လံာ်စီၤပၤအခီၣ်ထံးတဘ့ၣ် 17 - Sgaw Karen Common Bible

စီၤအ့ၤလံယၤဒီးတၢ်ယီၤဃ့

¹ ဝံတဂၤလၢအမံၤမ့ၢ်စီၤအ့ၤလံယၤ, လၢဝ့ၢ်တံးၡဘး, ကီၢ်ကံးလဧးအပူၤန့ၣ်စံးဘၣ်စီၤပၤအၤဃာ်, “လၢယွၤ, ကီၢ်အံၣ်စရ့လးအကစၢ်ယွၤလၢအမူဝဲလၢယမၤအတၢ်တဂၤ အမံၤအပူၤန့ၣ်, ယတဲဘၣ်နၤလၢမ့တမ့ၢ်လၢယစံးတၢ်တမံၤမံၤဒံးဘၣ်န့ၣ်, ပစီၤထံမ့ၢ်ဂ့ၤတၢ်စူၤထံမ့ၢ်ဂ့ၤတအိၣ်ဘၣ်နီတစဲးလၢဆူညါ ခံနံၣ်မ့တမ့ၢ်သၢနံၣ်အတီၢ်ပူၤဘၣ်လီၤ.”

² အန့ၣ်ဒီးယွၤစံးဘၣ်စီၤအ့ၤလံယၤ,

³ “ဟးထီၣ်ကွံာ်လၢတၢ်လီၢ်အံၤဒီးလဲၤဆူမုၢ်ထီၣ်ဒီးပာ်တဒၢ နသးဘူးဒီးထံကျိဖိကရံသးအနံၤလၢထံကျိယၢ်ဒ့ၣ်အမုၢ်ထီၣ် န့ၣ်တက့ၢ်.

⁴ ထံကျိဖိကဟ့ၣ်ထီၣ်နၤလၢထံလၢနကအီအဂီၢ်ဒီးယမၤလိာ်တ့ၢ်စိး ဝၣ်ဃးတဖၣ်လၢကဟဲစိာ်န့ၢ်နၤတၢ်အီၣ်ဖဲန့ၣ်လီၤ.”

⁵ စီၤအ့ၤလံယၤစူၢ်ဝဲယွၤအတၢ်မၤလိာ်ဒီးလဲၤအိၣ်ဝဲဖဲထံကျိ ဖိကရံသးအကပၤန့ၣ်လီၤ.

⁶ အဝဲအီထံလၢထံကျိဖိအပူၤဒီးစိးဝၣ်ဃးတဖၣ်ဟဲစိာ်န့ၢ်အီၤ ကိၣ်ဒီးတၢ်ညၣ်ကိးမုၢ်ဂီၤဒီးကိးမုၢ်ဟါဒဲးန့ၣ်လီၤ.

⁷ တယံာ်ဘၣ်အလီၢ်ခံန့ၣ်ထံကျိဖိလီၤသံးကွံာ်ဝဲမ့ၢ်လၢတၢ်တဟဲ စူၤဘၣ်အဃိန့ၣ်လီၤ.

စီၤအ့ၤလံယၤဒီးမုၣ်ကမဲလၢဝ့ၢ်စၤရဖၤသး

⁸ အန့ၣ်ဒီး, ယွၤစံးဘၣ်စီၤအ့ၤလံယၤ,

⁹ “ခဲကနံၣ်အံၤ, လဲၤဆူဝ့ၢ်စၤရဖၤသးဘူးဒီးဝ့ၢ်စံဒိၣ်ဒီး အိၣ်ဖဲန့ၣ်တက့ၢ်. ယမၤလိာ်တ့ၢ်လံမုၣ်ကမဲတဂၤလၢအအိၣ်ဖဲန့ၣ်ဒ်သိးကလုၢ်အီၣ်နၤ လီၤ.”

¹⁰ လၢတၢ်န့ၣ်အဃိစီၤအ့ၤလံယၤလဲၤဃီၤဆူဝ့ၢ်စၤရဖၤသး, ဒီးတုၤအဟဲဝဲဆူဝ့ၢ်အတြဲၤဖးဒိၣ်န့ၣ်အဝဲထံၣ်ဃီၤမုၣ်ကမဲ တဂၤထၢဖှိၣ်သ့ၣ်မုၣ်ဒ့လီၤ. အဝဲစံးဘၣ်အီၤ, “ဝံသးစူၤဟဲစိာ်န့ၢ်ယၤထံအီတခွးတက့ၢ်.”

¹¹ ဒီးဖဲအလဲၤဝဲဒ်သိးအကဟံးန့ၢ်ထံအီန့ၣ်, အဝဲကိးဃီၤဝဲ, “ဝံသးစူၤဟဲစိာ်န့ၢ်ယၤကိၣ်တစဲးစ့ၢ်ကီးတက့ၢ်.”

¹² မုၣ်ကမဲစံးဆၢအီၤ, “ယဆိၣ်လီၤယသးလၢယွၤ, နကစၢ်လၢအမူဝဲတဂၤအမံၤအပူၤလၢယတအိၣ်ဒီးကိၣ်နီတစဲးဘၣ်. တၢ်လၢအအိၣ်ဒီးယၤခဲလၢာ်န့ၣ်မ့ၢ်ဒၣ်ကိၣ်ကမူၣ်တစှီၤလၢလီခီ တဖျၢၣ်အပူၤဒီးသ့ၣ်စၤယံးအသိတစဲးဖိလၢကိတဖျၢၣ်အပူၤန့ၣ် လီၤ. ယဟဲတ့ၢ်ဖဲအံၤဒ်သိးယကထၢဖှိၣ်သ့ၣ်မုၣ်တနီၤလၢယကက့ၤစိာ်ဆူ ဟံၣ်ဒီးကတဲာ်ကတီၤတၢ်လၢအအိၣ်ဒီးယၤတစဲးဖိအံၤလၢယဖိခွါ ဒီးယၤအဂီၢ်န့ၣ်လီၤ. တၢ်န့ၣ်မ့ၢ်ပတၢ်အီၣ်လၢခံကတၢၢ်ဝံၤဒီးပကလီၤဒိသံကွံာ်န့ၣ်လီၤ.”

¹³ စီၤအ့ၤလံယၤစံးဘၣ်အီၤ, “ကိၢ်တၢ်တဂ့ၤ. လဲၤဒီးကတဲာ်ကတီၤသုတၢ်အီၣ်တက့ၢ်. ဘၣ်ဆၣ်မၤဆိကိၣ်အဆံးဖိတလိၣ်လၢတၢ်လၢအအိၣ်ဒီးနၤအပူၤဒီး ဟဲစိာ်တၢ်န့ၣ်ဆူယအိၣ်, ဝံၤဒီးကတဲာ်ကတီၤတၢ်လၢအအိၣ်တီၢ်န့ၣ်လၢနဂီၢ်ဒီးနဖိခွါအဂီၢ်န့ၣ်တက့ၢ်.

¹⁴ အဂ့ၢ်ဒ်အံၤ, တၢ်အံၤမ့ၢ်တၢ်လၢယွၤကီၢ်အံၣ်စရ့လးအကစၢ်ယွၤ စံးဝဲန့ၣ်လီၤ. တချုးဒံးလၢမုၢ်တနံၤလၢယၤ, ယွၤ, မၢလီၤတၢ်ဟဲစူၤဒံးဘၣ်န့ၣ်, နလီခီအပူၤကိၣ်ကမူၣ်တလၢာ်မ့ၢ်ဂ့ၤ, နကိအပူၤသိတလၢာ်မ့ၢ်ဂ့ၤန့ၣ်ဘၣ်.”

¹⁵ မုၣ်ကမဲန့ၣ်လဲၤဃီၤဒီးမၤဝဲဒ်စီၤအ့ၤလံယၤတဲဘၣ်တ့ၢ်အီၤ အသိးဒီးအဝဲသ့ၣ်ခဲလၢာ်အဂီၢ်ကိၣ်အိၣ်ဝဲလၢလၢလီၣ်လီၣ်လၢအါ နံၤအါသီအတီၢ်ပူၤန့ၣ်လီၤ.

¹⁶ ဒ်ယွၤအၢၣ်လီၤတ့ၢ်တၢ်ခီဖျိစီၤအ့ၤလံယၤအသိးန့ၣ်, လၢလီခီပူၤကိၣ်ကမူၣ်တလၢာ်မ့ၢ်ဂ့ၤလၢကိအပူၤသိတလၢာ်မ့ၢ် ဂ့ၤဘၣ်န့ၣ်လီၤ.

¹⁷ လၢခံ, တယံာ်ဘၣ်အတီၢ်ပူၤန့ၣ်, မုၣ်ကမဲအဖိခွါဆါထီၣ်ဝဲဒီး အတၢ်ဆါနးထီၣ်နးထီၣ်ဝဲဒီးလၢခံကတၢၢ်သံဝဲဒၣ်န့ၣ်လီၤ.

¹⁸ အဝဲစံးဘၣ်စီၤအ့ၤလံယၤ, “ကစၢ်ယွၤအပှၤကညီတဂၤဧၢ, နမၤဘၣ်ယၤတၢ်အံၤဘၣ်မနုၤအဃိလဲၣ်. မ့ၢ်နဟဲဖဲအံၤဒ်သိး နကဒုးသ့ၣ်နီၣ်ကစၢ်ယွၤလၢယတၢ်ဒဲးဘးတဖၣ်ဒီးလၢတၢ်န့ၣ်အဃိ ကဒုးအိၣ်ထီၣ်ယဖိခွါအတၢ်သံန့ၣ်ဧါ.”

¹⁹ စီၤအ့ၤလံယၤစံးဝဲ, “ဟ့ၣ်ဃီၤယၤလၢဖိသၣ်ပိာ်ခွါတ က့ၢ်.” အဝဲဟံးထီၣ်ဖိသၣ်ပိာ်ခွါလၢအမိၢ်အစုတီၤလိၤဒီးလဲၤစိာ်ဝဲဆူ ဒၢးလၢထးခီဖဲအအိၣ်ဝဲအလီၢ်ဒီးပာ်လီၤအီၤလၢလီၢ်မံအဖီ ခိၣ်န့ၣ်လီၤ.

²⁰ အန့ၣ်ဝံၤဒီးအဝဲဘါထုကဖၣ်တၢ်လၢအကလုၢ်ဖးဒိၣ်, “အိယွၤ, ယကစၢ်ယွၤဧၢ, ဘၣ်မနုၤအဃိလၢနမၤဘၣ်တၢ်နးနးကလဲာ် တမံၤအံၤဆူမုၣ်ကမဲတဂၤအံၤန့ၣ်လဲၣ်. အဝဲသးကညီၤတၢ်တုၤဒၣ်လဲာ်လၢအအံးထွဲကွၢ်ထွဲယၤ, ဒီးခဲအံၤနမၤသံအဖိခွါလီၤဧါ.”

²¹ အန့ၣ်ဒီး, စီၤအ့ၤလံယၤစူၣ်မံလီၤအသးလၢဖိသၣ်အဖီခိၣ်သၢ ဘျီဒီးဘါထုကဖၣ်ဝဲ, “အိယွၤ, ယကစၢ်ယွၤဧၢ, ဟ့ၣ်ကဒါက့ၤဖိသၣ်အံၤအသးသမူတက့ၢ်.”

²² ယွၤစံးဆၢစီၤအ့ၤလံယၤအတၢ်ထုကဖၣ်, ဒီးဖိသၣ်စးထီၣ်သါကဒါက့ၤဒီးမူက့ၤဝဲန့ၣ်လီၤ.

²³ စီၤအ့ၤလံယၤဟဲက့ၤစိာ်လီၤဖိသၣ်ဆူဟံၣ်အဖီလာ်တတီၤဆူ အမိၢ်အအိၣ်ဒီးစံးဘၣ်အီၤ, “ကွၢ်တက့ၢ်. နဖိခွါမူဝဲလီၤ.”

²⁴ မုၣ်ကမဲစံးဆၢအီၤ, “ဒီးခဲကနံၣ်အံၤ, ယသ့ၣ်ညါလၢနမ့ၢ်ကစၢ် ယွၤအပှၤကညီတဂၤဒီးလၢယွၤကတိၤတၢ်နီၢ်နီၢ်ခီဖျိနၤလီၤ.”