လံာ်စီၤပၤခံဘ့ၣ်တဘ့ၣ် 1 - Sgaw Karen Common Bible

ဝံအ့ၤလံယၤဒီးစီၤပၤအဃၤစယၤ

¹ ကီၢ်အံၣ်စရ့လးအစီၤပၤအၤဃာ်သံဝံၤအလီၢ်ခံန့ၣ်, ကီၢ်မိၤအးပူထီၣ်ထီဒါကီၢ်အံၣ်စရ့လးန့ၣ်လီၤ.

² ကီၢ်အံၣ်စရ့လးအစီၤပၤအဃၤစယၤလီၤတဲာ်ကွံာ်ဝဲဒၣ်လၢအနီ အဘျီၣ်ခိၣ်ဒုးဖီခိၣ်လၢဝ့ၢ်ၡၤမရံအပူၤဒီးဘၣ်ဒိဘၣ်ထံးနး နးကလဲာ်န့ၣ်လီၤ. လၢတၢ်န့ၣ်အဃိအဝဲမၢလီၤပှၤစိာ်တၢ်ကစီၣ်တနီၤလၢကလဲၤဃ့တၢ် ဟ့ၣ်ကူၣ်ဒီးပှၤဖလ့ၡသးဖိအဝ့ၢ်ဧ့ကြိၣ်အကစၢ်ဘဧၤလးစဘူာ်, လၢကသ့ၣ်ညါဘၣ်ဝဲဘျါက့ၤသ့, တသ့ဘၣ်အဂ့ၢ်န့ၣ်လီၤ.

³ ဘၣ်ဆၣ်ဒီးယွၤအကလူးတဂၤမၤလိာ်စီၤအ့ၤလံယၤ, ဝံတဂၤလၢဝ့ၢ်တံးၡဘးဒ်သိးကလဲၤသဂၢၢ်စီၤပၤအဃၤစယၤအပှၤစိာ် တၢ်ကစီၣ်တဖၣ်ဒီးသံကွၢ်အဝဲသ့ၣ်, “ဘၣ်မနုၤလၢသုကဘၣ်လဲၤဃ့တၢ်ဟ့ၣ်ကူၣ်လၢပှၤဧ့ကြိၣ်အကစၢ် ဘဧၤလးစဘူာ်န့ၣ်လဲၣ်. မ့ၢ်သုဆိကမိၣ်လၢကစၢ်တအိၣ်ဘၣ်နီတဂၤလၢကီၢ်အံၣ်စရ့လးအပူၤ အဃိန့ၣ်ဧါ.

⁴ တဲဘၣ်စီၤပၤလၢယွၤစံးဝဲဒ်အံၤ, နတဘျါက့ၤလၢနတၢ်ဘၣ်ဒိ ဘၣ်ထံးန့ၣ်ဘၣ်. နကသံလီၤ.” စီၤအ့ၤလံယၤမၤတ့ၢ်ဝဲဒ်ယွၤမၤလိာ်အီၤအသိး,

⁵ ဒီးစီၤပၤအပှၤစိာ်တၢ်ကစီၣ်တဖၣ်ဟဲက့ၤကဒါက့ၤဆူစီၤပၤအအိၣ် န့ၣ်လီၤ. စီၤပၤသံကွၢ်အဝဲသ့ၣ်, “ဘၣ်မနုၤလၢသုဟဲက့ၤကဒါက့ၤန့ၣ်လဲၣ်.”

⁶ အဝဲသ့ၣ်စံးဆၢဝဲဒၣ်, “ပဘၣ်တၢ်ဟဲသဂၢၢ်ပှၤလၢပှၤတဂၤလၢအတဲ ဘၣ်ပှၤလၢပကဟဲက့ၤကဒါက့ၤဒီးတဲဘၣ်နၤလၢယွၤစံးဘၣ်ဝဲ, ဘၣ်မနုၤလၢနဆှၢလီၤနပှၤစိာ်တၢ်ကစီၣ်တဖၣ်ဆူ ပှၤဧ့ကြိၣ်အကစၢ်ဘဧၤလးစဘူာ်အအိၣ်လၢကဃ့န့ၢ်တၢ်ဟ့ၣ်ကူၣ်န့ၣ် လဲၣ်. တၢ်န့ၣ်မ့ၢ်နဆိကမိၣ်လၢကစၢ်တအိၣ်နီတဂၤလၢကီၢ်အံၣ်စရ့လး အပူၤအဃိန့ၣ်ဧါ. နတဘျါက့ၤဘၣ်လၢနတၢ်ဘၣ်ဒိဘၣ်ထံးန့ၣ်ဘၣ်. နကသံလီၤ.”

⁷ စီၤပၤသံကွၢ်ဝဲဒၣ်, “ပှၤတဂၤန့ၣ်ဒိၣ်တၢ်မၤအသးဒ်လဲၣ်.”

⁸ အဝဲသ့ၣ်စံးဆၢဝဲဒၣ်, “ပှၤတဂၤန့ၣ်ကူသိးဝဲဆ့ကၤဖးဒိၣ် တဘ့ၣ်လၢအဘၣ်တၢ်ဆးအီၤလၢဆၣ်ဖိကီၢ်ဖိအဖံး, ဒီးကံာ်တူာ်အယီၢ်ဒ့ဒီးယီၢ်တကိးတၢ်ဖံးတဘိန့ၣ်လီၤ.” စီၤပၤကိးထီၣ်ဝဲ, “ပှၤန့ၣ်မ့ၢ်ဒၣ်စီၤအ့ၤလံယၤလီၤ.”

⁹ တုၤနုၤတစုအဝဲဆှၢလီၤသုးခိၣ်တဂၤဃုာ်ဒီးပှၤအဂၤယဲၢ်ဆံလၢ ကလဲၤကိးန့ၢ်စီၤအ့ၤလံယၤအဂီၢ်န့ၣ်လီၤ. သုးခိၣ်န့ၣ်ထံၣ်ဘၣ်စီၤအ့ၤလံယၤလၢအဆ့ၣ်နီၤဝဲလၢတၢ်လူၢ်ဒီ ခိၣ်ဒီးစံးဘၣ်အီၤ, “ကစၢ်ယွၤအပှၤကညီဧၢ, စီၤပၤဟ့ၣ်လီၤအကလုၢ်လၢနကဟဲက့ၤလီၤန့ၣ်လီၤ.”

¹⁰ စီၤအ့ၤလံယၤစံးဆၢဝဲဒၣ်, “ယမ့မ့ၢ်ကစၢ်ယွၤအပှၤကညီ တဂၤဒီးမ်မ့ၣ်အူဟဲလီၤလၢမူခိၣ်ဒီးအီၣ်ကွံာ်နၤဒီးနပှၤ ခဲလၢာ်န့ၣ်တက့ၢ်.” ဒီးမ့ၣ်အူဟဲလီၤတကီၢ်ခါဒီးအီၣ်ကွံာ်သုးခိၣ်န့ၣ်ဒီးအပှၤခဲလၢာ်န့ၣ်လီၤ.

¹¹ စီၤပၤဆှၢလီၤသုးခိၣ်အဂၤတဂၤဃုာ်ဒီးပှၤအဂၤယဲၢ်ဆံလၢအလဲၤ ထီၣ်ဆူတၢ်လူၢ်ဒီခိၣ်ဒီးစံးဘၣ်စီၤအ့ၤလံယၤ, “ကစၢ်ယွၤအပှၤကညီဧၢ, စီၤပၤဟ့ၣ်လီၤအကလုၢ်လၢနကဟဲက့ၤလီၤတဘျီဃီန့ၣ်လီၤ.”

¹² စီၤအ့ၤလံယၤစံးဆၢဝဲဒၣ်, “ယမ့မ့ၢ်ကစၢ်ယွၤအပှၤကညီ တဂၤန့ၣ်ဒီးမ်မ့ၣ်အူဟဲလီၤလၢမူခိၣ်ဒီးအီၣ်ကွံာ်နၤဒီး နပှၤတဖၣ်န့ၣ်တက့ၢ်.” တဘျီဃီဖဲန့ၣ်ကစၢ်ယွၤအမ့ၣ်အူဟဲလီၤဒီးအီၣ်ကွံာ်သုးခိၣ် န့ၣ်ဒီးအပှၤတဖၣ်လီၤ.

¹³ မၤကဒီးတဘျီ, စီၤပၤဆှၢလီၤသုးခိၣ်တဂၤဒီးပှၤအဂၤယဲၢ်ဆံ န့ၣ်လီၤ. အဝဲလဲၤထီၣ်ဆူတၢ်လူၢ်ဒီခိၣ်, ဒီးတီၤလီၤကဒွံ ကျိာ်လၢစီၤအ့ၤလံယၤအမဲာ်ညါဒီးဃ့ကညးအီၤဒ်အံၤ, “ကစၢ်ယွၤအပှၤကညီဧၢ, သူၣ်ကညီၤသးကညီၤယၤဒီးယပှၤတဖၣ်န့ၣ်တ က့ၢ်. မၤပူၤဖျဲးပသးသမူတဖၣ်တက့ၢ်.

¹⁴ သုးခိၣ်အဂၤခံဂၤဒီးအဝဲသ့ၣ်အပှၤတဖၣ်ဘၣ်တၢ်အီၣ်သံကွံာ်လၢ မ့ၣ်အူလၢအဟဲလီၤလၢမူခိၣ်န့ၣ်လီၤ. ဘၣ်ဆၣ်ဝံသးစူၤသူၣ်ကညီၤသးကညီၤယၤတက့ၢ်.”

¹⁵ ယွၤအကလူးတဂၤစံးဘၣ်စီၤအ့ၤလံယၤဒ်အံၤ, “လဲၤလီၤဒီးအီၤဒီးပျံၤတၢ်တဂ့ၤ,” လၢတၢ်န့ၣ်အဃိစီၤအ့ၤလံယၤလဲၤတၢ်ဒီးသုးခိၣ်တဂၤန့ၣ်ဆူ စီၤပၤအအိၣ်,

¹⁶ ဒီးစံးဘၣ်အီၤ, “အအံၤမ့ၢ်တၢ်လၢယွၤစံးဝဲလီၤ. မ့ၢ်လၢနဆှၢလီၤပှၤစိာ်တၢ်ကစီၣ်တဖၣ်ဆူပှၤဧ့ကြိၣ်ဖိအကစၢ်ဘဧၤ လးစဘူာ်အအိၣ်လၢကဃ့တၢ်ဟ့ၣ်ကူၣ်အဃိ, တၢ်မၤအသးဒ်သိးကစၢ်တအိၣ်နီတဂၤလၢကီၢ်အံၣ်စရ့လးအပူၤလၢ နကဃ့တၢ်ဟ့ၣ်ကူၣ်ဘၣ်လီၤ. အဃိဒီးနတဘျါက့ၤဘၣ်. နကသံလီၤ.”

¹⁷ စီၤပၤအဃၤစယၤသံဝဲဒ်ယွၤစံးတ့ၢ်ဝဲခီဖျိစီၤအ့ၤလံယၤန့ၣ်လီၤ. စီၤအဃၤစယၤအဖိခွါတအိၣ်နီတဂၤဘၣ်. လၢတၢ်န့ၣ်အဃိအဝဲအဒီပုၢ်ဝဲၢ်ခွါစီၤယဟိရၣ်ကဲထီၣ်စီၤပၤ လၢအဝဲအလီၢ်, ဖဲစီၤယဟိၡၤဖးအဖိခွါ, ကီၢ်ယူဒၤအစီၤပၤ, စီၤယဟိရၣ်ကဲစီၤပၤပှဲၤထီၣ်ခံနံၣ်တနံၣ်အကတီၢ်န့ၣ်လီၤ.

¹⁸ ကယဲၢ်တၢ်အဂၤလၢစီၤပၤအဃၤစယၤမၤဝဲန့ၣ်, ဘၣ်တၢ်ကွဲးနီၣ်ကွဲးဃါအီၤလၢကီၢ်အံၣ်စရ့လး အစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.