လံာ်စီၤၡမူၤအ့လးခံဘ့ၣ်တဘ့ၣ် 23 - Sgaw Karen Common Bible

စီၤဒၤဝံးအတၢ်ကတိၤလၢခံကတၢၢ်တဖၣ်

¹ စီၤယံးၡဲအဖိခွါစီၤဒၤဝံးမ့ၢ်တ့ၢ်ပှၤတဂၤလၢကစၢ်ယွၤပာ်ထီၣ်ထီအီၤ, ပှၤတဂၤလၢစီၤယၤကိာ်အကစၢ်ယွၤဃုထၢတ့ၢ်အီၤလၢကကဲထီၣ်စီၤပၤ, ဒီးပှၤတဂၤလၢအထုးထီၣ်တၢ်သးဝံၣ်အမုာ်တဖၣ်လၢကီၢ်အံၣ်စရ့လးအဂီၢ်လီၤ. တၢ်လၢလံာ်အံၤတဖၣ်အံၤမ့ၢ်စီၤဒၤဝံးအတၢ်ကတိၤလၢခံကတၢၢ်တဖၣ် န့ၣ်လီၤ.

² ယွၤအသးကတိၤတၢ်ခီဖျိယၤ, အဝဲအတၢ်ကစီၣ်အိၣ်ဝဲလၢယထးခိၣ်န့ၣ်လီၤ.

³ ကီၢ်အံၣ်စရ့လးအကစၢ်ယွၤကတိၤလံတၢ်လံ. ကီၢ်အံၣ်စရ့လးအပှၤဒီဒၣ်အိၣ်ပှိၤအီၤစံးဘၣ်ယၤ, စီၤပၤလၢအပၢတၢ်လၢတၢ်စံၣ်ညီၣ်တီလၢအပၢတၢ်လၢတၢ်ယူးယီၣ်ပာ်ကဲကစၢ်ယွၤန့ၣ်,

⁴ လီၤဂာ်ဒ်မုၢ်လၢအကပီၤထီၣ်ဝဲဖဲမုၢ်ဆ့ၣ်ထီၣ်သီတဂီၤလၢတၢ်အၢၣ်တအိၣ်ဘၣ်အသိး, မုၢ်တဘ့ၣ်လၢအဒုးကပြုၢ်ကပြီၤထီၣ်တပံၢ်တမါဖဲတၢ်စူၤလီၤဝံၤအလီၢ်ခံန့ၣ်လီၤ.

⁵ ဒီးတၢ်န့ၣ်မ့ၢ်ကစၢ်ယွၤကဆိၣ်ဂ့ၤယစၢၤယသွဲၣ်တဖၣ် ဒ်လဲၣ်ဒ်လဲၣ်အဂ့ၢ်, မ့ၢ်လၢအဝဲမၤတ့ၢ်တၢ်အၢၣ်လီၤအီလီၤအထူအယိာ်တမံၤဒီးယၤ, ဒီးတၢ်အၢၣ်လီၤခံခီယၢ်ခီတမံၤလၢအဟးဂီၤကွံာ်အီၤတသ့ဘၣ်, တၢ်အၢၣ်လီၤတမံၤလၢတၢ်လဲလိာ်ကွံာ်တသ့ဘၣ်န့ၣ်လီၤ. တၢ်န့ၣ်မ့ၢ်တၢ်ခဲလၢာ်လၢယမိၢ်န့ၢ်သးလီၤအီၤန့ၣ်လီၤ. တၢ်န့ၣ်ကမ့ၢ်ယတၢ်မၤနၢၤ, ဒီးကစၢ်ယွၤကမၤလၢထီၣ်ပှဲၤထီၣ်အီၤသပှၢ်တၢၢ်န့ၣ်လီၤ.

⁶ မ့မ့ၢ်ပှၤလၢအယွၤတအိၣ်ဘၣ်တဖၣ်န့ၣ်မၤသးဒ်တၤဆှူၣ်တၤမဲ တဖၣ်လၢအဘၣ်တၢ်စူးကွံာ်အီၤ အသိးန့ၣ်လီၤ. ပှၤထိးဘၣ်အီၤထဲလၢအစုယၢ်ခီတသ့ဘၣ် နီတဂၤဘၣ်.

⁷ နကဘၣ်သူထးတၢ်အပီးအလီတမံၤမ့ၢ်ဂ့ၤ ဘီတဘ့ၣ်မ့ၢ်ဂ့ၤန့ၣ်လီၤ. အဝဲသ့ၣ်ကဘၣ်တၢ်ဆူးကဲၤကွံာ်အီၤလၢာ်လၢာ်ဆ့ဆ့န့ၣ်လီၤ.

စီၤဒၤဝံးအပှၤသုးဖိတဖၣ်လၢအမံၤဟူသၣ်ဖျါ

⁸ ပှၤတဖၣ်အံၤမ့ၢ်စီၤဒၤဝံးအပှၤသုးဖိတဖၣ်လၢအမံၤဟူသၣ်ဖျါ န့ၣ်လီၤ. အခီၣ်ထံးတဂၤမ့ၢ်ဝဲ, စီၤယိစဘးဘၡဘး လၢတၤဃမိၣ်န့ၣ်လီၤ. အဝဲမ့ၢ်ပှၤအခိၣ်လၢပှၤသၢဂၤအကျါတဂၤဒီး အဝဲဒုးတၢ်ဒီးအဘီထီဒါပှၤအဂၤဃိးကယၤဒီးမၤသံကွံာ်အဝဲသ့ၣ် ခဲလၢာ်လၢတၢ်ဒုးတဘျီအပူၤန့ၣ်လီၤ.

⁹ ပှၤခံဂၤတဂၤလၢပှၤမံၤဟူသၣ်ဖျါသၢဂၤအကျါန့ၣ်မ့ၢ်ဝဲ စီၤဒိဒိၤအဖိခွါစီၤအလၤဧစၢ်လၢပှၤအဃိဃးဖိအဒူၣ်ထၢတခီန့ၣ်လီၤ. တနံၤန့ၣ်, အဝဲဒီးစီၤဒၤဝံးတၤတၢ်ဒီးပှၤဖလ့ၡသးဖိတဖၣ်လၢ အပာ်ဖှိၣ်ထီၣ်အသးလၢတၢ်ဒုးတၢ်ယၤအဂီၢ်န့ၣ်လီၤ. ပှၤအံၣ်စရ့လးဖိတဖၣ်ဂုၤက့ၤဆူအလီၢ်ခံ,

¹⁰ ဘၣ်ဆၣ်အဝဲဆၢထၢၣ်ဂၢၢ်ကျၢၤဝဲဒီးဒုးပှၤဖလ့ၡသးဖိတဖၣ် တုၤလၢအစုလီၤဘှါဒိၣ်မး, တုၤဒၣ်လဲာ်အစုလၣ်လၢအစှီၤဃးနးန့ၣ်အိၣ်ဃံးတံာ်အသးဒီးသလၣ် ထီၣ်က့ၤဝဲလၢကပျဲကွံာ်နးတန့ၢ်ဘၣ်လီၤ. ယွၤအိၣ်ဒီးတၢ်မၤနၢၤဖးဒိၣ်လၢမုၢ်တနံၤန့ၣ်လီၤ. တၢ်န့ၣ်ဝံၤအလီၢ်ခံ, ပှၤအံၣ်စရ့လးဖိတဖၣ်ဟဲက့ၤကဒါက့ၤဆူ တၢ်လီၢ်ဖဲစီၤအလၤဧစၢ်အိၣ်ဝဲဒီးဟံးန့ၢ်ကွံာ်ပှၤသံတဖၣ်အစုကဝဲၤန့ၣ်လီၤ.

¹¹ ပှၤသၢဂၤတဂၤလၢပှၤမံၤဟူသၣ်ဖျါအကျါမ့ၢ်ဝဲပှၤဟရၢ်ဖိ စီၤအက့ဝ့ၢ်အဖိခွါစီၤၡးမၤန့ၣ်လီၤ. ပှၤဖလ့ၡသးဖိတဖၣ်ပာ်ဖှိၣ်ထီၣ်အသးဖဲဝ့ၢ်လ့ၤဃံဖဲပျီတဘ့ၣ် လၢအပှဲၤဒီးပထိးသၣ်အမုၢ်တဖၣ်အပူၤန့ၣ်လီၤ. ပှၤအံၣ်စရ့လးဖိတဖၣ်ထွးထီၣ်ဃ့ၢ်ကွံာ်လၢပှၤဖလ့ၡသးဖိအအိၣ်,

¹² ဘၣ်ဆၣ်ဒီးစီၤၡးမၤဆၢထၢၣ်ဂၢၢ်ကျၢၤဖဲအလီၢ်လၢပျီပူၤ, တြီၤဆၢခီဆၢတၢ်ဒီးမၤသံကွံာ်ပှၤဖလ့ၡသးဖိတဖၣ်န့ၣ်လီၤ. ယွၤအိၣ်ဒီးတၢ်မၤနၢၤဖးဒိၣ်လၢမုၢ်တနံၤန့ၣ်လီၤ.

¹³ ဖဲအခါဘူးထီၣ်လၢကူးဘုအကတီၢ်ကစးထီၣ်န့ၣ်, ပှၤသၢဂၤလၢ ‘ပှၤအခိၣ်အဂၤသၢဆံ’ အကျါလဲၤလီၤဝဲဆူ ဧဒူးလၣ်အလ့ကအိ, လၢစီၤဒၤဝံးအိၣ်ဝဲ, ဖဲပှၤဖလ့ၡသးဖိတဖုသူၣ်ထီၣ်အဒဲ, ဖဲရၤဖၤကစၢၢ်ကဆူးအခါ န့ၣ်လီၤ.

¹⁴ အကတီၢ်ဖဲန့ၣ်, စီၤဒၤဝံးအိၣ်ဝဲလၢတိာ်ခၢၣ်သနၢၣ်တဖျၢၣ်အပူၤ ဒီးပှၤဖလ့ၡသးဖိတဖုမၤန့ၢ်ကွံာ်ဝ့ၢ်ဘ့ၤသလ့ဃ့ၣ်န့ၣ်လီၤ.

¹⁵ စီၤဒၤဝံးသးသယုၢ်ဘၣ်အအိၣ်အဆိးအလီၢ်ဒီးစံးဝဲ, “ယဆၢမးလၢပှၤတဂၤဂၤကဟဲဒၢၣ်ဒုးအီယၤထံလၢထံပူၤတပူၤ လၢအအိၣ်ဖဲဝ့ၢ်ဘ့ၤသလ့ဃ့ၣ်အကျဲစၢၤတြဲၤခီၣ်ထံးန့ၣ်လီၤ.”

¹⁶ ဒီးပှၤသုးဖိမံၤဟူသၣ်ဖျါသၢဂၤ, လဲၤနုာ်ဖျိဆူၣ်ဝဲဆူပှၤ ဖလ့ၡသးဖိတဖၣ်သူၣ်ဒဲအလီၢ်, ဒၢၣ်ထီၣ်ထံလၢထံပူၤ, ဝံၤဒီးဟဲက့ၤစိာ်ဝဲဆူစီၤဒၤဝံးအအိၣ်န့ၣ်လီၤ. ဘၣ်ဆၣ်ဒီးအဝဲတအီဝဲဘၣ်. အခိၣ်တလိာ်, အဝဲလူလီၤဝဲဒ်တၢ်လုၢ်တၢ်ပာ်တမံၤအသိးလၢယွၤအဂီၢ်,

¹⁷ ဒီးအဝဲဒၣ်စံးဝဲ, “ယွၤဧၢ, ယအီတၢ်အံၤတလီၤဘၣ်ဝဲနီတစဲး ဘၣ်. တၢ်န့ၣ်ကမၤအသးဒ်ယအီ ပှၤလၢအဟ့ၣ်လီၤအသးသမူတဖၣ်အံၤအသွံၣ်အသိးန့ၣ်လီၤ.” လၢတၢ်န့ၣ်အဃိအဝဲဂ့ၢ်လိာ်လၢကအီတၢ်န့ၣ်လီၤ. တၢ်တဖၣ်န့ၣ်, မ့ၢ်တၢ်မၤအဒူအဃိာ်လၢပှၤသုးဖိမံၤဟူသၣ်ဖျါသၢဂၤမၤဝဲန့ၣ်လီၤ.

¹⁸ စီၤယိၤအာ်အဒီပုၢ်ဝဲခွါစီၤအဘံၡဲၤ (အဝဲသ့ၣ်အမိၢ်မ့ၢ်နီၢ်စရူယၤ) မ့ၢ်ပှၤလၢအမံၤဟူသၣ်ဖျါအဂၤသၢဆံအခိၣ်န့ၣ်လီၤ. အဝဲဒုးတၢ်ဒီးအဘီထီဒါပှၤအဂၤသၢကယၤဒီးမၤသံအဝဲသ့ၣ်, ဒီးအဝဲကဲထီၣ်ပှၤမံၤဟူသၣ်ဖျါထီၣ်လၢပှၤအခိၣ်အဂၤသၢဆံ အကျါန့ၣ်လီၤ.

¹⁹ အဝဲမ့ၢ်ပှၤမံၤဟူသၣ်ဖျါအဒိၣ်ကတၢၢ်လၢပှၤသၢဆံအကျါဒီးကဲ ထီၣ်ဝဲပှၤအခိၣ်န့ၣ်လီၤ. ဘၣ်ဆၣ်ဒီးအမံၤတဟူထဲသိးဒီးပှၤသၢဂၤန့ၣ်ဘၣ်.

²⁰ ပှၤကၤဘစ့လးဖိစီၤယဟိၤယဒါအဖိခွါစီၤဘနါယၤမ့ၢ်ပှၤသုး ဖိအမံၤဟူသၣ်ဖျါအဂၤတဂၤန့ၣ်လီၤ. အဝဲမၤတ့ၢ်တၢ်မၤအဒူအဃိအါမး, အိၣ်ဃုာ်ဒီးတၢ်မၤသံကွံာ်ပှၤမိၤအးဖိအသုးဖိအဂ့ၤကတၢၢ်ခံဂၤန့ၣ်လီၤ. တဘျီဖဲမူခိၣ်ဖီလီၤဝဲတနံၤန့ၣ်, အဝဲလဲၤလီၤဝဲဆူတၢ်ပူၤ တပူၤဒီးမၤသံကွံာ်ခ့ယုၢ်တဒုန့ၣ်လီၤ.

²¹ အဝဲမၤသံကွံာ်စ့ၢ်ကီးပှၤအဲၤကူပတူးဖိတဂၤ, လၢအမ့ၢ်ပှၤတဂၤလၢအနီၢ်ကစၢ်ဖးဒိၣ်အိၣ်ဒီးအဘီတဘ့ၣ် လၢအစိာ်ဃးဝဲဒ်အစုကဝဲၤအသိးန့ၣ်လီၤ. စီၤဘနါယၤဒုးအီၤလၢအနီၣ်တီၢ်ဒီးဂုာ်န့ၢ်ဘီတဘ့ၣ်န့ၣ်ချ့သဒံး လၢပှၤအဲၤကူပတူးဖိအစုပူၤဒီးမၤသံကွံာ်အီၤလၢဘီ န့ၣ်လီၤ.

²² တၢ်တဖၣ်န့ၣ်မ့ၢ်တၢ်မၤအဒူအဃိၤတဖၣ်လၢစီၤဘနါယၤ, လၢအမ့ၢ်ပှၤအဂၤသၢဆံအကျါတဂၤမၤတ့ၢ်ဝဲန့ၣ်လီၤ.

²³ အဝဲမ့ၢ်ပှၤဖျိးစိလၢအဝဲသ့ၣ်အကျါ, ဘၣ်ဆၣ်ဒီးအမံၤတဟူသၣ်တဖျါထဲသိးဒီးပှၤသၢဂၤန့ၣ်ဘၣ်. စီၤဒၤဝံးပာ်အီၤဒ်သုးဖိလၢအခိးအဝဲအသးသမူတဖၣ်အခိၣ်န့ၣ်လီၤ.

²⁴ ပှၤအဂၤတဖၣ်လၢပှၤအခိၣ်အဂၤသၢဆံအကျါန့ၣ်အိၣ်ဃုာ်ဒီး စီၤယိၤအာ်အဒီပုၢ်ဝဲၢ်စီၤဧစၤအ့လး, ပှၤဝ့ၢ်ဘ့ၤသလ့ဃ့ၣ်ဖိစီၤဒိဒိၤအဖိခွါစီၤအ့လယၤနၣ်,

²⁵ ပှၤဝ့ၢ်ဃရိးဖိစီၤၡမၤဒီးစီၤအလံကၤ,

²⁶ ပှၤဝ့ၢ်ပးလတံၤဖိစီၤဃ့လ့း, ပှၤဝ့ၢ်တကိၤဖိစီၤဧံးက့ၣ်အဖိခွါစီၤဧံရၤ,

²⁷ ပှၤဝ့ၢ်ဧၤနသိးဖိစီၤအဘံၤဧ့စၢ်, ပှၤဝ့ၢ်ဃူၡၤဖိစီၤမၤဘူနဲၤ,

²⁸ ပှၤဝ့ၢ်အဃိဃးဖိစီၤစၤလမိၣ်, ပှၤဝ့ၢ်နတိဖၤဖိစီၤမၤဟရဲ,

²⁹ ပှၤဝ့ၢ်နတိၤဖၤဖိစီၤဘၤနါအဖိခွါစီၤဃ့လ့ာ်, ပှၤဝ့ၢ်ကံးလဧၤဖိစီၤရံဘဲၤအဖိခွါစီၤအံတဲၤဘၣ်ဃးဒီး ပှၤဘံၣ်ယၤမံၣ်အဒူၣ်,

³⁰ ပှၤဝ့ၢ်ပံးရသိၣ်ဖိစီၤဘနါယၤ, စီၤဟံးဒဲလၢဝ့ၢ်ကၤဧၣ်အဃၢၤတၢ်တြီၤတဖၣ်အပူၤ,

³¹ ပှၤဝ့ၢ်ဧၤရဘၤဖိစီၤအဘံဧၤလဘိၣ်, ပှၤဝ့ၢ်ဘၤဃူၣ်ဖိစီၤဧၤစမၤဝ့း,

³² ပှၤဝ့ၢ်ၡၤလဘိၣ်ဖိစီၤအ့လံယဘၤ, စီၤယၤၡ့ၣ်အဖိခွါတဖၣ်, စီၤယိၤနၤသၣ်,

³³ ပှၤဝ့ၢ်ဟရၢ်ဖိစီၤၡးမၤ, ပှၤဝ့ၢ်ဟရၢ်ဖိစီၤၡၤရၢ်အဖိခွါစီၤအဃံအၣ်,

³⁴ ပှၤဝ့ၢ်မၤကၤဖိစီၤအဃၤစဘဲအဖိခွါစီၤအလံၤဖ့လ့း, ပှၤဝ့ၢ်ကံလိၣ်ဖိစီၤအဃံၤသဖ့လးအဖိခွါစီၤအလံဧၣ်,

³⁵ ပှၤဝ့ၢ်ကၤမ့လးဖိစီၤဃ့ၤစရ့, ပှၤအါရး (အၢ်ဘၤ) ဖိစီၤပရဲ,

³⁶ ပှၤဝ့ၢ်စိဘၤဖိစီၤနၤသၣ်အဖိခွါစီၤယံးက့လး, ပှၤဝ့ၢ်ကးဖိစီၤဘၤနံ,

³⁷ ပှၤဧၣ်မိၣ်ဖိစီၤစ့လ့း, စီၤယိၤအာ်အပှၤစိာ်စုကဝဲၤ, ပှၤဘအ့ရိးဖိစီၤနဃၤရဲ

³⁸ ပှၤဝ့ၢ်ယံးသၣ်ဖိစီၤဧံရၤဒီးစီၤကၢ်ရ့း

³⁹ ပှၤဃ့ၤသးဖိစီၤအူၤရံယၤတဖၣ်န့ၣ်လီၤ. ပှၤသုးဖိလၢအမံၤဟူသၣ်ဖျါခဲလၢာ်အိၣ်ဝဲသၢဆံနွံဂၤလီၤ.