၁ ယိၤဟၣ် 1 - Sgaw Karen Common Bible

တၢ်မူအကလုၢ်

¹ ပကွဲးန့ၢ်သုတၢ်ဘၣ်ဃးဒီးတၢ်မူအကလုၢ်, လၢအအိၣ်ပာ်တ့ၢ်လံဝဲလၢတၢ်အခီၣ်ထံးလံၤလံၤ န့ၣ်လီၤ. ပနၢ်ဟူဘၣ်လံ, ဒီးပထံၣ်ဘၣ်လံအီၤလၢပမဲာ်ချံဒၣ်ပဝဲန့ၣ်လီၤ. ပကွၢ်ထံအီၤဒီးပဟံးဘၣ်ဖီၣ်ဘၣ်လံအီၤလၢပစု န့ၣ်လီၤ.

² ဖဲတၢ်မူအံၤအိၣ်ဖျါထီၣ်ဝဲန့ၣ်, ပထံၣ်ဘၣ်အီၤသတးဒီးပကတိၤတၢ်လၢအဂ့ၢ် ဒီးစံးဘၣ်တဲဘၣ်သုဘၣ်ဃးတၢ်မူအထူအယိာ် လၢအအိၣ်ဒီးပၢ်, လၢအဘၣ်တၢ်ဒုးသ့ၣ်ညါပှၤအံၤန့ၣ်လီၤ.

³ တၢ်လၢပထံၣ်ဘၣ်ဒီးနၢ်ဟူဘၣ်တ့ၢ်လံန့ၣ်, ပစံးဘၣ်တဲဘၣ် စ့ၢ်ကီးသု, ဒ်သိးသုကရ့လိာ်မုာ်လိာ်သုသးဒီးပှၤန့ၣ်လီၤ. ပတၢ်ရ့လိာ်အံၤမ့ၢ်ပရ့လိာ်ပသးဒီးပၢ်, ဒီးအဖိခွါယ့ၣ်ၡူးခရံာ် န့ၣ်လီၤ.

⁴ ပကွဲးတၢ်အံၤမ့ၢ်ဒ်သိးပတၢ်သးခုကလၢထီၣ်ပှဲၤထီၣ်ဝဲ အဂီၢ်လီၤ.

ကစၢ်ယွၤမ့ၢ်တၢ်ကပီၤ

⁵ တၢ်ကစီၣ်လၢပနၢ်ဟူဘၣ်တ့ၢ်လံလၢအဖိခွါအအိၣ်ဒီးစံးဘၣ် တဲဘၣ်တ့ၢ်လံသုမ့ၢ်အအံၤ, ကစၢ်ယွၤမ့ၢ်တၢ်ကပီၤ ဒီးတၢ်ခံးတၢ်နၤတအိၣ်လၢအပူၤလ့ၤတက့ၤဘၣ်.

⁶ ပမ့ၢ်စံးလၢပရ့လိာ်မုာ်လိာ်ပသးဒီးအီၤဒီးအိၣ်မူဒံးဒၣ်လၢတၢ်ခံးတၢ်နၤအပူၤန့ၣ်, မ့ၢ်ပလီတၢ်ဒီးပတမၤဘၣ်တၢ်မ့ၢ်တၢ်တီဘၣ်.

⁷ ဘၣ်ဆၣ်ပမ့ၢ်အိၣ်မူလၢတၢ်ကပီၤအပူၤ, ဒ်အဝဲဒၣ်အိၣ်လၢတၢ်ကပီၤအပူၤအသိးန့ၣ်ဒီး, မ့ၢ်ပရ့လိာ်မုာ်လိာ်ပသးတဂၤဒီးတဂၤဒီးကစၢ်ယွၤ အဖိခွါယ့ၣ်ၡူးခရံာ်အသွံၣ်သ့စီကွံာ်ပှၤလၢပတၢ် ဒဲးဘးခဲလၢာ်န့ၣ်လီၤ.

⁸ ပမ့ၢ်စံးလၢပတၢ်ဒဲးဘးတအိၣ်နီတမံၤဘၣ်ဒီး, မ့ၢ်ပလီလီၤပသးဒီးတၢ်မ့ၢ်တၢ်တီတအိၣ်လၢပပူၤဘၣ်.

⁹ ဘၣ်ဆၣ်ဒီး, ပမ့ၢ်တဲလီၤကျဲၤလီၤပတၢ်ဒဲးဘးတဖၣ်ဒီး, အဝဲဒၣ်ကတီဒီးအတၢ်အၢၣ်လီၤအီလီၤဒီးမၤတၢ်လၢအဘၣ် န့ၣ်လီၤ. အဝဲကပျၢ်ကွံာ်ပတၢ်ဒဲးဘးတဖၣ်ဒီး, မၤကဆှီထီၣ်ပှၤလၢပတၢ်ကမၣ်ခဲလၢာ်န့ၣ်လီၤ.

¹⁰ ပမ့ၢ်စံးလၢပတမၤဘၣ်တၢ်ဒဲးဘးန့ၣ်, ပဒုးကဲထီၣ်ကစၢ်ယွၤလၢ ပှၤလီတၢ်ဒီးအကလုၢ်ကထါတအိၣ်ဘၣ်လၢပပူၤဘၣ်.