လံာ်စီၤၡမူၤအ့လးခံဘ့ၣ်တဘ့ၣ် 18 - Sgaw Karen Common Bible

စီၤအးဘၡါလိၣ်ဘၣ်တၢ်မၤနၢၤအီၤဒီး မၤသံကွံာ်အီၤ

¹ စီၤပၤစီၤဒၤဝံးဒုးအိၣ်ဖှိၣ်ရိဖှိၣ်အပှၤတဖၣ်ဒီးနီၤဖးလီၤအီၤဆူပှၤတကထိ, ပှၤတကယၤအကရူၢ်ဖိတဖၣ်ဒီးပာ်ထီၣ်သုးခိၣ်သုးနၢ်တဖၣ် လၢအဝဲသ့ၣ်အဖီခိၣ်လီၤ.

² အန့ၣ်ဝံၤဒီး, အဝဲဆှၢလီၤအဝဲသ့ၣ်သၢကရူၢ်အိၣ်ဒီးစီၤယိၤအာ်, စီၤယိၤအာ်အဒီပုၢ်ဝဲၢ်စီၤအဘံၡဲၤဒီးပှၤကၤသးဖိစီၤအံတဲၤ, တဂၤစုာ်စုာ်ဒ်သုးခိၣ်ဖးဒိၣ်တဖၣ်လၢကရူၢ်တဖုဘၣ်တဖုအဖီခိၣ် လီၤ. ဒီးစီၤပၤစံးဘၣ်အပှၤတဖၣ်, “ယကလဲၤဃုာ်ဒီးသုလၢယနီၢ်ကစၢ်ဒၣ်ယဲလီၤ.”

³ အဝဲသ့ၣ်စံးဆၢဝဲဒၣ်, “နတဘၣ်လဲၤဃုာ်တၢ်ဒီးပှၤဘၣ်. ပဝဲအကျါတနီၤမ့ၢ်ဃၣ်ကဒါက့ၤအသးဒီးဃ့ၢ်မ့ၢ်ဂ့ၤ, ပဝဲအကျါတဝာ်မ့ၢ်ဘၣ်တၢ်မၤသံကွံာ်အီၤမ့ၢ်ဂ့ၤန့ၣ်တမ့ၢ်ကလီၤ ဆီနီတမံၤလၢပဒုၣ်ပဒါအဂီၢ်ဘၣ်ဆၣ်, နလုၢ်ဒိၣ်ပှ့ၤဒိၣ်ထဲသိးဒီးပဝဲအဂၤတကလးညါန့ၣ်လီၤ. နမ့ၢ်အိၣ်လၢဝ့ၢ်ပူၤဖဲအံၤဒီးဆှၢလီၤန့ၢ်ပှၤတၢ်မၤစၢၤန့ၣ် ဂ့ၤဒိၣ်ဒၣ်တၢ်တက့ၢ်လီၤ.”

⁴ စီၤပၤစံးဆၢဝဲဒၣ်, “တၢ်တမံၤလၢ်လၢ်လၢသုဆိကမိၣ်လၢမ့ၢ် တၢ်အဂ့ၤကတၢၢ်န့ၣ်ယကမၤအီၤလီၤ.” အန့ၣ်ဝံၤဒီး, အဝဲဆၢထၢၣ်ဖဲတြဲၤကပၤဖဲအဝဲအပှၤတဖၣ်ဟးထီၣ် ဝဲဒ်ပှၤတကထိမ့ၢ်ဂ့ၤ, ပှၤတကယၤမ့ၢ်ဂ့ၤအကရူၢ်အသိး, တဖုဘၣ်တဖုအခါန့ၣ်လီၤ.

⁵ အဝဲဟ့ၣ်လီၤအကလုၢ်ဆူစီၤယိၤအာ်, စီၤအဘံၡဲၤဒီးစီၤအံတဲၤ အအိၣ်စံးဝဲ, “လၢတၢ်ကွၢ်မဲာ်ယၤအဃိန့ၣ်မၤဆါပှၤသးစၢ်စီၤအးဘၡါလိၣ်တဂ့ၤ.” ဒီးကယဲၢ်သုးဖိသံၣ်ဖိခဲလၢာ်နၢ်ဟူတ့ၢ် စီၤဒၤဝံးအတၢ်ဟ့ၣ်လီၤအကလုၢ်န့ၣ်, ဆူအသုးခိၣ်သုးနၢ်တဖၣ်အအိၣ်န့ၣ်လီၤ.

⁶ စီၤဒၤဝံးအသုးမုၢ်ဟးထီၣ်ဝဲဆူတၢ်ပျီပူၤဒီးဒုးပှၤအံၣ်စရ့လးဖိတဖၣ် လၢကီၢ်အ့ဖရဲၣ်အသ့ၣ်ပှၢ်ပူၤန့ၣ်လီၤ.

⁷ ပှၤအံၣ်စရ့လးဖိတဖၣ်ဘၣ်တၢ်မၤနၢၤကွံာ်အီၤလၢစီၤဒၤဝံးအပှၤတဖၣ်န့ၣ်လီၤ. တၢ်န့ၣ်မ့ၢ်တ့ၢ်ဝဲတၢ်ဃၣ်ကွံာ်လၢအလီၤပျံၤလီၤဖုးတမံၤအိၣ် ဒီးပှၤအဂၤခံကလးဘၣ်တၢ်မၤသံကွံာ်အီၤလၢနံၤအဝဲန့ၣ်လီၤ.

⁸ တၢ်ဒုးလိာ်ယၤလိာ်အသးရၤလီၤအသးလၢကီၢ်ဒီဘ့ၣ်ညါအပူၤဒီး ပှၤသံလၢသ့ၣ်ပှၢ်အပူၤအါန့ၢ်ဒံးပှၤဘၣ်တၢ်မၤသံအီၤလၢတၢ်ဒုးပျီအပူၤတက့ၢ်န့ၣ်လီၤ.

⁹ သတူၢ်ကလာ်, စီၤအးဘၡါလိၣ်ဘၣ်သဂၢၢ်လိာ်သးဒီးစီၤဒၤဝံးအပှၤတနီၤန့ၣ်လီၤ. စီၤအးဘၡါလိၣ်ဒိးဝဲကသ့ၣ်လၤတဒု, ဒီးဖဲကသ့ၣ်န့ၣ်လဲၤတၢ်လၢသ့ၣ်သ့ထိးဖးဒိၣ်တထံးအဖီလာ်အခါန့ၣ်, စီၤအးဘၡါလိၣ်အခိၣ်သူဘၣ်ဘျးဒီးသ့ၣ်ဒ့တဖၣ်လီၤ. ကသ့ၣ်လၤဃ့ၢ်ဆူညါဒီးစီၤအးဘၡါလိၣ်အိၣ်လီၤစဲၤတ့ၢ်လၢတၢ်ဖးဖီန့ၣ်လီၤ.

¹⁰ စီၤဒၤဝံးအပှၤအကျါတဂၤထံၣ်အီၤဒီးက့ၤတဲဘၣ်တၢ်ဂ့ၢ်ဆူစီၤ ယိၤအာ်ဒ်အံၤ, “တၢ်ဒိၣ်ဧၢ, ယထံၣ်ဘၢစီၤအးဘၡါလိၣ်လီၤစဲၤလၢသ့ၣ်သ့ထိးဖၣ် တထံးအခံန့ၣ်လီၤ.”

¹¹ စီၤယိၤအာ်စံးဆၢဝဲဒၣ်, “နမ့ၢ်ထံၣ်အီၤဒီး, ဘၣ်မနုၤလၢနတမၤသံကွံာ်အီၤဖဲန့ၣ်တဘျီဃီလဲၣ်. ယနီၢ်ကစၢ်ဒၣ်ယဲယကဟ့ၣ်နၤစ့အဘ့ၣ်တဆံဃုာ်ဒီးယီၢ်တကိးတခါန့ၣ်လီၤ.”

¹² ဘၣ်ဆၣ်ဒီးပှၤတဂၤန့ၣ်စံးဆၢအီၤ, “နမ့ၢ်ဟ့ၣ်ယၤစ့အဘ့ၣ်တကထိဒၣ်လဲာ်န့ၣ်ယတယူာ်ထီၣ်ဘၣ်ယစုထီ ဒါစီၤပၤအဖိခွါဘၣ်. ပဝဲကိးဂၤဒဲးပနၢ်ဟူဘၣ်စီၤပၤဟ့ၣ်လီၤအကလုၢ်ဆူနၤဒီးစီၤ အဘံၡဲၤဒီးစီၤအံတဲၤစံးဝဲလၢ, လၢတၢ်ကွၢ်မဲာ်ယၤအဃိန့ၣ် မၤဆါပှၤသးစၢ်စီၤအးဘၡါလိၣ်တဂ့ၤ, န့ၣ်လီၤ.

¹³ ဘၣ်ဆၣ်ဒီးယမ့ၢ်တစူၢ်ဘၣ်စီၤပၤအကလုၢ်ဒီးမၤသံကွံာ်စီၤအးဘၡါလိၣ်န့ၣ်, စီၤပၤကနၢ်ဟူဘၣ်တၢ်ဂ့ၢ်န့ၣ်, ဒီးတမ့ၢ်နကဒီဒၣ်အိၣ်ပှိၤယၤဘၣ်. အဂ့ၢ်ဒ်အံၤ, အဝဲညီနူၢ်နၢ်ဟူတၢ်ကိးမံၤဒဲးန့ၣ်လီၤ.”

¹⁴ စီၤယိၤအာ်စံးဝဲဒၣ်, “ယတမၤလၢာ်အါထီၣ်ယတၢ်ဆၢကတီၢ်ဒီးနၤနီတစဲးလၢၤဘၣ်.” အဝဲစိာ်ထီၣ်ဘီသၢဘ့ၣ်ဒီးဆဲးနုာ်အီၤဆူစီၤအးဘၡါလိၣ်အသးနါပှၢ်အပူၤ, ဖဲအဝဲမူဒံးဝဲအဖၢမုၢ်ဒီးအိၣ်လီၤစဲၤဝဲလၢသ့ၣ်သ့ထိးဖၣ် အလိၤအခါန့ၣ်လီၤ.

¹⁵ အန့ၣ်တစု, စီၤယိၤအာ်အပှၤသုးဖိအဂၤတဆံ ဟဲကဝီၤတံာ်စီၤအးဘၡါလိၣ်ဒီၤမၤသံကွံာ်အီၤန့ၣ်လီၤ.

¹⁶ စီၤယိၤအာ်မၢပှၤအူသီၣ်ထီၣ်ကွဲၤလၢတၢ်ကဆိကတီၢ်တၢ်ဒုးတၢ်ယၤအဂီၢ်, ဒီးအဝဲအပှၤသုးဖိတဖၣ်ဟဲက့ၤကဒါက့ၤလၢတၢ်လူၤဒုးပှၤအံၣ်စရ့လးဖိတဖၣ်န့ၣ်လီၤ.

¹⁷ အဝဲသ့ၣ်ဟံးထီၣ်စီၤအးဘၡါလိၣ်အစိၣ်ဒီးကွံာ်လီၤဝဲဆူ တၢ်ပူၤယိာ်တခါအပူၤလၢပှၢ်ပူၤ, ဒီးကးဘၢအီၤလၢလၢၢ်ဖးဒိၣ် ပူၣ်ထီၣ်အသးတဖၣ်န့ၣ်လီၤ. ကယဲၢ်ပှၤအံၣ်စရ့လးဖိတဖၣ်ထွးထီၣ်ဃ့ၢ်ကွံာ်ခဲလၢာ်, တဂၤက့ၤဆူအဟံၣ်ဒၣ်ဝဲစုာ်စုာ်န့ၣ်လီၤ.

¹⁸ ဖဲအဝဲအိၣ်မူဒံးအခါန့ၣ်စီၤအးဘၡါလိၣ်သူၣ်ထီၣ်တ့ၢ် တၢ်သ့ၣ်နီၣ်အလၢၢ်ထူၣ်တထူၣ်လၢအဂီၢ်ဒၣ်ဝဲလၢစီၤပၤအတၢ်တြီၤပူၤန့ၣ် လီၤ. အဂ့ၢ်ဒ်အံၤ, အဝဲတအိၣ်ဒီးအဖိခွါနီတဂၤလၢကစိာ်မူအဝဲအမံၤ အဂီၢ်န့ၣ်ဘၣ်. လၢတၢ်န့ၣ်အဃိအဝဲယုၢ်န့ၢ်လၢၢ်ထူၣ်န့ၣ်အမံၤဒ်အဝဲအမံၤဒၣ်ဝဲ ဒီးတုၤမုၢ်မဆါတနံၤအံၤန့ၣ်, လၢၢ်ထူၣ်န့ၣ်ဘၣ်တၢ်သ့ၣ်ညါအီၤဒ်တၢ်သ့ၣ်နီၣ်စီၤအးဘၡါလိၣ် အလၢၢ်ထူၣ်န့ၣ်လီၤ.

စီၤဒၤဝံးဘၣ်တၢ်တဲဘၣ်အီၤ လၢစီၤအးဘၡါလိၣ်အတၢ်သံအဂ့ၢ်

¹⁹ အန့ၣ်ဝံၤဒီး, စီၤစၤဒိးအဖိခွါစီၤအဃံမ့ၤဧးစံးဘၣ်စီၤယိၤအာ်ဒ်အံၤ, “ပျဲယဃ့ၢ်ဆူစီၤပၤအအိၣ်ဃုာ်ဒီးတၢ်ကစီၣ်အဂ့ၤလၢ, ယွၤအုၣ်က့ၤခီၣ်က့ၤလံအီၤလၢအဒုၣ်အဒါတဖၣ်အစုပူၤလံန့ၣ်တ က့ၢ်.”

²⁰ စီၤယိၤအာ်စံးဝဲဒၣ်, “လဲၤတဂ့ၤ. တနံၤအံၤနတဘၣ်စိာ်တၢ်ကစီၣ်အဂ့ၤနီတမံၤဘၣ်. လၢမုၢ်နံၤအဂၤတနီၤနီၤန့ၣ်နမၤအီၤကသ့, ဘၣ်ဆၣ်ဒီးတမ့ၢ်ဘၣ်တနံၤအံၤဘၣ်. အဂ့ၢ်ဒ်အံၤ, စီၤပၤအဖိခွါန့ၣ်သံလံ.

²¹ အန့ၣ်ဝံၤဒီးအဝဲတဲဘၣ်အကုၢ်, ပှၤကူၤၡးဖိတဂၤ, “လဲၤဒီးတဲဘၣ်စီၤပၤလၢတၢ်လၢနထံၣ်တ့ၢ်နဲတက့ၢ်.” ကုၢ်န့ၣ်သကူးလီၤအသးဒီးဃ့ၢ်ထီၣ်ဝဲဒၣ်လီၤ.

²² စီၤအဃံမ့ၤဧးဃ့ဆူၣ်ဝဲသပှၢ်ပှၢ်စံးဝဲ, “တၢ်ကမၤအသးဒ်လဲၣ်ဂ့ၤဒ်လဲၣ်ဂ့ၤန့ၣ်ယတကိၢ်ဘၣ်. ဝံသးစူၤပျဲစ့ၢ်ကီးယလဲၤစိာ် တၢ်ကစီၣ်န့ၣ်တက့ၢ်.” စီၤယိၤအာ်သံကွၢ်အီၤ, “ယဖိခွါဧၢ, ဘၣ်မနုၤအဃိနဘၣ်အဲၣ်ဒိးမၤတၢ်န့ၣ်လဲၣ်. နတမၤန့ၢ်တၢ်ဘျုးနီတမံၤလၢတၢ်န့ၣ်အဃိဘၣ်.”

²³ စီၤအဃံမ့ၤဧးစံးကဒီးဝဲ, “ကွၢ်ဖဲတၢ်ကမၤအသးတက့ၢ်. ယအဲၣ်ဒိးလဲၤလီၤ.” စီၤယိၤအာ်စံးဘၣ်အီၤ, “မ့မ့ၢ်ဒ်န့ၣ်ဒီးလဲၤတက့ၢ်.” လၢတၢ်န့ၣ်အဃိ, စီၤအဃံၤမ့ၤဧးဃ့ၢ်လီၤဝဲလၢကျဲလဲၤခီဖျိထံကျိယၢ်ဒ့ၣ် အတၢ်တြီၤပူၤဒီးတယံာ်ဘၣ်န့ၣ်အဝဲလဲၤပျံကွံာ်ကုၢ်တဂၤန့ၣ်လီၤ.

²⁴ စီၤဒၤဝံးဆ့ၣ်နီၤဝဲဖဲတၢ်လီၢ်လီၤပျီအိၣ်ဝဲဖဲဝ့ၢ်အတြဲၤ လၢတၢ်အိပူၤဒီးတြဲၤလၢတၢ်ချၢအဘၢၣ်စၢၤန့ၣ်လီၤ. ပှၤခိးကွၢ်တၢ်ဖိတဂၤလဲၤထီၣ်ဆူဝ့ၢ်ခိၣ်ဒူ, ဒီးဆၢထၢၣ်ဝဲဖဲတိာ်လၢကျဲစၢၤအဖီခိၣ်အခိၣ်ဒုးလိၤန့ၣ်လီၤ. အဝဲကွၢ်စိဃီၤဆူတၢ်ချၢဒီးထံၣ်ဘၣ်ဝဲပှၤတဂၤဃ့ၢ်ဝဲထဲတဂၤ ဧိၤန့ၣ်လီၤ.

²⁵ အဝဲကိးလီၤတၢ်ဒီးတဲဘၣ်စီၤပၤ, ဒီးစီၤပၤစံးဒၣ်, “အဝဲမ့ၢ်ဟဲထဲတဂၤဧိၤဒီး, အဝဲမ့ၢ်ပှၤဟဲစိာ်တၢ်ကစီၣ်အဂ့ၤလီၤ.” ပှၤဃ့ၢ်တၢ်ဖိတဂၤန့ၣ်ဟဲဘူးထီၣ်ဘူးထီၣ်ဝဲဒၣ်လီၤ.

²⁶ အန့ၣ်ဝံၤဒီး, ပှၤခိးကွၢ်တၢ်ဖိထံၣ်ကဒီး ပှၤအဂၤတဂၤဟဲဃ့ၢ်ကဒီးထဲတဂၤဧိၤန့ၣ်လီၤ. ဒီးအဝဲကိးတဲလီၤတၢ်ဆူပှၤပၢၤတြဲၤ အအိၣ်စံးဝဲ, “ကွၢ်ကွၢ်, ပှၤဟဲဃ့ၢ်ကဒီးလၢန့ၣ်အဂၤတဂၤလီၤ.” စီၤပၤစံးဆၢဝဲဒၣ်, “ပှၤတဂၤအံၤစ့ၢ်ကီးဟဲစိာ်တၢ်ကစီၣ်အဂ့ၤလီၤ.”

²⁷ ပှၤခိးကွၢ်တၢ်ဖိစံးဝဲဒၣ်, “ယထံၣ်ဘၣ်လၢပှၤအခီၣ်ထံးတဂၤ ဃ့ၢ်ဝဲလီၤဂာ်ဒ်စီၤအဃံမ့ၤဧးန့ၣ်လီၤ.” စီၤပၤစံးဝဲဒၣ်, “အဝဲမ့ၢ်ဒၣ်ပှၤအဂ့ၤတဂၤလီၤ. ဒီးအဝဲဟဲစိာ်တၢ်ကစီၣ်လၢအဂ့ၤန့ၣ်လီၤ.”

²⁸ စီၤအဃံမ့ၤဧးကိးထီၣ်တၢ်ဆၢဂ့ၤဆၢဝါဆူစီၤပၤအအိၣ်, စုးလီၤအသးလၢဟီၣ်ခိၣ်လိၤလၢစီၤပၤအမဲာ်ညါဒီးစံးဝဲဒၣ်, “စံးထီၣ်ပတြၢၤယွၤ, နကစၢ်ယွၤလၢအဟ့ၣ်လီၤနၤတၢ်မၤနၢၤလၢ ပှၤတဖၣ်လၢအပူထီၣ်ထီဒါနဲဒၣ်တၢ်ဒိၣ်ကစၢ်စီၤပၤန့ၣ်တက့ၢ်.”

²⁹ စီၤပၤသံကွၢ်ဝဲဒၣ်, “မ့ၢ်ပှၤသးစၢ်စီၤအးဘၡါလိၣ်အိၣ်မုာ်ဆိးပၢၤကစီဒါဧါ” စီၤအဃံမ့ၤဧးစံးဆၢဝဲဒၣ်, “တၢ်ဒိၣ်ဧၢ, ဖဲနသုးခိၣ်စီၤယိၤအာ်ဆှၢလီၤယၤန့ၣ်, ယထံၣ်တၢ်မၤအသးရူၢ်ရူၢ်တၢတၢဖးဒိၣ်တမံၤ, ဘၣ်ဆၣ်ဒီးတၢ်န့ၣ်မ့ၢ်မနုၤလဲၣ်န့ၣ်ယတဲတဘၣ်ဘၣ်.”

³⁰ စီၤပၤစံးဘၣ်အီၤ, “လဲၤဆၢထၢၣ်ဖဲန့ၣ်တက့ၢ်.” ဒီးအဝဲလဲၤဖဲန့ၣ်ဒီးဆၢထၢၣ်ဝဲလီၤ.

³¹ အန့ၣ်တစု, ပှၤကူၤၡးကုၢ်ဖိတဂၤဟဲတုၤဝဲဒီးစံးဘၣ်စီၤပၤ, “ယအိၣ်ဒီးတၢ်ကစီၣ်အဂ့ၤလၢနဲဒၣ်တၢ်ဒိၣ်ကစၢ်စီၤပၤအဂီၢ်န့ၣ်လီၤ. တနံၤအံၤယွၤဟ့ၣ်လီၤလံနၤလၢတၢ်မၤနၢၤကွံာ်ကယဲၢ်ပှၤတဖၣ်လၢ ပူထီၣ်ထီဒါနၤခဲလၢာ်န့ၣ်လံ.”

³² စီၤပၤသံကွၢ်ဝဲ, “မ့ၢ်ပှၤသးစၢ်စီၤအးဘၡါလိၣ်အိၣ်မုာ်ဆိးပၢၤစ့ၢ်ကီးဧါ.” ကုၢ်တဂၤန့ၣ်စံးဆၢဝဲဒၣ်, “တၢ်ဒိၣ်ဧၢ, ယဆၢလၢတၢ်လၢအမၤတ့ၢ်အသးဒီးအီၤန့ၣ်ကမၤအသး ဒီးနဒုၣ်နဒါခဲလၢာ်, ဒီးကမၤအသးဒီးကယဲၢ်ပှၤလၢအပူထီၣ်ထီဒါခဲလၢာ်န့ၣ်လီၤ.”

³³ တၢ်သးအုးလုၣ်ဘၢကွံာ်စီၤပၤန့ၣ်လီၤ. အဝဲလဲၤထီၣ်ဆူဒၢးလၢကျဲစၢၤအတြဲၤအဖီခိၣ်ဒီးဟီၣ်ဝဲလီၤ. ဖဲအလဲၤထီၣ်အဖၢမုၢ်န့ၣ်ဟီၣ်တၢ်ယၢၤတၢ်စံးဝဲ, “အိယဖိခွါဧၢ, ယဖိခွါစီၤအးဘၡါလိၣ်ဧၢ. စီၤအးဘၡါလိၣ်, ယဖိခွါဧၢ. ဘၣ်မနုၤယတသံတ့ၢ်လၢနလီၢ်လဲၣ် ယဖိခွါဧၢ, စီၤအးဘၡါလိၣ်, ယဖိခွါဧၢ.”