လံာ်စီၤပၤခံဘ့ၣ်တဘ့ၣ် 7 - Sgaw Karen Common Bible

¹ စီၤအလံၤၡါစံးဆၢဝဲဒၣ်, “ဒိကနၣ်တၢ်လၢယွၤစံးဝဲန့ၣ်တ က့ၢ်. ခဲမုၢ်ဆ့ၣ်လၢတၢ်ဆၢကတီၢ်ဒ်အံၤန့ၣ်, နပှ့ၤကိၣ်ကမူၣ်အဂ့ၤကတၢၢ် အလီၤတယၢၢ်တစ့အၤမ့ၢ်ဂ့ၤ, ဘုမုယီၤခံစ့အၤမ့ၢ်ဂ့ၤလၢစ့တဘ့ၣ်လၢၡၤမရံကန့ၢ်ဝဲလီၤ.

² ပှၤကွၢ်ထွဲမၤစၢၤစီၤပၤစံးဘၣ်စီၤအလံၤၡါ, “ယွၤအနီၢ်ကစၢ်ဒၣ်ဝဲမ့ၢ်ဆှၢလီၤဘုဧိၤဟုဧိၤတဘျီဃီဒၣ် လဲာ်န့ၣ်, မၤအသးတသ့ဘၣ်.” စီၤအလံၤၡါစံးဆၢဝဲ, “နကထံၣ်ဘၣ်တၢ်န့ၣ်မၤအသး, ဘၣ်ဆၣ်နတအီၣ်ဘၣ်တၢ်အီၣ်န့ၣ်နီတမံၤဘၣ်.”

ပှၤစူၤရံဖိအသုးမုၢ်ဟးထီၣ်ကွံာ်ဝဲ

³ ပှၤလွံၢ်ဂၤလၢအဘၣ်တၢ်ဆါအၢလီၤပျံၤလီၤဖုးအိၣ်ဝဲဖဲဝ့ၢ်ၡၤ မရံအတြဲၤအချၢ, ဒီးစံးလိာ်အသးတဂၤဒီးတဂၤ, “ဘၣ်မနုၤလၢပဘၣ်အိၣ်ခိးတၢ်ဖဲအံၤတုၤပကသံန့ၣ်လဲၣ်.

⁴ တၢ်လဲၤနုာ်ဆူဝ့ၢ်ပူၤန့ၣ်တၢ်ဘျုးတအိၣ်ဘၣ်. အဂ့ၢ်ဒ်အံၤ, ပကသၣ်ဝံၤလီၤဒိသံဖဲန့ၣ်လီၤ. ဘၣ်ဆၣ်မ့ၢ်ပအိၣ်ဖဲအံၤဒီးပကသံစ့ၢ်ကီးန့ၣ်လီၤ. လၢတၢ်န့ၣ်အဃိ, မ်ပကလဲၤသကိးဆူပှၤစူၤရံဖိသူၣ်ဒဲအလီၢ်တက့ၢ်. တၢ်အအၢကတၢၢ်လၢအဝဲသ့ၣ်မၤဝဲသ့န့ၣ်မ့ၢ်ဒၣ်တၢ်မၤသံပှၤန့ၣ် လီၤ. ဘၣ်ဆၣ်ဘၣ်သ့ၣ်သ့ၣ်အဝဲသ့ၣ်ကပျဲပူၤပသးသမူတဖၣ်န့ၣ်လီၤ.”

⁵ တုၤနုၤတစု, ဖဲတၢ်စးထီၣ်ခံးလီၤဝဲန့ၣ်, အဝဲသ့ၣ်လဲၤဆူ ပှၤစူၤရံဖိသူၣ်ဒဲအလီၢ်, ဘၣ်ဆၣ်ဖဲအဝဲသ့ၣ်လဲၤတုၤဝဲန့ၣ်, ပှၤတအိၣ်ဖဲန့ၣ်နီတဂၤလၢၤဘၣ်.

⁶ ယွၤဒုးနၢ်ဟူတ့ၢ်ပှၤစူၤရံဖိတဖၣ်လၢတၢ်အသီၣ်လၢအလီၤဂာ်ဒီး သုးမုၢ်ဖးဒိၣ်ဟဲထီၣ်ဝဲတဖုလၢအအိၣ်ဒီးကသ့ၣ်တဖၣ်ဒီးလ့ၣ် ကဟၣ်တဖၣ်န့ၣ်လီၤ. ပှၤစူၤရံဖိတဖၣ်ဆိကမိၣ်ဝဲလၢကီၢ်အံၣ်စရ့လးအစီၤပၤဒိးလဲ ပှၤဃ့ၤသးဖိဒီးပှၤအဲၤကူပတူးဖိအစီၤပၤတဖၣ်ဒီးအဝဲသ့ၣ် အသုးမုၢ်တဖၣ်လၢကဟဲထီၣ်ဒုးအဝဲသ့ၣ်န့ၣ်လီၤ.

⁷ လၢတၢ်န့ၣ်အဃိဖဲမုၢ်တဟါန့ၣ်, ပှၤစူၤရံဖိတဖၣ်ဃ့ၢ်ပူၤဖျဲး ကွံာ်လၢအသးသမူအဂီၢ်, ဒီးပာ်လီၤတဲာ်ကွံာ်အဒဲတဖၣ်, ကသ့ၣ်တဖၣ်ဒီးကသ့ၣ်ယီၤတဖၣ်, ဒီးပာ်တီၢ်အသူၣ်ဒဲအလီၢ်ဒ်အအိၣ်တ့ၢ်ဝဲအသိးန့ၣ်လီၤ.

⁸ ဖဲပှၤလွံၢ်ဂၤန့ၣ်လဲၤတုၤဝဲလၢပှၤသူၣ်ဒဲအလီၢ်အသရ့ၤန့ၣ်, အဝဲသ့ၣ်လဲၤနုာ်ဝဲဆူဒဲတဖျၢၣ်အပူၤ, အီၣ်တၢ်အီတၢ်လၢအအိၣ်ဝဲဖဲန့ၣ်တဖၣ်, စိာ်ထီၣ်ကွံာ်ကျိၣ်ဧိၤစ့ဧိၤ, ထူဧိၤလွဲဧိၤ, ဒီးတၢ်ကူတၢ်သိးလၢအထံၣ်န့ၢ်ဝဲဒီးဟးထီၣ်ဒီးပာ်ခူသူၣ်ဝဲ န့ၣ်လီၤ. အန့ၣ်ဝံၤဒီးအဝဲသ့ၣ်ဟဲက့ၤကဒါက့ၤဒီးလဲၤနုာ်လၢဒဲအဂၤ တဖျၢၣ်အပူၤဒီးမၤတၢ်တမံၤဃီဒ်န့ၣ်အသိးလီၤ.

⁹ ဘၣ်ဆၣ်ဒီးအဝဲသ့ၣ်စံးလိာ်အသးတဂၤဒီးတဂၤ, “ပတကြၢးမၤတၢ်ဒ်အံၤဘၣ်. ပအိၣ်ဒီးတၢ်ကစီၣ်လၢအဂ့ၤဒီးပတ ကြၢးပာ်ခူသူၣ်အီၤလၢပဂီၢ်ဒၣ်ပဝဲဘၣ်. ပမ့ၢ်ခိးတုၤမုၢ်ဆ့ၣ်ထီၣ်လၢပကတဲတၢ်ဂ့ၢ်အံၤန့ၣ်ပကဘၣ်တၢ်စံၣ် ညီၣ်သပှၢ်ကတၢၢ်န့ၣ်လီၤ. မ်ပလဲၤသကိးခဲအံၤဒီးတဲဘၣ်စီၤပၤအသုးခိၣ်သုးနၢ်တဖၣ်န့ၣ် တက့ၢ်.”

¹⁰ လၢတၢ်န့ၣ်အဃိ, အဝဲသ့ၣ်ဟးထီၣ်ကွံာ်လၢပှၤစူၤရံဖိတဖၣ်သူၣ် ဒဲအလီၢ်, ဒီးက့ၤကဒါက့ၤဝဲဆူဝ့ၢ်ၡၤမရံဒီးကိးထီၣ်ဆူပှၤပၢၤတၢ် တဖၣ်လၢဝ့ၢ်အတြဲၤန့ၣ်, “ပလဲၤတၢ်ဆူပှၤစူၤရံဖိသူၣ်ဒဲအလီၢ်, ဒီးပတထံၣ်ဘၣ်ပှၤနီတဂၤမ့ၢ်ဂ့ၤနၢ်ဟူဘၣ်အကလုၢ်နီတမံၤမ့ၢ် ဂ့ၤဘၣ်. ကသ့ၣ်တဖၣ်ဒီးကသ့ၣ်ယီၤတဖၣ်အိၣ်စၢဃာ်အသးဒီးဒဲတဖၣ်အိၣ်ဒၣ်ဒ် ပှၤစူၤရံဖိတဖၣ်ပာ်တီၢ်တ့ၢ်ဝဲအသိးန့ၣ်လီၤ.”

¹¹ ပှၤပၢၤတၢ်တဖၣ်ဘိးဘၣ်သ့ၣ်ညါတၢ်ကစီၣ်, ဒီးတၢ်န့ၣ်ဘၣ်တၢ်ပာ်ဖျါအီၤလၢနူၢ်ပူၤစီၤပူၤန့ၣ်လီၤ.

¹² မ့ၢ်အိၣ်ဒံးဒၣ်မုၢ်နၤခီအကတီၢ်, ဘၣ်ဆၣ်စီၤပၤဂဲၤဆၢထၢၣ်လၢ အလီၢ်မံပူၤဒီးစံးဘၣ်အသုးခိၣ်သုးနၢ်တဖၣ်, “ယကတဲသုတၢ်လၢပှၤစူၤရံဖိတဖၣ်ကူၣ်ကျဲၤဝဲန့ၣ်လီၤ. အဝဲသ့ၣ်သ့ၣ်ညါဝဲလၢတၢ်သၣ်ဝံၤလီၤဒိမၤအသးဖဲအံၤ, အဃိအဝဲသ့ၣ်ဟးထီၣ်ဒီးပာ်လီၤတဲာ်တ့ၢ်အသူၣ်ဒဲအလီၢ်လၢကလဲၤ အိၣ်ခူသူၣ်လၢခိခိၣ်ပှၢ်လၢ်ကျါန့ၣ်လီၤ. အဝဲသ့ၣ်ဆိကမိၣ်ဝဲလၢပကဟးထီၣ်လၢဝ့ၢ်ပူၤဒီးပကဃုထံၣ်တၢ် အီၣ်တၢ်အီ, အန့ၣ်ဒီးအဝဲသ့ၣ်ကဖီၣ်န့ၢ်မူဒံးပှၤဒီးမၤန့ၢ်ဝ့ၢ်န့ၣ် လီၤ.”

¹³ အဝဲအသုးခိၣ်အကျါတဂၤစံးဝဲဒၣ်, “ဒ်လဲၣ်ဂ့ၤဒ်လဲၣ်ဂ့ၤန့ၣ်, ပှၤဂီၢ်မုၢ်လၢအအိၣ်ဆိးဖဲဝ့ၢ်ပူၤအံၤတဖၣ်ဘၣ်တၢ်စံၣ်ညီၣ်ဃါမ နၤ, ဒ်ပှၤတဖၣ်လၢအသံတ့ၢ်လံအသိးန့ၣ်လီၤ. လၢတၢ်န့ၣ်အဃိမ်ပဆှၢလီၤပှၤတနီၤဃုာ်ဒီးကသ့ၣ်ယဲၢ်ဒု လၢအအိၣ်တ့ၢ်ဒံးဒီးပှၤဒ်သိးကဃုသ့ၣ်ညါတၢ်မနုၤမၤအသးလဲၣ် န့ၣ်တက့ၢ်.”

¹⁴ အဝဲသ့ၣ်ဃုထၢထီၣ်ပှၤပိာ်ခွါတနီၤ, ဒီးစီၤပၤဆှၢလီၤအဝဲ သ့ၣ်လၢလ့ၣ်ကဟၣ်ခံဆိအပူၤအိၣ်ဒီးတၢ်မၤလိာ်ပိာ်လီၤတဖၣ်လၢ ကလဲၤဒီးဃုထံၣ်သ့ၣ်ညါတၢ်မၤအသးဒီးပှၤစူၤရံဖိသုးမုၢ်ဒ် လဲၣ်န့ၣ်လီၤ.

¹⁵ ပှၤတဖၣ်န့ၣ်လဲၤဝဲယံၤတုၤလၢထံကျိယၢ်ဒ့ၣ်ဒၣ်လဲာ်, ဒီးလၢကျဲဒီဘိညါန့ၣ်အဝဲသ့ၣ်ထံၣ်ဘၣ်ဝဲတၢ်ကူတၢ်သိးတဖၣ် ဒီးတၢ်ပီးတၢ်လီတဖၣ်လၢပှၤစူၤရံဖိတဖၣ်ပာ်လီၤတဲာ်တ့ၢ်ဝဲ ဖဲအဝဲသ့ၣ်ဃ့ၢ်ပူၤဖျဲးအသးအခါန့ၣ်ဒီးအဝဲသ့ၣ်ဟဲက့ၤကဒါ က့ၤဒီးပာ်ဖျါထီၣ်တၢ်ဂ့ၢ်န့ၣ်ဆူစီၤပၤအအိၣ်လီၤ.

¹⁶ ၡၤမရံအပှၤဂီၢ်မုၢ်ဃ့ၢ်သဖှိဃီၤဒီးဂုာ်န့ၢ်တၢ်အီၣ်လၢပှၤစူၤ ရံဖိအသူၣ်ဒဲအလီၢ်န့ၣ်လီၤ. ဒီးဒ်ယွၤစံးတ့ၢ်ဝဲအသိးန့ၣ်, ကိၣ်ကမူၣ်အဂ့ၤကတၢၢ်တစ့အၤမ့ၢ်ဂ့ၤ, ဘုမုယီၤခံစ့အၤမ့ၢ်ဂ့ၤ, ဘၣ်တၢ်ဆါကွံာ်အီၤလၢစ့တဘ့ၣ်န့ၣ်လီၤ.

¹⁷ တၢ်မၤအသးလၢ, ကီၢ်အံၣ်စရ့လးအစီၤပၤပာ်လီၤဝဲတၢ်ပၢၤဝ့ၢ်အ တြဲၤလၢအဝဲအခ့အပှၤဒၣ်ဝဲလၢအကွၢ်ထွဲမၤစၢၤအီၤတဂၤအတၢ်ကွၢ် ထွဲပၢဆှၢအဖီလာ်န့ၣ်လီၤ. ပဒိၣ်န့ၣ်ဘၣ်တၢ်ယီၢ်သံကွံာ်အီၤဖဲန့ၣ်, လၢပှၤဂီၢ်မုၢ်ဒ်စီၤအလံၤၡါကတိၤဆိပာ်တ့ၢ်ဝဲအသိးဖဲ စီၤပၤလဲၤထံၣ်အီၤအခါန့ၣ်လီၤ.

¹⁸ စီၤအလံၤၡါတဲဘၣ်တ့ၢ်စီၤပၤလၢ, လၢခံတနံၤဖဲတၢ်ဆၢကတီၢ်ဒ် သိးအံၤန့ၣ်ကိၣ်ကမူၣ်အဂ့ၤကတၢၢ်တစ့အၤမ့ၢ်ဂ့ၤ, ဘုမု ယီၤခံစ့အၤမ့ၢ်ဂ့ၤ, ကဘၣ်တၢ်ဆါကွံာ်အီၤလၢဝ့ၢ်ၡၤမရံ အပူၤလၢစ့တဘ့ၣ်န့ၣ်လီၤ.

¹⁹ တၢ်ဂ့ၢ်အံၤပဒိၣ်ဖးဒိၣ်န့ၣ်စံးဆၢတ့ၢ်ဝဲလၢ, ယွၤအကစၢ်ဒၣ်ဝဲ မ့ၢ်ဆှၢလီၤဘုဧိၤဟုဧိၤတဘျီဃီဒၣ်လဲာ်န့ၣ်မၤအသးတသ့ဘၣ် န့ၣ်လီၤ. ဒီးစီၤအလံၤၡါစံးဆၢဝဲ, “နကထံၣ်တၢ်အံၤမၤအသး, ဘၣ်ဆၣ်နတအီၣ်ဘၣ်တၢ်အီၣ်န့ၣ်နီတစဲးဘၣ်” န့ၣ်လီၤ.

²⁰ ဒီးတၢ်န့ၣ်မ့ၢ်တၢ်လၢအမၤအသးဒီးအီၤန့ၣ်လီၤ. အဝဲသံဝဲခီဖျိဘၣ်တၢ်ယီၢ်တံၢ်အီၤလၢပှၤဂီၢ်မုၢ်ဖဲဝ့ၢ်အ တြဲၤန့ၣ်လီၤ.