၂ ကရံၣ်သူး 6 - Sgaw Karen Common Bible

¹ လၢတၢ်န့ၣ်အဃိ, လၢပတၢ်မၤသကိးဃုာ်တၢ်ဒီးကစၢ်ယွၤ အပူၤန့ၣ်, ပဃ့ကညးသုဝဲလၢအဒိးန့ၢ်လံကစၢ်ယွၤအဘျုး တဖၣ်လၢ မ်သုသုတပျဲအကဲထီၣ်တၢ်ကလီကလီန့ၣ်တဂ့ၤ.

² ဒိကနၣ်တၢ်လၢကစၢ်ယွၤစံးဝဲန့ၣ်တက့ၢ်. “ဖဲတၢ်ဆၢကတီၢ်တုၤအိၣ်လၢယဂီၢ်, လၢယကမၤဂ့ၤသုန့ၣ်, ယဒိကနၣ်သုကလုၢ်လီၤ. ဖဲမုၢ်နံၤမုၢ်သီတုၤအိၣ်လၢယဂီၢ်, လၢယကဘၣ်အုၣ်က့ၤခီၣ်က့ၤသုန့ၣ်, ယမၤစၢၤသုလီၤ.” ဒိကနၣ်တက့ၢ်. ခဲကနံၣ်အံၤ မ့ၢ်ဝဲဆၢကတီၢ်နၣ်ရံၣ်လၢတၢ် ကဒိးန့ၢ်ယွၤအတၢ်မၤဂ့ၤအဂီၢ်လီၤ. တနံၤအံၤမ့ၢ်မုၢ်တနံၤလၢတၢ်ကဒိးန့ၢ်တၢ်အုၣ်က့ၤခီၣ်က့ၤ အဂီၢ်လီၤ.

³ ပတအဲၣ်ဒိးလၢပှၤတဂၤဂၤကထံၣ်န့ၢ်တၢ်ကမၣ်လၢပတၢ်ဖံး တၢ်မၤအပူၤဘၣ်အဃိဒီး, ပဂုာ်ကျဲးစၢးဒ်သိးပသုတပာ်လီၤတၢ်တြီမၤတံာ်တာ်လၢပှၤ အကျဲနီကစၢ်တဂၤတဂ့ၤန့ၣ်လီၤ.

⁴ အခိၣ်တလိာ်လၢတၢ်ကိးမံၤဒဲးလၢပမၤအီၤအပူၤန့ၣ် ပဒုးနဲၣ်လၢပမ့ၢ်ကစၢ်ယွၤအခ့အပှၤတဖၣ်ခီဖျိပတူၢ်တၢ်ကီတၢ်ခဲ တၢ်ဖှီၣ်တၢ်ယာ်ဒီးတၢ်နးတၢ်ဖှီၣ်တဖၣ် လၢတၢ်သူၣ်စူၤသးစူၤ အပူၤန့ၣ်လီၤ.

⁵ ပဘၣ်တၢ်ဒိပှၤတီၢ်ပှၤ, တၢ်ဒၢနုာ်ပှၤလၢဃိာ်ပူၤ, တၢ်မၤအၢမၤသီပှၤလၢပှၤဂီၢ်မုၢ်တၢထီၣ်တၢလီၤတဖၣ်, ပဘၣ်တၢ်ဒုးဖံးဒုးမၤပှၤတၢ်တလၢကွံာ်အခၢးဒီးပဘၣ် ကီၤမံကီၤဂဲၤကီၤဝံၤကီၤစ့ၤပဝဲန့ၣ်လီၤ.

⁶ လၢပတၢ်သးကဆှီ, တၢ်သ့ၣ်ညါ, တၢ်သးစူၤဒီးတၢ်သူၣ်ဂ့ၤသးဝါ အပူၤန့ၣ်, ပဒုးနဲၣ်ဖျါထီၣ်ပသးလၢပမ့ၢ်ကစၢ်ယွၤအခ့အပှၤ, လၢသးစီဆှံအပူၤ, လၢပတၢ်အဲၣ်နီၢ်နီၢ်အပူၤ,

⁷ လၢပတၢ်ကစီၣ်ဘၣ်ဃးတၢ်မ့ၢ်တၢ်တီအပူၤ, ဒီးလၢကစၢ်ယွၤအစိကမီၤအပူၤန့ၣ်လီၤ. ပအိၣ်ဒီးတၢ်တီ တၢ်လိၤဒ်ပစုကဝဲၤ, လၢပကထီၣ်မၤနၢၤတၢ်အဂီၢ် ဒီးပကဒီတဒၢပသးအဂီၢ်ခံမံၤလၢာ်န့ၣ်လီၤ.

⁸ ပဘၣ်တၢ်မၤလၤကပီၤပှၤဒီးတၢ်မၤဟးဂီၤပလၤပကပီၤ, ပဘၣ်တၢ်ဒုၣ်ဒွဲၣ်ဒီးတၢ်စံးထီၣ်ပတြၢၤပှၤန့ၣ်လီၤ. ပဘၣ်တၢ်ပာ်ပှၤဒ်ပှၤလီတၢ်ဖိဘၣ်ဆၣ်ဒီးပကတိၤ တၢ်မ့ၢ်တၢ်တီလီၤ.

⁹ ပဘၣ်တၢ်ပာ်ပှၤဒ်ပှၤလၢတၢ်တသ့ၣ်ညါအီၤ, ဘၣ်ဆၣ်ဒီးပဘၣ်တၢ်သ့ၣ်ညါပှၤလၢပှၤကိးဂၤဒဲးလီၤ. တၢ်ပာ်ပှၤဒ်ပသံအသိး, ဘၣ်ဆၣ်ဒီးဒ်သုထံၣ်သုဝဲအသိး, ပမူပဝဲဆူညါလီၤ. တၢ်စံၣ်ညီၣ်ပှၤဘၣ်ဆၣ်ဒီးပတဘၣ် တၢ်မၤသံပှၤဘၣ်.

¹⁰ တၢ်မၤသးအုးပှၤဘၣ်ဆၣ်ဒီး ပသးခုပဝဲထီဘိလီၤ. ပအိၣ်ဖျါဖှီၣ်ယာ်ဘၣ်ဆၣ်ဒီးပဒုးထူးဒုးတီၤထီၣ်ပှၤအါဒံ အါဂၤလီၤ. အိၣ်ဖျါလၢတၢ်တအိၣ်ဒီးပှၤနီတမံၤ, ဘၣ်ဆၣ်ဒီးအနီၢ်နီၢ်တခီပအိၣ်ဒီးတၢ်ခဲလၢာ်ခဲဆ့န့ၣ်လီၤ.

¹¹ တံၤသကိးသးဘိလၢဝ့ၢ်ကရံၣ်သူးသ့ၣ်ဧၢ, ပကတိၤတၢ်လိၤလိၤဘျၢဘျၢဒီးသုလီၤ. ပအိးထီၣ်လံ ပသးလဲၢ်လဲၢ်လံ.

¹² တမ့ၢ်ပကးတံာ်ပသးလၢသုဘၣ်. သုမ့ၢ်ပှၤလၢအကးတံာ်တ့ၢ်အသးလၢပှၤတခီန့ၣ်လီၤ.

¹³ ယစံးကတိၤတၢ်ခဲကနံၣ်အံၤ ဒ်သုမ့ၢ်ယဖိယလံၤတဖၣ်အသိး လီၤ. ဒုးနဲၣ်ဖျါထီၣ်ပှၤသုတၢ်ပာ်သူၣ်ပာ်သးတမံၤဃီဒ် ပပာ်ဖျါ အီၤလၢ သုဂီၢ်အသိးန့ၣ်တက့ၢ်. အိးထီၣ်သုသးလဲၢ်လဲၢ်တက့ၢ်.

တၢ်ဟ့ၣ်ပလီၢ်ထီဒါပှၤသူခိၣ်ဖိအတၢ် ဘၣ်ကူဘၣ်ဂာ်တဖၣ်

¹⁴ တဘၣ်ဂုာ်ကျဲးစၢးမၤသကိးတၢ်ဒီးပှၤတစူၢ်တနာ်တၢ် တဖၣ်ဒ်သုမ့ၢ်ပှၤဒ်သိးသိးဒီးအဝဲသ့ၣ်တဂ့ၤ. အဂ့ၢ်ဒ်အံၤ, တၢ်မၤဒ်န့ၣ်တသ့ဘၣ်. တၢ်အဘၣ်ဒီးတၢ်ကမၣ်န့ၣ်, ဒီတံၤဒီသကိးကသ့ဝဲလၢကျဲဒ်လဲၣ်. တၢ်ကပီၤဒီးတၢ်ခံးန့ၣ်အိၣ်ဃုာ်တပူၤဃီကသ့ဝဲလၢကျဲဒ်လဲၣ်.

¹⁵ ခရံာ်ဒီးမုၣ်ကီၤလံၢ်န့ၣ် အသးလီၤပလိာ်ကသ့ဝဲလၢကျဲဒ် လဲၣ်. ပှၤစူၢ်က့ၤနာ်က့ၤတၢ်တဂၤဒီးပှၤတစူၢ်တနာ်တၢ်တဂၤ န့ၣ်လီၤဂာ်လိာ်အသးကသ့လၢတၢ်မနုၤတမံၤလဲၣ်.

¹⁶ ကစၢ်ယွၤအတၢ်လုၢ်ဟံၣ်ဒီးပှၤသူခိၣ်ဖိအတၢ်ဂီၤတၢ်ဖီၣ် န့ၣ်အသးလီၤပလိာ်ကသ့ဝဲလၢကျဲဒ်လဲၣ်. အဂ့ၢ်ဒ်အံၤ, ပမ့ၢ်ကစၢ်ယွၤလၢအမူဝဲတဂၤအတၢ်လုၢ်ဟံၣ်လီၤ. ဒ်ကစၢ်ယွၤအနီၢ်ကစၢ်ဒၣ်ဝဲစံးလံဝဲအသိး, “ယကသူၣ်ထီၣ်ယဟံၣ်ယဃီဒီးယပှၤဂီၢ်မုၢ် ဒီးအိၣ်ယဲဆိးယဲလၢအဝဲသ့ၣ်တဖၣ်အသိးအကျါလီၤ. ယကမ့ၢ်အဝဲသ့ၣ်အကစၢ်ယွၤ ဒီးအဝဲသ့ၣ်ကမ့ၢ်ယပှၤဂီၢ်မုၢ်လီၤ.”

¹⁷ ဒီးလၢတၢ်န့ၣ်အဃိကစၢ်စံးဝဲ, “သုကဘၣ်ပာ်တီၢ်ကွံာ်အဝဲသ့ၣ် ဒီးမၤလီၤဖးကွံာ်သုသးလၢအီၤလီၤ. တဘၣ်မၤဘၣ်ဃးသုသးဒီး တၢ်လၢအတကဆှီန့ၣ်နီတမံၤတဂ့ၤ. ဒီးယကတူၢ်လိာ်သုလီၤ.

¹⁸ ယကမ့ၢ်ပၢ်တဂၤလၢသုဂီၢ် ဒီးသုကမ့ၢ်ယဖိခွါဒီးယဖိမုၣ်တဖၣ်လီၤ. သ့တၢ်လၢာ်ကစၢ်စံးဝဲဒၣ်”