လံာ်ကွဲးနီၣ်တၢ်အခီၣ်ထံးတဘ့ၣ် 29 - Sgaw Karen Common Bible

တၢ်ဟ့ၣ်သ့ၣ်တဖၣ်လၢတၢ်သူၣ်ထီၣ် ယွၤအတၢ်လုၢ်ဟံၣ်အဂီၢ်

¹ စီၤပၤဒၤဝံးဘိးဘၣ်သ့ၣ်ညါပှၤလၢအဟဲပာ်ဖှိၣ်အသးခဲလၢာ်, “ယဖိခွါစီၤၡလိၤမိၤ, မ့ၢ်ပှၤတဂၤလၢကစၢ်ယွၤဃုထၢတ့ၢ်ဝဲ, ဘၣ်ဆၣ်အဝဲအသးစၢ်ဒံး, ဒီးအတၢ်လဲၤခီဖျိစှၤဒံးဝဲန့ၣ်လီၤ. တၢ်မၤလၢတၢ်ကဘၣ်မၤအီၤန့ၣ်, မ့ၢ်တၢ်မၤလီၤဘီလီၤမုၢ်, မ့ၢ်လၢတၢ်အံၤတမ့ၢ်ဘၣ်နီတဖျၢၣ်လၢပှၤကညီအဂီၢ်ဘၣ်. မ့မ့ၢ်, မ့ၢ်တၢ်လုၢ်ဟံၣ်တဖျၢၣ်လၢယွၤ, ကစၢ်ယွၤအဂီၢ်အဃိန့ၣ်လီၤ.

² လၢယဂံၢ်ယဘါခဲလၢာ်အပူၤန့ၣ်, ယကတဲာ်ကတီၤတ့ၢ်တၢ်လၢအလိၣ်ဝဲ တဖၣ်လၢယွၤအတၢ်လုၢ်ဟံၣ်အဂီၢ်ဒ်ထူ, စ့, တိၢ်ဘီ, ထး, သ့ၣ်, လၢၢ်လုၢ်ဒိၣ်ပှ့ၤဒိၣ်တဖၣ်, တၢ်မျၢ်ထးသံတဖၣ်, လၢၢ်အလွဲၢ်အကလုာ်ကလုာ်လၢတၢ်ကရဲၣ်လီၤထီထီၣ်အီၤတဖၣ်, လၢၢ်ဝါအါအါဂီၢ်ဂီၢ်တဖၣ်န့ၣ်လီၤ.

³ ဒိၣ်န့ၢ်အါန့ၢ်ကယဲၢ်တၢ်အံၤခဲလၢာ်လၢယမၤတ့ၢ်န့ၣ်, ယဟ့ၣ်လီၤစ့ၢ်ကီး, စ့ဒီးထူလၢယကစၢ်ဒၣ်ယဲအတၢ်စုလီၢ်ခီၣ်ခိၣ် အကျါ, မ့ၢ်လၢယတၢ်အဲၣ်အိၣ်ဝဲလၢကစၢ်ယွၤအတၢ်လုၢ်ဟံၣ်အဂီၢ်အဃိန့ၣ် လီၤ.

⁴ ယဟ့ၣ်လီၤတ့ၢ်ထူအဂ့ၤကတၢၢ်ကံကၢ်သၢကထိဒီးစ့လၢအကဆှီအကံ ကၢ်နွံကထိ, လၢတၢ်မၤဃံမၤလၤယွၤအတၢ်လုၢ်ဟံၣ်အတၢ်ဒူၣ်တဖၣ်အဂီၢ်,

⁵ လၢကယဲၢ်တၢ်တမံၤလၢ်လၢ်လၢပှၤပိာ်တၢ်ဖိတဖၣ်ကမၤဝဲဒၣ်အဂီၢ်န့ၣ် လီၤ. ခဲအံၤမ့ၢ်မတၤတဂၤကအိၣ်ဒံးဝဲလၢအသးအိၣ်ဟ့ၣ်လီၤတၢ်သးအ့ၣ် တဲာ်အါအါဂီၢ်ဂီၢ်အတၢ်ဟ့ၣ်တမံၤဆူယွၤန့ၣ်လဲၣ်.”

⁶ အန့ၣ်တစု, ဒူၣ်ထၢတဖၣ်အခိၣ်အနၢ်တဖၣ်, ဒူၣ်တဖၣ်အပဒိၣ်ပပှၢ်တဖၣ်, သုးခိၣ်ကျၢၢ်တဖၣ်လၢသုးမုၢ်အပူၤ, ဒီးပှၤတဖၣ်လၢအပၢဆှၢသုးကျဲၤစီၤပၤအတၢ်စုလီၢ်ခီၣ်ခိၣ်, ဟ့ၣ်လီၤတၢ်လၢတၢ်သးအိၣ်အပူၤလီၤ.

⁷ တၢ်လၢအဝဲသ့ၣ်ဟ့ၣ်လီၤလၢတၢ်ဘှီထီၣ်ယွၤအတၢ်လုၢ်ဟံၣ်အဂီၢ်မ့ၢ် ဒ်လာ်အံၤလီၤ. ထူကံကၢ်ယဲၢ်ကထိဒီးဒၤရံးတကလး, စ့အကံကၢ်တကလး, တိၢ်ဘီအကံကၢ်တကလးဃိးကထိ, ဒီးထးအကံကၢ်တကလီၤ.

⁸ ပှၤတဖၣ်လၢအအိၣ်ဒီးလၢၢ်လုၢ်ဒိၣ်ပှ့ၤဒိၣ်တဖၣ်န့ၣ်, ဟ့ၣ်လီၤအလၢၢ်လုၢ်ဒိၣ်ပှ့ၤဒိၣ်တဖၣ်ဆူယွၤအတၢ်လုၢ်ဟံၣ်အတၢ်ပာ် ဖှိၣ်အလီၢ်လၢအဘၣ်တၢ်ပၢဆှၢကွၢ်ထွဲအီၤလၢပှၤက့ရၡိၣ်ဖိလၢ လ့ၤဝံအဒူၣ်ထၢပူၤစီၤယဃံအ့လးန့ၣ်လီၤ.

⁹ ပှၤဂီၢ်မုၢ်ဟ့ၣ်တၢ်လၢတၢ်သူၣ်အိၣ်သးအိၣ်အပူၤဆူယွၤဒီးအဝဲ သ့ၣ်သူၣ်ဖှံသးညီဝဲလီၤ. စီၤပၤစီၤဒၤဝံးစ့ၢ်ကီးအသးခုဝဲဒိၣ်ဒိၣ်ကလဲာ်န့ၣ်လီၤ.

စီၤဒၤဝံးစံးထီၣ်ပတြၢၤကစၢ်ယွၤ

¹⁰ ဖဲန့ၣ်, လၢပှၤအိၣ်ဖှိၣ်ရိဖှိၣ်ခဲလၢာ်အမဲာ်ညါ, စီၤပၤစီၤဒၤဝံးစံးထီၣ်ပတြၢၤယွၤန့ၣ်လီၤ. အဝဲစံးဝဲ, “ယွၤ, ပပၢ်ဖးဒိၣ်စီၤယၤကိာ်အကစၢ်ယွၤဧၢ, မ်နဘၣ်တၢ်စံးထီၣ်ပတြၢၤနၤအစိၤစိၤအဃၣ်ဃၣ်န့ၣ်တက့ၢ်.

¹¹ နမ့ၢ်တၢ်ဒိၣ်တၢ်မုၢ်ဒီးစိဒိၣ်ကမီၤထီ, လၤဒိၣ်ကပီၤအါ, ကပြုၢ်ကပြီၤဒီးလီၤကဟုကညီၢ်န့ၣ်လီၤ. ကယဲၢ်တၢ်ခဲလၢာ်လၢအအိၣ်ဝဲလၢမူခိၣ်ဒီးဟီၣ်ခိၣ်န့ၣ်မ့ၢ်နတၢ်, ဒီးနမ့ၢ်စီၤပၤ, ဒီးပှၤပၢတၢ်အဒိၣ်ကတၢၢ်လၢတၢ်ခဲလၢာ်အဖီခိၣ် န့ၣ်လီၤ.

¹² ကယဲၢ်တၢ်ထူးတၢ်တီၤတဖၣ်စ့ဒီးတၢ်စုလီၢ်ခီၣ်ခိၣ်န့ၣ်ဟဲလၢ နအိၣ်လီၤ. နပၢတၢ်ခဲလၢာ်လၢနဂံၢ်နဘါဒီးနစိနကမီၤ, ဒီးနဒုးကဲထီၣ်ပှၤတဂၤလၢ်လၢ်လၢပှၤအဒိၣ်ဒီးပှၤအဆူၣ်သ့ဝဲ န့ၣ်လီၤ.

¹³ ခဲကနံၣ်အံၤ, ပကစၢ်ယွၤဧၢ, ပဟ့ၣ်ထီၣ်နၤလၢတၢ်စံးဘျုးစံး ဖှိၣ်, ဒီးပစံးထီၣ်ပတြၢၤနမံၤလၤဒိၣ်ကပီၤအါန့ၣ်လီၤ.

¹⁴ အန့ၣ်ဒၣ်လဲာ်, ယပှၤဂီၢ်မုၢ်ဒီးယၤပဟ့ၣ်နၤတၢ်တသ့နီၢ်နီၢ်နီ တမံၤဘၣ်. အဂ့ၢ်ဒ်အံၤ, တၢ်ခဲလၢာ်န့ၣ်မ့ၢ်တၢ်ဟ့ၣ်ဟဲလၢနၤဒီးပဟ့ၣ်ဆၢ က့ၤနၤတၢ်လၢအမ့ၢ်တ့ၢ်နတၢ်တဖၣ်န့ၣ်လီၤ.

¹⁵ အိ, ယွၤဧၢ, နသ့ၣ်ညါနဲလၢပလဲၤခီဖျိတၢ်အိၣ်မူလီၤဂာ်ဒ်ပှၤ ဘၣ်တၢ်စိာ်မၢကဲကုၢ်တဖၣ်ဒီးပှၤတမှံၤတဖၣ်အသိး, ဒ်ပမိၢ်ပၢ်ဖံဖုလၢပျၢၤတဖၣ်လဲၤခီဖျိတ့ၢ်ဝဲန့ၣ်လီၤ. ပမုၢ်နံၤတဖၣ်လီၤဂာ်ဒ်တၢ်ကဒုလၢအလဲၤပူၤကွံာ်အသိးဒီးပပူၤ ဖျဲးထီၣ်ကွံာ်လၢတၢ်သံတသ့ဘၣ်.

¹⁶ အိယွၤ, ပကစၢ်ယွၤဧၢ, ပဟဲပာ်ဖှိၣ်သကိးကယဲၢ်တၢ်ထူးတၢ်တီၤခဲ လၢာ်အံၤလၢတၢ်ကသူၣ်ထီၣ်တၢ်လုၢ်ဟံၣ်တဖျၢၣ်လၢတၢ်ကမၤလၤကပီၤ နမံၤစီဆှံအဂီၢ်, ဘၣ်ဆၣ်, တၢ်အံၤခဲလၢာ်ဟဲဒၣ်လၢနၤဒီးမ့ၢ်ဒၣ်နတၢ်န့ၣ်လီၤ.

¹⁷ ယသ့ၣ်ညါလၢနမၤကွၢ်ပှၤခဲလၢာ်အသး, ဒီးနမုာ်သူၣ်မုာ်သးတ့ၢ် ဒီးပှၤဂီၢ်မုၢ်လၢအသူၣ်တီသးရၤန့ၣ်လီၤ. ဒီးလၢတၢ်သူၣ်တီသးလိၤနီၢ်နီၢ်အပူၤန့ၣ်, ယဟ့ၣ်လီၤတၢ်သ့ၣ်တဖၣ်အံၤခဲလၢာ်ဆူနၤ, လၢတၢ်သူၣ်အိၣ်သးအိၣ်အပူၤ, ဒီးယထံၣ်တ့ၢ်နပှၤဂီၢ်မုၢ်လၢအဟဲပာ်ဖှိၣ်အသးဖဲအံၤတဖၣ်သူၣ် ဖှံသးညီတ့ၢ်ဒ်လဲၣ်, လၢကဟဲစိာ်တၢ်မၤဘူၣ်တဖၣ်ဆူနအိၣ်န့ၣ်လီၤ.

¹⁸ ယွၤ, ပပၢ်ဖးဒိၣ်လၢပျၢၤတဖၣ်လၢအမ့ၢ်စီၤအၤဘြၤဟၣ်, စီၤအံၤစဲးဒီးစီၤယၤကိာ်အကစၢ်ယွၤဧၢ, တၢ်ဘူၣ်ထီၣ်ဘါထီၣ်ဒ် သိးအံၤန့ၣ်ပၢၤဃာ်အီၤကျၢၤကျၢၤလၢနပှၤဂီၢ်မုၢ်တဖၣ်အသးကံၢ် ပူၤလီၤစိၤလီၤထီ, ဒီးဟံးဃာ်အဝဲသ့ၣ်ဒ်သိးကသးတီ ဒီးနၤထီဘိန့ၣ်တက့ၢ်.

¹⁹ ယဟ့ၣ်လီၤယဖိခွါစီၤၡလိၤမိၤလၢကစူၢ်တၢ်တမံၤလၢ်လၢ်လၢန မၤလိာ်အီၤလၢအသးဒီဖျၢၣ်ညါလၢတၢ်သးအိၣ်, ဒီးလၢကသူၣ်ထီၣ်ယွၤအတၢ်လုၢ်ဟံၣ်လၢယကတဲာ်ကတီၤတ့ၢ်တၢ်သ့ၣ်တဖၣ် အံၤလၢအဂီၢ်န့ၣ်တက့ၢ်.”

²⁰ အန့ၣ်ဝံၤဒီး, စီၤဒၤဝံးမၤလိာ်လီၤပှၤဂီၢ်မုၢ်, “စံးထီၣ်ပတြၢၤယွၤသုကစၢ်ယွၤန့ၣ်တက့ၢ်.” ဒီးပှၤဂီၢ်မုၢ်လၢအဟဲအိၣ်ဖှိၣ်ရိဖှိၣ်ခဲလၢာ်စံးထီၣ်ပတြၢၤယွၤ, အမိၢ်ပၢ်ဖံဖုလၢပျၢၤသ့ၣ်တဖၣ်အကစၢ်ယွၤ, ဒီးအဝဲသ့ၣ်သကူးလီၤအသးဒီးဟ့ၣ်တၢ်ယူးယီၣ်ဆူယွၤဒီးဆူ စီၤပၤစ့ၢ်ကီးန့ၣ်လီၤ.

²¹ မုၢ်ဆ့ၣ်ထီၣ်တနံၤန့ၣ်, အဝဲသ့ၣ်မၤသံဆၣ်ဖိကီၢ်ဖိတဖၣ်ဒ်တၢ် လုၢ်တၢ်ပာ်တဖၣ်အသိး, ပာ်စီဆှံထီၣ်ဝဲဆူယွၤဝံၤဒီးဟ့ၣ်နီၤလီၤဝဲဆူပှၤဂီၢ်မုၢ် လၢကအီၣ်ဝဲအဂီၢ်န့ၣ်လီၤ. အါန့ၢ်အန့ၣ်, အဝဲသ့ၣ်လုၢ်ထီၣ်တ့ၢ်ဂီၤဖံးဖါအဒုတကထိ, သိဖါအဒုတကထိ, လၢအဆိၣ်ကဲၤထီၣ်ဝဲခဲလၢာ်ခဲဆ့လၢတၢ်လုၢ် လီၢ်အဖီခိၣ်န့ၣ်လီၤ. အဝဲသ့ၣ်ဟဲစိာ်စ့ၢ်ကီးတၢ်လုၢ်စပံးထံတဖၣ်န့ၣ်လီၤ.

²² သတးဒီးလၢမုၢ်တနံၤအဝဲန့ၣ်, အဝဲသ့ၣ်သူၣ်ဖှံသးညီတ့ၢ်ဒိၣ် မးဖဲအအီၣ်တၢ်ဒီးအီတၢ်လၢယွၤအမဲာ်ညါန့ၣ်လီၤ. အဝဲသ့ၣ်ကိးသတြီထီၣ်ဝဲလၢစီၤၡလိၤမိၤမ့ၢ်စီၤပၤခံဘျီ တဘျီန့ၣ်လီၤ. လၢယွၤအမံၤအပူၤန့ၣ်အဝဲသ့ၣ်ဖှူအီၤဒ်ပှၤလၢကပၢဘၣ်အဝဲသ့ၣ် အသိးဒီးစီၤစၤဒိးဒ်ပှၤလုၢ်တၢ်အခိၣ်အသိးန့ၣ်လီၤ.

²³ လၢတၢ်န့ၣ်အဃိ, စီၤၡလိၤမိၤကဲထီၣ်ဘၣ်စီၤပၤလၢအပၢ်စီၤဒၤ ဝံးအလီၢ်လၢလီၢ်ပစိာ်လၢယွၤပာ်လီၤတ့ၢ်ဝဲအဖီခိၣ်န့ၣ်လီၤ. အဝဲမ့ၢ်စီၤပၤတဂၤလၢအတၢ်မၤကဲထီၣ်လိၣ်ထီၣ်ဒီးအံၣ်စရ့လး အပှၤကလုာ်ခဲလၢာ်စူၢ်အီၤန့ၣ်လီၤ.

²⁴ ကယဲၢ်ပဒိၣ်ပပှၢ်တဖၣ်ဒီးသုးမုၢ်သံၣ်ဘိတဖၣ်ဒီးကယဲၢ်စီၤဒၤဝံး အဖိခွါအဂၤခဲလၢာ်ဒၣ်လဲာ်အၢၣ်လီၤအီလီၤတ့ၢ်ဝဲလၢကတီ ဒီးစီၤၡလိၤမိၤဒ်စီၤပၤအသိးန့ၣ်လီၤ.

²⁵ ယွၤပာ်ဒိၣ်ပာ်ထီစီၤၡလိၤမိၤဒိၣ်ဒိၣ်ကလဲာ်လၢအံၣ်စရ့လးခဲ လၢာ်အမဲာ်ညါဒီးဒုးကဲထီၣ်အီၤစီၤပၤတဂၤလၢအလၤကပီၤအိၣ်အါ န့ၢ်ဒံးစီၤပၤအဂၤလၢအပၢတ့ၢ်ကီၢ်အံၣ်စရ့လးန့ၣ်လီၤ.

စီၤပၤစီၤဒၤဝံးအတၢ်ပၢအဂ့ၢ်ဖုၣ်ကိာ်

²⁶ စီၤယံးၡဲအဖိခွါစီၤဒၤဝံးကဲစီၤပၤလၢအံၣ်စရ့လးခဲလၢာ်အဖီ ခိၣ်န့ၣ်လီၤ.

²⁷ အဝဲပၢတ့ၢ်တၢ်အနံၣ်လွံၢ်ဆံ, ပၢတၢ်လၢဝ့ၢ်ဃ့ဘြိၣ်အပူၤနွံ နံၣ်ဒီးလၢဝ့ၢ်ယရူၤၡလ့ၣ်အပူၤသၢဆံသၢနံၣ်န့ၣ်လီၤ.

²⁸ အဝဲသံဖဲအမှံၤတုာ်ပှၢ်တီၤ, အိၣ်ပှဲၤဒီးနံၣ်အါလါအါ, တၢ်ထူးဒိၣ်တၢ်တီၤအါ, ဒီးတၢ်လီၤယူးယီၣ်ပာ်ကဲ, ဒီးအဝဲအဖိခွါစီၤၡလိၤမိၤကဲထီၣ်ဘၣ်စီၤပၤလၢအလီၢ်န့ၣ်လီၤ.

²⁹ တၢ်စံၣ်စိၤတဲစိၤဘၣ်ဃးဒီးစီၤပၤစီၤဒၤဝံးစးထီၣ်လၢအခီၣ် ထံးတုၤလၢအကတၢၢ်န့ၣ်ဘၣ်တၢ်ကွဲးနီၣ်တ့ၢ်အီၤလၢဝံသၢဂၤလၢ အမ့ၢ်, ဝံၡမူၤအ့လး, ဝံနၤသၣ်ဒီးဝံကးတဖၣ်အတၢ်ကွဲးနီၣ်ကွဲးဃါ တဖၣ်အပူၤန့ၣ်လီၤ.

³⁰ တၢ်ကွဲးနီၣ်ကွဲးဃါတဖၣ်တဲဖျါ, အဝဲပၢတ့ၢ်တၢ်ဒ်လဲၣ်, ဒိၣ်စိဒိၣ်ကမီၤတ့ၢ်ထဲလဲၣ်, ဒီးကယဲၢ်တၢ်လၢအမၤတ့ၢ်အသးဒီး အီၤတဖၣ်, တၢ်မၤတ့ၢ်အသးဒီးအံၣ်စရ့လးဒီးဘီမုၢ်အိၣ်ဝးတရံးအီၤတဖၣ် အဂ့ၢ်န့ၣ်လီၤ.