လံာ်စီၤၡမူၤအ့လးခံဘ့ၣ်တဘ့ၣ် 14 - Sgaw Karen Common Bible

စီၤယိၤအာ်ကတဲာ်ကတီၤတၢ်လၢ စီၤအးဘၡါလိၣ်အဂီၢ်

¹ စီၤယိၤအာ်သ့ၣ်ညါဘၣ်ဝဲလၢစီၤပၤဒၤဝံး သးသယုၢ်ဘၣ်စီၤအးဘၡါလိၣ်ဒိၣ်မးန့ၣ်လီၤ.

² လၢတၢ်န့ၣ်အဃိ, အဝဲမၢပှၤကိးန့ၢ်အီၤပိာ်မုၣ်တဂၤလၢအကူၣ်သ့ဒိၣ်မး လၢအအိၣ်ဆိးဝဲလၢဝ့ၢ်တကိၤန့ၣ်လီၤ. ဖဲပိာ်မုၣ်န့ၣ်ဟဲတုၤဒီးအဝဲစံးဘၣ်အီၤဒ်အံၤ, “ပာ်မၤနသးဒ်နအိၣ်လၢတၢ်ဟီၣ်တၢ်ယၢၤအပူၤ, ကူထီၣ်ကၤထီၣ်တၢ်ဘၣ်မိၣ်ဘၣ်မးအကူအသိးတဖၣ်ဒီးခွံနခိၣ်သူတဂ့ၤ. မၤနသးဒ်ပိာ်မုၣ်တဂၤလၢအဟီၣ်တၢ်ဖးယံာ်ဖးထၢလံအသိးန့ၣ်တက့ၢ်.

³ အန့ၣ်ဝံၤဒီး, လဲၤဆူစီၤပၤအအိၣ်ဒီးစံးဘၣ်အီၤ, တၢ်လၢယမၤလိာ်နၤလၢနကဘၣ်တဲအီၤန့ၣ်တက့ၢ်.” အန့ၣ်ဝံၤဒီး, စီၤယိၤအာ်တဲဘၣ်အီၤတၢ်လၢအဝဲကစံးတဲဝဲန့ၣ်လီၤ.

⁴ ပိာ်မုၣ်န့ၣ်လဲၤဆူစီၤပၤအအိၣ်, ထိၣ်လီၤပှီၤအသး, ဆုးလီၤအခိၣ်ဆူဟီၣ်ခိၣ်လိၤလၢတၢ်ယူးယီၣ်အပူၤဒီးစံးဝဲဒၣ်, “နဲဒၣ်, တၢ်ဒိၣ်ကစၢ်စီၤပၤဧၢ, မၤစၢၤယၤတက့ၢ်.”

⁵ စီၤပၤသံကွၢ်အီၤ, “နလိၣ်ဘၣ်တၢ်မနုၤလဲၣ်.” ပိာ်မုၣ်န့ၣ်စံးဆၢအီၤ, “တၢ်ဒိၣ်ဧၢ, ယမ့ၢ်မုၣ်ကမဲလၢအဖှီၣ်တဂၤလီၤ. ယဝၤသံကွံာ်လံ.

⁶ တၢ်ဒိၣ်ဧၢ, ယအိၣ်ဒီးဖိခွါခံဂၤ, ဒီးဘၣ်တနံၤန့ၣ်အဝဲသ့ၣ် အ့ၣ်လိာ်အသးလၢပျီတဖၣ်အပူၤ, ဖဲပှၤတအိၣ်နီတဂၤလၢကထုးဖှၣ်အဝဲသ့ၣ်ဘၣ်, ဒီးလၢအကျါတဂၤန့ၣ်မၤသံကွံာ်အဂၤတဂၤလီၤ.

⁷ ဒီးခဲကနံၣ်အံၤတၢ်ဒိၣ်ဧၢ, ယဘူးယတံၢ်ခဲလၢာ်ဃၣ်ကွံာ်အသးထီဒါယၤ ဒီးဃ့ဆူၣ်ဝဲလၢယကဘၣ်ဟ့ၣ်လီၤယဖိခွါဆူအဝဲသ့ၣ်အအိၣ် ဒ်သိးအဝဲသ့ၣ်မၤသံကွံာ်အီၤကသ့, လၢအဝဲမၤသံတ့ၢ်အဒီပုၢ်ဝဲၢ်ခွါအဃိန့ၣ်လီၤ. အဝဲသ့ၣ်မ့ၢ်မၤတၢ်အံၤဒီးယကအိၣ်လီၤတဲာ်တအိၣ်ဒီးဖိခွါနီတဂၤဘၣ်လီၤ. အဝဲသ့ၣ်ကမၤဟးဂီၤယတၢ်မုၢ်လၢ်လၢခံကတၢၢ်ဒီးဖိခွါတဂၤလၢ ကစိာ်မူထွဲဒ်ယဝၤအမံၤန့ၣ်တအိၣ်လၢၤဘၣ်.”

⁸ စီၤပၤစံးဝဲဒၣ်, “က့ၤက့ၤဆူနဟံၣ်တက့ၢ်. ယကကွၢ်သုးကျဲၤတၢ်ဂ့ၢ်အံၤန့ၣ်လီၤ.”

⁹ ပိာ်မုၣ်န့ၣ်စံးဘၣ်အီၤ, “နဲဒၣ်တၢ်ဒိၣ်ကစၢ်စီၤပၤဧၢ, မ်ယဟံၣ်ဖိဃီဖိဒီးယၤဒိးဘၣ်တၢ်ပာ်ဒ့ၣ်ပာ်ကမၣ်အီၤလၢကယဲၢ် တၢ်လၢနမၤအီၤတမံၤလၢ်လၢ်အဃိန့ၣ်တက့ၢ်. နၤဒီးနစီၤလိၣ်စီၤပၤအဟံၣ်ဖိဃီဖိအတၢ်ကမၣ်တအိၣ်ဘၣ်နီတမံၤဘၣ်.”

¹⁰ စီၤပၤစံးဆၢဝဲဒၣ်, “ပှၤတဂၤဂ့ၤတဂၤဂ့ၤမ့ၢ်မၤပျံၤမၤ ဖုးနၤဒီး, ဟဲကိးအီၤဆူယအိၣ်တက့ၢ်. ဒီးအဝဲမၤတံာ်တာ်ကဒီးနၤတသ့လၢၤ နီတစုဘၣ်.”

¹¹ ပိာ်မုၣ်န့ၣ်စံးဝဲဒၣ်, “နဲဒၣ်တၢ်ဒိၣ်ကစၢ်စီၤပၤဧၢ, ဝံသးစူၤဘါထုကဖၣ်တၢ်ဆူယွၤ, နကစၢ်ယွၤအအိၣ်ဒ်သိးယဘူးယတံၢ် လၢအအိၣ်မူအိၣ်ဒါလၢတၢ်ဟ့ၣ်ကၣ်က့ၤတၢ်လၢယဖိခွါအတၢ်သံအဃိ န့ၣ်, အသုတမၤတၢ်ကမၣ်လၢအဒိၣ်န့ၢ်ဒံးအလီၢ်တမံၤ, ခီဖျိတၢ်မၤသံကွံာ်ယဖိခွါအဂၤတဂၤအဃိတဂ့ၤ.” စီၤဒၤဝံးစံးဆၢဝဲဒၣ်, “ယအၢၣ်လီၤအီလီၤနၤလၢယွၤလၢအမူဝဲတဂၤအမံၤအပူၤလၢနဖိ ခွါတဘၣ်တၢ်မၤဆါအီၤဆံးကိာ်ဖိဒၣ်လဲာ်ဘၣ်န့ၣ်လီၤ.”

¹² ပိာ်မုၣ်န့ၣ်စံးဝဲဒၣ်, “ဝံသးစူၤ, နဲဒၣ်တၢ်ဒိၣ်ကစၢ်စီၤပၤဧၢ, ဒုးစံးဘၣ်အါထီၣ်ယၤတၢ်ဆူညါထဲတမံၤဧိၤတက့ၢ်.” စီၤပၤစံးဆၢဝဲဒၣ်, “ဂ့ၤလံ.”

¹³ ပိာ်မုၣ်န့ၣ်စံးဘၣ်အီၤ, “ဘၣ်မနုၤအဃိနကူၣ်ထီၣ်တၢ်ကမၣ်ဒ်န့ၣ်တမံၤ ထီဒါကစၢ်ယွၤအပှၤဂီၢ်မုၢ်န့ၣ်လဲၣ်. နတပျဲဘၣ်နဖိခွါဒၣ်နဲလၢကဟဲက့ၤကဒါက့ၤလၢတၢ်ဃ့ၢ်ပူၤဖျဲးအသးအလီၢ်ဘၣ်. လၢတၢ်န့ၣ်အဃိ, နမ့ၢ်ပှၤစံၣ်ညီၣ်လီၤနသးခီဖျိတၢ်လၢနစံးတ့ၢ်အီၤခဲအံၤန့ၣ်လီၤ.

¹⁴ ဒ်ထံလၢအလီၤဂၢ်လၢဟီၣ်ခိၣ်လိၤ, လၢအဘၣ်တၢ်ပာ်ဖှိၣ်က့ၤကဒီး အီၤတသ့ဘၣ်အသိးန့ၣ်, ပကဘၣ်သံကိးဂၤဒဲးန့ၣ်လီၤ. ဘၣ်ဆၣ်ကစၢ်ယွၤတမၤသံဘၣ်တၢ်လီၤထူလီၤယိာ်ဘၣ်. လၢတၢ်န့ၣ်အဃိ, အစှၤကတၢၢ်စီၤပၤကိးက့ၤပှၤတဂၤလၢအဃ့ၢ်ပူၤဖျဲးအသးသ့ဝဲလီၤ.

¹⁵ ခဲကနံၣ်အံၤ, နဲဒၣ်, တၢ်ဒိၣ်ကစၢ်စီၤပၤဧၢ, တၢ်အဂ့ၢ်အခၢးလၢယဟဲဒ်သိးယကကတိၤတၢ်ဒီးနၤန့ၣ်, မ့ၢ်ဒၣ်ပှၤဂီၢ်မုၢ်မၤပျံၤမၤဖုးယၤ, ဒီးလၢတၢ်န့ၣ်အဃိ, ယစံးလီၤယသးလၢယကဘၣ်ကတိၤတၢ်ဒီးနၤ, အိၣ်ဒီးတၢ်မုၢ်လၢ်လၢနကမၤတၢ်လၢဒ်ယဃ့နၤန့ၣ်လီၤ.

¹⁶ ယဆိကမိၣ်လၢနကဒိကနၣ်ယၤဒီးမၤပူၤမၤဖျဲးယၤလၢပှၤတဂၤလၢ အကျဲးစၢးဒ်သိးကမၤသံယဖိခွါ, ဒီးယၤ, အစုပူၤန့ၣ်လီၤ. အဝဲဒၣ်သးအိၣ်သုးကွံာ်ပှၤလၢကီၢ်တဘ့ၣ်လၢ ကစၢ်ယွၤဟ့ၣ်လီၤအပှၤဂီၢ်မုၢ်အံၤအပူၤန့ၣ်လီၤ.

¹⁷ တၢ်ဒိၣ်ဧၢ, ယစံးလီၤယသးလၢနတၢ်အၢၣ်လီၤအီလီၤန့ၣ်, ကမၤပူၤဖျဲးယၤလီၤ. အဂ့ၢ်ဒ်အံၤ, စီၤပၤန့ၣ်လီၤဂာ်ဒီးကစၢ်ယွၤအကလူးတဂၤဒီးနီၤ ဖးတၢ်ဂ့ၤဒီးတၢ်အၢအဆၢသ့ဝဲဒၣ်န့ၣ်လီၤ. မ်ယွၤ, နကစၢ်ယွၤအိၣ်ဒီးနၤတက့ၢ်.”

¹⁸ စီၤပၤစံးဘၣ်ပိာ်မုၣ်န့ၣ်, “ယကသံကွၢ်နၤတၢ်တမံၤ ဒီးနကဘၣ်တဲယၤတၢ်မ့ၢ်တၢ်တီလၢာ်လၢာ်ဆ့ဆ့န့ၣ်လီၤ.” ပိာ်မုၣ်န့ၣ်စံးဆၢအီၤ, “သံကွၢ်ယၤတၢ်တမံၤဂ့ၤတမံၤဂ့ၤတက့ၢ်. နဲဒၣ်, တၢ်ဒိၣ်ကစၢ်စီၤပၤဧၢ.”

¹⁹ စီၤပၤသံကွၢ်အီၤ, “မ့ၢ်စီၤယိၤအာ်မၢနမၤတၢ်အံၤန့ၣ်ဧါ.” ပိာ်မုၣ်န့ၣ်စံးဆၢအီၤ, “နဲဒၣ်, တၢ်ဒိၣ်ကစၢ်စီၤပၤဧၢ, ယဆိၣ်တၢ်လၢတၢ်စီဆှံခဲလၢာ်အပူၤလၢ, ကျဲတအိၣ်ဘၣ်နီတဘိလၢ ယကပဒ့ၣ်ဟးဆှဲးစံးဆၢနတၢ်သံကွၢ်ဘၣ်န့ၣ်လီၤ. သပှၢ်ကတၢၢ်နသုးခိၣ်စီၤယိၤအာ်, မ့ၢ်ပှၤလၢအတဲဘၣ်ယၤလၢယကဘၣ်မၤ တၢ်မနုၤဒီးယကဘၣ်စံးတၢ်မနုၤလဲၣ်န့ၣ်လီၤ.

²⁰ ဘၣ်ဆၣ်ဒီးအဝဲမၤတ့ၢ်တၢ်အံၤဒ်သိးလၢကမၤလိၤမၤဘၣ်က့ၤတၢ်ဂ့ၢ်ခဲလၢာ်အံၤန့ၣ်လီၤ. နဲဒၣ်တၢ်ဒိၣ်ကစၢ်စီၤပၤမ့ၢ်ပှၤကူၣ်သ့ထဲသိးဒီးကစၢ်ယွၤအကလူး ဒီးသ့ၣ်ညါတၢ်ခဲလၢာ်လၢအမၤအသးန့ၣ်လီၤ.”

²¹ လၢခံက့ၤဒီး, စီၤပၤစံးဘၣ်စီၤယိၤအာ်, “ယပာ်လီၤယသးလၢယကမၤတၢ်လၢနအဲၣ်ဒိးန့ၣ်လီၤ. လဲၤဒီးကိးန့ၢ်ပှၤသးစၢ်စီၤအးဘၡါလိၣ်ဒီးဟဲက့ၤကိးအီၤဆူအံၤတက့ၢ်.”

²² စီၤယိၤအာ်ထိၣ်လီၤပှီၤအသးဆူဟီၣ်ခိၣ်လိၤလၢစီၤဒၤဝံးအမဲာ် ညါလၢတၢ်ယူးယီၣ်အပူၤဒီးစံးဝဲဒၣ်, “နဲဒၣ်, တၢ်ဒိၣ်ကစၢ်စီၤပၤဧၢ, ကစၢ်ယွၤဆိၣ်ဂ့ၤနၤလီၤ. ခဲကနံၣ်အံၤ, ယသ့ၣ်ညါယဲလၢယဘၣ်ဘျုးဘၣ်ဖှိၣ်လၢနမဲာ်ညါန့ၣ်လီၤ. အဂ့ၢ်ဒ်အံၤ, နဟ့ၣ်လီၤယၤတၢ်လၢယဃ့ ကညးအီၤန့ၣ်လီၤ.”

²³ အန့ၣ်ဝံၤဒီး, အဝဲဆၢထၢၣ်လဲၤဆူဝ့ၢ်ကၡူၢ်ဒီးဟဲက့ၤကိးကဒါက့ၤစီၤအးဘၡါလိၣ်ဆူဝ့ၢ်ယရူၤၡလ့ၣ်န့ၣ်လီၤ.

²⁴ ဘၣ်ဆၣ်ဒီးစီၤပၤဟ့ၣ်လီၤအကလုၢ်လၢစီၤအးဘၡါလိၣ်တဘၣ်အိၣ်လၢနူၢ်ပူၤစီၤပူၤဘၣ်. စီၤပၤစံးဝဲဒၣ်, “ယတအဲၣ်ဒိးထံၣ်အီၤဘၣ်.” လၢတၢ်န့ၣ်အဃိစီၤအးဘၡါလိၣ်အိၣ် လၢအဟံၣ်ဒၣ်ဝဲအပူၤဒီးတပာ်ဖျါထီၣ်အသးလၢစီၤပၤအမဲာ်ညါန့ၣ်ဘၣ်.

စီၤအးဘၡါလိၣ်ဘၣ်တၢ်တၢ်မၤဃူမၤဖိးအီၤ ဒီးစီၤဒၤဝံး

²⁵ လၢကီၢ်အံၣ်စရ့လးအပူၤန့ၣ် ပှၤတအိၣ်ဝဲနီတဂၤလၢအမံၤကဟူသၣ်ကဖျါဝဲလၢအဒိၣ်တၢ်ဂ့ၤအဃိဒ်သိးစီၤအးဘၡါလိၣ်န့ၣ်ဘၣ်. စးထီၣ်လၢအခိၣ်တုၤလီၤလၢအခီၣ်န့ၣ် နီၢ်ခိအတၢ်လီၤတူာ်လီၤကာ်တအိၣ်နီတမံၤဘၣ်.

²⁶ အဝဲအခိၣ်သူတီၣ်မး, ဒီးအဝဲဘၣ်တံာ်ကွံာ်ဝဲတနံၣ်တဘျီ ဖဲအထီထီၣ်ဒီးဃၢထီၣ်ဝဲဒိၣ်မးအခါန့ၣ်လီၤ. အဃၢလီၤတယၢၢ်ဝဲခံၡက့လးခံကယၤ, ဒ်စီၤလိၣ်စီၤပၤအစီၤ ပီၢ်သၣ်အနီၣ်ထိၣ်အိၣ်ဝဲအသိးန့ၣ်လီၤ.

²⁷ စီၤအးဘၡါလိၣ်အဖိခွါအိၣ်သၢဂၤဒီးအဖိမုၣ်တဂၤလၢအမံၤမ့ၢ်ဝဲနီၢ်တၤမၢ် ဒီးမ့ၢ်ပိာ်မုၣ်တဂၤလၢအဃံလၤဒိၣ်မးန့ၣ်လီၤ.

²⁸ စီၤအးဘၡါလိၣ်အိၣ်ဝဲလၢဝ့ၢ်ယရူၤၡလ့ၣ်အပူၤခံနံၣ် ဒီးတထံၣ်လိာ်စီၤပၤနီတဘျီဘၣ်.

²⁹ အန့ၣ်ဒီး, အဝဲမၢပှၤလဲၤကိးန့ၢ်အီၤစီၤယိၤအာ် ဒ်သိးကမၢအီၤလၢကလဲၤဆူစီၤပၤအအိၣ်လၢအဝဲအဂီၢ်န့ၣ်လီၤ. ဘၣ်ဆၣ်ဒီးစီၤယိၤအာ်တဟဲဝဲဘၣ်. မၤကဒီးတစုစီၤအးဘၡါလိၣ်မၢပှၤလဲၤကိးကဒီးအီၤ, ဘၣ်ဆၣ်ဒီးစီၤယိၤအာ်ဂ့ၢ်လိာ်ဟဲကဒီးဝဲလီၤ.

³⁰ လၢတၢ်န့ၣ်အဃိစီၤအးဘၡါလိၣ်စံးဘၣ်အခ့အပှၤတဖၣ်ဒ်အံၤ, “ကွၢ်, စီၤယိၤအာ်အစံာ်ပျီန့ၣ်အိၣ်ဖဲယစံာ်ပျီအကပၤ, ဒီးဘုမုယီၤဘၣ်တၢ်သူၣ်အီၤလၢအပူၤန့ၣ်လီၤ. လဲၤဒီးဆူးကဲၤထီၣ်ကွံာ်အီၤလၢမ့ၣ်အူတက့ၢ်.” မၤသးဒ်န့ၣ်ဒီး, အဝဲသ့ၣ်လဲၤဒီးဆူးကဲၤထီၣ်စံာ်ပျီလၢမ့ၣ်အူန့ၣ်လီၤ.”

³¹ စီၤယိၤအာ်လဲၤဆူစီၤအးဘၡါလိၣ်အဟံၣ်ဒီးသံကွၢ်အီၤဆူၣ်ဆူၣ်ဒ်အံၤ, “ဘၣ်မနုၤနခ့နပှၤတဖၣ်ဆူးကဲၤထီၣ်ယစံာ်ပျီလၢမ့ၣ်အူန့ၣ် လဲၣ်.”

³² စီၤအးဘၡါလိၣ်စံးဆၢဝဲဒၣ်, “အဂ့ၢ်ဒ်အံၤ, ဖဲယမၢပှၤလဲၤကိးနၤန့ၣ်နတဟဲဘၣ်. ယအဲၣ်ဒိးလၢနကလဲၤဆူ စီၤပၤအအိၣ်လၢယဂီၢ်ဒီးသံကွၢ်န့ၢ်ယၤ, ဘၣ်မနုၤလၢယဟးထီၣ်လၢဝ့ၢ်ကၡူၢ်ဒီးဟဲဆူအံၤန့ၣ်လဲၣ်. ယအိၣ်ဖဲန့ၣ်န့ၣ်, ဂ့ၤဒိၣ်ဒၣ်တၢ်တက့ၢ်လၢယဂီၢ်န့ၣ်လီၤ.” ဒီးစီၤအးဘၡါလိၣ်စံးအါထီၣ်ကဒီးဝဲ, “ယအဲၣ်ဒိးလၢနကသုးကျဲၤတၢ်လၢယဂီၢ်ဒ်သိးယကထံၣ်ဘၣ်စီၤပၤ, ဒီးယတၢ်ကမၣ်မ့ၢ်အိၣ်န့ၣ်, မ်အမၤသံကွံာ်ယၤတက့ၢ်.”

³³ လၢတၢ်န့ၣ်အဃိ, စီၤယိၤအာ်လဲၤဆူစီၤပၤဒၤဝံးအအိၣ်ဒီးတဲ ဘၣ်အီၤတၢ်လၢစီၤအးဘၡါလိၣ်စံးတ့ၢ်ဝဲန့ၣ်လီၤ. စီၤပၤမၢပှၤလဲၤကိးစီၤအးဘၡါလိၣ်လၢကဟဲဆူအဝဲအအိၣ်ဒီး တီၤလီၤကဒွံကျိာ်ဒီးဆူးလီၤအခိၣ်ဆူဟီၣ်ခိၣ်လိၤလၢအမဲာ်ညါန့ၣ်လီၤ. စီၤပၤတူၢ်လိာ်မုာ်အီၤလၢတၢ်နၢမူန့ၣ်လီၤ.