လံာ်စီၤၡမူၤအ့လးအခီၣ်ထံးတဘ့ၣ် 3 - Sgaw Karen Common Bible

ယွၤလီၣ်ဖျါထီၣ်အသးဆူစီၤၡမူၤအ့လး

¹ လၢမုၢ်နံၤတဖၣ်အပူၤ, ဖဲဖိသၣ်စီၤၡမူၤအ့လးမၤယွၤအတၢ်မၤ လၢစီၤဧ့လံၤအတၢ်နဲၣ်ကျဲအဖီလာ်အခါန့ၣ်, တၢ်ကစီၣ်ဟဲလၢယွၤစှၤဒိၣ်မးလီၤ. ဒီးတၢ်ထံၣ်လၢညါခီတဖၣ် လၢအဟဲလၢအအိၣ်န့ၣ်ကၤဒိၣ်မးလီၤ.

² ဘၣ်မုၢ်တနၤ, စီၤဧ့လံၤလၢခဲအံၤဘူးအမဲာ်တထံၣ်လၢၤတၢ်ဃၣ်ဃၣ် မံဝဲလၢအဒၢးဒၣ်ဝဲအပူၤလီၤ.

³ စီၤၡမူၤအ့လးမံဝဲလၢတၢ်လုၢ်ဟံၣ်အပူၤဖဲယွၤအတၢ်အၢၣ်လီၤ အီလီၤအတလါစီဆှံအိၣ်ဝဲဒၣ်အလီၢ်န့ၣ်လီၤ. တချုးမုၢ်ဆ့ၣ်ထီၣ်တၢ်ခံးဒံးဘၣ်ဖဲမ့ၣ်အူဒၢကပီၤဒံးဝဲန့ၣ်,

⁴ ယွၤကိးထီၣ်စီၤၡမူၤအ့လးလီၤ. အဝဲဒၣ်စံးဆၢဝဲ, “မ့ၢ်, တၢ်ဒိၣ်ဧၢ,” ဝံၤဒီးဃ့ၢ်ဆူစီၤဧ့လံၤအအိၣ်ဒီးစံး, “နကိးယၤဒီးယအိၣ်ဖဲအံၤလီၤ.”

⁵ ဘၣ်ဆၣ်ဒီးစီၤဧ့လံၤစံးဝဲဒၣ်, “ယတကိးနၤဘၣ်. က့ၤမံတက့ၢ်.”

⁶ ယွၤကိးထီၣ်ကဒီးစီၤၡမူအ့လးလီၤ. ဖိသၣ်ပိာ်ခွါန့ၣ်တသ့ၣ်ညါဝဲလၢတၢ်န့ၣ်မ့ၢ်ယွၤဘၣ်. အဂ့ၢ်ဒ်အံၤ, ယွၤတကတိၤတ့ၢ်တၢ်ဒီးအီၤလၢညါနီတစုဘၣ်. မၤသးဒ်န့ၣ်ဒီး, အဝဲဂဲၤဆၢထၢၣ်လဲၤဆူစီၤဧ့လံၤအအိၣ်ဒီးစံး, “နကိးယၤဒီးယအိၣ်ဖဲအံၤလီၤ.”

⁷ ဘၣ်ဆၣ်ဒီးစီၤဧ့လံၤစံးဆၢအီၤ, “ယဖိခွါဧၢ, ယတကိးနၤဘၣ်. က့ၤမံတက့ၢ်.”

⁸ ယွၤကိးထီၣ်စီၤၡမူၤအ့လးသၢဘျီတဘျီလီၤ. အဝဲဂဲၤဆၢထၢၣ်ဒီးလဲၤဆူစီၤဧ့လံၤအအိၣ်ဒီးစံး, “နကိးယၤဒီးယအိၣ်ဖဲအံၤလီၤ.” တုၤနုၤတစု, စီၤဧ့လံၤသ့ၣ်ညါလီၤတံၢ်လၢပှၤကိးဖိသၣ်ပိာ်ခွါန့ၣ်မ့ၢ်ယွၤလီၤ.

⁹ မၤသးဒ်န့ၣ်ဒီးစီၤဧ့လံၤစံးဘၣ်အီၤ, “က့ၤမံတက့ၢ်. ဒီးအဝဲမ့ၢ်ကိးထီၣ်ကဒီးနၤန့ၣ်, စံး, ယွၤဧၢ, ကတိၤတၢ်တက့ၢ်. နခ့နပှၤဒိကနၣ်တၢ်လီၤ.” မၤသးဒ်န့ၣ်ဒီးစီၤၡမူၤအ့လးက့ၤမံဝဲလီၤ.

¹⁰ ယွၤဟဲဒီးဆၢထၢၣ်ဖဲန့ၣ်ဒီးကိးထီၣ်ဒ်အကိးတ့ၢ်ဝဲလၢညါအသိး, “စီၤၡမူၤအ့လး, စီၤၡမူၤအ့လးဧၢ,” န့ၣ်လီၤ. စီၤၡမူၤအ့လးစံးဆၢဝဲ, “ကတိၤတၢ်တက့ၢ်. နခ့နပှၤဒိကနၣ်တၢ်လီၤ.”

¹¹ ယွၤစံးဘၣ်အီၤ, “မုၢ်တနံၤနံၤန့ၣ်ယကမၤဘၣ်ကီၢ်အံၣ်စရ့လး အပှၤဂီၢ်မုၢ်လၢတၢ်တမံၤမံၤ, တၢ်လၢအလီၤပျံၤလီၤဖုးတုၤဒၣ်လဲာ်ပှၤတဂၤလၢ်လၢ်လၢ အနၢ်ဟူတၢ်ဂ့ၢ်န့ၣ်အသးကလီၤကတုၤဝဲလီၤ.

¹² လၢမုၢ်နံၤအဝဲန့ၣ်န့ၣ်ယကမၤကဲထီၣ်ကယဲၢ်တၢ်လၢယကတိၤထီဒါ တ့ၢ်စီၤဧ့လံၤအဟံၣ်ဖိဃီဖိ, စးထီၣ်လၢအခီၣ်ထံးတုၤလၢ အကတၢၢ်တစုန့ၣ်လီၤ.

¹³ ယစံးဘၣ်တ့ၢ်လံအီၤလၢယကစံၣ်ညီၣ်အဟံၣ်ဖိဃီဖိလီၤစိၤလီၤထီလီၤ. အဂ့ၢ်ဒ်အံၤ, အဖိခွါတဖၣ်ကတိၤတ့ၢ်တၢ်ကတိၤအအၢအသီထီဒါ ယၤလီၤ. စီၤဧ့လံၤသ့ၣ်ညါတ့ၢ်တၢ်လၢအဝဲသ့ၣ်မၤတ့ၢ်ဝဲတဖၣ်အံၤဘၣ်ဆၣ် ဒီးတတြီဘၣ်အဝဲသ့ၣ်ဘၣ်.

¹⁴ မၤသးဒ်န့ၣ်ဒီးယဘိးဘၣ်သ့ၣ်ညါတၢ်, ဆူစီၤဧ့လံၤအဟံၣ်ဖိဃီ ဖိလၢတၢ်လုၢ်တၢ်ပာ်မ့ၢ်ဂ့ၤ, တၢ်လုၢ်မၤဘူၣ်မ့ၢ်ဂ့ၤသုးကွံာ်တၢ်ဒဲးဘးလီၤပျံၤလီၤဖုး အံၤအဘူးအလဲတန့ၢ်ဘၣ်အဂ့ၢ်န့ၣ်လီၤ.”

¹⁵ စီၤၡမူၤအ့လးအိၣ်လၢလီၢ်မံခိၣ်တုၤလၢမုၢ်ဆ့ၣ်ဝါလီၤ. ဝံၤဒီးဂဲၤဆၢထၢၣ်ဝဲဒီးအိးထီၣ်ယွၤအဟံၣ်အတြဲၤတဖၣ်လီၤ. အဝဲပျံၤတၢ်လၢကတဲစီၤဧ့လံၤဘၣ်ဃးဒီးတၢ်ထံၣ်လၢညါခီအဂ့ၢ်န့ၣ်လီၤ.

¹⁶ စီၤဧ့လံၤကိးအီၤ, “စီၤၡမူၤအ့လး, ယဖိခွါဧၢ,” စီၤၡမူၤအ့လးစံးဆၢဝဲ, “မ့ၢ်, တၢ်ဒိၣ်ဧၢ.”

¹⁷ ဒီးစီၤဧ့လံၤသံကွၢ်ဝဲ, “ယွၤတဲနၤတၢ်မနုၤလဲၣ်. ပာ်ခူသူၣ်တၢ်လၢယၤနီတမံၤတဂ့ၤ. တၢ်လၢအဝဲစံးတ့ၢ်ဝဲန့ၣ် နမ့ၢ်တတဲယၤကိးမံၤဒဲးဒီးကစၢ်ယွၤကစံၣ်ညီၣ်နၤဆါဆါလီၤ.”

¹⁸ မၤသးဒ်န့ၣ်ဒီးစီၤၡမူၤအ့လးတဲဘၣ်အီၤတၢ်ကိးမံၤဒဲးဒီး တပာ်ခူသူၣ်တ့ၢ်ဝဲတၢ်နီတမံၤဘၣ်. စီၤဧ့လံၤစံးဝဲ, “အဝဲမ့ၢ်ယွၤလီၤ. အဝဲကမၤတၢ်လၢအထံၣ်ဝဲလၢအဂ့ၤကိးမံၤဒဲးန့ၣ်လီၤ.”

¹⁹ တုၤစီၤၡမူၤအ့လးဒိၣ်ထီၣ်ဝဲဒီး, ယွၤအိၣ်ဒီးအီၤဒီးမၤလၢ ထီၣ်ပှဲၤထီၣ်ကယဲၢ်တၢ်လၢစီၤၡမူၤအ့လးစံးဝဲခဲလၢာ်န့ၣ်လီၤ.

²⁰ မၤသးဒ်န့ၣ်ဒီးကီၢ်အံၣ်စရ့လးအပှၤဂီၢ်မုၢ်စးထီၣ်လၢကီၢ်အဆၢ လၢအံၤတုၤကီၢ်အဆၢအဂၤတကပၤန့ၣ်သ့ၣ်ညါလၢစီၤၡမူအ့လးမ့ၢ် ယွၤအဝံနီၢ်နီၢ်တဂၤန့ၣ်လီၤ.

²¹ ယွၤလီၣ်ဖျါထီၣ်ဒံးအသးဆူညါလၢဝ့ၢ်ၡံလိၤအပူၤတၢ်လီၢ်ဖဲ အလီၣ်ဖျါထီၣ်တ့ၢ်အသးဆူစီၤၡမူၤအ့လးဒီးကတိၤတ့ၢ်တၢ်ဒီး အီၤအလီၢ်န့ၣ်လီၤ. ဒီးဖဲစီၤၡမူၤအ့လးကတိၤတၢ်န့ၣ်အံၣ်စရ့လးဒီကီၢ် ဒိကနၣ်အီၤလီၤ.