လံာ်စီၤပၤခံဘ့ၣ်တဘ့ၣ် 22 - Sgaw Karen Common Bible

ကီၢ်ယူဒၤအစီၤပၤယိၤၡံယၤ

¹ စီၤယိၤၡံယၤအသးအိၣ်ဝဲဃိးနံၣ်ဖဲအဝဲကဲထီၣ်ကီၢ်ယူဒၤ အစီၤပၤ, ဒီးအဝဲပၢဝဲတၢ်ဖဲဝ့ၢ်ယရူၤၡလ့ၣ်အပူၤသၢဆံတနံၣ်န့ၣ်လီၤ. အဝဲအမိၢ်မ့ၢ်ဝဲစီၤဧဒါယၤလၢဝ့ၢ်ဘိးစကးအဖိမုၣ်, နီၢ်ယဒံဒၤန့ၣ်လီၤ.

² စီၤယိၤၡံယၤမၤတ့ၢ်တၢ်လၢအဘၣ်ယွၤအသးန့ၣ်လီၤ. အဝဲပိာ်ထွဲအပၢ်ဖးဒိၣ်လၢပျၢၤစီၤပၤစီၤဒၤဝံးအဒိအတဲာ် အခံဒီးစူၢ်ကယဲၢ်ကစၢ်ယွၤအတၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဃံးဃံးန့ၣ်လီၤ.

ယူဒၤအတၢ်သိၣ်တၢ်သီအလံာ် ဘၣ်တၢ်ထံၣ်န့ၢ်အီၤ

³ ဖဲအဝဲပၢတၢ်တဆံဃိးနံၣ်တနံၣ်အပူၤန့ၣ်, စီၤပၤယိၤၡံယၤမၢ လီၤစီၤအစါလံယၤအဖိခွါ, ဒီးစီၤမၡူလၣ်အလံၤခွါကွီၢ်ဘျီၣ်အပှၤကွဲးလံာ်ဒိၣ်စီၤၡၤဖၣ် ဆူယွၤအတၢ်လုၢ်ဟံၣ်အိၣ်ဒီးတၢ်ဟ့ၣ်လီၤအကလုၢ်ဒ်အံၤ,

⁴ “လဲၤဆူပှၤလုၢ်တၢ်အခိၣ်အဒိၣ်ကတၢၢ်စီၤဃံးလကံယၤအအိၣ်ဒီး မၤန့ၢ်တၢ်ပာ်ဖျါဘၣ်ထွဲဒီးစ့လၢပှၤလုၢ်တၢ်အခိၣ်အိၣ်မူအိၣ်ဒါတဖၣ်, ဖဲယွၤအတၢ်လုၢ်ဟံၣ်အကျဲစၢၤ, ထၢဖှိၣ်တ့ၢ်ဝဲလၢပှၤဂီၢ်မုၢ်အအိၣ်န့ၣ်တက့ၢ်.

⁵ တဲဘၣ်အီၤလၢကဟ့ၣ်လီၤကျိၣ်ဧိၤစ့ဧိၤဆူပှၤအခိၣ်တဖၣ်လၢအပၢ ဆှၢတၢ်မၤလၢတၢ်ဘှီဂ့ၤထီၣ်က့ၤယွၤအတၢ်လုၢ်ဟံၣ်န့ၣ်တက့ၢ်. အဝဲသ့ၣ်ကဘၣ်ဟ့ၣ်,

⁶ ပှၤမၤတၢ်လၢသ့ၣ်တဖၣ်, ပှၤဘှီထီၣ်တၢ်တဖၣ်, ဒီးပှၤမၤတၢ်လၢအီကတဲတဖၣ်, ဒီးပှ့ၤသ့ၣ်ဒီးလၢၢ်တဖၣ်လၢတၢ် ကသူအီၤလၢတၢ်ဘှီထီၣ်က့ၤတၢ်အဂီၢ်န့ၣ်လီၤ.

⁷ ပှၤအခိၣ်တဖၣ်လၢအကွၢ်ထွဲပၢဆှၢတၢ်ဖံးတၢ်မၤမ့ၢ်ပှၤအတီအလိၤ လၢာ်လၢာ်ဆ့ဆ့အဃိဒီးအလီၢ်တအိၣ်ဘၣ်လၢတၢ်ကဃ့အဝဲသ့ၣ်စ့အတၢ် ကွဲးနီၣ်အတၢ်ပာ်ဖျါဘၣ်.”

⁸ စီၤၡၤဖၣ်ဟ့ၣ်လီၤစီၤပၤအကလုၢ်ဆူစီၤဃံးလကံယၤအအိၣ်ဒီး စီၤဃံးလကံယၤတဲဘၣ်အီၤလၢအဝဲထံၣ်န့ၢ်ယူဒၤအတၢ်သိၣ်တၢ်သီ အလံာ်လၢယွၤအတၢ်လုၢ်ဟံၣ်အပူၤန့ၣ်လီၤ. စီၤဃံးလကံယၤဟ့ၣ်အီၤလံာ်န့ၣ်ဒီးစီၤၡၤဖၣ်ဖးအီၤန့ၣ်လီၤ.

⁹ အန့ၣ်ဝံၤဒီးအဝဲက့ၤကဒါက့ၤဆူစီၤပၤအအိၣ်ဒီးပာ်ဖျါထီၣ် ဝဲဒ်အံၤ, “နခ့နပှၤတဖၣ်ဟံးန့ၢ်စ့လၢအအိၣ်လၢယွၤအတၢ်လုၢ်ဟံၣ်အပူၤ, ဒီးဟ့ၣ်လီၤဝဲဆူပှၤအခိၣ်တဖၣ်လၢအကွၢ်ထွဲပၢဆှၢဂ့ၤထီၣ်က့ၤ အတၢ်မၤအအိၣ်န့ၣ်လီၤ.”

¹⁰ ဝံၤဒီးအဝဲစံးဝဲ, “ယအိၣ်ဒီးလံာ်တဘ့ၣ်, ဖဲအံၤလၢစီၤဃံးလကံယၤဟ့ၣ်ယၤန့ၣ်လီၤ.” ဒီးအဝဲဖးထီၣ်န့ၢ်စီၤပၤလၢအကလုၢ်ဖးဒိၣ်န့ၣ်လီၤ.

¹¹ တုၤစီၤပၤနၢ်ဟူဘၣ်လံာ်အံၤဘၣ်တၢ်ဖးန့ၢ်အီၤဝံၤဒီး, အဝဲဖှီကွံာ်အကူအသိးတဖၣ်လၢတၢ်ကမၢကမၣ်အပူၤ,

¹² ဒီးဟ့ၣ်လီၤအကလုၢ်ဒ်လာ်အံၤဆူပှၤလုၢ်တၢ်အခိၣ်စီၤဃံးလကံယၤ, ဆူစီၤၡၤဖၣ်အဖိခွါစီၤအဃံကၣ်, ဆူစီၤမံၤကါယၤအဖိခွါ စီၤဧးကဘိၢ်, ဆူကွီၢ်ဘျီၣ်အပှၤကွဲးလံာ်ဒိၣ်စီၤၡၤဖၣ်ဒီးဆူပှၤကွၢ်ထွဲမၤ စၢၤစီၤပၤစီၤဧစါယၤအအိၣ်န့ၣ်လီၤ.

¹³ “လဲၤဒီးသံကွၢ်တၢ်လၢယွၤ, လၢယဂီၢ်ဒီးလၢကယဲၢ်ကီၢ်ယူဒၤ အပှၤဂီၢ်မုၢ်အဂီၢ်ဘၣ်ဃးဒီးလံာ်အံၤအတၢ်သိၣ်တၢ်သီ တဖၣ်အဂ့ၢ်န့ၣ်တက့ၢ်. ယွၤအသးထီၣ်ဘၣ်ပှၤ, မ့ၢ်လၢပမိၢ်ပၢ်ဖံဖုလၢပျၢၤတဖၣ်တမၤတ့ၢ်တၢ်လၢလံာ်အံၤပာ် ဖျါဝဲလၢပကဘၣ်မၤဝဲတဖၣ်အဃိန့ၣ်လီၤ.”

¹⁴ စီၤဃံးလကံယၤ, စီၤအဃံကၣ်, စီၤဧးကဘိၢ်, စီၤၡၤဖၣ်ဒီးစီၤဧစါယၤတဖၣ်လဲၤဒ်သိးကသံကွၢ်တၢ်လၢပိာ်မုၣ် တဂၤလၢအမံၤမ့ၢ်ဝဲနီၢ်ဃူးလဒါဝံမုၣ်တဂၤလၢအအိၣ်ဆိးဝဲလၢ ဝ့ၢ်ယရူၤၡလ့ၣ်အတၢ်လီၢ်အသီ, အအိၣ်န့ၣ်လီၤ. (အဝဲအဝၤစီၤၡၤလူၣ်လၢအမ့ၢ်စီၤတံးကဝၤအဖိခွါ, ဒီးစီၤဃၢ်ဃၣ်အလံၤခွါန့ၣ်, မ့ၢ်ပှၤပၢၤယွၤအတၢ်လုၢ်ဟံၣ်အဆ့ ကၤဖးထီတဖၣ်န့ၣ်လီၤ.) အဝဲသ့ၣ်တဲဘၣ်နီၢ်ဃူးလဒါလၢတၢ်လၢအမၤတ့ၢ်အသး,

¹⁵ ဒီးဝံမုၣ်န့ၣ်တဲဘၣ်အဝဲသ့ၣ်လၢကက့ၤကဒါက့ၤဆူစီၤပၤအအိၣ် ဒီးဟ့ၣ်အီၤ,

¹⁶ တၢ်ကစီၣ်ဒ်လာ်အံၤလၢယွၤအအိၣ်န့ၣ်လီၤ. “ယကစံၣ်ညီၣ်ဝ့ၢ်ယရူၤၡလ့ၣ်ဒီးအပှၤဂီၢ်မုၢ်ခဲလၢာ်ဒ်တၢ်ကွဲး အသးအိၣ်ဝဲလၢလံာ်လၢစီၤပၤဖးတ့ၢ်အီၤအပူၤအသိးန့ၣ်လီၤ.

¹⁷ အဝဲသ့ၣ်ညိကွံာ်တ့ၢ်ယၤ, ဒီးလုၢ်ထီၣ်တ့ၢ်တၢ်လုၢ်တၢ်ပာ်တဖၣ်ဆူ ကစၢ်အဂၤတဖၣ်အအိၣ်, ဒီးလၢတၢ်န့ၣ်အဃိထိၣ်ဂဲၤထီၣ်ယတၢ်သးကဲၤထီၣ်ခီဖျိ, တၢ်ခဲလၢာ်လၢအဝဲသ့ၣ်မၤတ့ၢ်ဝဲန့ၣ်လီၤ. ယတၢ်သးဒိၣ်ဘၣ်တၢ်ထိၣ်ဂဲၤအီၤထီဒါဝ့ၢ်ယရူၤၡလ့ၣ် ဒီးတလီၤပံာ်ဝဲဒၣ်ဘၣ်.

¹⁸ လၢစီၤပၤအနီၢ်ကစၢ်ဒၣ်ဝဲအဂီၢ်န့ၣ်, အအံၤမ့ၢ်တၢ်လၢယၤ, အံၣ်စရ့လးအကစၢ်ယွၤစံးဝဲဒၣ်န့ၣ်လီၤ. နဒိကနၣ်တ့ၢ်တၢ်လၢအအိၣ်ကွဲးအသးလၢလံာ်အပူၤ,

¹⁹ ဒီးနပီၢ်ယၢ်လီၤက့ၤနသး, ဒီးနဆီၣ်လီၤနသးလၢယမဲာ်ညါ, နဖှီနကူနသိးတဖၣ်နဟီၣ်တၢ်ယၢၤတၢ်ဖဲနနၢ်ဟူဘၣ်ယမၤပျံၤမၤ ဖုးတၢ်လၢယကစံၣ်ညီၣ်ဝ့ၢ်ယရူၤၡလ့ၣ်ဒီးအပှၤဂီၢ်မုၢ်ဒ်လဲၣ်န့ၣ် လီၤ. ယကဒုးကဲထီၣ်အီၤလၢတၢ်ထံၣ်လီၤပျံၤလီၤဖုးအလီၢ်တတီၤ, တၢ်လီၢ်တတီၤလၢပှၤဂီၢ်မုၢ်ကသူအမံၤဒ်တၢ်ဆိၣ်အၢန့ၣ်လီၤ. ဘၣ်ဆၣ်ယနၢ်ဟူတ့ၢ်နတၢ်ထုကဖၣ်,

²⁰ ဒီးတၢ်စံၣ်ညီၣ်လၢယကဒုးလီၤဘၣ်အီၤလၢဝ့ၢ်ယရူၤၡလ့ၣ်အ လိၤန့ၣ်, တချုးလၢနသံဝံၤဒံးဘၣ်န့ၣ်, တလီၤဘၣ်ဝဲဘၣ်. ယကပျဲနသံနဲမုာ်မုာ်န့ၣ်လီၤ.” ပှၤတဖၣ်န့ၣ်က့ၤကဒါက့ၤဆူစီၤပၤယိၤၡံယၤအအိၣ်, အိၣ်ဃုာ်ဒီးတၢ်ကစီၣ်အံၤန့ၣ်လီၤ.