လံာ်ကွဲးနီၣ်တၢ်ခံဘ့ၣ်တဘ့ၣ် 2 - Sgaw Karen Common Bible

တၢ်ကတဲာ်ကတီၤတဖၣ်လၢတၢ်သူၣ်ထီၣ် ယွၤအတၢ်လုၢ်ဟံၣ်အဂီၢ်

¹ စီၤပၤၡလိၤမိၤပာ်လီၤအသးလၢကသူၣ်ထီၣ်တၢ်လုၢ်ဟံၣ်တဖျၢၣ်ဖဲ ယွၤကဘၣ်တၢ်ဘူၣ်ထီၣ်ဘါထီၣ်အီၤဒီးကသူၣ်ထီၣ်စ့ၢ်ကီးနီ တဖျၢၣ်လၢအဂီၢ်ဒၣ်ဝဲန့ၣ်လီၤ.

² အဝဲပာ်လီၤပှၤနွံကလးဂၤလၢကစိာ်ထီၣ်စိာ်လီၤတၢ်ပီးတၢ်လီတ ဖၣ်, ဒီးပှၤဃိးကလးဂၤလၢကမၤတၢ်ကူးတဲာ်လၢၢ်အတၢ်မၤန့ၣ်လီၤ. ပှၤအိၣ်စ့ၢ်ကီးသၢကထိဃုကယၤဂၤ, လၢအိၣ်မူအိၣ်ဒါဝဲလၢတၢ် ပၢဆှၢတၢ်မၤအဂီၢ်န့ၣ်လီၤ.

³ စီၤၡလိၤမိၤဆှၢလီၤတၢ်ကစီၣ်တမံၤဆူဝ့ၢ်ထါယၢၣ်အစီၤပၤဃံ ရၣ်အအိၣ်ဒီးစံးဝဲဒၣ်, “မၤသကိးတၢ်ဒီးယၤဒ်နမၤတ့ၢ်ဒီးယပၢ်, စီၤပၤဒၤဝံးအသိး, ဖဲနဆါန့ၢ်တ့ၢ်အီၤသ့ၣ်ဆှိးအ့ရ့းအကျီၣ်တဖၣ်လၢတၢ်ကသူၣ်ထီၣ် အနီအဂီၢ်န့ၣ်တက့ၢ်.

⁴ ယသူၣ်ထီၣ်တၢ်လုၢ်ဟံၣ်တဖျၢၣ်လၢတၢ်မၤလၤကပီၤယွၤ, ကစၢ်ယွၤအဂီၢ်န့ၣ်လီၤ. တၢ်န့ၣ်ကမ့ၢ်တၢ်အလီၢ်စီဆှံတတီၤ, လၢယပှၤဂီၢ်မုၢ်ဒီးယၤ, ကဘူၣ်ထီၣ်ဘါထီၣ်အီၤခီဖျိ တၢ်ဆူးကဲၤတၢ်လုၢ်နၢမူတဖၣ်, ဖဲပကလုၢ်ထီၣ်ကိၣ်စီဆှံ အတၢ်လုၢ်တဖၣ်လၢအဂီၢ်တဘိယူာ်ဃီ, ဒီးဖဲပကလုၢ်ထီၣ်တၢ်လုၢ်မ့ၣ် အူတဖၣ်ကိးမုၢ်ဂီၤဒီးကိးမုၢ်ဟါ, ဒီးဒ်န့ၣ်အသိးလၢမုၢ်အိၣ်ဘှံးနံၤတဖၣ်, လါထီၣ်သီအမူးတဖၣ်ဒီးမုၢ်နံၤစီဆှံအဂၤတဖၣ်လၢတၢ်မၤလၤကပီၤယွၤ, ပကစၢ်ယွၤအဂီၢ်န့ၣ်လီၤ. အဝဲအံၤမ့ၢ်တၢ်အလုၢ်အလၢ်စီဆှံလၢ အံၣ်စရ့လးကဘၣ်မၤဝဲလီၤစိၤလီၤထီန့ၣ်လီၤ.

⁵ ယအဲၣ်ဒိးလၢတၢ်လုၢ်ဟံၣ်လၢယသူၣ်ထီၣ်အံၤကမ့ၢ်တၢ်လုၢ်ဟံၣ်ဖး ဒိၣ်တဖျၢၣ်, မ့ၢ်လၢပကစၢ်ယွၤန့ၣ်, ဒိၣ်န့ၢ်ဒံးကစၢ်အဂၤအဃိ န့ၣ်လီၤ.

⁶ ဘၣ်ဆၣ်, ပှၤသူၣ်ထီၣ်တၢ်လုၢ်ဟံၣ်တဖျၢၣ်လၢယွၤအဂီၢ်တသ့နီၢ်နီၢ် နီတဂၤဘၣ်. အဂ့ၢ်ဒ်အံၤ, ကယဲၢ်မူခိၣ်အတၢ်လီၢ်အလဲၢ်ခဲလၢာ်ဒၣ်လဲာ်, အဝဲအိၣ်တတြီၢ်ဘၣ်. မ့မ့ၢ်ဒ်န့ၣ်ဒီး, တၢ်လုၢ်ဟံၣ်တဖျၢၣ်လၢ ယသူၣ်ထီၣ်အီၤအံၤ, မ့ၢ်တၢ်အါန့ၢ်ဒံးတၢ်လီၢ်တတီၤဖဲ တၢ်လုၢ်နၢမူကဘၣ်တၢ်ဆူးကဲၤထီၣ်အီၤဆူကစၢ်ယွၤန့ၣ်, ကသ့ဒ်လဲၣ်.

⁷ ခဲကနံၣ်အံၤ, ဆှၢလီၤန့ၢ်ယၤပှၤတဂၤလၢအမၤတၢ်သ့ဂ့ၤဂ့ၤ, လၢတၢ်စိးပျၤအတၢ်မၤ, လၢတၢ်ပိာ်တၢ်လၢထူ, စ့, တိၢ်ဘီဒီးထး, လၢတၢ်သ့ဆးတၢ်လၢတၢ်ကံးယာ်အလွဲၢ်လါဟ့, အဂီၤလုးဒီးအဂီၤအပူၤတက့ၢ်. အဝဲကမၤသကိးတၢ်ဒီးပှၤစုသ့တဖၣ်လၢကီၢ်ယူဒၤဒီးဝ့ၢ်ယရူၤၡလ့ၣ်, လၢယပၢ်စီၤဒၤဝံးဃုထၢတ့ၢ်ဝဲန့ၣ်လီၤ.

⁸ ယသ့ၣ်ညါလၢနပှၤကူၣ်သ့ၣ်တဖၣ်အိၣ်ဒီးအတၢ်သ့တၢ်ဘၣ်ထဲလဲၣ်ထဲ လဲၣ်အဃိ, ဆှၢလီၤန့ၢ်ယၤသ့ၣ်ဆှိအ့ရ့း, သ့ၣ်ဆှိ, သ့ၣ်အလၤမူးအကျီၣ်တဖၣ်လၢကီၢ်လဘၤနိၣ်န့ၣ်တက့ၢ်. ယအိၣ်ကတဲာ်ကတီၤယသးလၢယကဆှၢလီၤယပှၤတဖၣ် လၢကမၤစၢၤနပှၤတဖၣ်,

⁹ လၢတၢ်ကတဲာ်ကတီၤသ့ၣ်အါအါဂီၢ်ဂီၢ်, မ့ၢ်လၢတၢ်လုၢ်ဟံၣ်လၢယအဲၣ် ဒိးသူၣ်ထီၣ်အံၤကမ့ၢ်တၢ်လုၢ်ဟံၣ်ဖးဒိၣ်လီၤဘီလီၤမုၢ်အဃိ န့ၣ်လီၤ.

¹⁰ လၢနပှၤကူာ်သ့ၣ်တဖၣ်အတၢ်အီၣ်အဂီၢ်, ယကဟ့ၣ်လီၤနၤဘုကၠူၣ်အကိၢ် ခံကလးဘုမုယီၤအကိၢ်ခံကလး, စပံးထံအဘၤသးခံကလးဒီးသ့ၣ်စၤယံးအသိအဘၤသးခံကလးန့ၣ်လီၤ.

¹¹ စီၤပၤဃံရၣ်ဆှၢလီၤကဒါလံာ်ပရၢစံးဆၢတၢ်တဘ့ၣ်ဆူ စီၤၡလိၤမိၤအအိၣ်န့ၣ်လီၤ. အဝဲကွဲးတၢ်စံးဝဲ, “မ့ၢ်လၢယွၤအဲၣ်အပှၤဂီၢ်မုၢ်အဃိ အဝဲပာ်ထီၣ်လံနၤလၢအဝဲသ့ၣ်အစီၤပၤအလီၢ်န့ၣ်လီၤ.

¹² စံးထီၣ်ပတြၢၤယွၤ, အံၣ်စရ့လးအကစၢ်ယွၤ, ကစၢ်လၢအတ့လီၤမူခိၣ်ဒီးဟီၣ်ခိၣ်တဂၤန့ၣ်တက့ၢ်. အဝဲဟ့ၣ်လီၤတ့ၢ်လံစီၤပၤစီၤဒၤဝံးလၢဖိခွါလၢအကူၣ်တၢ်သ့ တဂၤလၢအပှဲၤဒီးတၢ်သ့ၣ်ညါဒီးတၢ်သ့တၢ်ဘၣ်, လၢခဲကနံၣ်အံၤကူၣ်ကျဲၤဝဲလၢကသူၣ်ထီၣ်တၢ်လုၢ်ဟံၣ်တဖျၢၣ်လၢ ယွၤအဂီၢ်, ဒီးနီတဖျၢၣ်လၢအနီၢ်ကစၢ်ဒၣ်ဝဲအဂီၢ်န့ၣ်လီၤ.

¹³ ယဆှၢလီၤန့ၢ်နၤပှၤကူၣ်သ့ဒီးပှၤသ့မၤတၢ်လၢစုဂ့ၤဂ့ၤတဂၤ လၢအမံၤမ့ၢ်ဝဲစီၤဃူရၣ်အဘံန့ၣ်လီၤ.

¹⁴ အဝဲအမိၢ်မ့ၢ်ပှၤဒူၣ်ဖိထၢဖိတဂၤလၢဒၣ်အဒူၣ်ပူၤဒီးအပၢ်မ့ၢ် ပှၤလၢဝ့ၢ်ထါယၢၣ်ဖိတဂၤန့ၣ်လီၤ. အဝဲနၢ်ပၢၢ်တၢ်မၤဘၣ်ထွဲဒီးတၢ်ပိာ်ထူ, စ့, တိၢ်ဘီ, ထး, ဒီးတၢ်စိးပျၢၤလၢၢ်ဒီးသ့ၣ်န့ၣ်လီၤ. အဝဲဆးတၢ်ဒီးတၢ်ကံးယာ်အလွဲၢ်လါဟ့, လုးတကုာ်, အဂီၤဒီးဖှီဝါကဆှၣ်သ့စ့ၢ်ကီးဝဲန့ၣ်လီၤ. အဝဲမၤကယဲၢ်တၢ်စိးပျၤအတၢ်မၤအကလုာ်ကလုာ်သ့ဝဲ, ဒီးမၤကဲထီၣ်ကယဲၢ်တၢ်အက့ၢ်အဂီၤအဒိလၢအဘၣ်တၢ်ဟ့ၣ်ကူၣ်အီၤ န့ၣ်လီၤ. မ်အကမၤဃုာ်သကိးတၢ်ဒီးနပှၤတဖၣ်လၢအသ့မၤတၢ်လၢစုလၢအမၤ တ့ၢ်တၢ်လၢနပၢ်စီၤပၤဒၤဝံးအဂီၢ်န့ၣ်တက့ၢ်.

¹⁵ လၢတၢ်န့ၣ်အဃိ, ခဲကနံၣ်အံၤဆှၢလီၤန့ၢ်ပှၤဘုကၠူၣ်, ဘုမုယီၤ, စပံးထံဒီးသ့ၣ်စၤယံးအသိလၢနအၢၣ်လီၤတ့ၢ်ပှၤန့ၣ်တက့ၢ်.

¹⁶ ပကကူာ်လီၤကယဲၢ်သ့ၣ်ဆှိအ့ရ့းလၢနလိၣ်ဘၣ်, လၢကစၢၢ်တဖၣ်အလိၤလၢလဘၤနိၣ်, ဒီးစၢဖှိၣ်ထီၣ်အီၤဒ်ထိအသိး, ဒီးဟဲစိာ်အီၤခီဖျိပီၣ်လဲၣ်တုၤလၢဝ့ၢ်ယၤဖိၤန့ၣ်လီၤ. စးထီၣ်ဖဲန့ၣ်သုဟဲက့ၤစိာ်အီၤဆူဝ့ၢ်ယရူၤၡလ့ၣ်သ့ဝဲလီၤ.”

တၢ်သူၣ်ထီၣ်ယွၤအတၢ်လုၢ်ဟံၣ် စးထီၣ်အသး

¹⁷ စီၤပၤၡလိၤမိၤမၤတၢ်ဂံၢ်ဒီးဆဲးလီၤမံၤတမံၤလၢပှၤတခီ ဘီမုၢ်ဖိတဖၣ်လၢအအိၣ်ဆိးလၢကီၢ်အံၣ်စရ့လးအပူၤအဂီၢ်ဒ်အပၢ် စီၤဒၤဝံးထၢဒီးကွဲးနီၣ်ကွဲးဃါတ့ၢ်ဝဲအသိးန့ၣ်လီၤ. ဖဲန့ၣ်, ပှၤတခီဘီမုၢ်ဖိတဖၣ်လၢအအိၣ်ဝဲဆိးဝဲအိၣ်, တကလီၢ်ယဲၢ်ကလးသၢကထိဃုကယၤ ဂၤန့ၣ်လီၤ.

¹⁸ အဝဲပာ်လီၤပှၤနွံကလး ဂၤလၢအဝဲသ့ၣ်အကျါဒ်သိးကဆှၢထီၣ်ဆှၢ လီၤတၢ်ပီးတၢ်လီတဖၣ်, ဒီးပှၤ ဃိးကလး ဂၤလၢကကူးတဲာ်လၢၢ်တဖၣ်လၢကစၢၢ်တဖၣ်အလိၤဒီး ဃုထၢပာ်လီၤပှၤသုးကျဲၤကွၢ်ထွဲတၢ် သၢကထိဃုကယၤ ဂၤ, လၢတၢ်မၤကဘၣ်တၢ်မၤအီၤသပှၢ်ကတၢၢ်အဂီၢ်လီၤ.