လံာ်စီၤၡမူၤအ့လးအခီၣ်ထံးတဘ့ၣ် 19 - Sgaw Karen Common Bible

စီၤဒၤဝံးဘၣ်တၢ်မၤအၢမၤနးအီၤလၢစီၤစီလူး

¹ စီၤစီလူးတဲဘၣ်အသုးခိၣ်သုးနၢ်တဖၣ်ဒီးအဖိခွါစီၤယိနၤ သၣ်လၢအဝဲကူၣ်ထီၣ်ကျဲၤလီၤဝဲဒ်သိးကမၤသံစီၤဒၤဝံးလီၤ. ဘၣ်ဆၣ်ဒီးစီၤယိနၤသၣ်အဲၣ်ဘၣ်စီၤဒၤဝံးဒိၣ်မးလီၤ.

² မၤသးဒ်န့ၣ်ဒီး, စီၤယိနၤသၣ်စံးဘၣ်စီၤဒၤဝံး, “ယပၢ်ကျဲးစၢးဒ်သိးကမၤသံနၤလီၤ. ခဲမုၢ်ဆ့ၣ်တနံၤန့ၣ် ဝံသးစူၤပလီၢ်နသးဂ့ၤဂ့ၤတက့ၢ်. အိၣ်ခူသူၣ်လၢတၢ်လီၢ်ခူသူၣ်တတီၤဒီးအိၣ်ဖဲန့ၣ်တက့ၢ်.

³ ယကလဲၤဒီးဆၢထၢၣ်လၢယပၢ်အကပၤလၢပျီပူၤဖဲ နအိၣ်ခူသူၣ်အလီၢ်, ဒီးယကတဲအီၤလၢနဂ့ၢ်လီၤ. ယမ့ၢ်ထံၣ်သ့ၣ်ညါတၢ်တမံၤမံၤဒီးယကဒုးသ့ၣ်ညါနၤလီၤ.”

⁴ စီၤယိနၤသၣ်စံးပတြၢၤစီၤဒၤဝံးလၢစီၤစီလူးအမဲာ်ညါဒီး စံးဘၣ်အီၤ, “တၢ်ဒိၣ်ဧၢ, မၤကမၣ်နခ့နပှၤစီၤဒၤဝံးတဂ့ၤ. အဝဲတမၤကမၣ်တ့ၢ်နၤနီတမံၤဘၣ်. မ့မ့ၢ်တခီ, ကယဲၢ်တၢ်ကိးမံၤလၢအမၤတ့ၢ်ဝဲန့ၣ်ကဲထီၣ်တၢ်မၤစၢၤဖးဒိၣ်လၢ နဂီၢ်လီၤ.

⁵ အဝဲညိကွံာ်အသးသမူဖဲအမၤသံစီၤကၤလယးဒီးယွၤမၤနၢၤတၢ် ဖးဒိၣ်လၢကီၢ်အံၣ်စရ့လးအဂီၢ်လီၤ. ဖဲနထံၣ်တ့ၢ်တၢ်န့ၣ်ဒီးနသးခုလီၤ. အန့ၣ်ဒီး, ဘၣ်မနုၤအဃိခဲအံၤနအဲၣ်ဒိးမၤကမၣ်ပှၤအတၢ်ကမၣ်တအိၣ် ဘၣ်တဂၤဒီးမၤသံစီၤဒၤဝံးလၢတၢ်ဂ့ၢ်တၢ်ကျိၤတအိၣ်ဘၣ်အပူၤ န့ၣ်လဲၣ်.”

⁶ စီၤစီလူးဘၣ်တၢ်တဲနၢ်ပၢၢ်အီၤလီၤတံၢ်လီၤဆဲးခီဖျိစီၤယိ နၤသၣ်အတၢ်တဲဘၣ်အီၤဒီးမၤတၢ်ဆိၣ်တခါလၢယွၤအမံၤအပူၤလၢ အတမၤသံဘၣ်စီၤဒၤဝံးဘၣ်န့ၣ်လီၤ.

⁷ မၤသးဒ်န့ၣ်ဒီး, စီၤယိၤနၤသၣ်ကိးစီၤဒၤဝံးဒီးတဲဘၣ်အီၤ တၢ်ကိးမံၤဒဲးလီၤ. အန့ၣ်ဝံၤဒီးအဝဲလဲၤကိးစီၤဒၤဝံးဆူစီၤစီလူးအအိၣ်, ဒီးစီၤဒၤဝံးမၤတၢ်ခ့တၢ်ပှၤအတၢ်မၤလၢစီၤပၤအဂီၢ်ဒ်အညီ နုၢ်မၤဝဲအသိးန့ၣ်လီၤ.

⁸ တၢ်ဒုးတၢ်ယၤဒီးပှၤဖလ့ၡသးဖိတဖၣ်ကဲထီၣ်ကဒီးလီၤ. စီၤဒၤဝံးဒုးအဝဲသ့ၣ်ဒီးမၤနၢၤကွံာ်အဝဲသ့ၣ်လၢာ်လၢာ်ဆ့ဆ့ ဒီးအဝဲသ့ၣ်ထွးထီၣ်ဃ့ၢ်ကွံာ်ဝဲဒၣ်လီၤ.

⁹ တနံၤန့ၣ်, သးအအၢအသီတဖျၢၣ်လၢအဟဲလၢယွၤဟံးဃာ်စီၤစီလူးလီၤ. အဝဲဆ့ၣ်နီၤလၢအဟံၣ်ပူၤဃုာ်ဒီးအဘီအိၣ်လၢအစုပူၤလီၤ. ဒီးစီၤဒၤဝံးအိၣ်ဖဲန့ၣ်ဒ့တနၢ်န့ၣ်လီၤ.

¹⁰ စီၤစီလူးကျဲးစၢးဝဲဒ်သိးကဆဲးတံၢ်စီၤဒၤဝံးလၢဂီၤပၤအလိၤလၢ အဘီလီၤ. ဘၣ်ဆၣ်ဒီး, စီၤဒၤဝံးပဒ့ၣ်အသးဒီးဘီန့ၣ်စဲဘူးအသးလၢဂီၤ ပၤလိၤဒီးစီၤဒၤဝံးဃ့ၢ်ထီၣ်ကွံာ်ဝဲဒီးပူၤဖျဲးဝဲဒၣ်လီၤ.

¹¹ မုၢ်တနၤဃီန့ၣ်, စီၤစီလူးမၢလီၤပှၤလဲၤခိးကွၢ်စီၤဒၤဝံး အဟံၣ်ဒီးမၢအမၤသံကွံာ်အီၤလၢမုၢ်ဆ့ၣ်ထီၣ်န့ၣ်လီၤ. စီၤဒၤဝံးအမါနီၢ်မံကၤလးဟ့ၣ်ပလီၢ်အီၤ, “နမ့ၢ်တဟးထီၣ်ကွံာ်တနၤညါအံၤန့ၣ်, ခဲမုၢ်ဆ့ၣ်နကသံလီၤ.”

¹² အမါစဲၤလီၤအီၤလၢပဲတြီဖိတဘ့ၣ်, ဒီးအဝဲဃ့ၢ်ပူၤဖျဲး ကွံာ်အသးန့ၣ်လီၤ.

¹³ အန့ၣ်ဝံၤဒီးအဝဲဟံးန့ၣ်အဒူၣ်ဖိထၢဖိအတၢ်ဂီၤသိအသးဒီး ပုာ်မံလီၤအီၤလၢလီၢ်မံခးအဖီခိၣ်, ပာ်ခိၣ်သခၢၣ်လၢတၢ်မၤအီၤလၢမဲာ်တဲးလဲးအဖံးဖဲအခိၣ်န့ၣ်ဒီး လုးဘၢအီၤလၢအဖီခိၣ်လီၤ.

¹⁴ ဖဲစီၤစီလူးအပှၤတဖၣ်ဟဲဒ်သိးကမၤန့ၢ်စီၤဒၤဝံးန့ၣ်နီၢ်မံ ကၤလးစံးဘၣ်အဝဲသ့ၣ်လၢစီၤဒၤဝံးအိၣ်တမုာ်ဘၣ်လီၤ.

¹⁵ ဘၣ်ဆၣ်ဒီးစီၤစီလူးမၢကဒါက့ၤအဝဲသ့ၣ်လၢအကလဲၤကွၢ်စီၤဒၤဝံး လၢအဝဲသ့ၣ်အနီၢ်ကစၢ်ဒၣ်ဝဲလီၤ. စီၤစီလူးမၤလိာ်အဝဲသ့ၣ်, “ဟဲက့ၤစိာ်အီၤဆူအံၤလၢအလီၢ်မံခးအပူၤ, ဒီးယကမၤသံအီၤလီၤ.”

¹⁶ အဝဲသ့ၣ်လဲၤနုာ်ဆူဒၢးပူၤဒီးထံၣ်ဝဲဟံၣ်ဖိဃီဖိအတၢ်ဂီၤသိ အသးလၢလီၢ်မံခးအဖီခိၣ်, တခၢၣ်လီၤလၢမဲာ်တဲးလဲးအဖံးခိၣ်သခၢၣ်အလိၤန့ၣ်လီၤ.

¹⁷ စီၤစီလူးသံကွၢ်နီၢ်မံကၤလး, “ဘၣ်မနုၤနမၤကဘျံးကဘျၣ်ယၤ ဒ်အံၤဒီးပျဲယဒုၣ်ယဒါပူၤဖျဲးကွံာ်ဝဲဒၣ်န့ၣ်လဲၣ်.” ပိာ်မုၣ်စံးဆၢဝဲဒၣ်, “အဝဲစံးလၢယမ့ၢ်တမၤစၢၤအီၤဒ်သိးအကပူၤဖျဲးဘၣ်ဒီး ကမၤသံကွံာ်ယၤန့ၣ်လီၤ.”

¹⁸ စီၤဒၤဝံးပူၤဖျဲးဒီးလဲၤဝဲဆူစီၤၡမူၤအ့လးအအိၣ်လၢဝ့ၢ် ရၤမါအပူၤဒီးတဲဘၣ်အီၤတၢ်ကိးမံၤဒဲးလၢစီၤစီလူးမၤတ့ၢ်အီၤန့ၣ်လီၤ. အန့ၣ်ဝံၤဒီး, အဝဲဒၣ်ဒီးစီၤၡမူၤအ့လးလဲၤဆူဝ့ၢ်နၤပိး ဒီးအိၣ်ဝဲဖဲန့ၣ်လီၤ.

¹⁹ စီၤစီလူးဘၣ်တၢ်တဲဘၣ်အီၤလၢစီၤဒၤဝံးအိၣ်လၢနၤဝိး, လၢဝ့ၢ်ရၤမါ, အပူၤန့ၣ်လီၤ.

²⁰ လၢတၢ်န့ၣ်အဃိ, အဝဲမၢလီၤပှၤတနီၤလၢကလဲၤဖီၣ်န့ၢ်အီၤန့ၣ် လီၤ. အဝဲသ့ၣ်ထံၣ်ဝံတဖုဂဲၤကလံာ်ဒီးကိးပသူတၢ်ဃုာ်ဒီး စီၤၡမူၤအ့လးဒ်အခိၣ်အနၢ်အသိးန့ၣ်လီၤ. တုၤနုၤတစု, ယွၤအသးဟံးဃာ်စီၤစီလူးအပှၤတဖၣ်ဒီးအဝဲသ့ၣ် စးထီၣ်ဂဲၤကလံာ်ဒီးကိးပသူဝဲလီၤ.

²¹ ဖဲစီၤစီလူးနၢ်ဟူတၢ်အံၤန့ၣ်, အဝဲဆှၢလီၤအါထီၣ်ပှၤစိာ်တၢ် ကစီၣ်လီၤ. အဝဲသ့ၣ်စ့ၢ်ကီးစးထီၣ်ဂဲၤကလံာ်ဒီးကိးပသူဝဲလီၤ. အဝဲဆှၢလီၤပှၤစိာ်တၢ်ကစီၣ်သၢဘျီတဘျီ, ဒီးတၢ်တမံၤဃီမၤအသးဒီးအဝဲသ့ၣ်န့ၣ်လီၤ.

²² တုၤနုၤတစုစီၤစီလူးအနီၢ်ကစၢ်ဒၣ်ဝဲလဲၤဆူဝ့ၢ်ရၤမါလီၤ. ဖဲအတုၤဃီၤလၢထံပူၤဖးဒိၣ်စ့ကူၤန့ၣ်အဝဲသံကွၢ်မ့ၢ်စီၤၡမူၤအ့လး ဒီးစီၤဒၤဝံးအိၣ်ဖဲလဲၣ်အဂ့ၢ်လီၤ. ဒီးဘၣ်တၢ်စံးဆၢအီၤလၢအဝဲသ့ၣ်အိၣ်ဖဲနၤဝိးန့ၣ်လီၤ.

²³ ဖဲအဝဲလဲၤဆူန့ၣ်အခါန့ၣ်, ကစၢ်ယွၤအသးဟံးဃာ်အီၤစ့ၢ်ကီး, ဒီးအဝဲဒၣ်ဂဲၤကလံာ်ဒီးကိးပသူလၢကျဲဒီဘိညါဆူနၤဝိးန့ၣ်လီၤ.

²⁴ အဝဲဘ့ၣ်လီၤကွံာ်အတၢ်ကူတၢ်သိးတဖၣ်ဒီးဂဲၤကလံာ်ဒီးကိးပသူထီၣ်ဝဲလၢ စီၤၡမူၤအ့လးအမဲာ်ညါဒီးမံလီၤဘ့ၣ်ဆ့ဒီနံၤဒီနၤညါ န့ၣ်လီၤ. (တၢ်အံၤမ့ၢ်တၢ်ကတိၤတထံၣ်လၢအစံးဝဲ, “မ့ၢ်စီၤစီလူးဒၣ်လဲာ်ကဲထီၣ်ဝံတဂၤလံဧါ.” န့ၣ်ကဲထီၣ်အခီၣ်ထံးခီၣ်ဘိဒ်လဲၣ်အဂ့ၢ်န့ၣ်လီၤ.)