လံာ်စီၤၡမူၤအ့လးခံဘ့ၣ်တဘ့ၣ် 5 - Sgaw Karen Common Bible

စီၤဒၤဝံးကဲထီၣ်ကီၢ်အံၣ်စရ့လးဒီး ကီၢ်ယူဒၤအစီၤပၤ

¹ တုၤနုၤတစု, ကယဲၢ်ကီၢ်အံၣ်စရ့လးအဒူၣ်တဖၣ်လဲၤဆူစီၤဒၤဝံး အအိၣ်လၢဝ့ၢ်ဃ့ဘြိၣ်ဒီးစံးဘၣ်အီၤ, “ပမ့ၢ်နသွံၣ်နထံ, နဖံးနညၣ်ဒၣ်နဲလီၤ.

² လၢအပူၤကွံာ်, ဖဲစီၤစီလူးမ့ၢ်ဒံးပစီၤပၤအခါဒၣ်လဲာ်န့ၣ်, နဆှၢကီၢ်အံၣ်စရ့လးအပှၤဂီၢ်မုၢ်လၢတၢ်ဒုးအပူၤ, ဒီးယွၤအၢၣ်လီၤတ့ၢ်နၤလၢနကဆှၢအပှၤဂီၢ်မုၢ် ဒီးကဲထီၣ်အဝဲသ့ၣ်အပှၤပၢတၢ်န့ၣ်လီၤ.”

³ လၢတၢ်န့ၣ်အဃိကယဲၢ်ပှၤခိၣ်ပှၤနၢ်လၢကီၢ်အံၣ်စရ့လးအပူၤဟဲဆူ စီၤပၤဒၤဝံးအအိၣ်ဖဲဝ့ၢ်ဃ့ဘြိၣ်န့ၣ်လီၤ. အဝဲမၤတၢ်ဒီသိၣ်ဒီမှံၤဒီးအဝဲသ့ၣ်လၢယွၤအမဲာ်ညါ, ဒီးအဝဲသ့ၣ်ဖှူစီၤဒၤဝံးဒ်သိးကကဲထီၣ်စီၤပၤလၢကီၢ်အံၣ်စရ့လးအဖီခိၣ်န့ၣ်လီၤ.

⁴ ဖဲစီၤဒၤဝံးကဲထီၣ်စီၤပၤန့ၣ်အသးအိၣ်အနံၣ်သၢဆံဒီးအဝဲ ပၢတၢ်အနံၣ်လွံၢ်ဆံန့ၣ်လီၤ.

⁵ အဝဲမၤတၢ်လၢဝ့ၢ်ဃ့ဘြိၣ်အပူၤလၢကီၢ်ယူဒၤအဖီခိၣ်နွံနံၣ် တခီဒီးလၢဝ့ၢ်ယရူၤၡအပူၤလၢကီၢ်အံၣ်စရ့လးဒီးကီၢ်ယူဒၤခဲ လၢာ်အဖီခိၣ်, သၢဆံသၢနံၣ်န့ၣ်လီၤ.

⁶ အဆၢကတီၢ်တုၤဃီၤဝဲလၢစီၤပၤဒၤဝံးဒီးအပှၤတဖၣ်ကလဲၤထီၣ် ဒုးဝ့ၢ်ယရူၤၡလ့ၣ်လီၤ. ပှၤယဘူၣ်ဖိတဖၣ်လၢအအိၣ်ဖဲန့ၣ်ဆိကမိၣ်ဝဲလၢစီၤဒၤဝံး မၤနၢၤဝ့ၢ်အံၤတမ့ၢ်ကသ့ဘၣ်အဃိ, အဝဲသ့ၣ်စံးဘၣ်အီၤ, “နဟဲနုာ်ဖဲအံၤတန့ၢ်နီတစုဘၣ်. ပှၤမဲာ်ဘျီၣ်တဖၣ်ဒီးပှၤခီၣ်ဟးဂီၤတဖၣ်ဒၣ်လဲာ်, တြီဆၢကွံာ်နၤသ့ဝဲလီၤ.”

⁷ (ဘၣ်ဆၣ်ဒီးစီၤဒၤဝံးမၤန့ၢ်ကွံာ်အဝဲသ့ၣ်အဝ့ၢ်စံယိၣ်အတိာ် ဒီးတၢ်န့ၣ်ဘၣ်တၢ်သ့ၣ်ညါအီၤဒ်စီၤဒၤဝံးအဝ့ၢ်န့ၣ်လီၤ.)

⁸ လၢမုၢ်နံၤအဝဲန့ၣ်စီၤဒၤဝံးစံးဘၣ်အပှၤတဖၣ်, “မ့ၢ်ပှၤဖဲအံၤတဂၤဂၤလၢအသးဟ့ပှၤယဘူၣ်ဖိထဲသိးယၤန့ၣ် အိၣ်ဧါ. မ့ၢ်အမ့ၢ်တၢ်သးဟ့တုၤလၢတၢ်အဲၣ်ဒီးမၤသံအဝဲသ့ၣ်န့ၣ်ဧါ. မ့မ့ၢ်ဒ်န့ၣ်အဃိဒီး, လဲၤထီၣ်ခီဖျိထံအကျိၤဒီးဒုးပှၤမဲာ်ဘျီၣ်, ခီၣ်ဟးဂီၤအဖှီၣ်တဖၣ်တက့ၢ်.” (လၢတၢ်န့ၣ်အဃိတၢ်စံးဝဲလၢ, “ပှၤမဲာ်ဘျီၣ်ဒီးပှၤခီၣ်ဟးဂီၤတဖၣ်န့ၣ်လဲၤနုာ်ဆူယွၤအဟံၣ် တသ့ဘၣ်” န့ၣ်လီၤ.

⁹ ဖဲအမၤန့ၢ်တိာ်န့ၣ်ဝံၤဒီး, စီၤဒၤဝံးအိၣ်ဆိးဝဲလၢအပူၤ ဒီးယုၢ်န့ၢ်အမံၤလၢ, “စီၤဒၤဝံးအဝ့ၢ်” န့ၣ်လီၤ. အဝဲသူၣ်ထီၣ်ဝ့ၢ်ဝးတရံးတၢ်လီၢ်န့ၣ်, စးထီၣ်လၢတၢ်လီၢ်လၢဟီၣ်ခိၣ်ဘၣ်တၢ်မၤပှဲၤအီၤ, လၢအအိၣ်ဝဲဖဲတၢ်လူၢ်အမုၢ်ထီၣ်တခီန့ၣ်လီၤ.

¹⁰ အဝဲအဂံၢ်အဘါဆူၣ်ထီၣ်အါထီၣ်တဘိယူၢ်ဃီန့ၣ်လီၤ. အဂ့ၢ်ဒ်အံၤ, ယွၤ, သ့တၢ်လၢာ်ကစၢ်ယွၤအိၣ်ဒီးအီၤအဃိလီၤ.

¹¹ ဝ့ၢ်ထါယၢၣ်အစီၤပၤစီၤဃံရၣ်ဆှၢလီၤတၢ်မၤကူၣ်မၤကၤအခၢၣ်စး တဖုဆူစီၤဒၤဝံးအအိၣ်လီၤ. အဝဲဆှၢလီၤန့ၢ်အီၤလၢသ့ၣ်ဆှိးအ့ရ့းအကျီၣ်တဖၣ်ဃုာ်ဒီး ပှၤစုသ့ဖိတဖၣ်လၢအမၤတၢ်လၢသ့ၣ်သ့ဒီးပှၤလၢအမၤတၢ်လၢလၢၢ်သ့တဖၣ် ဒ်သိးကဘှီထီၣ်စီၤပၤအနီတဖျၢၣ်အဂီၢ်န့ၣ်လီၤ.

¹² လၢတၢ်န့ၣ်အဃိ, စီၤဒၤဝံးသ့ၣ်ညါဝဲလၢယွၤပာ်ထီၣ်အီၤဂၢၢ်ဂၢၢ်ကျၢၤကျၢၤ ဒ်ကီၢ်အံၣ်စရ့လးအစီၤပၤအသိးဒီးမၤဘီၣ်ထီၣ် ညီထီၣ်အဘီအမုၢ်လၢအပှၤဂီၢ်မုၢ်အဃိန့ၣ်လီၤ.

¹³ တုၤအသုးအလီၢ်လၢဝ့ၢ်ဃ့ဘြိၣ်ဆူဝ့ၢ်ယရူၤၡလ့ၣ်ဝံၤအလီၢ်ခံန့ၣ်, စီၤဒၤဝံးဟံးန့ၢ်အါထီၣ်အသံမါတဖၣ်ဒီးအမါတဖၣ်ဒီးအိၣ်အါထီၣ်ဒီး အဖိခွါတဖၣ်ဒီးအဖိမုၣ်တဖၣ်န့ၣ်လီၤ.

¹⁴ ဖိလၢလာ်တဖၣ်အံၤမ့ၢ်ပှၤတဖၣ်လၢအအိၣ်ဖျဲၣ်ထီၣ်လၢအဂီၢ် လၢဝ့ၢ်ယရူၤၡလ့ၣ်အပူၤန့ၣ်လီၤ. စီၤၡးမူၤ, စီၤၡိၤဘာ်, စီၤနၤသၣ်, စီၤၡလိၤမိၤ,

¹⁵ စီၤယံးဘဃၢ်, စီၤအလံၡူၤ, စီၤန့းဖ့း, စီၤယၤဖံ,

¹⁶ စီၤအလံၡမၤ, စီၤအလံဒး ဒီးစီၤအလံဖလ့ တဖၣ်န့ၣ်လီၤ.

တၢ်မၤနၢၤလၢပှၤဖလ့ၡသးဖိတဖၣ်အဖီခိၣ်

¹⁷ ပှၤဖလ့ၡသးဖိတဖၣ်ဘၣ်တၢ်တဲဘၣ်အီၤလၢစီၤဒၤဝံး ဘၣ်တၢ်ဒုးကဲထီၣ်အီၤလၢကီၢ်အံၣ်စရ့လးအစီၤပၤအဃိ, အဝဲသ့ၣ်အသုးမုၢ် ဟးထီၣ်ဒ်သိးကဟဲဃုဖီၣ်စီၤဒၤဝံးအဂီၢ်န့ၣ်လီၤ. ဖဲစီၤဒၤဝံးနၢ်ဟူဘၣ်တၢ်ဂ့ၢ်အံၤန့ၣ်, အဝဲလဲၤဆူတၢ်လီၢ်တပူၤဖဲတၢ်မၤခၢၣ်သနၢၣ်အီၤန့ၣ်လီၤ.

¹⁸ ပှၤဖလ့ၡသးဖိတဖၣ်ဟဲတုၤဝဲဆူရၤဖၤအတၢ်တြီၤပူၤဒီးမၤန့ၢ် အီၤန့ၣ်လီၤ.

¹⁹ စီၤဒၤဝံးသံကွၢ်ယွၤ, “မ့ၢ်ယကဘၣ်ဒုးပှၤဖလ့ၡသးဖိတဖၣ်န့ၣ်ဧါ. မ့ၢ်နကဟ့ၣ်ယၤလၢတၢ်မၤနၢၤန့ၣ်ဧါ.” ယွၤစံးဆၢဝဲဒၣ်, “မ့ၢ်, လဲၤဒုးတက့ၢ်. ယကဟ့ၣ်နၤလၢတၢ်မၤနၢၤန့ၣ်လီၤ.”

²⁰ လၢတၢ်န့ၣ်အဃိ, စီၤဒၤဝံးလဲၤဝဲဆူဝ့ၢ်ဘဧၤလးပရၤစံၣ်ဒီး ဖဲန့ၣ်အဝဲမၤနၢၤကွံာ်ပှၤဖလ့ၡသးဖိတဖၣ်န့ၣ်လီၤ. အဝဲစံးဝဲဒၣ်, “ယွၤမၤဟးဂီၤကွံာ်ယဒုၣ်ယဒါတဖၣ်ဒ်ထံလုၣ်ဘၢတၢ်အသိးန့ၣ်လီၤ.” ဒီးလၢတၢ်န့ၣ်အဃိတၢ်လီၢ်န့ၣ်ဘၣ်တၢ်ကိးအီၤလၢဘဧၤလး ပရၤစံၣ်န့ၣ်လီၤ.

²¹ ဖဲပှၤဖလ့ၡသးဖိတဖၣ်ဃ့ၢ်ကွံာ်ဝဲန့ၣ်အဝဲသ့ၣ် ပာ်တီၢ်အတၢ်ဂီၤတၢ်ဖီၣ်တဖၣ်လၢအလီၢ်ခံ, ဒီးစီၤဒၤဝံးဒီးအပှၤတဖၣ်စိာ်ကွံာ်တၢ်သ့ၣ်တဖၣ်န့ၣ်လီၤ.

²² အန့ၣ်ဝံၤဒီးပှၤဖလ့ၡသးဖိတဖၣ်လဲၤဆူရၤဖၤအတၢ်တြီၤပူၤဒီး မၤန့ၢ်ကွံာ်ကဒီးတၢ်လီၢ်န့ၣ်လီၤ.

²³ မၤကဒီးတစု, စီၤဒၤဝံးသံကွၢ်တၢ်လၢယွၤဒီးယွၤစံးဆၢ အီၤ, “လဲၤဒုးအဝဲသ့ၣ်ဖဲအံၤတဂ့ၤ. မ့မ့ၢ်လဲၤတရံးဒီးကတဲာ်ကတီၤသုသးဒ်သိးသုကလဲၤဒုးအီၤလၢ အဂၤတကပၤဖဲအဘူးဒီးပံၢ်သလီအထူၣ်တဖၣ်န့ၣ်တက့ၢ်.

²⁴ ဖဲသုနၢ်ဟူတၢ်လဲၤထီၣ်ဒုးတၢ်အသီၣ်လၢသ့ၣ်တဖၣ်အစိးခံန့ၣ်, လဲၤထီၣ်ဒုးတၢ်တက့ၢ်. အဂ့ၢ်ဒ်အံၤ, ယကလဲၤထီၣ်ဆိ လၢသုမဲာ်ညါလၢတၢ်မၤနၢၤကွံာ်ပှၤဖလ့ၡသးဖိအသုးမုၢ်အဂီၢ် န့ၣ်လီၤ.”

²⁵ စီၤဒၤဝံးမၤတ့ၢ်ဒ်ယွၤမၤလိာ်တ့ၢ်အီၤအသိးအဃိ, အဝဲနီၣ်ကဒါကွံာ်ပှၤဖလ့ၡသးဖိတဖၣ်လၢကျဲဒီဘိစးထီၣ်လၢ ဝ့ၢ်က့ဘၤတုၤဆူဝ့ၢ်က့စၢ်သ့ဝဲလီၤ.