Yuuda 1 - Kuumeet Sinɔ Tɔɔnuk Ad Majaŋeeroŋk

¹ Ege sini wargatɛ sinɛkɔ wosɛyɛɛrɛ seey lak Yuudaa sinɛ laaŋoyen Yeese Kereseek ɛ manya Yaykoobak, joopa sigaagaɓa riyk ɛ poru sɛɛg Baabɛ Waakoyot ɛ koorɛ sɛɛg Yeese Keresee.

² In kɔna obulur maariyeet, a bɔdɛ, a mɛyin.

Rɔɔriytaanak Sigɔ Nyonkaanakik

³ Iinak sigɛ kɔnu poraak, ɗɛykaayakan jɛt a gun kɔna taapiɗiira agut bɔdɛ sinɛɓa tina ijaagɛɛk sinɛkoy kaasii agut omoŋɔŋk. Yakana direta sinɔ kɔna taapiɗirkiɗa kɛnɔ kɔnu rɔɔriya nɔ ariir ɗɔŋkɔɔlɛ agut ŋaadiyɛ sigɛɓa gaɓɛ Waakoyot a adarat ŋaadtaanaka agut omoŋ a pedtank.

⁴ Guugunyarkikan kɔna kɔɔra dugeeɗ joop sigɛɓa taapɛɛ agut sɛɛg ɔɔtɛ sinɔɔnɛ jeeɗoŋɔŋk jeemɛ Wargatɛɛ Waakoyotoŋk kɛ, goopɛɛkoy sɛɛgŋɔŋk a omoŋ omoŋ sigɔ kir ŋaadit Waakoyok, ɛ weerɛr wookan Waakoyotoŋk ruunyikeena, ɛ kaadɛr Suumi naŋk Yeese Keresee sinɛ tin ɓali sɛɛn dakɛɗaak.

⁵ Kɛygunɓa aasi ɗegerarkaayar sini baŋɛ jeemɛŋ, nɛ ɗɛya kɛnɔ kɔna koɓuka kɛ boŋkuɓa Suumii joop gɛɛŋk ɗook Gibsik ɛk, nɛɓaɓɔrɛ baŋiya sɔɔkɛ sigɛɓa kir ŋaaditkiŋ.

⁶ Ɛɓɔrɛ in koɓukɛɛ wosɛytaanak sigɔɓa kir koorɛɛt nyon nɛŋk suumiikeenoŋkuk, maɓa ŋɔɗar nyon nɛŋk beeɗitoŋk, kookorkunɓa sɛɛg Waakoyot korkoɗɔɔn sinaanɛkoy nɔkoy nɔkoyk nyuugur, mɛlɛɛɗa ɓɛɛnyɔwa sinaana koy goopanoŋk Obiiŋɔŋk.

⁷ Maɓɔrɛ Sɛdoom a Gɛmoora a katamɛɛ sigɛ atu sɛɛge tookɛɛtak gaɓɛrɓa ɛkan gɛŋk ŋɔɗɔkikeena a ruunyikeena. Nɛɓa moɗɛɛ sɛɛg maɗ nɛ dakɛr a rɔmɛ joopa sigɔɔga rakatɛr maɗ sinaanɛkoy nɔkoy nɔkoyk.

⁸ Nɛɓɔrɛ joop sigi ikekeɓi sɛɛga pɛrkiyɛ gɛŋk nɛ arir buusɛyɛ gɛŋk a somkaanakik, ɓooyur ɓaŋkawuka Waakoyotoŋk ɛ nyɔɔnar ɓaŋkawukaata dariyoŋk.

⁹ Mikaeel aasi sinɛ ɔɗɔwen wosɛytaanakoŋkuk, saaɓa palamɗiɗ a Diyabiloosuk agut buusɛ Muuseek, kiɓa paariit a daariyɗigeeɗ a nyɔɔn, maɓa tongeeɗ kɛ, "Inni lamɛ Suumii."

¹⁰ Ɔkɔn aasi lakɛ any sinɔ ɗegerar ɓɛɛlɛt nɛŋk oko keegu sigɔ kɛɛ sɛɛge koɓik. Nɛkoy badɛr ant sinaanɛ.

¹¹ Durikoy sɛɛga! Kaarɗiɓa gopan sinɛɓa Kaayelik. Nɛɓa golɛrgeeɗ wori nɛ guugunyar tikiyɛɛka Bɛlɛaamuk, nɛɓa badɛr oko sinɛɓa Koore ɓooyiɗ ɓaŋkawuka Waakoyotoŋkuk nɛɓa ɓɔrɛ duri joopa sigeega agut ɓooyan nɛŋk.

¹² Saa joop sigi wideetarkiɗ ɛɛk son lak wɔɔr noŋk mɛyinoŋk a sɛɛge kɛɛ keeny ma ijaagir any sinɔ keerɛɛŋɔŋk nɛ kɔna dakɛr a gaŋtaanak, wɔɔrɛr sɛɛk ɛkan gɛŋk dakɛɗa ɗamat a ito sɛɛg irtaanak. Ito sɛɛg tiiman sinɔ kiiɗɛ tulk sinɔ diile yoŋgoyk, a kɛɛn sigɔ kɛɛ sɛɛge laŋiiɗ taamɛ ɔɔtɛ sineene aaɗorarɗi kɛɛnk, ito sɛɛg kɛɛn sigɔɓa montɛɛ sɛɛg tiltilɛɛkɛ gɛŋk nɛɓa paalorar maatokuk ɛɓa rɛrar agut pɛɛyk.

¹³ Ŋaarki sɛɛge ad kuru ijaag any sinɔ lagiɗɛɛ keenyk a ito apani maawu sigɔ ɓaŋkaawarŋɔŋk, ɛ ito sɛɛg maryɔ sigɔ ɛɛnyɛkar a kookor sɛɛg nyuugur sinɔ kɔju kɛ susuk sinɔkoy nɔkoyk nɔkoyk.

¹⁴ Henook sinɛ ɓartiyɛ tula pɛɛyeen nɛɛk a tukiɗik Adameek tonuɓa pɛrka agut joop sigi kɛ, "Mɛlkikoy Suumii a wosɛytaanak sigɔ geetitaanakik sigɔ kumɛɛ ɓɔɔkaaŋɔŋk agut omoŋ.

¹⁵ Mɛlkikoy kɛnɔ goop joop baŋɛ, ɛ gɔɔnyɛ joop sigɔ kir ŋaadit Waakoyok, agut ijaag nɛŋk sinɔ ŋɛɛwɛnŋɔŋk baŋɛ, ɛ agut sinɔ nyɔɔnarɗi Waakoyo agut sinɔ kirɗi tiiɗitik baŋɛk."

¹⁶ Noonoga sɛɛg ɓɛɛnyɔwɛ gɛɛŋk baŋɛ. Kɛɛ any sinɔ yaa sɛɛgak. Nomɛrɗi ɗɛyan nɛŋk any sinɔ ŋɛɛwɛnŋɔŋkuk. Enya ato nɛŋk pɛɛni sinɔ ɓɔŋgɔɔrɛrɗi ɛɛk nɛŋkik, ɗɛyɛr tɔkɔny ɛkan gɛŋkik nɛ muuser ɛkan gɛŋk.

Rɔɔrɔkɔn A Rɔɔriyɔn

¹⁷ Yakana iinak sigɛti poriirik, in koɓukɛ pɛɛni sinɛɓa tonur wosɛytaanak Suumi naŋk Yeese Kereseek.

¹⁸ Tonurɓa sɛɛk kɔna kɛ, "Mɛlɛrkikoy eme sinaanɛ koy pediyaak joop sigɔ nomɛrɗi ɗɛyan nɛŋk sinɔ ŋɛɛwɛnŋɔŋk."

¹⁹ Pakaatar sɛɛk joop, nomɛrɗi ɓɛɛlɛt nɛŋk. Sɛɛg joop sigɔ kɛɛ sɛɛge Wɛɛŋa sigɔ Geetitaanakik.

²⁰ Yakana iinak sigɛ kɔnu poraak, in ɓaŋkaawurɛɛ olaatɛ baŋɛ nɔ kɛnyɛɛ ɛkan goŋk ŋaadiyɛɛkɛ goŋk sigaagɛɓa geetɛɛk. In ɗanɗamaakɛɛ ɓaŋkawukaat Wɛɛŋa sigɔ Geetitaanakik.

²¹ In koorɛɛ ɛkan goŋk mɛyin Waakoyotoŋk nɔ kookorkuunɛɛ maariyeet Suumi naŋk Yeese Kereseek kɛnɔkoy kɔna gaɓɛ wɛɛŋa sigɛkoy nɔkoy nɔkoyk.

²² In maariyɛ joop sigɛ latu koɓiɗak a pɛɛyk agut ŋaadiyɛ gɛŋkik.

²³ In boŋkɛɛ joop ɔgɔ maɗ kɛnɔ sɛɛk arɛɛ a bɔdɛrŋ, ɛ in maariyɛɛ joop ɔgɔ tuɓur, mayakana in ɓooyɛɛ sɛɛk a aasi ki dakɛ abii nɛŋk sinɛɓa kume ɛɛk nɛŋk sinɛɓa dakɛ a somkan tikiyɛɛkɛk.

Ɗanɗamɔn Pɔɔsiyɛɛkoŋk

²⁴ In dakɛ eemɛyɔɔn Waakoyota sinaana oolɛ a kɔnu ari kɛnɔ kat ɗiirarik, ɛ kɔnu wideer yaakat sinɔɔnɛ obiiŋɔŋk taamɛka gɛɛnaak sigaaga eemɛyɛɛk a kɔne kɛɛ keenyk.

²⁵ In dakɛ eemɛyɔɔn a muusiyɛ a ɓaŋkawuka, a ɔɗɔwikeen sɛɛna sinaana Sɛɛn Waakoyo sinɛ Ebɔdtan naŋk aɓa tukiɗik ɗeeŋ nɔ sisɔwa sɛɛn dakɛɗaak, goy Suumi naŋk Yeese Kereseek kɛygun nɔkoy nɔkoyk! Ameen.