လံာ်ကွဲးနီၣ်တၢ်ခံဘ့ၣ်တဘ့ၣ် 19 - Sgaw Karen Common Bible

ဝံတဂၤအတၢ်သိၣ်က့ၤသီက့ၤစီၤယဟိၡၤဖး ဆါဆါကလဲာ်

¹ ကီၢ်ယူဒၤအစီၤပၤစီၤယဟိၡၤဖးဟဲက့ၤကဒါက့ၤပူၤပူၤဖျဲး ဖျဲးဆူအနီ, လၢဝ့ၢ်ယရူၤၡလ့ၣ်အပူၤန့ၣ်လီၤ.

² ဝံတဂၤလၢအမ့ၢ်စီၤဃနၤနံအဖိခွါစီၤယ့ၤဟူ, လဲၤထီၣ်သဂၢၢ်စီၤပၤဒီးစံးဘၣ်အီၤ, “မ့ၢ်နဆိကမိၣ်လၢတၢ်မၤ စၢၤပှၤအၢပှၤသီဒီးတၢ်အိၣ်လၢပှၤသးဟ့ယွၤအအိၣ်တကပၤန့ၣ်, မ့ၢ်တၢ်အဘၣ်န့ၣ်ဧါ. တၢ်လၢနမၤတ့ၢ်န့ၣ်, ဟဲစိာ်ယွၤအတၢ်သးထီၣ်လၢနလိၤန့ၣ်လီၤ.

³ ဘၣ်ဆၣ်ဒီးလၢနပူၤန့ၣ်တၢ်အဂ့ၤအိၣ်ဒံးဝဲတနီၤန့ၣ်လီၤ. နသုးကွံာ်တ့ၢ်ကယဲၢ်ကစၢ်မုၣ်အၡ့ရၤအတၢ်ပနီၣ်တဖၣ်လၢပှၤဂီၢ်မုၢ် ဘူၣ်ထီၣ်ဘါထီၣ်ဝဲ, ဒီးနဂုာ်ကျဲးစၢးပိာ်ထွဲတ့ၢ်ကစၢ်ယွၤအတၢ်ဘၣ်အသးအခံန့ၣ် လီၤ.”

စီၤယဟိၡၤဖးအတၢ်မၤသီထီၣ်က့ၤတၢ်တဖၣ်

⁴ စီၤပၤယဟိၡၤဖးမ့ၢ်အိၣ်ဝဲဆိးဝဲလၢဝ့ၢ်ယရူၤၡလ့ၣ်အပူၤဒၣ် လဲာ်, အဝဲလဲၤတၢ်က့ၤတၢ်တဘျီဘၣ်တဘျီလၢပှၤဂီၢ်မုၢ်အကျါစးထီၣ်လၢ ဝ့ၢ်ဘ့ၤၡဘၤလၢကလံၤထံးတခီ, တုၤဆူအ့ဖရဲၣ်အကစၢၢ်ကလိအကီၢ်အကတၢၢ်လၢကလံၤစိးတခီ, ဒ်သိးကကိးကဒါက့ၤပှၤဂီၢ်မုၢ်ဆူယွၤ, မိၢ်ပၢ်ဖံဖုလၢပျၢၤ တဖၣ်အကစၢ်ယွၤအအိၣ်အဂီၢ်န့ၣ်လီၤ.

⁵ အဝဲဃုထၢပာ်လီၤပှၤစံၣ်ညီၣ်ကွီၢ်တဖၣ်လၢဝ့ၢ်တဖၣ်လၢအအိၣ်ဒီး အတိာ်ဧိၤတာ်ဧိၤ, တဖျၢၣ်စုာ်စုာ်အပူၤလၢကီၢ်ယူဒၤ,

⁶ ဒီးသိၣ်လိနဲၣ်ယူၤအဝဲသ့ၣ်ဒ်အံၤ, “ပလီၢ်သူၣ်ပလီၢ်သးလၢသု တၢ်ခါလီၤသုကလုၢ်လၢတၢ်စံၣ်ညီၣ်အဂီၢ်တက့ၢ်. သုတမၤဘၣ်တၢ်လၢပှၤကညီအတၢ်စိတၢ်ကမီၤအမံၤအပူၤဘၣ်. မ့မ့ၢ်လၢယွၤအတၢ်စိတၢ်ကမီၤအပူၤ, ဒီးအဝဲအိၣ်ဒီးသုဖဲသုဟ့ၣ်လီၤတၢ်စံၣ်ညီၣ်န့ၣ်လီၤ.

⁷ ယူးယီၣ်ပာ်ကဲယွၤဒီးမၤတၢ်လီၤတံၢ်လီၤဆဲးတက့ၢ်. အဂ့ၢ်ဒ်အံၤ, ယွၤ, ပကစၢ်ယွၤန့ၣ်, တၢ်လီတၢ်ဝ့ၤမ့ၢ်ဂ့ၤ, တၢ်ကွၢ်မဲာ်တၢ်မ့ၢ်ဂ့ၤတၢ်ဟံးန့ၢ်ခိၣ်ဖးလာ်ဆှိးမ့ၢ်ဂ့ၤတအိၣ် ဘၣ်ဒီးအီၤဘၣ်.”

⁸ လၢဝ့ၢ်ယရူၤၡလ့ၣ်အပူၤန့ၣ်စီၤယဟိၡၤဖးဃုထၢပာ်လီၤပှၤလ့ၤ ဝံဖိတဖၣ်, ပှၤလုၢ်တၢ်အခိၣ်တဖၣ်ဒီးဟံၣ်ဒူၣ်ဃီထၢအခိၣ်တနီၤဒ်ပှၤစံၣ်ညီၣ် ကွီၢ်တဖၣ်လၢကွီၢ်တဖၣ်လၢအဘၣ်ထွဲဒီး, တၢ်လုၢ်သ့ၣ်ခါပတာ်ယူဒၤအတၢ်သိၣ်တၢ်သီလၢယွၤဟ့ၣ်လီၤဝဲအဂီၢ် မ့ၢ်ဂ့ၤ, ခူဖိဝ့ၢ်ဖိကဒဲကဒဲ တဖၣ်အတၢ်လိာ်ကွီၢ်လိာ်အသးအဂီၢ်မ့ၢ်ဂ့ၤန့ၣ်လီၤ.

⁹ အဝဲဟ့ၣ်လီၤအဝဲသ့ၣ်လၢတၢ်သိၣ်လိနဲၣ်ယုၤတဖၣ်ဒ်လၢလာ်အံၤန့ၣ် လီၤ. “သုကဘၣ်မၤသုမူသုဒါတဖၣ်လၢတၢ်ယူးယီၣ်ပာ်ကဲယွၤအပူၤ, စူၢ်အီၤအိၣ်ဒီးတၢ်သူၣ်တီသးရၤလၢတၢ်ခဲလၢာ်လၢသုမၤအီၤ အပူၤန့ၣ်လီၤ.

¹⁰ တဘျီလၢ်လၢ်ဖဲသုထံဖိကီၢ်ဖိကဒဲကဒဲလၢဝ့ၢ်တဖျၢၣ်လၢ်လၢ် အပူၤဟဲစိာ်ကွီၢ်ဘၣ်ထွဲဒီးတၢ်မၤသံမၤဝီမ့ၢ်ဂ့ၤ, တၢ်လုၢ်သ့ၣ်ခါပတာ်တၢ်ဘူၣ်တၢ်ဘါအတၢ်သိၣ်တၢ်သီမ့တမ့ၢ်တၢ်မၤ လိာ်တမံၤမံၤမ့ၢ်ဂ့ၤန့ၣ်, သုကဘၣ်သိၣ်လိနဲၣ်ယုၤအဝဲသ့ၣ်လီၤတံၢ်လီၤဆဲးလၢအဝဲသ့ၣ်ကဘၣ် ပာ်အသးဒ်လဲၣ်ဖဲကွီၢ်အကတီၢ်, ဒ်သိးအဝဲသ့ၣ်သုတကဲထီၣ်ပှၤမၤကမၣ်တၢ်ခီဖျိတၢ်မၤတၢ်ဒဲးဘး ထီဒါယွၤတဂ့ၤန့ၣ်လီၤ. သုမ့ၢ်တမၤဒ်န့ၣ်ဘၣ်ဒီး, သုဒီးသုပှၤထံဖိကီၢ်ဖိ ကဒဲကဒဲ, ကကလၢၢ်ဘၣ်ယွၤအတၢ်သးဒိၣ်ထီၣ်အသဟီၣ်န့ၣ်လီၤ. မ့မ့ၢ်သုမ့ၢ်မၤသုမူသုဒါဒီးသုတၢ်ကမၣ်တအိၣ်ဝဲဘၣ်.

¹¹ ပှၤလုၢ်တၢ်အခိၣ်အဒိၣ်ကတၢၢ်စီၤအမၤရယၤကအိၣ်ဒီးတၢ်စိ တၢ်ကမီၤလၢခံကတၢၢ်တပတီၢ်လၢကယဲၢ်တၢ်ဘူၣ်တၢ်ဘါအကွီၢ်တဖၣ်အ ဂီၢ်, ဒီးကီၢ်ယူဒၤအပဒိၣ်ဖးဒိၣ်အဒိၣ်ကတၢၢ်စီၤယံးၡမၤဧ့လးအဖိ ခွါစီၤစဘၤဒယၤကအိၣ်ဒီးတၢ်စိတၢ်ကမီၤလၢခံကတၢၢ်တပတီၢ်လၢ ကယဲၢ်ထံဖိကီၢ်ဖိအကွီၢ်တဖၣ်အဂီၢ်န့ၣ်လီၤ. ပှၤလ့ၤဝံဖိတဖၣ်အိၣ်မူအိၣ်ဒါလၢတၢ်ကွၢ်ထွဲကွီၢ်ဘျီၣ်အတၢ် စံၣ်ညီၣ်တဖၣ်မ့ၢ်အဘၣ်တၢ်မၤထွဲအီၤဧါ, တဘၣ်တၢ်မၤထွဲအီၤဘၣ်လဲၣ်အဂ့ၢ်န့ၣ်လီၤ. အိၣ်ဒီးတၢ်သူၣ်ဒူသးဒူဒီးစိာ်ထီၣ်မၤထွဲတၢ်သိၣ်လိနဲၣ်ယုၤ တဖၣ်အံၤအခံ, ဒီးမ်ယွၤအိၣ်လၢတၢ်အဘၣ်တကပၤန့ၣ်တက့ၢ်.”