၂ ပ့းတရူး 1 - Sgaw Karen Common Bible

တၢ်ကတိၤလၢညါ

¹ လၢစီၤၡံမိၣ်ပ့းတရူး, ယ့ၣ်ၡူးခရံာ်အခ့အပှၤ ဒီးအတၢ်မၢဖိ, ဆူပှၤတဖၣ်လၢခီဖျိကစၢ်ယွၤဒီးပှၤ အုၣ်က့ၤခီၣ်က့ၤတၢ်ယ့ၣ်ၡူးခရံာ်အတၢ်တီတၢ်လိၤန့ၣ်, ဘၣ်တၢ်ဟ့ၣ်လီၤအီၤလၢတၢ်စူၢ်တၢ်နာ်လၢအလုၢ်ဒိၣ် ပှ့ၤဒိၣ်ဒ်ပတၢ်စူၢ်တၢ်နာ်လၢအလုၢ်ဒိၣ်ပှ့ၤဒိၣ်အသိးအအိၣ်,

² မ်တၢ်ဘျုးတၢ်ဖှိၣ်ဒီးတၢ်ဃူတၢ်ဖိးမ့ၢ်သုတၢ်လၢလၢ ပှဲၤပှဲၤခီဖျိသုတၢ်သ့ၣ်ညါကစၢ်ယွၤဒီးပကစၢ်ယ့ၣ်ၡူးခရံာ် န့ၣ်တက့ၢ်.

ကစၢ်ယွၤအတၢ်ကိးဒီးအတၢ်ဃုထၢ

³ ကစၢ်ယွၤအတၢ်စိကမီၤဟ့ၣ်လီၤပှၤတၢ်ခဲလၢာ်လၢပလိၣ် ဘၣ်အီၤ, ဒ်သိးပကအိၣ်မူတၢ်အဲၣ်ထူအဲၣ်ယွၤအတၢ်အိၣ် မူနီၢ်နီၢ်ခီဖျိပတၢ်သ့ၣ်ညါပှၤလၢအကိးန့ၢ်ပှၤ, ဒ်သိးကဒိးန့ၢ်ဃုာ်အလၤကပီၤဒီးအတၢ်ဂ့ၤတၢ်ဝါတဂၤ န့ၣ်လီၤ.

⁴ လၢကျဲဒ်အံၤန့ၣ်, အဝဲဟ့ၣ်လီၤလံစ့ၢ်ကီးပှၤလၢတၢ် ဟ့ၣ်အဒိၣ်အမုၢ်ဒီးလုၢ်ဒိၣ်ပှ့ၤဒိၣ်တဖၣ်လၢအအၢၣ်လီၤ တ့ၢ်ဝဲ, ဒ်သိးခီဖျိတၢ်ဟ့ၣ်တဖၣ်အံၤသုကထူၣ်ဖျဲး ထီၣ်လၢတၢ်သးကွံလၢအအိၣ်လၢဟီၣ်ခိၣ်အံၤ အပူၤလၢအမၤဟးဂီၤတၢ်, ဒီးသုကဒိးန့ၢ်ဃုာ်ကစၢ်ယွၤ အန့ဆၢၣ်အဂီၢ်န့ၣ်လီၤ.

⁵ လၢတၢ်ဂ့ၢ်အံၤအဃိ, ဂုာ်ကျဲးစၢးအဂ့ၤကတၢၢ်ဒီးလၢသုတၢ် စူၢ်တၢ်နာ်အမဲာ်ညါပာ်ဖှိၣ်အါထီၣ်တၢ်ဂ့ၤတၢ်ဝါ, ဒီးလၢတၢ်ဂ့ၤတၢ်ဝါအမဲာ်ညါပာ်ဖှိၣ်အါထီၣ်တၢ်သ့ၣ်ညါ,

⁶ လၢတၢ်သ့ၣ်ညါအမဲာ်ညါပာ်ဖှိၣ်အါထီၣ်တၢ်ကီၤသူၣ် ကီၤသး, ဒီးလၢတၢ်ကီၤသူၣ်ကီၤသးအမဲာ်ညါပာ်ဖှိၣ် အါထီၣ်တၢ်သ့တူၢ်တၢ်, ဒီးလၢတၢ်သ့တူၢ်တၢ်အမဲာ်ညါပာ်ဖှိၣ်အါထီၣ်တၢ်အဲၣ် ထူအဲၣ်ယွၤ,

⁷ လၢတၢ်အဲၣ်ထူအဲၣ်ယွၤအမဲာ်ညါပာ်ဖှိၣ်အါထီၣ်တၢ်အဲၣ် ပုၢ်အဲၣ်ဝဲၢ်, ဒီးလၢတၢ်အဲၣ်ပုၢ်အဲၣ်ဝဲၢ်အမဲာ်ညါပာ်ဖှိၣ်အါထီၣ် တၢ်အဲၣ်တၢ်ကွံတက့ၢ်.

⁸ တၢ်သ့ၣ်တဖၣ်အံၤမ့ၢ်တၢ်လၢသုလိၣ်ဘၣ်အီၤ, ဒီးသုမ့ၢ်အိၣ်ဒီးတၢ်သ့ၣ်တဖၣ်အံၤအါအါကလဲာ်ဒီး, ကဒုးမူဒုးဂဲၤသုဒီးဒုးကဲဘျုးကဲဖှိၣ်သုလၢသုတၢ်သ့ၣ်ညါ ပကစၢ်ယ့ၣ်ၡူးခရံာ်အပူၤန့ၣ်လီၤ.

⁹ ဘၣ်ဆၣ်ဒီး, ပှၤလၢအတအိၣ်ဘၣ်ဒီးတၢ်သ့ၣ်တဖၣ်အံၤန့ၣ်, အတၢ်ထံၣ်ကဖုၣ်ဝဲတုၤဒၣ်လဲာ်တထံၣ်တၢ်လၢၤဘၣ်, ဒီးသးပ့ၤနီၣ်လံဝဲလၢအဝဲဘၣ်တၢ်မၤကဆှီတ့ၢ်လံအီၤလၢ အတၢ်ဒဲးဘးအပူၤကွံာ်တဖၣ်န့ၣ်လီၤ.

¹⁰ လၢတၢ်န့ၣ်အဃိယဒီပုၢ်ဝဲၢ်သ့ၣ်ဧၢ, ကျဲးစၢးဆူၣ်ထီၣ်ဒ်သိးကစၢ်ယွၤအတၢ်ကိးသုဒီးအတၢ် ဃုထၢသုကကဲထီၣ်တၢ်လဲၤခီဖျိအဂၢၢ်အကျၢၤတမံၤအဂီၢ်န့ၣ် တက့ၢ်. သုမ့ၢ်မၤဒ်န့ၣ်ဒီး, သုတလီၤတဲာ်ကွံာ်လၢသုတၢ်စူၢ်တၢ်နာ်အပူၤနီတဘျီဘၣ်.

¹¹ လၢကျဲဒ်အံၤန့ၣ်, တၢ်ကဟ့ၣ်သုတၢ်အခွဲးအယာ်အလၢ အပှဲၤလၢသုကလဲၤနုာ်ဘၣ်ဆူပကစၢ်ဒီးပှၤအုၣ်က့ၤခီၣ်က့ၤ ပှၤယ့ၣ်ၡူးခရံာ်အဘီအမုၢ်အထူအယိာ်အပူၤန့ၣ်လီၤ.

¹² လၢတၢ်န့ၣ်အဃိ, သုသ့ၣ်ညါပာ်စၢၤတၢ်သ့ၣ်တဖၣ်အံၤ, ဒီးသုမ့ၢ်အိၣ်ဂၢၢ်ဆိးကျၢၤတ့ၢ်လၢတၢ်မ့ၢ်တၢ်တီလၢသုဒိး န့ၢ်ဘၣ်တ့ၢ်လံအီၤအပူၤဘၣ်ဆၣ်ဒီး, ယကဒုးသ့ၣ်နီၣ်ထီၣ်သုလၢတၢ်ဂ့ၢ်တဖၣ်အံၤထီဘိန့ၣ်လီၤ.

¹³ ယဆိကမိၣ်လၢဖဲယအိၣ်မူဒံးအဖၢမုၢ်ဒီး, ယထိၣ်ဂဲၤထီၣ်သုတၢ်သ့ၣ်နီၣ်ဘၣ်ဃးတၢ်ဂ့ၢ်တဖၣ်အံၤန့ၣ်မ့ၢ်တၢ် လၢအဘၣ်န့ၣ်လီၤ.

¹⁴ ယသ့ၣ်ညါလၢတယံာ်လၢၤဘၣ်ဒီးယကဘၣ်ပာ်တ့ၢ်ကွံာ် ယနီၢ်ခိလၢအသံသ့အံၤ, ဒ်ပကစၢ်ယ့ၣ်ၡူးခရံာ်စံးဘၣ်တဲဘၣ်တ့ၢ်ယၤဖျါဖျါအသိးန့ၣ်လီၤ.

¹⁵ လၢတၢ်န့ၣ်အဃိ, ယကဂုာ်ကျဲးစၢးအဂ့ၤကတၢၢ်ဒ်သိးသု ကသ့ၣ်နီၣ်ထီၣ်တၢ်သ့ၣ်တဖၣ်အံၤကိးဆၢကတီၢ်ဒဲးဖဲ ယသံဝံၤအလီၢ်ခံန့ၣ်လီၤ.

ပှၤအုၣ်အသးတဖၣ်လၢအထံၣ်ဘၣ် ခရံာ်အလၤကပီၤ

¹⁶ လၢပတၢ်ဒုးသ့ၣ်ညါသုပကစၢ်ယ့ၣ်ၡူးခရံာ်အတၢ်ဟဲလၢ အလီၤဘီလီၤမုၢ်အဂ့ၢ်အံၤန့ၣ်, တမ့ၢ်ပသန့ၤပသးလၢပူတဖၣ်လၢပှၤကညီဒုးကဲထီၣ်အီၤ န့ၣ်ဘၣ်. မ့မ့ၢ်ပထံၣ်ဘၣ်အတၢ်ဒိၣ်တၢ်မုၢ်လၢပမဲာ်ချံဒၣ်ပဝဲန့ၣ်လီၤ.

¹⁷ ဖဲပၢ်ကစၢ်ယွၤဟ့ၣ်လီၤအီၤတၢ်ပာ်ဒိၣ်ပာ်ထီဒီးတၢ်လၤကပီၤ အဆၢကတီၢ်, ဒီးဖဲယွၤလၢအလၤကပီၤဒိၣ်စိတဂၤအကလုၢ် ဟဲတုၤအိၣ်အီၤဒီး စံးဝဲ, “အအံၤမ့ၢ်ယဖိခွါဒၣ်ယဲလၢယအဲၣ်အီၤဒီးဘၣ်ယသး လၢအီၤဒိၣ်မးလီၤ” အဆၢကတီၢ်န့ၣ်, ပအိၣ်ဖဲန့ၣ်လီၤ.

¹⁸ ပကစၢ်ဒၣ်ပဝဲပနၢ်ဟူတၢ်အကလုၢ်အံၤဟဲလီၤလၢမူခိၣ်, ဖဲပအိၣ်ဒီးအီၤလၢကစၢၢ်စီဆှံအဖီခိၣ်အဆၢကတီၢ်န့ၣ်လီၤ.

¹⁹ လၢတၢ်န့ၣ်အဃိ, တၢ်ကစီၣ်လၢဝံတဖၣ်တဲဖျါထီၣ်ဝဲဒၣ်န့ၣ်, လီၤတံၢ်လၢပဂီၢ်ဒိၣ်န့ၢ်အလီၢ်တက့ၢ်လီၤ. သုဂ့ၤပာ်သူၣ်ပာ်သး လၢတၢ်ကစီၣ်အံၤလၢအလီၤဂာ်ဒီးမ့ၣ်အူဒၢကပီၤထီၣ်လၢတၢ် ခံးကျါတုၤလီၤလၢမုၢ်ဆ့ၣ်ထီၣ်ဒီးဆၣ်တူၢ်ဂီၤအတၢ်ကပီၤ ကပီၤထီၣ်လၢသုသးကံၢ်ပူၤတစုန့ၣ်လီၤ.

²⁰ ဘၣ်ဆၣ်ဒီးလၢတၢ်ခဲလၢာ်အဖီခိၣ်, သ့ၣ်နီၣ်ထီၣ်လၢဝံအကလုၢ်လၢတၢ်ကွဲးအသးစီဆှံတဖၣ် အပူၤန့ၣ်, ပှၤတဲဖျါအခီပညီလၢအကစၢ်ဒၣ်ဝဲတသ့နီ တဂၤဘၣ်.

²¹ အဂ့ၢ်ဒ်လဲၣ်န့ၣ်, ဝံအတၢ်ကစီၣ်တဟဲလၢပှၤကညီ အတၢ်ဘၣ်အသးဒၣ်ဝဲနီတဘျီဘၣ်. မ့မ့ၢ်ဒ်သးစီဆှံ ပၢၤဒီးထိၣ်ဂဲၤအသးအသိး, အဝဲသ့ၣ်ကတိၤတၢ်ကစီၣ်လၢ အဟဲလၢကစၢ်ယွၤအအိၣ်န့ၣ်လီၤ.