လံာ်စီၤပၤခံဘ့ၣ်တဘ့ၣ် 25 - Sgaw Karen Common Bible

ဝ့ၢ်ယရူၤၡလ့ၣ်အတၢ်လီၤကွံာ်

¹ စီၤစံးဒကံယၤပူထီၣ်တၢ်ထီဒါကီၢ်ဘၤဘူၤလိၣ်အစီၤပၤနဘူး ကးန့စၢ်, ဒီးလၢတၢ်န့ၣ်အဃိစီၤနဘူၤကးန့စၢ်ဟဲဝဲဒီးကယဲၢ်အသုးမုၢ် ခဲလၢာ်ဒီးဒုးဝ့ၢ်ယရူၤၡလ့ၣ်ဖဲစီၤစံးဒကံယၤပၢတၢ်ခွံနံၣ်တနံၣ်အပူၤ, လါဆံဆဲၣ်လါတလါထီၣ်ဆံဆဲၣ်သီအနံၤန့ၣ်လီၤ. အဝဲသ့ၣ်သူၣ်ဒဲဖဲဝ့ၢ်အချၢ, မၤထီၣ်တၢ်ဒူၣ်ဝးတရံးအီၤ,

² ဒီးကဝီၤဃာ်အီၤတုၤလီၤလၢစီၤပၤစံးဒကံယၤပၢတၢ်တဆံတနံၣ် အပူၤန့ၣ်လီၤ.

³ လၢနံၣ်တနံၣ်ဃီ, လါလွံၢ်လါတလါထီၣ်ခွံသီတသီ, ဖဲန့ၣ်တၢ်သၣ်ဝံၤလီၤဒိအိၣ်ထီၣ်ဝဲနးမး, တုၤဒၣ်လဲာ်ပှၤဂီၢ်မုၢ်ကအီၣ်တၢ်အဂီၢ်တၢ်တအိၣ်လီၤတဲာ်နီတမံၤ လၢၤဘၣ်န့ၣ်,

⁴ ဝ့ၢ်ခိၣ်ဒူတဖၣ်ဘၣ်တၢ်ဘၢၣ်ဖျိကွံာ်အီၤန့ၣ်လီၤ. ပှၤဘၤဘူၤလိၣ်ဖိတဖၣ်ကဝီၤဝ့ၢ်ဒၣ်လဲာ်န့ၣ်, ကယဲၢ်ပှၤသုးဖိ ခဲလၢာ်ဃ့ၢ်ပူၤဖျဲးကွံာ်ဝဲဒၣ်လၢမုၢ်နၤအခါန့ၣ်လီၤ. အဝဲသ့ၣ်ဟးထီၣ်ကွံာ်လၢစီၤပၤအတၤသၣ်လီၢ်အကျဲ, လဲၤခီဖျိဝဲကျဲစၢၤလၢအဒုးစဲဘူးတၢ်ဒူၣ်ခံခါဒီးဃ့ၢ် ပူၤဖျဲးကွံာ်ဝဲဒၣ်ဆူယၢ်ဒ့ၣ်အတၢ်တြီၤပူၤတခီန့ၣ်လီၤ.

⁵ ဘၣ်ဆၣ်ပှၤဘၤဘူၤလိၣ်ဖိအသုးမုၢ်လူၤထွဲစီၤပၤစံးဒကံယၤအ ခံ, ဖီၣ်န့ၢ်အီၤ, ဖဲတၢ်ပၢၤခိၣ်ဘူးဒီးဝ့ၢ်ယရံၤဃိ, ဒီးအဝဲအသုးဖိခဲလၢာ်ဃ့ၢ်သဒၣ်ကွံာ်အီၤန့ၣ်လီၤ.

⁶ စီၤစံးဒကံယၤဘၣ်တၢ်လဲၤကိးအီၤဆူစီၤပၤနဘူၤကးန့စၢ် အအိၣ်, လၢအအိၣ်ဝဲဖဲဝ့ၢ်ရံးဘလၤ, ဒီးဖဲန့ၣ်စီၤပၤနဘူၤကးန့စၢ်စံၣ်ညီၣ်အီၤန့ၣ်လီၤ.

⁷ ဖဲစီၤစံးဒကံယၤကွၢ်တၢ်အဖၢမုၢ်န့ၣ်, အဝဲအဖိခွါတဖၣ်ဘၣ်တၢ် မၤသံအီၤဝံၤဒီးစီၤနဘူၤကးန့စၢ်အူခွဲးထီၣ်ကွံာ်စီၤစံး ဒကံယၤအမဲာ်ချံစၢဃာ်အီၤလၢထးသွဲဒီးက့ၤမိၤအီၤဆူ ဝ့ၢ်ဘၤဘူၤလိၣ်န့ၣ်လီၤ.

တၢ်မၤဟးဂီၤကွံာ်ယွၤအတၢ်လုၢ်ဟံၣ်

⁸ လၢကီၢ်ဘၤဘူၤလိၣ်အစီၤပၤနဘူၤကးန့စၢ်, အနံၣ်တဆံခွံနံၣ်တနံၣ်လါယဲၢ်လါတလါထီၣ်နွံသီတသီ အနံၤန့ၣ်, စီၤပၤအပှၤဟ့ၣ်ကူၣ်တၢ်ဒီးအသုးမုၢ်အသုးခိၣ်ကျၢၢ် စီၤနဘူစၢ်ရဒၣ်လဲၤနုာ်လီၤဝဲဆူဝ့ၢ်ယရူၡလ့ၣ်အပူၤန့ၣ်လီၤ.

⁹ အဝဲဒွဲၣ်အူထီၣ်ကွံာ်ယွၤအတၢ်လုၢ်ဟံၣ်, နူၢ်ဧိၤစီၤဧိၤဒီး ကယဲၢ်ပှၤအကါဒိၣ်လၢဝ့ၢ်ယရူၤရှလ့ၣ်ပူၤတဖၣ်အဟံၣ်ခဲလၢာ်,

¹⁰ ဒီးအဝဲအပှၤသုးဖိတဖၣ်မၤလီၤပှီၢ်ကွံာ်ဝ့ၢ်ခိၣ်ဒူတဖၣ်န့ၣ်လီၤ.

¹¹ ဝံၤဒီးစီၤနဘူစၢ်ရဒၣ်စိာ်ထီၣ်ကွံာ်, ပှၤဂီၢ်မုၢ်လၢအအိၣ်လီၤ တဲာ်ဒံးလၢဝ့ၢ်ပူၤခဲလၢာ်, ပှၤမၤတၢ်သ့ဂ့ၤဂ့ၤလၢအအိၣ်လီၤတဲာ်ဒံးတဖၣ်, ဒီးပှၤတဖၣ်လၢအပာ်လီၤတဲာ်အကီၢ်ဒီးခီနုာ်ဆူပှၤဘၤဘူၤလိၣ် ဖိတဖၣ်အကျါ, န့ၣ်လီၤ.

¹² ဘၣ်ဆၣ်လၢကီၢ်ယူဒၤအပူၤန့ၣ်, အဝဲပာ်တ့ၢ်ပှၤအဖှီၣ်ကတၢၢ်အကျါ တနီၤလၢအတၢ်စုလီၢ်ခီၣ်ခိၣ်တအိၣ်နီတမံၤ, ဒီးမၢအဝဲသ့ၣ်မၤတၢ်လၢစပံးလီၢ်တဖၣ်ဒီးစံာ်ပျီတဖၣ်အပူၤန့ၣ်လီၤ.

¹³ ပှၤဘၤဘူၤလိၣ်ဖိတဖၣ်မၤကၢ်လီၤကလဲကွံာ်ထူၣ်တိၢ်ဘီတဖၣ်, ဒီးလ့ၣ်တဖၣ်လၢအအိၣ်လၢယွၤအတၢ်လုၢ်ဟံၣ်အပူၤ, ဃုာ်ဒီးထံဒၢတိၢ်ဘီဖးဒိၣ်, ဒီးအဝဲသ့ၣ်က့ၤစိာ်တိၢ်ဘီခဲ လၢာ်ဆူဝ့ၢ်ဘၤဘူၤလိၣ်န့ၣ်လီၤ.

¹⁴ အဝဲသ့ၣ်စိာ်ထီၣ်ကွံာ်စ့ၢ်ကီးနီၣ်တရိာ်ဟီၣ်ခိၣ်တဖၣ်ဒီးဖၣ်ဆါ သပၢၤတဖၣ်လၢအဘၣ်တၢ်သူအီၤလၢတၢ်မၤကဆှီတၢ်လုၢ်လီၢ်အဂီၢ်, တၢ်ပီးတၢ်လီတဖၣ်လၢတၢ်သူအီၤလၢတၢ်အံးထွဲကွၢ်ထွဲ မ့ၣ်အူဒၢတဖၣ်အဂီၢ်, သလၢတဖၣ်လၢတၢ်သူအီၤလၢတၢ်ကဒိးဃာ်တၢ် လုၢ်တၢ်ပာ်တဖၣ်အသွံၣ်အဂီၢ်, သလၢတဖၣ်လၢတၢ်သူအီၤလၢတၢ်ဆူးကဲၤတၢ်နၢမူအဂီၢ်ဒီးကယဲၢ်တၢ် အဃၢၤအဃိၢ်တိၢ်ဘီအဂၤတဖၣ်လၢအဘၣ်တၢ်သူ အီၤလၢတၢ်လုၢ်ဟံၣ်အတၢ်ဖံးတၢ်မၤအပူၤန့ၣ်လီၤ.

¹⁵ အဝဲသ့ၣ်စိာ်ထီၣ်ကွံာ်ကယဲၢ်တၢ်ခဲလၢာ်လၢအဘၣ်တၢ်ပိာ်အီၤလၢထူ မ့ၢ်ဂ့ၤ, စ့မ့ၢ်ဂ့ၤ, ဃုာ်ဒီးသလၢအဆံးတဖၣ်ဒီးသပၢၤဘံၣ်သလၣ်တဖၣ်လၢတၢ် သူအီၤလၢတၢ်စိာ်မ့ၣ်အူအ့ၣ်အဂီၢ်န့ၣ်လီၤ.

¹⁶ တၢ်ပီးတၢ်လီတိၢ်ဘီတဖၣ်လၢစီၤၡလိၤမိၤမၤတ့ၢ်ဝဲလၢယွၤအတၢ် လုၢ်ဟံၣ်အဂီၢ်န့ၣ်, မ့ၢ်ဝဲ, ထူၣ်ခံထူၣ်, လ့ၣ်တဖၣ်, ထံဒၢဖးဒိၣ်, တၢ်တဖၣ်အံၤမ့ၢ်တၢ်လၢအဃၢ, ဃၢကဲာ်ဆိးလၢတၢ်ကစီၤ အီၤအဂီၢ်န့ၣ်လီၤ.

¹⁷ ထူၣ်ခံထူၣ်န့ၣ်လီၤဂာ်လိာ်အသးလီၤ. တထူၣ်စုာ်စုာ်န့ၣ်အထီ အိၣ်ဝဲတဆံဃိးပျၢ်အိၣ်ဒီးတိၢ်ဘီအခိၣ်ထိးတခါလၢအထိးနါ, လၢအထီဝဲသၢပျၢ်န့ၣ်လီၤ. ဝးတရံးတၢ်အခိၣ်ထိးတခါစုာ်စုာ် အလိၤန့ၣ်, တိၢ်ဘီအတၢ်ထ့ဃ့အသးလၢအဘၣ်တၢ်ကယၢကယဲ အီၤဒီးတိၢ်ဘီသလဲသၣ်တဖၣ်အိၣ်ဝဲန့ၣ်လီၤ.

ကီၢ်ယူဒၤအပှၤဂီၢ်မုၢ်ဘၣ်တၢ်က့ၤစိာ်အီၤဆူ ကီၢ်ဘၤဘူၤလိၣ်

¹⁸ လၢန့ၣ်အမဲာ်ညါ, ပှၤသုးမုၢ်အသုးခိၣ်ကျၢၢ်စီၤနဘူစၢ်ရဒၣ်က့ၤ ကိးပှၤလုၢ်တၢ်အခိၣ်အဒိၣ်ကတၢၢ်စီၤစရါယၤ, ပှၤလုၢ်တၢ်အခိၣ်အဒိၣ်ကတၢၢ်ခံဂၤတဂၤစီၤစဖါနယၤဒီးယွၤအတၢ် လုၢ်ဟံၣ်အပဒိၣ်လၢအကါဒိၣ်အဂၤသၢဂၤဒ်ပှၤဘၣ်တၢ်စၢဃာ်တဖၣ် အသိးန့ၣ်လီၤ.

¹⁹ လၢဝ့ၢ်ပူၤန့ၣ်အဝဲက့ၤကိးပှၤသုးဖိသံၣ်ဖိတဖၣ်အခိၣ်, စီၤပၤအပှၤဟ့ၣ်ကူၣ်တၢ်ယဲၢ်ဂၤလၢအအိၣ်ဒံးလၢဝ့ၢ်ပူၤ, ပှၤမၤစၢၤသုးခိၣ်ကျၢၢ်လၢအအိၣ်မူအိၣ်ဒါလၢသုးအတၢ်ကွဲးနီၣ် တဖၣ်အဂီၢ်ဒီးပှၤအကါဒိၣ်အဂၤတဖၣ်, အဂၤဃုဆံန့ၣ်လီၤ.

²⁰ စီၤနဘူစၢ်ရဒၣ်စိာ်ထီၣ်ကွံာ်အဝဲသ့ၣ်ဆူကီၢ်ဘၤဘူၤလိၣ်အစီၤ ပၤလၢအအိၣ်, ဖဲဝ့ၢ်ရံးဘလၤ,

²¹ အိၣ်ဝဲလၢကီၢ်ဃမါသးအလီၢ်ကဝီၤပူၤန့ၣ်လီၤ. ဖဲန့ၣ်စီၤပၤမၢပှၤဒိပှၤတီၢ်အဝဲသ့ၣ်ဒီးမၤသံကွံာ်အီၤန့ၣ် လီၤ. လၢတၢ်န့ၣ်အဃိကီၢ်ယူဒၤပှၤဂီၢ်မုၢ်ဘၣ်တၢ်စိာ်ထီၣ်ကွံာ်အီၤလၢ အထံအကီၢ်ဆူတၢ်စိာ်မၢကဲကုၢ်အပူၤန့ၣ်လီၤ.

ကီၢ်ယူဒၤအပဒိၣ်ဖးဒိၣ်စီၤကဒါလယၤ

²² ကီၢ်ဘၤဘူၤလိၣ်အစီၤပၤနဘူၤကးန့စၢ်ဒုးကဲထီၣ်စီၤအဃံကၣ် အဖိခွါဒီးစီၤၡၤဖၣ်အလံၤခွါစီၤကဒါလယၤလၢကီၢ်ယူဒၤ အပဒိၣ်ဖးဒိၣ်, ဒီးပာ်လီၤအီၤဒ်ပှၤအခိၣ်လၢကအံးထွဲကွၢ်ထွဲ ပှၤတဖၣ်လၢအတဘၣ်တၢ်စိာ်ထီၣ်ကွံာ်အီၤဆူကီၢ်ဘၤဘူၤလိၣ်န့ၣ် လီၤ.

²³ တုၤပှၤယူဒၤဖိအသုးခိၣ်တဖၣ်ဒီးအပှၤသုးဖိတဖၣ်လၢအတဟ့ၣ်လီၤ ကွံာ်အသးနၢ်ဟူတၢ်ဂ့ၢ်အံၤန့ၣ်, အဝဲသ့ၣ်ပာ်ဖှိၣ်ထီၣ်အသးဒီးစီၤကဒါလယၤဖဲဝ့ၢ်မံးစပၤန့ၣ် လီၤ. သုးခိၣ်တဖၣ်အံၤန့ၣ်မ့ၢ်ဝဲ, စီၤနသၤနံယၤအဖိခွါစီၤယံး ၡမၤဧ့လး, စီၤကၤရ့ၤအဖိခွါစီၤယိဃၤနၣ်, ပှၤဝ့ၢ်နတိဖးဖိ စီၤတ့ၣ်ဃူမ့းအဖိခွါစီၤစရါယၤ, ဒီးပှၤဝ့ၢ်မၤကၤသးဖိ စီၤယၤစၤနယၤန့ၣ်လီၤ.

²⁴ စီၤကဒါလယၤစံးဘၣ်အဝဲသ့ၣ်, “ယဆိၣ်တၢ်ဒီးသုလၢ, အလီၢ်တအိၣ်လၢသုကဘၣ်ပျံၤဘၣ်ဖုးကီၢ်ဘၤဘူၤလိၣ် အသုးခိၣ်သုးနၢ်တဖၣ်န့ၣ်ဘၣ်. သူၣ်လီၤသုတၢ်အိၣ်တၢ်ဆိးအလီၢ်ဖဲထံကီၢ်အံၤအပူၤ, မၤကီၢ်ဘၤဘူၤလိၣ်အစီၤပၤအတၢ်မၤ, ဒီးတၢ်ခဲလၢာ်ကလဲၤအသးဂ့ၤဂ့ၤဘၣ်ဘၣ်လၢသုဂီၢ်န့ၣ်လီၤ.”

²⁵ ဘၣ်ဆၣ်လၢနံၣ်အဝဲန့ၣ်လါနွံလါတလါအပူၤန့ၣ်စီၤနသၤနံယၤ အဖိခွါဒီးစီၤအလံၡမၤအလံၤခွါစီၤယံးၡမၤဧ့လးလၢအမ့ၢ် စီၤပၤအဒူၣ်ဖိထၢဖိအကျါတဂၤန့ၣ်, လဲၤဝဲဆူဝ့ၢ်မံးစပၤဃုာ်ဒီးပှၤအဂၤတဆံ, ဒုးစီၤကဒါလယၤ, ဒီးမၤသံကွံာ်အီၤန့ၣ်လီၤ. အဝဲမၤသံကွံာ်စ့ၢ်ကီးပှၤအံၣ်စရ့လးဖိဒီးပှၤဘၤဘူၤလိၣ်ဖိ လၢအအိၣ်ဖဲန့ၣ်ဒီးအီၤတဖၣ်န့ၣ်လီၤ.

²⁶ အန့ၣ်ဒီး, ကယဲၢ်ပှၤအံၣ်စရ့လးဖိ, ပှၤထူးပှၤတီၤမ့ၢ်ဂ့ၤ, ပှၤဖှီၣ်ဖိယာ်ဖိမ့ၢ်ဂ့ၤ, ဃုာ်ဒီးသုးမုၢ်အသုးခိၣ်သုးနၢ်တ ဖၣ်, ဟးထီၣ်ဝဲ, ဒီးလဲၤဝဲဆူကီၢ်အဲၤကူပတူးမ့ၢ်လၢ, အဝဲသ့ၣ်ပျံၤဘၣ်ပှၤဘၤဘူၤလိၣ်ဖိတဖၣ်အဃိန့ၣ်လီၤ.

စီၤယဟိၤယါခံၣ်ဘၣ်တၢ်ပျၢ်ဖျဲးကွံာ်အီၤ လၢတၢ်စၢဃာ်

²⁷ ဖဲနံၣ်တနံၣ်လၢစီၤအ့ဝလးမရိဒးကဲထီၣ်ကီၢ်ဘၤဘူၤလိၣ်အစီၤ ပၤန့ၣ်, အဝဲပာ်ဖျါထီၣ်အတၢ်သးကညီၤဆူကီၢ်ယူဒၤအစီၤပၤယဟိၤယါခံၣ်, ခီဖျိတၢ်ပျၢ်ဖျဲးကွံာ်အီၤလၢတၢ်စၢဃာ်အပူၤန့ၣ်လီၤ. တၢ်အံၤမၤအသးဖဲစီၤယဟိၤယါခံၣ်ဘၣ်တၢ်စိာ်ကွံာ်အီၤဒ်ပှၤဘၣ် တၢ်စၢဃာ်အသိးပှဲၤထီၣ်သၢဆံနွံနံၣ်တနံၣ်ဝံၤအလီၢ်ခံ, လါတဆံခံလါတလါထီၣ်ခံဆံနွံသီအနံၤန့ၣ်လီၤ.

²⁸ စီၤအ့ဝလးမရိဒးမၤဘၣ်အီၤလၢတၢ်သူၣ်ကညီၤသးကညီၤအပူၤ, ဒီးဟ့ၣ်အီၤလၢတၢ်လီၢ်တတီၤလၢအလၤကပီၤဒိၣ်န့ၢ်ဒံး, အဝဲဟ့ၣ်စီၤပၤအဂၤတဖၣ်လၢအအိၣ်လၢတၢ်စိာ်မၢကဲကုၢ်အပူၤဃုာ် ဒီးအီၤလၢကီၢ်ဘၤဘူၤလိၣ်အပူၤန့ၣ်လီၤ.

²⁹ လၢတၢ်န့ၣ်အဃိစီၤယဟိၤယါခံၣ်ဒိးန့ၢ်ဘၣ်တၢ်ပျဲလၢကလဲ လိာ်ကွံာ်ဝဲပှၤဃိာ်ဖိအကူအသိးတဖၣ်, ဒီးကအီၣ်ဃုာ်တၢ်လၢစီၤ ပၤအစီၢ်နီၤခိၣ်လၢအသးသမူအိၣ်တ့ၢ်ဒံးတစိၤဒၣ်အီၤန့ၣ်လီၤ.

³⁰ ဖဲအဝဲအိၣ်မူဒံးဝဲအခါန့ၣ်ကိးနံၤဒဲး, အဝဲဘၣ်တၢ်ဟ့ၣ်အီၤတၢ်မၤစၢၤဘၣ်ဆၢဘၣ်ကတီၢ်လၢတနံၤဘၣ်တနံၤ အဂီၢ်, လၢအဝဲအတၢ်လိၣ်တဖၣ်အဂီၢ်န့ၣ်လီၤ.