လံာ်စီၤၡမူၤအ့လးခံဘ့ၣ်တဘ့ၣ် 21 - Sgaw Karen Common Bible

စီၤစီလူးအစၢၤအသွဲၣ်တဖၣ် ဘၣ်တၢ်မၤသံအီၤ

¹ ဖဲစီၤဒၤဝံးပၢတၢ်အမုၢ်နံၤတဖၣ်အပူၤန့ၣ် တၢ်သၣ်ဝံၤလီၤဒိ ဒိၣ်ဒိၣ်မုၢ်မုၢ်မၤသးယံာ်ဝဲသၢနံၣ်တီတီလီၤ. လၢတၢ်န့ၣ်အဃိစီၤဒၤဝံးသံကွၢ်တၢ်ဒီးယွၤဘၣ်ဃးတၢ်ဂ့ၢ်န့ၣ် ဒီးယွၤစံးဘၣ်အီၤ, “စီၤစီလူးဒီးအပှၤဟံၣ်ဖိဃီဖိတဖၣ်အတၢ်ကမၣ်အိၣ်လၢ အမၤသံမၤဝီတၢ်အဃိန့ၣ်လီၤ. အဝဲမၤသံတ့ၢ်ပှၤကံးဘိၣ်ဖိတဖၣ်လီၤ.”

² (ပှၤကံးဘိၣ်ဖိတဖၣ်န့ၣ်တမ့ၢ်ပှၤအံၣ်စရ့လးဖိတဖၣ်ဘၣ်. အဝဲသ့ၣ်မ့ၢ်ပှၤအဆံးဖိတဖုလၢအမိၢ်ဖိအကျါလၢပှၤအံၣ်စရ့လးဖိတဖၣ် အၢၣ်လီၤဝဲလၢကအိၣ်ပှိၤဒီဒၣ်အီၤဘၣ်ဆၣ်, စီၤစီလူးကျဲးစၢးဒ်သိးကမၤဟးဂီၤကွံာ်အဝဲသ့ၣ် မ့ၢ်လၢအဝဲဒၣ်အတၢ်သးဆူၣ်သးဂဲၤလၢ ကီၢ်အံၣ်စရ့လးဒီးကီၢ်ယူဒၤအပှၤဂီၢ်မုၢ်အဂီၢ်အဃိန့ၣ်လီၤ.)

³ လၢတၢ်န့ၣ်အဃိစီၤဒၤဝံးကိးဖှိၣ်ကံးဘိၣ်အပှၤဂီၢ်မုၢ်ဒီး စံးဘၣ်အဝဲသ့ၣ်ဒ်အံၤ, “ယမၤတၢ်လၢသုဂီၢ်သ့မနုၤတမံၤလဲၣ်. ယသးအိၣ်မၤလိၤမၤဘၣ်က့ၤတၢ်ကမူၤကမၣ်လၢတၢ်မၤဘၣ်တ့ၢ်သု, ဒ်သိးသုကဆိၣ်ဂ့ၤယွၤအပှၤဂီၢ်မုၢ်အဂီၢ်န့ၣ်လီၤ.”

⁴ အဝဲသ့ၣ်စံးဆၢဝဲဒၣ်, “ပတၢ်အ့ၣ်လိာ်ပသးဒီးစီၤစီလူးဒီး အပှၤဟံၣ်ဖိဃီဖိန့ၣ်ဘၣ်တၢ်မၤလိၤမၤဘၣ်က့ၤအီၤလၢထူမ့ၢ်ဂ့ၤ စ့မ့ၢ်ဂ့ၤတသ့ဘၣ်. ပတအဲၣ်ဒိးစ့ၢ်ကီးလၢပှၤအံၣ်စရ့လးဖိ ကဘၣ်တၢ်မၤသံအီၤနီတဂၤဘၣ်.” စီၤဒၤဝံးသံကွၢ်ဝဲ, “မ့မ့ၢ်ဒ်န့ၣ်ဒီးသုဆိကမိၣ်ယကြၢးမၤတၢ်မနုၤလၢသုဂီၢ်န့ၣ်လဲၣ်.”

⁵ အဝဲသ့ၣ်စံးဆၢဝဲဒၣ်, “စီၤစီလူးအဲၣ်ဒိးမၤဟးဂီၤကွံာ် ပှၤဒီးတအဲၣ်ဒိးပာ်မူတ့ၢ်ပှၤနီတဂၤလၢကီၢ်အံၣ်စရ့လးအပူၤ နီတတီၤဘၣ်.

⁶ လၢတၢ်န့ၣ်အဃိဟ့ၣ်လီၤပှၤလၢအဝဲအစၢၤအသွဲၣ်ပိာ်ခွါနွံဂၤ ဒီးပကစၢသံအဝဲသ့ၣ်လၢယွၤအမဲာ်ညါလၢဝ့ၢ်ကံးဘဧၤ, တၢ်လီၢ်လၢအမ့ၢ်, စီၤပၤလၢယွၤဃုထၢတ့ၢ်အီၤစီၤစီလူးအဝ့ၢ်န့ၣ်လီၤ.” စီၤပၤစံးဆၢဝဲဒၣ်, “ယကဟ့ၣ်လီၤအဝဲသ့ၣ်ဆူသုအိၣ်လီၤ.”

⁷ ဘၣ်ဆၣ်ဒီးမ့ၢ်လၢတၢ်အၢၣ်လီၤစီဆှံလၢအဝဲဒီးစီၤယိနၤသၣ် မၤတ့ၢ်ဝဲလၢတဂၤဒီးတဂၤအဘၢၣ်စၢၤအဃိ, စီၤဒၤဝံးပျဲပူၤဖျဲးစီၤမဖံၤဘိၤၡ့း, လၢအမ့ၢ်စီၤစီလူးအလံၤခွါစီၤယိနၤသၣ်အဖိခွါန့ၣ်လီၤ.

⁸ ဘၣ်ဆၣ်ဒီး, အဝဲဟံးန့ၢ်စီၤစီလူးအဖိခွါခံဂၤ လၢစီၤအၤယၤအဖိမုၣ်နီၢ်ရံးစဖၤဆံးစၢ်န့ၢ်အီၤလၢအမ့ၢ်ဝဲ, စီၤအၢ်မိၤနံဒီးစီၤမဖံဘိၤၡ့းန့ၣ်လီၤ. အဝဲဟံးန့ၢ်စ့ၢ်ကီးစီၤစီလူးအဖိမုၣ်နီၢ်မ့ရာ်အဖိခွါယဲၢ် ဂၤလၢအဆံးစၢ်န့ၢ်ဝဲလၢစီၤဘၢ်စံးလဲအဖိခွါ စီၤဧ့ဒြံၤအ့လးလၢဝ့ၢ်မဃိလၤ အဂီၢ်န့ၣ်လီၤ.

⁹ စီၤဒၤဝံးဟ့ၣ်လီၤအဝဲသ့ၣ်ဆူကံးဘိၣ်အပှၤဂီၢ်မုၢ်အစုပူၤ, လၢအစၢသံကွံာ်အဝဲသ့ၣ်လၢကစၢၢ်ဒီခိၣ်လၢယွၤအမဲာ်ညါန့ၣ် လီၤ. ဒီးအဝဲသ့ၣ်နွံဂၤလိာ်သံဝဲတပူၤဃီန့ၣ်လီၤ. တၢ်န့ၣ်မ့ၢ်ဖဲတၢ်မဲထီၣ်သီအကတီၢ်ကလၢာ်အဆၢဒီးတၢ်စးထီၣ်ကူး ဘုမုယီၤအကတီၢ်, ဖဲအဝဲသ့ၣ်ဘၣ်တၢ်မၤသံအီၤအခါန့ၣ်လီၤ.

¹⁰ အန့ၣ်ဝံၤဒီးစီၤစီလူးအသံၣ်မါလၢအမ့ၢ်စီၤအၤယၤအဖိမုၣ် နီၢ်ရံးစဖၤသူဝဲထၢၣ်တၢ်ကံးညာ်ဒ်သိးကမၤတၢ်ဒုးခိၣ်လၢ အနီၢ်ကစၢ်ဒၣ်ဝဲအဂီၢ် လၢလ့အဖီခိၣ်ဖဲတၢ်အခိၣ်တဖၣ်အိၣ်ဝဲအလီၢ် ဒီးအဝဲဒၣ်အိၣ်ဆိးဝဲဖဲန့ၣ်စးထီၣ်လၢတၢ်ကူးဘုအကတီၢ် တုၤလီၤလၢတၢ်စူၤလီၤသီအကတီၢ်တုၤဝဲန့ၣ်လီၤ. လၢမုၢ်ဆါအကတီၢ်န့ၣ်အဝဲကနီၣ်ကွံာ်ထိၣ်ဧိၤလံာ်ဧိၤတဖၣ်လၢတၢ်အစိၣ်တဖၣ် အဖီခိၣ်ဒီးလၢမုၢ်နၤအကတီၢ်န့ၣ်, အဝဲကအံးထွဲကွၢ်ထွဲတၢ်စိၣ်တဖၣ်န့ၣ်, ဒ်သိးဆၣ်ဖိကီၢ်ဖိအမံၤတဖၣ်သုတဟဲတဂ့ၤန့ၣ်လီၤ.

¹¹ ဖဲစီၤဒၤဝံးနၢ်ဟူဘၣ်တၢ်လၢနီၢ်ရံးစဖၤမၤတ့ၢ်ဝဲအဂ့ၢ်န့ၣ်,

¹² အဝဲလဲၤဒီးဟံးန့ၢ်စီၤစီလူးဒီးအဖိခွါစီၤယိနၤသၣ်အဃံတဖၣ် လၢဝ့ၢ်ယၤဘ့ၣ်အပူၤလၢကီၢ်ကံးလဧးအပှၤဂီၢ်မုၢ်အအိၣ်န့ၣ်လီၤ. (အဝဲသ့ၣ်ဟုၣ်န့ၢ်တ့ၢ်တၢ်တဖၣ်န့ၣ်လၢဝ့ၢ်ဘ့ၤသၡၣ်အတၢ်လီၢ်လီၤပျီ, ဖဲပှၤဖလ့ၡသးဖိတဖၣ်ဘျးထီၣ်တ့ၢ်တၢ်အစိၣ်တဖၣ်န့ၣ် ဖဲမုၢ်တနံၤလၢအဝဲသ့ၣ်မၤသံကွံာ် စီၤစီလူးလၢကစၢၢ်ကံးလဘိးအလိၤအခါန့ၣ်လီၤ.)

¹³ စီၤဒၤဝံးဟံးန့ၢ်စီၤစီလူးဒီးစီၤယိနၤသၣ်အဃံတဖၣ်ဒီး ပာ်ဖှိၣ်စ့ၢ်ကီးအီၤပှၤနွံဂၤလၢအဘၣ်တၢ်စၢၣ်သံအီၤအဃံတဖၣ်န့ၣ်လီၤ.

¹⁴ အန့ၣ်ဝံၤဒီးအဝဲသ့ၣ်ခူၣ်လီၤကွံာ်စီၤစီလူးဒီးစီၤယိၤနၤ သၣ်အဃံတဖၣ်လၢစီၤစီလူးအပၢ်စီၤကံၣ်အသွၣ်ခိၣ်အပူၤလၢဝ့ၢ်စ့လၤ, လၢဘံၣ်ယၤမံၣ်အလီၢ်ကဝီၤအပူၤ ဒီးမၤတၢ်ခဲလၢာ်လၢစီၤပၤမၤလိာ်တ့ၢ်ဝဲန့ၣ်လီၤ. ဒီးတၢ်န့ၣ်ဝံၤအလီၢ်ခံ, ကစၢ်ယွၤဒိကနၣ်အဝဲသ့ၣ်အတၢ်ထုကဖၣ် တဖၣ်လၢထံကီၢ်အဂီၢ်န့ၣ်လီၤ.

တၢ်ဒုးတၢ်ယၤထီဒါပှၤဖလ့ၡသး အပှၤဖးဒိၣ်တဖၣ်

¹⁵ တၢ်ဒုးတၢ်ယၤအဂၤတခါလၢပှၤဖလ့ၡသးဖိဒီးပှၤအံၣ်စရ့လးဖိ အဘၢၣ်စၢၤအိၣ်ထီၣ်ဝဲ, ဒီးစီၤဒၤဝံးဒီးအပှၤတဖၣ်လဲၤဒီးဒုးပှၤဖလ့ၡသးဖိတဖၣ်န့ၣ်လီၤ. ဖဲတၢ်ဒုးတၢ်ယၤတဖၣ်အကျါတဘျီန့ၣ်, စီၤဒၤဝံးတၢ်ဘှံးအသးလီၤ.

¹⁶ ပှၤဖးဒိၣ်တဂၤလၢအမံၤမ့ၢ် စီၤယံၡဘနိးလၢအစိာ်ဘီတိၢ်ဘီလၢအတယၢၢ်ဃၢဝဲၡက့လးသၢကယၤ, ဒီးသိးဃာ်နးအသီတဘ့ၣ်န့ၣ်, ဆိကမိၣ်ဝဲလၢအမၤသံစီၤဒၤဝံး ကန့ၢ်န့ၣ်လီၤ.

¹⁷ ဘၣ်ဆၣ်ဒီးနီၢ်စရူယၤအဖိခွါစီၤအဘံၡဲၤဟဲမၤစၢၤစီၤဒၤဝံးဒီးဒုးပှၤဖးဒိၣ်တဂၤန့ၣ်, ဒီးမၤသံကွံာ်အီၤလီၤ. တုၤနုၤတစု, စီၤဒၤဝံးအပှၤတဖၣ်မၢစီၤဒၤဝံးအၢၣ်လီၤတၢ်လၢအဝဲတပိာ်လၢၤဘၣ်အဝဲသ့ၣ်အခံဆူ တၢ်ဒုးပျီအပူၤနီတစု ဘၣ်န့ၣ်လီၤ. အဝဲသ့ၣ်စံးဝဲဒၣ်, “နမ့ၢ်ကီၢ်အံၣ်စရ့လးအတၢ်မုၢ်လၢ် ဒီးပတအဲၣ်ဒိးလၢနကလီၤမၢ်ကွံာ်လၢပဂီၢ်ဘၣ်.”

¹⁸ တၢ်အံၤဝံၤအလီၢ်ခံ, တၢ်ဒုးတၢ်ယၤဒီးပှၤဖလ့ၡသးဖိ အိၣ်ထီၣ်တဘျီဖဲဝ့ၢ်ကိာ်, ဒီးဖဲတၢ်ဒုးအံၤအခါန့ၣ်ပှၤဃူၡသးဖိ စီၤစံၤဘကဲ မၤသံကွံာ်ပှၤအနီၢ်ဖးဒိၣ်တဂၤလၢအမံၤမ့ၢ်စီၤစာ်န့ၣ်လီၤ.

¹⁹ တၢ်ဒုးတၢ်ယၤဒီးပှၤဖလ့ၡသးဖိအိၣ်ထီၣ်ကဒီးအဂၤတဘျီ လၢဝ့ၢ်ကိာ်ဒီးပှၤဝ့ၢ်ဘ့ၤသလ့ဃ့ၣ်ဖိစီၤယၤရ့းအိရကံၣ်အဖိ ခွါစီၤအ့လဃၤနၤ, မၤသံကွံာ်ပှၤဝ့ၢ်ကၤသးဖိစီၤကၤလယးလၢအဘီအိၣ်ဒီး အတိၢ်တခါလၢအမၤသးဒ်သိးပှၤထါထၣ်အနီၣ်ဘိန့ၣ်လီၤ.

²⁰ အန့ၣ်ဝံၤဒီးတၢ်ဒုးတၢ်ယၤအဂၤတဘျီအိၣ်ထီၣ်ကဒီးဝဲ လၢဝ့ၢ်ကၤသးဖဲပှၤအနီၣ်ဖးဒိၣ်လၢအအဲၣ်တၢ်ဒုးတၢ်ယၤတဂၤအိၣ် ဝဲအလီၢ်န့ၣ်လီၤ. အဝဲအိၣ်ဒီးအစုမုၢ်ဃုဘိ, လၢအစုတခီစုာ်စုာ်အလိၤဒီးအခီၣ်မုၢ်အိၣ်ဃုဘိ, လၢအခီၣ်တခီစုာ်စုာ်အလိၤန့ၣ်လီၤ.

²¹ အဝဲဒုၣ်ဒွဲၣ်ဒီးတၤတၢ်ဒီးပှၤအံၣ်စရ့လးဖိတဖၣ်အဃိ စီၤဒၤဝံးအဒီပုၢ်ဝဲၢ်ခွါစီၤၡံမံၤအဖိခွါစီၤယိနၤသၣ် မၤသံကွံာ်အီၤန့ၣ်လီၤ.

²² ပှၤလွံၢ်ဂၤအံၤမ့ၢ်ပှၤဟဲလီၤစၢၤလီၤသွဲၣ်လၢပှၤနီၢ်ဒိၣ်တဖၣ် လၢဝ့ၢ်ကၤသးအပူၤဒီးအဝဲသ့ၣ်ဘၣ်တၢ်မၤသံကွံာ်အီၤလၢ စီၤဒၤဝံးဒီးအပှၤတဖၣ်န့ၣ်လီၤ.