1 ကရံၣ်သူး 1 - Sgaw Karen Common Bible

တၢ်ကတိၤလၢညါ

¹ လၢစီၤပီလူး, လၢအဘၣ်တၢ်ကိးအီၤခီဖျိကစၢ်ယွၤအတၢ်ဘၣ် အသး, ဒ်သိးအကကဲထီၣ်ယ့ၣ်ၡူးခရံာ်အတၢ်မၢဖိတဂၤ, ဒီးပဒီပုၢ်ဝဲၢ်စီၤစိၤစသ့ၣ်,

² ဆူကစၢ်ယွၤအတၢ်အိၣ်ဖှိၣ်လၢအအိၣ်ဝဲဖဲဝ့ၢ်ကရံၣ်သူး, ဆူကယဲၢ်ပှၤလၢအဘၣ်တၢ်ကိးအီၤဒ်သိးအကကဲထီၣ်ကစၢ်ယွၤ အပှၤဂီၢ်မုၢ်စီဆှံ, လၢအဘၣ်ဃးဒီးအီၤလၢတၢ်ပာ်ဖှိၣ်ဃုာ်သး တပူၤဃီဒီးယ့ၣ်ၡူးခရံာ်အပူၤ, ပၣ်ဃုာ်ဒီးကယဲၢ်ပှၤအိၣ်လၢတၢ်လီၢ်ကိးပူၤဒဲးလၢအဘူၣ်ထီၣ်ဘါ ထီၣ်ပကစၢ်ယ့ၣ်ၡူးခရံာ်, အဝဲသ့ၣ်အကစၢ်ဒီးပကစၢ်တဂၤ, အအိၣ်

³ မ်ပပၢ်ကစၢ်ယွၤဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုးတၢ်ဖှိၣ်, ဒီးတၢ်ဃူတၢ်ဖိးတက့ၢ်.

တၢ်ဆိၣ်ဂ့ၤလၢခရံာ်အပူၤတဖၣ်

⁴ ထီဘိန့ၣ်, ယစံးဘျုးစံးဖှိၣ်ယကစၢ်ယွၤလၢသုဂီၢ်အဂ့ၢ်မ့ၢ်လၢ တၢ်ဘျုးတၢ်ဖှိၣ်လၢအဝဲဒၣ်ဟ့ၣ်တ့ၢ်သုခီဖျိယ့ၣ်ၡူးခရံာ် အဃိန့ၣ်လီၤ.

⁵ အဂ့ၢ်ဒ်အံၤ, လၢတၢ်ပာ်ဖှိၣ်ဃုာ်သုသးတဖျၢၣ်ဃီဒီးခရံာ်အပူၤ န့ၣ်, သုထူးထီၣ်တီၤထီၣ်တ့ၢ်လၢတၢ်ကိးမံၤဒဲးအပူၤ, ဃုာ်ဒီးတၢ်စံးတၢ်ကတိၤခဲလၢာ်, ဒီးတၢ်သ့ၣ်ညါနၢ်ပၢၢ်ခဲလၢာ် န့ၣ်လီၤ.

⁶ တၢ်ကစီၣ်ဘၣ်ဃးခရံာ်အဂ့ၢ်အိၣ်သူၣ်လီၤအသးကျၢၤကျၢၤလၢ သုပူၤတုၤဒၣ်လဲာ်

⁷ ဖဲသုအိၣ်ခိးတၢ်ကလီၣ်ဖျါထီၣ်ပကစၢ်ယ့ၣ်ၡူးခရံာ်အဖၢမုၢ် န့ၣ်တၢ်ဆိၣ်ဂ့ၤဆိၣ်ဝါထဲတမံၤဒၣ်လဲာ်, သုတလီၤတိၢ်လၢသုကဒိး န့ၢ်အီၤန့ၣ်ဘၣ်.

⁸ အဝဲဒၣ်ကဒုးအိၣ်ဂၢၢ်အိၣ်ကျၢၤစ့ၢ်ကီးသုတုၤလၢအကတၢၢ်, ဒ်သိးဖဲပကစၢ်ယ့ၣ်ၡူးခရံာ်အမုၢ်တနံၤန့ၣ်, သုကအိၣ်ပူၤပူၤဖျဲးဖျဲးဒီးတၢ်သရူးကမၣ်အဂီၢ်န့ၣ်လီၤ.

⁹ ကစၢ်ယွၤလၢအကိးဃီၤသုဒ်သိးသုကရ့လိာ်မုာ်လိာ်သုသး ဒီးအဖိခွါပကစၢ်ယ့ၣ်ၡူးခရံာ်န့ၣ်, ကြၢးဘၣ်တၢ်နာ်န့ၢ်အီၤလီၤ.

တၢ်လီၤမုၢ်လီၤဖးလၢတၢ်အိၣ်ဖှိၣ်အပူၤ

¹⁰ လၢပကစၢ်ယ့ၣ်ၡူးခရံာ်အမံၤအဃိန့ၣ်, ယဃ့ကညးသုဝဲကိးဒံကိးဂၤဒဲး, ပုၢ်သ့ၣ်ဝဲၢ်သ့ၣ်ဧၢ, ဒ်သိးသုကအၢၣ်လီၤတူၢ်လိာ်တဂၤဒီးတဂၤအတၢ်စံးတၢ်ကတိၤ, ဒီးသုတအိၣ်ဒီးတၢ်လီၤမုၢ်လီၤဖးလၢသုသိးသုကျါတဂ့ၤန့ၣ်လီၤ. ပာ်ဖှိၣ်ထီၣ်သုသးတဖျၢၣ်ဃီလၢာ်လၢာ်ဆ့ဆ့, အိၣ်ဒီးတၢ်ဆိကမိၣ်တမံၤဃီ, ဒီးတၢ်တိာ်ပာ်တမံၤဃီန့ၣ်တက့ၢ်.

¹¹ အဂ့ၢ်ဒ်အံၤ, ပှၤလၢနီၢ်ကျိးအ့ၤအဒူၣ်ဖိထၢဖိအပူၤတနီၤ စံးဘၣ်တဲဘၣ်တ့ၢ်ယၤဖျါဖျါလၢ တၢ်အ့ၣ်လိာ်ဆိးက့အိၣ်ဝဲဒၣ်လၢသုသိးသုကျါလီၤ. ယဒီပုၢ်ဝဲၢ်သ့ၣ်ဧၢ,

¹² တၢ်လၢယအဲၣ်ဒိးစံးန့ၣ်မ့ၢ်ဒ်အံၤလီၤ. သုဝဲတဂၤဒီးတဂၤသုစံး, “ယဲယဘၣ်ဃးဒီးစီၤပီလူး,” မ့တမ့ၢ်, “ယဲယဘၣ်ဃးဒီး စီၤအပီးလိၤ,” မ့တမ့ၢ်, “ယဲယဘၣ်ဃးဒီးစီၤပ့းတရူး,” မ့တမ့ၢ်, “ယဲယဘၣ်ဃးဒီးခရံာ်” န့ၣ်လီၤ.

¹³ ခရံာ်ဘၣ်တၢ်နီၤဖးလီၤအီၤဆူကရူၢ်တဖၣ်လံ, ပှၤလၢအသံလၢသုဂီၢ်လၢထူၣ်စုညါအလိၤန့ၣ်, မ့ၢ်ဝဲစီၤပီလူးဧါ, သုဘၣ်တၢ်ဒိးဘျၢသုလၢစီၤပီလူးအမံၤအပူၤဧါ.

¹⁴ ယစံးဘျုးကစၢ်ယွၤလၢယတဘျၢဘၣ်သုဝဲအဂၤနီတဂၤဘၣ် ဒီးယဘျၢဘၣ်ထဲစီၤကြံစပူၤဒီးစီၤကါယူးအဃိန့ၣ်လီၤ.

¹⁵ လၢတၢ်န့ၣ်အဃိပှၤစံးလၢသုဘၣ်တၢ်ဘျၢသုလၢယမံၤ အပူၤန့ၣ်တသ့နီတဂၤဘၣ်.

¹⁶ (အိ, မ့ၢ်လီၤ. ယဘျၢဘၣ်စ့ၢ်ကီးစီၤစတ့းဖနၣ်ဒီးအဒူၣ်ဖိထၢဖိ လီၤ. မ့မ့ၢ်, လၢအဝဲသ့ၣ်အမဲာ်ညါ, ယဘျၢဘၣ်ဒံးယဲပှၤအဂၤတဖၣ် ကစီဒီဧါ, တဘျၢဘၣ်လဲၣ်န့ၣ်, ယတသ့ၣ်နီၣ်ဘၣ်.)

¹⁷ ခရံာ်တဆှၢလီၤဒီးမၢလီၤယၤဒ်သိးယကဒိးဘျၢတၢ်ဘၣ်. မ့ၢ်အဝဲဒၣ်ဆှၢလီၤဒီးမၢလီၤယၤဒ်သိးယကစံၣ်တဲၤတဲလီၤတၢ် သးခုကစီၣ်, ဒီးယကစံၣ်တဲၤတဲလီၤအီၤတအိၣ်ဒီးတၢ်သူပှၤကညီအတၢ် ကူၣ်ဘၣ်ကူၣ်သ့ဘၣ်. အဂ့ၢ်မ့ၢ်ဒ်သိးတၢ်စိတၢ်ကမီၤဘၣ်ဃးဒီးခရံာ်အတၢ်သံလၢထူၣ်စု ညါအလိၤန့ၣ်သုတဘၣ်တၢ်ဒုးလီၤမၢ်ကွံာ်အီၤတဂ့ၤန့ၣ်လီၤ.

ခရံာ်မ့ၢ်ကစၢ်ယွၤအစိကမီၤဒီးအတၢ်ကူၣ်သ့

¹⁸ အဂ့ၢ်ဒ်အံၤ, လၢပှၤလီၤမၢ်တဖၣ်အဂီၢ်န့ၣ်, တၢ်ကစီၣ်ဘၣ်ဃးခရံာ်အတၢ်သံလၢထူၣ်စုညါအလိၤတမ့ၢ်တၢ်လၢ အခီပညီအိၣ်ဘၣ်. မ့မ့ၢ်, လၢပဝဲပှၤဒိးန့ၢ်တၢ်အုၣ်က့ၤခီၣ်က့ၤတဖၣ် အဂီၢ်န့ၣ်, ခရံာ်အတၢ်သံလၢထူၣ်စုညါအလိၤမ့ၢ်ဝဲကစၢ်ယွၤအစိ ကမီၤလီၤ.

¹⁹ အဂ့ၢ်ဒ်အံၤတၢ်ကွဲးအသးစံးဝဲ, “ယကမၤဟးဂီၤကွံာ်ပှၤကူၣ်သ့အတၢ်ကူၣ်ဘၣ်ကူၣ်သ့ဒီး တၢၤကွံာ်ပှၤသ့လံာ်သ့လဲၢ်တဖၣ်အတၢ်သ့ၣ်ညါနၢ်ပၢၢ်န့ၣ် လီၤ.”

²⁰ မ့မ့ၢ်ဒ်န့ၣ်ဒီး, ပှၤကူၣ်ဘၣ်ကူၣ်သ့မ့ၢ်ဂ့ၤ, ပှၤသ့လံာ်သ့လဲၢ်မ့ၢ်ဂ့ၤ, မ့တမ့ၢ်ဘၣ်ဒီးပှၤသ့ဂ့ၢ်လိာ်ဘှီလိာ်တၢ်လၢဟီၣ်ခိၣ်တဘ့ၣ်အံၤ အပူၤန့ၣ်အိၣ်ဝဲဖဲလဲၣ်ပူၤလဲၣ်. ကစၢ်ယွၤဒုးနဲၣ်တ့ၢ်ဝဲဒၣ်လၢဟီၣ်ခိၣ်တဘ့ၣ်အံၤအတၢ်ကူၣ်ဘၣ်ကူၣ် သ့မ့ၢ်ဒၣ်တၢ်သူၣ်တဆးသးတဆးန့ၣ်လီၤ.

²¹ အဂ့ၢ်ဒ်အံၤ, လၢအဝဲဒၣ်အတၢ်ကူၣ်ဘၣ်ကူၣ်သ့အပူၤန့ၣ်, ကစၢ်ယွၤမၤဝဲဒ်သိးပှၤဟီၣ်ခိၣ်ဖိအသုတသ့ၣ်ညါအီၤခီဖျိ အဝဲသ့ၣ်အတၢ်ကူၣ်ဘၣ်ကူၣ်သ့ဒၣ်ဝဲတဂ့ၤ. မ့မ့ၢ်ခီဖျိ, တၢ်ကစီၣ်လၢပစံၣ်တဲၤတဲလီၤ, လၢပှၤစံးလၢအလၢအပှဲၤဒီးတၢ်သူၣ်တဆးသးတဆးန့ၣ်, ကစၢ်ယွၤပာ်လီၤအသးလၢအကအုၣ်က့ၤခီၣ်က့ၤပှၤစူၢ်က့ၤနာ်က့ၤ တၢ်တဖၣ်လီၤ.

²² လၢတၢ်အုၣ်အသးအဂီၢ်န့ၣ်, ပှၤယူဒၤဖိတဖၣ်သးအိၣ်ဒိးန့ၢ်ဘၣ် တၢ်လီၤလး, မ့မ့ၢ်ပှၤကြံးခ် ဖိတဖၣ်ကွၢ်ဃုတၢ်ကူၣ်ဘၣ်ကူၣ်သ့လီၤ.

²³ မ့မ့ၢ်ပဝဲသ့ၣ်တဖၣ်အံၤ, ပစံၣ်တဲၤတဲလီၤခရံာ်လၢအဘၣ်တၢ်ပျၤထီအီၤလၢထူၣ်စုညါ အလိၤ, တၢ်ကစီၣ်လၢအမၤဆါပှၤယူဒၤဖိတဖၣ်အသး, ဒီးမ့ၢ်တၢ်ကလီကလီလၢပှၤကလုာ်ဂၤသ့ၣ်တဖၣ်အဂီၢ်န့ၣ်လီၤ.

²⁴ ဘၣ်ဆၣ်ဒီးလၢပှၤလၢကစၢ်ယွၤကိးတ့ၢ်အီၤတဖၣ်, ပှၤယူဒၤဖိဒီးပှၤကလုာ်ဂၤခံဖုလၢာ်အဂီၢ်န့ၣ်, တၢ်ကစီၣ်အဝဲအံၤ မ့ၢ်ခရံာ်လၢအမ့ၢ်ကစၢ်ယွၤအစိကမီၤဒီးကစၢ်ယွၤအတၢ်ကူၣ်ဘၣ် ကူၣ်သ့န့ၣ်လီၤ.

²⁵ အဂ့ၢ်ဒ်အံၤ, တၢ်လၢအအိၣ်ဖျါလီၤဂာ်ဒ်အမ့ၢ်ကစၢ်ယွၤအတၢ်သး တဆးန့ၣ်ကူၣ်ဘၣ်ကူၣ်သ့ဒိၣ်န့ၢ်ပှၤကညီအတၢ်ကူၣ်ဘၣ်ကူၣ်သ့, ဒီးတၢ်လၢအအိၣ်ဖျါလီၤဂာ်ဒ်အမ့ၢ်ကစၢ်ယွၤအတၢ်ဂံၢ်စၢ်ဘါစၢ်န့ၣ် အဂံၢ်အဘါဆူၣ်န့ၢ်ပှၤကညီအဂံၢ်အဘါလီၤ.

²⁶ ခဲကနံၣ်အံၤ, ယဒီပုၢ်ဝဲၢ်သ့ၣ်ဧၢ, ဖဲကစၢ်ယွၤကိးသုအခါ, သုမ့ၢ်တ့ၢ်တၢ်မနုၤလဲၣ်န့ၣ် သ့ၣ်နီၣ်ထီၣ်သုဝဲတက့ၢ်. လၢပှၤကညီအတၢ်ထံၣ်တကပၤန့ၣ်သုဝဲ လၢအကူၣ်ဘၣ်ကူၣ်သ့မ့ၢ်ဂ့ၤ, အဂံၢ်ဆူၣ်ဘါဆူၣ်မ့ၢ်ဂ့ၤ, အိၣ်ဒီးအလီၢ်ဒိၣ်လၤထီမ့ၢ်ဂ့ၤအိၣ်ထဲစှၤဂၤလီၤ.

²⁷ ကစၢ်ယွၤဃုထၢဝဲဒ်အတၢ်တိာ်ပာ်အိၣ်ဝဲအသိး, တၢ်လၢပှၤဟီၣ်ခိၣ်ဖိထံၣ် လၢအတအိၣ်ဒီးတၢ်သူၣ်ဆးသးဆးဒ်သိးအကမၤမဲာ်ဆှးပှၤကူၣ် ဘၣ်ကူၣ်သ့, ဒီးအဝဲဒၣ်ဃုထၢတၢ်လၢပှၤဟီၣ်ခိၣ်ဖိထံၣ်လၢ အဂံၢ်စၢ်ဘါစၢ်, ဒ်သိးအကမၤမဲာ်ဆှးပှၤဂံၢ်ဆူၣ်ဘါဆူၣ်အဂီၢ် န့ၣ်လီၤ.

²⁸ အဝဲဒၣ်ဃုထၢတၢ်လၢပှၤဟီၣ်ခိၣ်ဖိကွၢ်တလီၤ, ဒီးပာ်လၢအတဂိာ် တသီၣ်, ဒီးဆိကမိၣ်လၢအတမ့ၢ်တၢ်နီတမံၤဘၣ်န့ၣ် ဒ်သိးအကမၤ ဟးဂီၤတၢ်လၢပှၤဟီၣ်ခိၣ်ဖိဆိကမိၣ်အမ့ၢ်တၢ်အကါဒိၣ်န့ၣ်လီၤ.

²⁹ အဝဲအံၤမ့ၢ်ဒ်သိးမတၤတဂၤမးကတိၤဒိၣ်ကတိၤသွါအသးလၢ ကစၢ်ယွၤအမဲာ်ညါသုတသ့တဂ့ၤအဂီၢ်န့ၣ်လီၤ.

³⁰ မ့မ့ၢ်ကစၢ်ယွၤပာ်ဖှိၣ်တ့ၢ်သုဒီးယ့ၣ်ၡူးခရံာ်, ဒီးကစၢ်ယွၤဒုးကဲယ့ၣ်ၡူးလၢပတၢ်ကူၣ်ဘၣ်ကူၣ်သ့န့ၣ်လီၤ. ခီဖျိခရံာ်န့ၣ်ပဘၣ်တၢ်မၤဘၣ်လိာ်ဖိးဒ့ပှၤဒီးယွၤ, ပကဲထီၣ်ယွၤအပှၤစီဆှံတကလုာ်ဒီးဘၣ်တၢ်ဒုးထူၣ်ဖျဲးထီၣ်ကွံာ်ပှၤလီၤ.

³¹ လၢတၢ်န့ၣ်အဃိ, ဒ်တၢ်ကွဲးအသးစီဆှံစံးဝဲအသိးန့ၣ် “ပှၤတဂၤလၢ်လၢ်လၢအအဲၣ်ဒိးကတိၤဒိၣ်ကတိၤသွါတၢ်န့ၣ် ကဘၣ်ကတိၤဒိၣ်ကတိၤသွါတၢ်ဘၣ်ဃးတၢ်လၢကစၢ်မၤတ့ၢ်ဝဲန့ၣ် လီၤ.”