ဃးကယဲၢ်တၢ်လၢယ့ၣ်ၡူးမၤဝဲဒီးသိၣ်လီၤသီ လီၤဝဲခဲလၢာ်စးထီၣ်မုၢ်တနံၤလၢအဝဲဒၣ်မၤအတၢ်မၤ,

² တုၤလီၤလၢမုၢ်တနံၤလၢယွၤဟံးထီၣ်အီၤဆူမူခိၣ်န့ၣ်လီၤ. တချုးအဘၣ်တၢ်ဟံးထီၣ်အီၤဒံးဘၣ်ဒီး, ခီဖျိသးစီဆှံအစိကမီၤန့ၣ် အဝဲဒၣ်မၤလိာ်တ့ၢ်အပှၤတၢ်မၢဖိလၢအဃုထၢတ့ၢ်ဝဲတဖၣ်တၢ်လၢ အဝဲသ့ၣ်ကဘၣ်မၤဝဲတဖၣ်န့ၣ်လီၤ.

³ အဝဲဒၣ်တူၢ်သံအသးဒီးဂဲၤဆၢထၢၣ်သမူထီၣ်က့ၤဝံၤအလီၢ် ခံလၢအသီလွံၢ်ဆံအတီၢ်ပူၤန့ၣ်, လီၣ်ဖျါထီၣ်အသးတဘျုးဘျီလၢအပျဲၢ်အဘီၣ်တဖၣ်အမဲာ်ညါ ဒီးစံးဘၣ်တဲဘၣ်အဝဲသ့ၣ်ဘၣ်ဃးယွၤအဘီမုၢ်အဂ့ၢ်န့ၣ်လီၤ. အပျဲၢ်အဘီၣ်တဖၣ်ထံၣ်ဘၣ်အီၤဒီးအဝဲသ့ၣ်အသးတဒ့ဒီဘၣ် လၢအဝဲဒၣ်မူဝဲနီၢ်နီၢ်အဂ့ၢ်န့ၣ်ဘၣ်လီၤ.

⁴ ဖဲအဝဲဒၣ်အိၣ်သကိးဒံးဒီးအဝဲသ့ၣ်အဖၢမုၢ်န့ၣ်, မၤလိာ်အဝဲသ့ၣ်ဒ်အံၤ, “ဟးထီၣ်ကွံာ်လၢဝ့ၢ်ယရူၤရှလ့ၣ်တဂ့ၤ. မ့မ့ၢ်အိၣ်ခိးသုဝဲတုၤသုန့ၢ်ဘၣ်တၢ်ဟ့ၣ်တမံၤလၢ ယစံးဘၣ်တ့ၢ်သုလၢယပၢ်အၢၣ်လီၤအီလီၤလၢအကဟ့ၣ်ဝဲန့ၣ် တက့ၢ်.

⁵ စီၤယိၤဟၣ်ဘျၢပှၤလၢထံ, မ့မ့ၢ်လၢစှၤနံၤစှၤသီအတီၢ်ပူၤန့ၣ်, သုကဘၣ်တၢ်ဘျၢသုလၢသးစီဆှံန့ၣ်လီၤ.”

ယ့ၣ်ၡူးဘၣ်တၢ်ဟံးထီၣ်အီၤဆူမူခိၣ်

⁶ တုၤပှၤတၢ်မၢဖိတဖၣ်ထံၣ်လိာ်သကိးအသးဒီး ယ့ၣ်ၡူးန့ၣ်အဝဲသ့ၣ်သံကွၢ်အီၤ, “ကစၢ်ဧၢ, ခဲကနံၣ်အံၤမ့ၢ်နကဟ့ၣ်က့ၤပှၤအံၣ်စရ့လးဖိလၢဘီမုၢ်န့ၣ်ဧါ.”

⁷ ယ့ၣ်ၡူးစံးဆၢက့ၤအဝဲသ့ၣ်, “တၢ်ဆၢကတီၢ်ဒီးတၢ်ကတီၢ်လီၤဆီတဖၣ်န့ၣ်, အိၣ်ဒၣ်လၢယပၢ်အစုပူၤလၢအကစံၣ်ညီၣ်ပာ်လီၤဝဲလၢအစိကမီၤဒၣ် ဝဲဒီးတၢ်တပျဲသုသ့ၣ်ညါတၢ်ဆၢကတီၢ်အံၤန့ၣ်ဘၣ်.

⁸ မ့မ့ၢ်တုၤသးစီဆှံဟဲလီၤလၢသုလိၤဝံၤဒီးသုကလၢ ထီၣ်ပှဲၤထီၣ်ဒီးတၢ်စိတၢ်ကမီၤ, ဒီးသုကကဲထီၣ်ပှၤအုၣ်အသးတဖၣ်လၢယဂီၢ်လၢဝ့ၢ် ယရူၤရှလ့ၣ်အပူၤ, လၢကီၢ်ယူဒၤဒီကီၢ်ညါဒီးကီၢ်ၡၤမရံ ဒီးပၢၢ်တုၤလၢဟီၣ်ခိၣ်အကတၢၢ်န့ၣ်လီၤ.”

⁹ အဝဲဒၣ်စံးတၢ်အံၤဝံၤဒီးတၢ်ဟံးထီၣ်အီၤဆူမူခိၣ်, ဒီးဖဲအပျဲၢ်အဘီၣ်တဖၣ်ကွၢ်စူၣ်အီၤအဖၢမုၢ်န့ၣ်, တၢ်အၢၣ်တလိၣ်မၤဘၢကွံာ်အီၤဒီးအဝဲသ့ၣ်တထံၣ်အီၤလၢၤဘၣ်.

¹⁰ ဖဲအဝဲသ့ၣ်ကွၢ်စူၣ်ဒံးတၢ်ဆူမူခိၣ်အကတီၢ်န့ၣ်, သတူၢ်ကလာ်ပှၤခံဂၤကူသိးတၢ်အဝါဟဲအိၣ်ဆၢ ထၢၣ်ဖဲအဝဲသ့ၣ်အကပၤ

¹¹ ဒီးစံးဝဲ, “သုဝဲပှၤကီၢ်ကၤလံၤလါဖိသ့ၣ်ဧၢ, ဘၣ်မနုၤသုအိၣ်ဆၢထၢၣ်ဖဲအံၤဒီးကွၢ်ထီၣ်တၢ်ဆူမူခိၣ်န့ၣ်လဲၣ်. ယ့ၣ်ၡူးလၢသုထံၣ်တၢ်ဟံးထီၣ်ကွံာ်အီၤလၢသုအိၣ်ဆူမူခိၣ်တဂၤအံၤ, ကဟဲက့ၤကဒါက့ၤဒ်သုထံၣ်ဘၣ်အလဲၤထီၣ်ဝဲအသိးန့ၣ်လီၤ.”

ပှၤလၢအထီၣ်က့ၤစီၤယူဒၤအလီၢ်

¹² အန့ၣ်ဒီးအပျဲၢ်အဘီၣ်တဖၣ်လၢအအိၣ်ဝဲလၢကစၢၢ်သ့ၣ်စၤယံး အဒီခိၣ်န့ၣ်, က့ၤကဒါက့ၤဝဲဆူဝ့ၢ်ယရူၤရှလ့ၣ်လၢအအိၣ်စီၤစုၤယံၤဝဲမံး လးတဝာ်န့ၣ်လီၤ.

¹³ တုၤအက့ၤတုၤလၢဝ့ၢ်ယရူၤရှလ့ၣ်န့ၣ်ဒီး, အဝဲသ့ၣ်လဲၤထီၣ်ဝဲဆူဒၢးတဖျၢၣ်အပူၤလၢဟံၣ်ထးခီတဆီ, ဒၢးတဖျၢၣ်ဃီလၢအဝဲသ့ၣ်အိၣ်ဆိးဝဲတစိၢ်တလီၢ်လၢအပူၤ န့ၣ်လီၤ. ပှၤအိၣ်ဖဲန့ၣ်တဖၣ်မ့ၢ်ဝဲစီၤပ့းတရူး, စီၤယိၤဟၣ်, စီၤယၤကိာ်, စီၤအၣ်ဒရ့း, စီၤဖံလံးပူး, စီၤသိၤမါ, စီၤဘၢ်သလီးမဲ, စီၤမးသဲ, စီၤအၤလဖဲအဖိခွါစီၤယၤကိာ်, ပှၤအဲၣ်အထံအကီၢ်စီၤၡံမိၣ်, ဒီးစီၤယၤကိာ်အဖိခွါ စီၤယူဒၤတဖၣ်လီၤ.

¹⁴ အဝဲသ့ၣ်ပာ်ဖှိၣ်ထီၣ်အသးတလီၢ်လီၢ်ဒ်သိးအကဘါထု ကဖၣ်သကိးတၢ်ဃုာ်ဒီးပိာ်မုၣ်တဖၣ်, ဒီးယ့ၣ်ၡူးအမိၢ်နီၢ်မၤရံ, ဒီးယ့ၣ်ၡူးအပုၢ်ပိာ်ခွါတဖၣ်န့ၣ်လီၤ.

¹⁵ လၢခံစှၤသီန့ၣ်စီၤပ့းတရူးဂဲၤဆၢထၢၣ်ကတိၤတၢ်လၢပှၤ စူၢ်က့ၤနာ်က့ၤယ့ၣ်ၡူးတဖၣ်အမဲာ်ညါ, ပှၤခဲလၢာ်လၢအပာ်ဖှိၣ်ထီၣ်အသးကအိၣ်အဂၤတကယၤခံဆံ, ဒီးစံးဝဲ,

¹⁶ “ယဒီပုၢ်ဝဲၢ်သ့ၣ်ဧၢ, တၢ်ကွဲးအသးလၢအပာ်ဖျါသးစီဆှံအတၢ်ဒုးစံးဒုးကတိၤစီၤဒၤ ဝံးဖဲအဝဲကတိၤဆိပာ်စၢၤဘၣ်ဃးစီၤယူဒၤလၢအမ့ၢ်ပှၤဆှၢ ပှၤလၢအလဲၤဖီၣ်ယ့ၣ်ၡူးအဂ့ၢ်န့ၣ်, ကဘၣ်လၢထီၣ်ပှဲၤထီၣ်ဝဲလီၤ.

¹⁷ စီၤယူဒၤမ့ၢ်ပှၤတဖုတကရၢဃီဒီးပှၤ, အဂ့ၢ်မ့ၢ်လၢအဘၣ်တၢ်ဃုထၢထီၣ်အီၤလၢအကလဲၤ က့ၤဖံးမၤသကိးတၢ်ဒီးပှၤအဃိန့ၣ်လီၤ.”

¹⁸ (စ့လၢစီၤယူဒၤမၤန့ၢ်ဝဲခီဖျိအမၤတၢ်လၢအအၢတမံၤန့ၣ်, အဝဲဒၣ်ပှ့ၤန့ၢ်ဟီၣ်ခိၣ်တကဝီၤ, ဒီးလီၤတဲာ်ဆှိခိၣ်လၢအပူၤန့ၣ်လီၤ. အဟၢဖၢပိၢ်ဖးဒီးအပှံာ်အကဖုတဖၣ်လီၤလဲာ်ကွံာ်ခဲလၢာ်လီၤ.

¹⁹ ပှၤအိၣ်လၢဝ့ၢ်ယရူၤၡလ့ၣ်ပူၤခဲလၢာ်နၢ်ဟူဘၣ်တၢ်မၤအသးအံၤ သတးဒီး, လၢအဝဲသ့ၣ်အကျိာ်ဒၣ်ဝဲ ကိးတၢ်လီၢ်တကဝီၤန့ၣ်လၢ, “အၤက့းလဒၤမါ”, အခီပညီမ့ၢ်ဝဲ, “တၢ်သွံၣ်အပျီန့ၣ်လီၤ.”)

²⁰ “အဂ့ၢ်ဒ်အံၤ တၢ်အိၣ်ကွဲးအသးလၢလံာ်စံးထီၣ်ပတြၢၤအပူၤစံးဝဲ, ‘မ်အဟံၣ်အဃီအိၣ်ကလီ, ဒီးပှၤသုတအိၣ် လၢအပူၤနီတဂၤတဂ့ၤ’ (စံး ၆၉:၂၅). တၢ်ကွဲးစ့ၢ်ကီးအသး, ‘အတၢ်မၤန့ၣ်မ်ပှၤအဂၤတဂၤ ကနုာ်လီၤမၤအီၤန့ၣ်တက့ၢ်’ (စံး ၁၀၉:၈).

²¹ “အန့ၣ်သတးဒီး, ပကဘၣ်ဃုထၢထီၣ်ပှၤတဂၤလၢအကဟဲပာ်ဖှိၣ် အသးဒီးပှၤဒီးကဲထီၣ်သကိးပှၤအုၣ်အသးလၢကစၢ်ယ့ၣ်ၡူးဂဲၤဆၢထၢၣ် သမူထီၣ်က့ၤလၢတၢ်သံအဂ့ၢ်န့ၣ်လီၤ. အဝဲကဘၣ်မ့ၢ်ပှၤတဂၤလၢအအိၣ်တ့ၢ်လံလၢပသိးပကျါဖဲ ကစၢ်ယ့ၣ်ၡူးလဲၤထီၣ်က့ၤလီၤဒီးပှၤဒီကတီၢ်ညါအဖၢမုၢ်,

²² စးထီၣ်လၢစီၤယိၤဟၣ်စံၣ်တဲၤတဲလီၤအတၢ်ဘျၢပှၤလၢထံအဂ့ၢ်, တုၤလီၤလၢယ့ၣ်ၡူးဘၣ်တၢ်ဟံးထီၣ်ကွံာ်အီၤလၢပအိၣ်ဆူမူခိၣ် တစုန့ၣ်လီၤ.”

²³ အန့ၣ်ဒီးအဝဲသ့ၣ်ဟ့ၣ်ထီၣ်ဝဲပှၤခံဂၤအမံၤ, စီၤယိၤသးကိးဝဲလၢစီၤဘၢ်စဘါ (တၢ်ကိးစ့ၢ်ကီးအမံၤလၢစီၤယူစတူး) ဒီးစီၤမးသံလီၤ.

²⁴ အန့ၣ်ဝံၤအဝဲသ့ၣ်ဃ့ဘါထုကဖၣ်တၢ်ဒီးစံးဝဲ, “ကစၢ်ဧၢ, ပှၤကိးဂၤဒဲးအသးအတၢ်ဆိကမိၣ်န့ၣ်နသ့ၣ်ညါနဲလီၤ. သတးဒီး, ဒုးနဲၣ်ပဝဲဒၣ်တဖၣ်အံၤလၢပှၤခံဂၤအံၤအကျါနဃုထၢတ့ၢ်နဲ ဖဲလဲၣ်တဂၤ

²⁵ လၢအကဟံးန့ၢ်စီၤယူဒၤအလီၢ်ဒ်ပှၤတၢ်မၢဖိတဂၤအသိးအဂီၢ်န့ၣ် တက့ၢ်. စီၤယူဒၤညိကွံာ်တ့ၢ်တၢ်လီၢ်န့ၣ်လၢအကလဲၤဆူအလီၢ် အကျဲဒၣ်ဝဲန့ၣ်လီၤ.”

²⁶ အန့ၣ်ဒီးအဝဲသ့ၣ်ဖီၣ်တၢ်ဖး ဒ်သိးကဃုထၢထီၣ်ပှၤတဂၤလၢပှၤခံဂၤ အကျါလီၤ. ဒီးပှၤလၢအဘၣ်တၢ်ဃုထၢထီၣ်အီၤမ့ၢ်စီၤမးသံ, ဒီးအဝဲဒၣ်အံၤဘၣ်တၢ်ပာ်ဖှိၣ်ဃုာ်အီၤလၢပှၤတၢ်မၢဖိတဆံတဂၤ အကရူၢ်ပူၤန့ၣ်လီၤ.