လံာ်ကွဲးနီၣ်တၢ်ခံဘ့ၣ်တဘ့ၣ် 21 - Sgaw Karen Common Bible

¹ စီၤယဟိၡၤဖးသံဝဲဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ် သွၣ်ခိၣ်တဖၣ်အပူၤလၢစီၤဒၤဝံးအဝ့ၢ်ပူၤ, ဒီးအဖိခွါစီၤယဟိရၣ်ကဲထီၣ်က့ၤစီၤပၤလၢအလီၢ်န့ၣ်လီၤ.

ကီၢ်ယူဒၤအစီၤပၤစီၤယဟိရၣ်

² ကီၢ်ယူဒၤအစီၤပၤစီၤယဟိၡၤဖးအဖိခွါစီၤယဟိရၣ်အိၣ်ဒီး အဒီပုၢ်ဝဲၢ်ခွါဃုဂၤ, လၢအမ့ၢ်ဝဲစီၤဧစၤရယၤ, စီၤယဃံအ့လး, စီၤစကၤရယၤဟူၤ, စီၤဧစၤရယၤ, စီၤမံၤက့လးဒီးစီၤၡဖးတယၤ န့ၣ်လီၤ.

³ အဝဲသ့ၣ်အပၢ်ဟ့ၣ်အဝဲသ့ၣ်လၢထူစ့ဒီးတၢ်လုၢ်ဒိၣ်ပှ့ၤဒိၣ်အဂၤ တဖၣ်အါအါဂီၢ်ဂီၢ်, ဒီးပာ်လီၤအဝဲသ့ၣ်တဂၤစုာ်စုာ်လၢကပၢဘၣ်ဝ့ၢ်အိၣ်ဒီးတိာ်ဧိၤ တာ်ဧိၤတဖၣ်အကျါတဝ့ၢ်စုာ်စုာ်လၢကီၢ်ယူဒၤအပူၤန့ၣ်လီၤ. ဘၣ်ဆၣ်မ့ၢ်လၢစီၤယဟိရၣ်မ့ၢ်ဝဲဖိဝဲၢ်ကိအဃိစီၤယဟိၡၤဖး ဒုးကဲထီၣ်အီၤလၢပှၤထီၣ်က့ၤအလီၢ်န့ၣ်လီၤ.

⁴ တုၤစီၤယဟိရၣ်အိၣ်ဂၢၢ်ဆိးကျၢၤလၢတၢ်ပၢဘၣ်ဘီမုၢ်န့ၣ်, အဝဲမၢပှၤမၤသံကွံာ်အဒီပုၢ်ဝဲၢ်ခွါခဲလၢာ်ဒီးဒ်န့ၣ်အသိး ကီၢ်အံၣ်စရ့လးအပဒိၣ်ပပှၢ်တနီၤန့ၣ်လီၤ.

⁵ စီၤယဟိရၣ်ကဲထီၣ်စီၤပၤဖဲအသးအိၣ်သၢဆံခံနံၣ်ဒီးပၢတ့ၢ် တၢ်လၢဝ့ၢ်ယရူၤၡလ့ၣ်အပူၤဃိးနံၣ်န့ၣ်လီၤ.

⁶ အဝဲပိာ်ထွဲတ့ၢ်စီၤပၤအၤဃာ်ဒီးကီၢ်အံၣ်စရ့လးအစီၤပၤအဂၤ တဖၣ်အဒိတဲာ်အၢသီအခံမ့ၢ်လၢအဝဲဒိးတ့ဒိးဖျီတ့ၢ်အသးဒီး စီၤအၤဃာ်အဖိမုၣ်တဖၣ်အကျါတဂၤအဃိန့ၣ်လီၤ. ဒီးမၤတ့ၢ်တၢ်ဒဲးဘးထီဒါယွၤ,

⁷ ဘၣ်ဆၣ်ယွၤတအဲၣ်ဒိးမၤဟးဂီၤကွံာ်စီၤဒၤဝံးအစၢၤအသွဲၣ်အတၢ် ပၢဘၣ်, မ့ၢ်လၢအဝဲမၤတ့ၢ်တၢ်အၢၣ်လီၤတမံၤဒီးစီၤဒၤဝံးဒီးအၢၣ်လီၤ တ့ၢ်ဝဲဒၣ်လၢစီၤဒၤဝံးအစၢၤအသွဲၣ်တဖၣ်ကပၢထွဲတၢ်ထီဘိတထံၣ် ဃီအဃိန့ၣ်လီၤ.

⁸ ဖဲစီၤယဟိရၣ်ပၢတၢ်အစိၤန့ၣ်ကီၢ်အဒိၣ်ပူထီၣ်တၢ်ထီဒါကီၢ်ယူ ဒၤဒီးကဲထီၣ်ဘီမုၢ်သဘျ့တဘ့ၣ်န့ၣ်လီၤ.

⁹ လၢတၢ်န့ၣ်အဃိ, စီၤယဟိရၣ်ဒီးအသုးခိၣ်သုးနၢ်တဖၣ်ဟးထီၣ် ဒီးလ့ၣ်ကဟၣ်ဒုးသုးတဖၣ်, ဒီးလဲၤထီၣ်ဒုးကီၢ်အဒိၣ်န့ၣ်လီၤ. ဖဲန့ၣ်ပှၤအဒိၣ်အသုးမုၢ်ကဝီၤဃာ်အဝဲသ့ၣ်, ဘၣ်ဆၣ်လၢမုၢ်နၤအကတီၢ်န့ၣ်, အဝဲသ့ၣ်ဟးဖျိထီၣ်ပၢၢ်ဝဲဒီးပူၤ ဖျဲးကွံာ်ဝဲန့ၣ်လီၤ.

¹⁰ လၢန့ၣ်လံၤလံၤကီၢ်အဒိၣ်အိၣ်သဘျ့ထီၣ်ကွံာ်လၢကီၢ်ယူဒၤန့ၣ် လီၤ. တကတီၢ်ဃီအံၤ, ဝ့ၢ်လံးဘနၤစ့ၢ်ကီးပူထီၣ်ထီဒါကွံာ်တၢ်, မ့ၢ်လၢစီၤယဟိရၣ်ညိကွံာ်ယွၤ, အမိၢ်ပၢ်ဖံဖုလၢပျၢၤတဖၣ်အကစၢ်ယွၤအဃိန့ၣ်လီၤ.

¹¹ အဝဲဘှီထီၣ်ဒၣ်လဲာ်ပှၤဘါတၢ်ဂီၤတၢ်ဖီၣ်တဖၣ်အတၢ်ဘူၣ်တၢ်ဘါ အလီၢ်လၢကီၢ်ယူဒၤအတၢ်လီၢ်ထီၣ်ထီတဖၣ်, ဒီးဆှၢဃီၤကီၢ်ယူဒၤဒီးဝ့ၢ်ယရူၤၡလ့ၣ်အပှၤဂီၢ်မုၢ်လၢကမၤ တၢ်ဒဲးဘးထီဒါယွၤန့ၣ်လီၤ.

¹² ဝံအ့ၤလံယၤဆှၢလီၤန့ၢ်စီၤယဟိရၣ်အလံာ်ပရၢတဘ့ၣ်, လၢအအိၣ်ကွဲးအသးဒ်အဖီလာ်အံၤအသိးန့ၣ်လီၤ. “ယွၤ, နပၢ်ဖးဒိၣ်လၢပျၢၤစီၤဒၤဝံးအကစၢ်ယွၤစံၣ်ညီၣ်ဃၣ် နၤ, မ့ၢ်လၢနတလူၤပိာ်ထွဲဘၣ်နပၢ်စီၤယဟိၡၤဖးအဒိ အတဲာ်မ့ၢ်ဂ့ၤ, နဖုစီၤအၤစါအဒိအတဲာ်မ့ၢ်ဂ့ၤအဃိန့ၣ်လီၤ.

¹³ အခိၣ်တလိာ်, နပိာ်ထွဲတ့ၢ်ကီၢ်အံၣ်စရ့လးအစီၤပၤတဖၣ်အဒိအတဲာ် ဒီးဆှၢဃီၤကီၢ်ယူဒၤဒီးဝ့ၢ်ယရူၤၡလ့ၣ်အပှၤဂီၢ်မုၢ်တဖၣ်လၢ အသးအသုတတီဒီးကစၢ်ယွၤတဂ့ၤ, ဒ်သိးဒၣ်စီၤပၤအၤဃာ်ဒီးပှၤထီၣ်က့ၤအဝဲအလီၢ်တဖၣ်ဆှၢဃီၤ ကီၢ်အံၣ်စရ့လးဆူတၢ်သူၣ်တတီသးတရၤအပူၤန့ၣ်လီၤ. နမၤသံကွံာ်ဒၣ်လဲာ်နဒီပုၢ်ဝဲၢ်ခွါတဖၣ်, လၢအမ့ၢ်ပှၤအဂ့ၤဒိၣ် န့ၢ်ဒံးနၤတက့ၢ်န့ၣ်လီၤ.

¹⁴ လၢတၢ်တဖၣ်န့ၣ်အဃိ, ယွၤကစံၣ်ညီၣ်နပှၤဂီၢ်မုၢ်, နဖိတဖၣ်, ဒီးနမါတဖၣ်ဆါဆါကလဲာ်, ဒီးကမၤဟးဂီၤနတၢ်စုလီၢ် ခီၣ်ခိၣ်တဖၣ်န့ၣ်လီၤ.

¹⁵ နကစၢ်ဒၣ်နဲနကတူၢ်ဘၣ်ပှံာ်အတၢ်ဆါလၢအဆါနးမးတမံၤ, လၢကအၢထီၣ်နးထီၣ်ဝဲတနံၤဘၣ်တနံၤန့ၣ်လီၤ.”

¹⁶ ပှၤဖလ့ၡသးဖိဒီးပှၤဧ့ရ့းဖိတနီၤအိၣ်ဝဲဆိးဝဲလၢပီၣ်လဲၣ် ကၢၢ်နံၤဘူးဒီးပှၤကူၤၡးဖိတဖၣ်သူၣ်လီၤအတၢ်အိၣ်တၢ်ဆိးအလီၢ် န့ၣ်လီၤ. ယွၤထိၣ်ဟူးထိၣ်ဂဲၤထီၣ်အဝဲသ့ၣ်အသးလၢကလဲၤထီၣ်ဒုးတၢ်ထီဒါ စီၤယဟိရၣ်န့ၣ်လီၤ.

¹⁷ အဝဲသ့ၣ်လဲၤထီၣ်ဒုးကီၢ်ယူဒၤ, ဂုာ်န့ၢ်ဆူၣ်တၢ်လၢစီၤပၤအနီ ပူၤ, ဒီးက့ၤစိာ်ကွံာ်ကယဲၢ်စီၤပၤအမါတဖၣ်ဒီးအဖိခွါတဖၣ်ဒ်ပှၤဘၣ် တၢ်စၢဃာ်တဖၣ်အသိးန့ၣ်လီၤ. ပှၤအိၣ်လီၤတဲာ်မ့ၢ်ဒၣ်ထဲအဖိခွါသဒါစီၤအဃၤစယၤတဂၤဧိၤန့ၣ်လီၤ.

¹⁸ တုၤတၢ်မၤအသးတဖၣ်အံၤဝံၤအလီၢ်ခံန့ၣ်, ယွၤဒုးဘၣ်စီၤပၤလၢ ပှံာ်အတၢ်ဆါတမံၤလၢအဆါနးမးန့ၣ်လီၤ.

¹⁹ လၢခံနံၣ်ဃၣ်ဃၣ်အတီၢ်ပူၤန့ၣ်, တၢ်ဆါနးထီၣ်တစဲးဘၣ်တစဲးတုၤ လီၤလၢ, လၢခံကတၢၢ်န့ၣ်စီၤပၤသံဝဲလၢ, တၢ်တူၢ်ဘၣ်ခီၣ်ဘၣ်နးနးကျံၤ ကျံၤအပူၤန့ၣ်လီၤ. အဝဲအထံဖိကီၢ်ဖိတဖၣ်တဆိၣ်ကဲၤထီၣ်ဘၣ်တၢ်ဘၣ်မိၢ်ဘၣ်မးအမ့ၣ် အူလၢအဝဲအဂီၢ်, ဒ်တၢ်မၤတ့ၢ်အီၤလၢအပၢ်သ့ၣ်လၢပျၢၤတဖၣ်အဂီၢ်အသိးန့ၣ်လီၤ.

²⁰ စီၤယဟိရၣ်ကဲထီၣ်စီၤပၤဖဲအသးအိၣ်သၢဆံခံနံၣ်ဒီးပၢတ့ၢ် တၢ်လၢဝ့ၢ်ယရူၤၡလ့အပူၤဃိးနံၣ်န့ၣ်လီၤ. ဖဲအဝဲဒၣ်သံန့ၣ်ပှၤလၢအသူၣ်အုးသးအုးတအိၣ်ဘၣ်နီတဂၤဘၣ်. အဝဲသ့ၣ်ခူၣ်လီၤကွံာ်အီၤလၢစီၤဒၤဝံးအဝ့ၢ်ပူၤ, ဘၣ်ဆၣ်ဒီးတမ့ၢ်ဘၣ်လၢစီၤပၤအတၢ်သွၣ်ခိၣ်တဖၣ်အပူၤန့ၣ်ဘၣ်.