လံာ်စီၤပၤခံဘ့ၣ်တဘ့ၣ် 2 - Sgaw Karen Common Bible

စီၤအ့ၤလံယၤဘၣ်တၢ်စိာ်ထီၣ်ကွံာ်အီၤဆူမူခိၣ်

¹ အကတီၢ်တုၤဃီၤဝဲဒၣ်လၢယွၤကစိာ်ထီၣ်ကွံာ်စီၤအ့ၤလံယၤဆူမူ ခိၣ်လၢကလံၤသဝံးတခါအပူၤန့ၣ်လီၤ. စီၤအ့ၤလံယၤဒီးစီၤအလံၤၡါဟးထီၣ်ဝဲလၢဝ့ၢ်ကံးလကၤလး,

² ဒီးဖဲအလဲၤတၢ်အခါန့ၣ်, စီၤအ့ၤလံယၤစံးဘၣ်စီၤအလံၤၡါ, “ခဲအံၤအိၣ်တ့ၢ်ဖဲအံၤတက့ၢ်. ယွၤမၤလိာ်တ့ၢ်ယၤလၢယကဘၣ်လဲၤဆူဝ့ၢ်ဘ့ၤသ့လးန့ၣ်လီၤ.” ဘၣ်ဆၣ်စီၤအလံၤၡါစံးဆၢဝဲဒၣ်, “လၢယတၢ်သးတီအပူၤ, ယဆိၣ်တၢ်ဒီးယွၤလၢအမူဝဲတဂၤဒီးနၤလၢယတဟးဖးဒီးနၤဘၣ်.” လၢတၢ်န့ၣ်အဃိအဝဲသ့ၣ်လဲၤသကိးဝဲဆူဝ့ၢ်ဘ့ၤသ့လးန့ၣ်လီၤ.

³ ဝံလၢအအိၣ်ဆိးဖဲန့ၣ်တဖုလဲၤဆူစီၤအလံၤၡါအအိၣ်ဒီးသံကွၢ် အီၤ, “တနံၤညါအံၤယွၤကဟံးထီၣ်ကွံာ်နကစၢ်လၢနအိၣ်န့ၣ်, မ့ၢ်နသ့ၣ်ညါကစီဒီဧါ.” စီၤအလံၤၡါစံးဆၢဝဲ, “မ့ၢ်, ယသ့ၣ်ညါယဲလီၤ. ဘၣ်ဆၣ်မ်ပသုတကတိၤတၢ်ဂ့ၢ်န့ၣ်တဂ့ၤ.”

⁴ အန့ၣ်ဝံၤဒီး, စီၤအ့ၤလံယၤစံးဘၣ်စီၤအလံၤၡါ, “ခဲအံၤအိၣ်တ့ၢ်ဖဲအံၤတက့ၢ်. ယွၤမၤလိာ်တ့ၢ်ယၤလၢယကဘၣ် လဲၤဆူဝ့ၢ်ယရံၤဃိန့ၣ်လီၤ.” ဘၣ်ဆၣ်စီၤအလံၤၡါစံးဆၢဝဲဒၣ်, “လၢယတၢ်သးတီအပူၤယဆိၣ်တၢ်ဒီးယွၤလၢအမူဝဲတဂၤဒီးနၤလၢ ယတဟးဖးဒီးနၤဘၣ်.” လၢတၢ်န့ၣ်အဃိလဲၤသကိးဝဲဆူဝ့ၢ်ယရံၤဃိန့ၣ်လီၤ.

⁵ ဝံတဖုလၢအအိၣ်ဆိးဖဲန့ၣ်လဲၤဆူစီၤအလံၤၡါအအိၣ်ဒီးသံကွၢ် အီၤ, “တနံၤညါအံၤယွၤကဟံးထီၣ်ကွံာ်နကစၢ်လၢနအိၣ်န့ၣ်မ့ၢ်နသ့ၣ် ညါကစီၤဒီဧါ.” စီၤအလံၤၡါစံးဆၢဝဲဒၣ်, “မ့ၢ်, ဘၣ်ဆၣ်မ်ပသုတကတိၤတၢ်ဂ့ၢ် န့ၣ်တဂ့ၤ.”

⁶ အန့ၣ်ဝံၤဒီး, စီၤအ့ၤလံယၤစံးဘၣ်စီၤအလံၤၡါ, “ခဲအံၤအိၣ်တ့ၢ်ဖဲအံၤတက့ၢ်, ယွၤမၤလိာ်တ့ၢ်ယၤလၢယကဘၣ် လဲၤဆူထံကျိယၢ်ဒ့ၣ်န့ၣ်လီၤ.” ဘၣ်ဆၣ်စီၤအလံၤၡါစံးဆၢအီၤ, “လၢယတၢ်သးတီအပူၤယဆိၣ်တၢ် ဒီးယွၤလၢအမူဝဲတဂၤဒီးနၤလၢယတဟးဖးဒီးနၤန့ၣ်ဘၣ်.” လၢတၢ်န့ၣ်အဃိအဝဲသ့ၣ်လဲၤတၢ်ဆူညါ,

⁷ ဒီးဝံအဂၤယဲၢ်ဆံပိာ်ထီၣ်အဝဲသ့ၣ်အခံဆူထံကျိယၢ်ဒ့ၣ်န့ၣ် လီၤ. စီၤအ့ၤလံယၤဒီးစီၤအလံၤၡါအိၣ်ကတီၢ်ဝဲဖဲထံကျိယၢ်ဒ့ၣ်အနံၤ, ဒီးဝံအဂၤယဲၢ်ဆံအိၣ်ကတီၢ်ဝဲတယံၤတဘူးဒီးအဝဲသ့ၣ်န့ၣ်လီၤ.

⁸ အန့ၣ်ဒီး, စီၤအ့ၤလံယၤဘ့ၣ်လီၤအဆ့ကၤဖးဒိၣ်ဒီးထူထီၣ်ဝဲ ဒီးတီၢ်ထံလၢဆ့ကၤန့ၣ်, ဒီးထံသ့ၣ်ဖးကွံာ်ဝဲနီၤဖးကွံာ်အသးခံခီဒီးအဝဲဒီးစီၤ အလံၤၡါခီဂာ်ဝဲဆူထံကျိအဝၢ်ဘးခီလၢခိန့ၣ်လီၤ.

⁹ ဖဲန့ၣ်စီၤအ့ၤလံယၤစံးဘၣ်စီၤအလံၤၡါ, “တချုးလၢယဘၣ်တၢ် စိာ်ထီၣ်ကွံာ်ဒံးယၤန့ၣ်, တဲယၤတၢ်လၢယကဘၣ်မၤလၢနဂီၢ်န့ၣ်တ က့ၢ်.” စီၤအလံၤၡါစံးဆၢဝဲဒၣ်, “မ်နသးအတၢ်စိတၢ်ကမီၤခံစး ကလီၤဘၣ်လၢယလိၤတက့ၢ်.”

¹⁰ စီၤအ့ၤလံယၤစံးဆၢဝဲဒၣ်, “တၢ်အံၤမ့ၢ်တၢ်သကွံၢ်ကညးအကီ တမံၤလၢယကဟ့ၣ်နၤအဂီၢ်န့ၣ်လီၤ. ဘၣ်ဆၣ်ဖဲယဘၣ်တၢ်စိာ်ထီၣ်ကွံာ်ယၤလၢနအိၣ်န့ၣ်, နမ့ၢ်ထံၣ်ယၤဒီးနကဒိးန့ၢ်ဘၣ်အီၤလီၤ. နမ့ၢ်တထံၣ်ယၤဘၣ်ဒီး နတဒိးန့ၢ်ဘၣ်အီၤဘၣ်.”

¹¹ အဝဲသ့ၣ်လဲၤတၢ်တခီခီကတိၤသကိးတၢ်တခီခီန့ၣ်လီၤ. သတူၢ်ကလာ်, လ့ၣ်ကဟၣ်မ့ၣ်အူလၢအဘၣ်တၢ်ထုးအီၤလၢကသ့ၣ်မ့ၣ်အူ တဖၣ်ဟဲလီၤသတူၢ်ကလာ်လၢအဝဲသ့ၣ်အဘၢၣ်စၢၤ, ဒီးစီၤအ့ၤလံယၤဘၣ်တၢ်စိာ်ထီၣ်ကွံာ်အီၤဆူမူခိၣ်လၢကလံၤ သဝံးအပူၤန့ၣ်လီၤ.

¹² စီၤအလံၤၡါထံၣ်တၢ်အံၤဒီးကိးထီၣ်ဝဲဆူစီၤအ့ၤလံယၤအ အိၣ်, “ယပၢ်ဧၢ, ယပၢ်ဧၢ, ပှၤအဆူၣ်တဂၤလၢအကဟုကယာ်တ့ၢ်ကီၢ်အံၣ်စရ့ လးဧၢ, နဘၣ်တၢ်ဟံးထီၣ်ကွံာ်နၤလံ.” ဒီးစီၤအလံၤၡါတထံၣ်ဘၣ်ကဒီးလၢၤစီၤအ့ၤလံယၤနီတစုလၢၤဘၣ်. လၢတၢ်သူၣ်အုးသးအုးအပူၤန့ၣ်စီၤအလံၤၡါဖှီယာ်ကွံာ်အဆ့ဖး ဒိၣ်ခံခီန့ၣ်လီၤ.

¹³ အန့ၣ်ဝံၤဒီး, အဝဲထၢထီၣ်စီၤအ့ၤလံယၤအဆ့ကၤဖးဒိၣ်လၢအဟဲ လီၤတဲာ်လၢအအိၣ်, ဒီးက့ၤကဒါက့ၤဝဲဒီးဆၢထၢၣ်ဝဲဖဲ ထံကျိယၢ်ဒ့ၣ်အနံၤန့ၣ်လီၤ.

¹⁴ အဝဲတီၢ်ထံလၢစီၤအ့ၤလံယၤအဆ့ကၤဖးဒိၣ်န့ၣ်ဒီးစံးဝဲဒၣ်, “ယွၤ, စီၤအ့ၤလံယၤအကစၢ်ယွၤန့ၣ်အိၣ်ဖဲလဲၣ်.” အန့ၣ်ဝံၤဒီးအဝဲတီၢ်ကဒီးထံဒီးထံန့ၣ်နီၤဖးကွံာ်အသးခံ ခီဒီးအဝဲလဲၤခီဂာ်ဝဲဆူထံကျိအဝၢ်ဘးခီန့ၣ်လီၤ.

¹⁵ ဝံအဂၤယဲၢ်ဆံလၢဝ့ၢ်ယရံၤဃိထံၣ်အီၤဒီးစံးဝဲဒၣ်, “စီၤအ့ၤလံယၤအသးအစိကမီၤလီၤဘၣ်လၢစီၤအလံၤၡါအလိၤန့ၣ် လံ.” အဝဲသ့ၣ်လဲၤဒ်သိးကသဂၢၢ်အီၤဒီးတီၤလီၤဝဲလၢအမဲာ်ညါ,

¹⁶ ဒီးစံးဝဲဒၣ်, “ဖဲအံၤပအိၣ်ပဝဲပှၤအဂၤယဲၢ်ဆံ, ခဲလၢာ်ထဲပှၤအဂံၢ်ဆူၣ်ဘါဆူၣ်တဖၣ်န့ၣ်လီၤ. မ်ပလဲၤဒီးဃုထံၣ်န့ၢ်က့ၤနကစၢ်တက့ၢ်. ဘၣ်သ့ၣ်သ့ၣ်ယွၤအသး စိာ်ထီၣ်အီၤဒီးကပာ်တီၢ်အီၤလၢကစၢၢ်ကလိအဒီခိၣ်တတီၤတီၤမ့ တမ့ၢ်တပူၤပူၤလၢတြီၤလာ်န့ၣ်လီၤ.” စီၤအလံၤၡါစံးဆၢဝဲဒၣ်, “တမ့ၢ်ဘၣ်. သုတဘၣ်လဲၤဘၣ်.”

¹⁷ ဘၣ်ဆၣ်အဝဲသ့ၣ်တဲအီၤသပှၢ်ပှၢ်တုၤစီၤအလံၤၡါဟ့ၣ်အဝဲသ့ၣ်တၢ် ပျဲလၢကလဲၤဝဲဒၣ်န့ၣ်လီၤ. ပှၤအဂၤယဲၢ်ဆံန့ၣ်လဲၤဒီးဃုတၢ်လၢကစၢၢ်ကလိအဒီခိၣ်မ့ၢ်ဂ့ၤ, လၢတြီၤခိၣ်တြီၤလာ်မ့ၢ်ဂ့ၤလၢသၢသီအတီၢ်ပူၤဘၣ်ဆၣ်ဒီးတထံၣ် ဘၣ်စီၤအ့ၤလံယၤန့ၣ်ဘၣ်.

¹⁸ ဝံၤဒီး, အဝဲသ့ၣ်ဟဲက့ၤကဒါက့ၤဆူစီၤအလံၤၡါအအိၣ်, လၢအအိၣ်ခိးအဝဲသ့ၣ်ဖဲဝ့ၢ်ယရံၤဃိန့ၣ်လီၤ. ဒီးစီၤအလံၤၡါစံးဘၣ်အဝဲသ့ၣ်, “ယတဲသုလၢလဲၤတဂ့ၤ, တမ့ၢ်ဘၣ်ဧါ.”

စီၤအလံၤၡါအတၢ်မၤလီၤလးတဖၣ်

¹⁹ ပှၤတနီၤလၢဝ့ၢ်ယရံၤဃိလဲၤဆူစီၤအလံၤၡါအအိၣ်ဒီးစံးဝဲ ဒၣ်, “တၢ်ဒိၣ်ဧၢ, ဒ်နသ့ၣ်ညါနဲအသိးဝ့ၢ်အံၤမ့ၢ်ဝ့ၢ်လၢအဂ့ၤ တဖျၢၣ်လီၤ. ဘၣ်ဆၣ်ထံတဂ့ၤဘၣ်ဒီးဒုးအိၣ်ထီၣ်တၢ်တကဲထီၣ်ကဲထီမ့ၢ်ဂ့ၤ, ပိာ်မုၣ်တဖၣ်အတၢ်ဟုးဟးဂီၤမ့ၢ်ဂ့ၤန့ၣ်လီၤ.

²⁰ စီၤအလံၤၡါမၤလိာ်ဝဲ, “တ့ၢ်နုာ်အံသၣ်တစဲးလၢလီခီအသီ တဖျၢၣ်အပူၤဒီးဟဲစိာ်အီၤဆူယအိၣ်တက့ၢ်.” ဒီးအဝဲသ့ၣ်ဟဲစိာ်ဆူအအိၣ်,

²¹ ဒီးအဝဲလဲၤဝဲဆူထံထီၣ်ပၢၢ်, တ့ၢ်လီၤအံသၣ်ဆူထံကျါဒီး စံးဝဲဒၣ်, “အအံၤမ့ၢ်တၢ်လၢယွၤစံးဝဲလီၤ. ယမၤကဆှီထီၣ်ထံလံ, တဒုးအိၣ်ထီၣ်လၢၤတၢ်သံမ့ၢ်ဂ့ၤ, ပိာ်မုၣ်တဖၣ်အတၢ်ဟုးဟးဂီၤမ့ၢ်ဂ့ၤနီတစုလၢၤဘၣ်.”

²² ဒီးစးထီၣ်လၢန့ၣ်လံၤလံၤထံန့ၣ်ကဆှီထီၣ်ဝဲဒ်စီၤအလံၤၡါ စံးတ့ၢ်လၢကမ့ၢ်ဝဲအသိးန့ၣ်လီၤ.

²³ စီၤအလံၤၡါဟးထီၣ်လၢဝ့ၢ်ယရံၤဃိဒ်သိးကလဲၤဝဲဆူဝ့ၢ်ဘ့ၤသ့ လးဒီးလၢကျဲန့ၣ်ဖိသၣ်ပိာ်ခွါတနီၤဟဲထီၣ်လၢဝ့ၢ်ပူၤ, ဒီးမၤကလိာ်ကလာ်အီၤဒီးကိးထီၣ်ဝဲဒၣ်, “ပှၤကျၤခိၣ်ဧၢ, ဟးထီၣ်ကွံာ်ဖဲအံၤတက့ၢ်,” န့ၣ်လီၤ.

²⁴ စီၤအလံၤၡါဃၣ်တရံးအသးဒီးကွၢ်ဒီးဆိၣ်အၢအီၤလၢယွၤအမံၤ အပူၤန့ၣ်လီၤ. တုၤနုၤတစု, တၤသူမိၢ်ခံဒုဟဲထီၣ်လၢသ့ၣ်ပှၢ်အကျါဒီးအ့ၣ် ဖှီလီၤကလဲကွံာ်ဖိသၣ်ပိာ်ခွါလွံၢ်ဆံခံဂၤန့ၣ်လီၤ.

²⁵ စီၤအလံၤၡါလဲၤဆူညါဆူကစၢၢ်ကၢ်မ့ၤလးအလိၤ, ဒီးလၢခံဟဲက့ၤကဒါက့ၤဆူၡၤမရံန့ၣ်လီၤ.