၂ သ့းစၤလနံ 1 - Sgaw Karen Common Bible

တၢ်ကတိၤလၢညါ

¹ လၢစီၤပီလူး, စီၤစံလၤ, ဒီးစီၤတံၤမသ့း, ဆူသ့းစၤလနံအတၢ်အိၣ်ဖှိၣ်ဖိတဖၣ်လၢအဘၣ်ဃးဒီး ပပၢ်ကစၢ်ယွၤဒီးကစၢ်ယ့ၣ်ၡူးခရံာ်အအိၣ်,

² မ်ကစၢ်ယွၤလၢအမ့ၢ်ပပၢ်, ဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုးတၢ်ဖှိၣ်ဒီးတၢ်ဃူတၢ်ဖိးတက့ၢ်.

တၢ်စံၣ်ညီၣ်ဖဲခရံာ်ဟဲက့ၤအကတီၢ်

³ ဒီပုၢ်ဝဲၢ်သ့ၣ်ဧၢ, ပဘၣ်စံးဘျုးကစၢ်ယွၤကိးဆၢကိးကတီၢ် ဒဲးလၢသုဃိလီၤ. မ့ၢ်တၢ်အကြၢးအဘၣ်တမံၤလၢပဂ့ၤမၤ အီၤလီၤ. အဂ့ၢ်ဒ်အံၤသုတၢ်စူၢ်တၢ်နာ်ဒိၣ်ထီၣ်ဝဲအဒိၣ်အအါ, ဒီးသုတၢ်အဲၣ်လိာ်ကွံလိာ်သုသးဒိၣ်ထီၣ်အါထီၣ်ဝဲဒၣ်လီၤ.

⁴ လၢတၢ်န့ၣ်အဃိ, ပနီၢ်ကစၢ်ဒၣ်ပဝဲပကတိၤတၢ်လၢသုဂ့ၢ် အိၣ်ဒီးတၢ်ပာ်ကဖၢလၢပသးလၢသုဃိ, လၢကစၢ်ယွၤ အတၢ်အိၣ်ဖှိၣ်တဖၣ်အပူၤ, ဘၣ်ဃးသုတၢ်အိၣ်ဂၢၢ်အိၣ်ကျၢၤဒီးသုတၢ်နာ်ဖဲသုလဲၤခီဖျိ ကယဲၢ်တၢ်မၤအၢမၤနးဒီးတၢ်နးတၢ်ဖှီၣ်တဖၣ်န့ၣ်လီၤ.

⁵ တၢ်သ့ၣ်တဖၣ်အံၤခဲလၢာ်အုၣ်အသးလၢကစၢ်ယွၤ အတၢ်စံၣ်ညီၣ်တီဝဲလိၤဝဲ, ဒီးလၢတၢ်န့ၣ်အဃိသုကကြၢးကဘၣ်ဒီးကစၢ်ယွၤအဘီ အမုၢ်လၢသုတူၢ်ဘၣ်တၢ်လၢအဃိန့ၣ်လီၤ.

⁶ ကစၢ်ယွၤကမၤတၢ်လၢအကြၢးဝဲဘၣ်ဝဲဒ်သိးပှၤလၢအမၤ နးမၤဖှီၣ်သုတဖၣ်ကတူၢ်ဘၣ်က့ၤတၢ်နးတၢ်ဖှီၣ်န့ၣ်လီၤ.

⁷ အဝဲဒၣ်ကမၤမုာ်ထီၣ်က့ၤသုဝဲလၢအတူၢ်ဘၣ်တၢ်နး တၢ်ဖှီၣ်, ဒီးပဝဲဒၣ်စ့ၢ်ကီးလီၤ. အဝဲဒၣ်ကမၤတၢ်အံၤဖဲကစၢ်ယ့ၣ်ၡူးအိၣ်ဖျါထီၣ်လၢမူခိၣ်ဃုာ် ဒီးအကလူးလၢအအိၣ်ဒီးအစိအကမီၤတဖၣ်,

⁸ ဒီးဟဲလီၤလၢမ့ၣ်အူလၣ်အပူၤ, ဒ်သိးအကစံၣ်ညီၣ်ပှၤတဖၣ်လၢအတအၢၣ်လီၤအီလီၤ ကစၢ်ယွၤဒီးတတူၢ်လိာ်တၢ်သးခုကစီၣ်ဘၣ်ဃးပကစၢ် ယ့ၣ်ၡူးန့ၣ်လီၤ.

⁹ အဝဲသ့ၣ်ကတူၢ်ဘၣ်တၢ်စံၣ်ညီၣ်လၢအမ့ၢ်တၢ်ဟးဂီၤအထူ အယိာ်, ဒီးကဘၣ်တၢ်ထုးဖးကွံာ်အီၤလၢကစၢ်အမဲာ်ညါ ဒီးအလၤကပီၤဘၣ်ဃးဒီးအစိအကမီၤန့ၣ်လီၤ.

¹⁰ တၢ်သ့ၣ်တဖၣ်အံၤခဲလၢာ်ကမၤအသးဖဲနံၤအဝဲန့ၣ် ဖဲအဝဲဒၣ်ဟဲဝဲဒ်သိးအကဒိးန့ၢ်တၢ်လၤကပီၤလၢအပှၤ ဂီၢ်မုၢ်ခဲလၢာ်အအိၣ်, ဒီးတၢ်မၤလၤမၤကပီၤလၢပှၤလၢအစူၢ်က့ၤနာ်က့ၤအီၤခဲလၢာ် အအိၣ်န့ၣ်လီၤ. သုဝဲသ့ၣ်စ့ၢ်ကီးသုကအိၣ်လၢအဝဲသ့ၣ်အသိး အကျါအဂ့ၢ်မ့ၢ်လၢသုနာ်တၢ်ကစီၣ်လၢပစံးဘၣ်တဲဘၣ်သု အဃိန့ၣ်လီၤ.

¹¹ လၢတၢ်န့ၣ်အဃိ, ထီဘိန့ၣ်ပဃ့ဘါထုကဖၣ်တၢ်လၢသုဂီၢ်ဒ်သိးပကစၢ် ယွၤကဒုးကြၢးဒုးဘၣ်သုဒီးတၢ်အိၣ်မူလၢအဝဲဒၣ်ကိးဃီၤ သုလၢသုကအိၣ်မူအီၤန့ၣ်လီၤ. ဒီးခီဖျိအစိအကမီၤန့ၣ်, မ်ကစၢ်ယွၤမၤစၢၤသုလၢသုကမၤတၢ်အဂ့ၤတမံၤလၢ်လၢ်လၢ သုသးအိၣ်မၤအီၤ, ဒီးမၤလၢမၤပှဲၤတၢ်ဖံးတၢ်မၤလၢ သုမၤတ့ၢ်လံအီၤခီဖျိတၢ်စူၢ်တၢ်နာ်န့ၣ်တက့ၢ်.

¹² လၢကျဲဒ်အံၤအပူၤန့ၣ် ပကစၢ်ယ့ၣ်ၡူးအမံၤကဒိးန့ၢ်တၢ်လၤ ကပီၤလၢသုအိၣ်ဒီးသုကဒိးန့ၢ်တၢ်လၤကပီၤလၢအဝဲဒၣ် အအိၣ်, ခီဖျိပကစၢ်ယွၤဒီးကစၢ်ယ့ၣ်ၡူးခရံာ်အဘျုးအဖှိၣ်န့ၣ်လီၤ.