Yowanis 9 - Kuumeet Sinɔ Tɔɔnuk Ad Majaŋeeroŋk

Ebɔdɛ Yeese Iɗit Sinɔɓa Ɓartɛɛ A Motuk

¹ Saaɓa Yeese ɗoyiɗ gopɛ omalteek, nɛɓa dɛnɛ iɗit sinɔɓa ɓartɛɛ a motuk.

² Nɛɓa nomtaanak gɛɛnɛ kɔɔniyar sɛɛn kɛ, "Rɔɔriytaano, ɓartɛɛɓa iɗit sini a mot ɔɔtɛ tikiyɛ wookuk?" Ɔɔtɛ tikiyɛ gɛɛŋkik maŋk ɛpɛnaak a ɛmɛsaak?

³ Nɛɓa Yeese jumur kɛ, "Iɗit sini nɔɓa dakɛɛɗ a motuk moko ɔɔtɛ tikiyɛ gɛɛŋk, maŋk ɛmɛsaak a ɛpɛnaakik. Mayakana kɛnɔ yaaŋɛɛ ijaag Waakoyotoŋk sɛɛne.

⁴ A in waawuy ɗɛyɛta a ijaaga ijaag Baabɛɛ sinɛkanti wosɛykik. Mɛlkikoy kaay sinɔ kɛɛ iɗit sinɔ oolɛ a ijaagɗiŋɔŋk.

⁵ Saa arkiɗa ɗook raŋk, eet pɛɗɛrka ɗookoŋk."

⁶ Saaɓa toniiɗ sinik, nɛ topaayɛ ɗooka nɛ sawɛ ɗeewakɛ gɛɛnɛ ɗoo, nɛ ɗonyɛ ɗokoy nɛɛkɛ taamɛ iɗit sinɛ motuk,

⁷ nɛ tongeeɗ kɛ, "Ŋaarik nɔ kɛɛɗin aadiɗiikin teel aadiitoŋk Sɛlihoome." See kɛ Sɛlihoomuk sinɔ kɛ sinɔɓa wosɛykɛɛŋɔŋk. Nɛɓa iɗit sinɛ kɛɛ aadiɗi, nɛ weeriiki ma dɛnɗiiŋ.

⁸ Joop sigɛ beeɗirɗi jɔkikentik a joop sigɛɓa dɛnɛr saaɓa kalɛlɛyiiɗik tonurɓa kɛ, "Mokoto sini iɗit kan beeber a kalɛlɛyiiŋɔŋk?"

⁹ Nɛɓa joop ɔgɔɔk tonur kɛ, "Ii, sɛɛn." Ma ɔgɔɔk tonur kɛ, "Gayi a sɛɛn, mayakana moko sɛɛn." Nɛɓa sɛŋk tonu sɛɛga kɛ, "Eet sɛɛn."

¹⁰ Nɛɓa joop gɛɛnɛ tonurgeeɗ kɛ, "Anɛkɔ ɓuukiɗi taamɛ goonɛ ɛk?"

¹¹ Nɛɓa sɛŋk jumur kɛ, "Iɗit sinɔ riyɛ kɛ Yeeseek sawɛkɔ ɗokoy nɛ ɗonyɛɛɗ taamɛ gaaŋk nɛta tonu kɛ, 'Mak aada Sɛlihoome.' Nɛkɔ kɛɛɗa aadiɗiika nɛ dɛnɗiikaaŋ."

¹² Nɛɓa sɛɛk tonurgeeɗ kɛ, "Nɛ iɗit nɛɛk ar eet?" Nɛ tonu sɛɛga kɛ, "Kaa ɗegerɔɔn."

¹³ Saadi baŋiya diilerɓa joop gɛɛnɛ iɗit sinɛɓa motuk joopa Paarisik.

¹⁴ Sinɛɓa Yeese boŋkuɗ ɗokoy nɔ ebɔdɛɛɗ taamɛ iɗit sinɛk waawuy Sambatɛyoŋk Ayuuduk.

¹⁵ Nɛɓa joop Paarisik kɔɔniyar iɗit sinɛ kɛkar kɛ, "Oolunkɔ dɛnɛɛ ɛk?" Nɛɓa sɛŋk jumur kɛ, "Ijaag kɔta ɗokoy taamɛka, nɛkɔ aadiɗiika, nɛ dɛnɗiikaaŋ.'

¹⁶ Ɔɔtɛ sinaanɛ joop Paarisik a omoŋ omoŋ tonurɓa kɛ, "Iɗit sini moko ar Waakoyote agut sinɔ kiiɗ eemɛyɔɔn waawuy Sambatɛyoŋkuk." Ma ɔgɔɔk tonur kɛ, "Anɛ iɗit sinɔ tikitank oolɛ a ijaag sɔɔriyɛ sigi ɛk?" Nɛɓa sɛɛge kɔɔr lakɛ pakakat agut any sini.

¹⁷ Nɛɓa kɔɔniyar iɗit sinɛɓa motuk kɛkar kɛ, "Tonun seŋk ɛk agut iɗit sinɛ tonun kɛ ebɔdɛkɔnɔnu taamɛk?" Nɛɓa sɛŋk tonu kɛ, "Iɗit pɛrkaakoŋk."

¹⁸ Kirɓa ŋaadit ɔɗɔwer Ayuuduk kɛ egeɓa iɗit sinɛ mot goorɛ nɛkɔ ɓuukiɗi taamɛ gɛɛnɛkiŋ. Nɛɓa riyarki ɛpɛn a ɛmɛs.

¹⁹ Nɛ kɔɔniyar sɛɛg kɛ, "Tɔɔn noŋk sinɛ toniir kɛ ɓartɛɛɓanɔɔ a motuk sɛɛn sini? Nɛkɔ sisɔ oolɛ dɛnɛɛ ɛk?"

²⁰ Nɛɓa ɛpɛna a ɛmɛs jumurar kɛ, "Iɗit sini ɗegerii saan kɛ tɔɔn naŋk aɓa ɓartɛɛ a motkuŋ,

²¹ mayakana sisɔ kii ɗegerɔɔn kɛ dɛnɗiikɔ ɛk ɛ kii ɗegerɔɔn kɛ ɓuukekɔ taamɛ gɛɛŋk wooɗ. In kɔɔniyɛɛ sɛɛn, agut sinɔ sɛɛn iɗit sinɔkan gayɛr emeyi gɛɛnɛŋɔŋk oolɛ toniiŋ.

²² Nɔɓa ɛpɛna a ɛmɛs tonurɗu sinik agut sinɔɓa ɓurerɗi ɔɗɔweer Ayuuduk. Waasɛrɓa sɛɛg soon kɛ ɔkɔn lakɛ iɗit sinɔ tonu kɛ, 'Ege Yeese Kereseeŋ,' nɛ boŋkɛ godeey tolɛɛɗoŋk Ayuuduk walasak.

²³ Nɔɓa tonurɗu ɛpɛna a ɛmɛs kɛ, "In kɔɔniyɛɛ sɛɛn. Sɛɛn iɗit sinɔkan gayɛr emeyi gɛɛnɛŋɔŋk."

²⁴ Nɛɓa riyitar joop Paarisik iɗit sinɛɓa motuk kɛkar nɛ tonurgeeɗ kɛ, "Iin iɗit sini eemɛyi Waakoyo, ɗegerii seek kɛ ege iɗit sini tikitan."

²⁵ Nɛɓa iɗit sinɛɓa motuk jumur kɛ, "Kaa saak ɗegerɔɔn kɛ ege iɗit sini tikitan. Ɗegera any a omoŋ saan kɛ eetɓa motuk nɛɓɔ sisɔ dɛnɗiikaaŋɔŋk."

²⁶ Nɛɓa sɛɛk tonurgeeɗ kɛ, "Ijaag kɔna jikon? Ɓuukekɔ taamɛ gooŋk ɛk?"

²⁷ Nɛɓa sɛŋk tonu sɛɛga kɛ, "Tonakɔ kɔna jeemɛŋ nɛkɔ kiir weenta. Anɛ ɗɛyɛɛr a tiyɛɛr kɛkar agut jikon? Ɗɛyɛɛr ɓɔrɔ a iinak nomtaanak gɛɛŋk?"

²⁸ Nɛɓa sɛɛk nyɔɔnar kɛ, "Nomtantɔ nɛɛk iin, ma seek eteŋk nomtaanak Muuseek.

²⁹ Ɗegerii kɛ tonɗiiɓa Waakoyot a Muuseeŋ, ma iɗit sini kii ɗegerɔɔn kɛ kusukan eet."

³⁰ Nɛɓa iɗit sinɛ jumur sɛɛga kɛ, "Ɓuukekɔ taamɛ gaaŋk sɛŋk, mayakana reemɗi ɓayɛ agut sinɔ kirɗɔ ɗegerɔɔn iɗit sini kɛ kuskan eetik!

³¹ Ɗegerɛɛ soon kɛ ki Waakoyot tiiɗit tikitaanakakiŋ, mayakana saa lakiɗɛ iɗit sinɔ ɓure Waakoyo a ijaag any sinɛ ɗɛyɛ sɛŋkik nɛ tiiɗigeeɗ Waakoyotuŋ.

³² Inɓa kɛɛ weenta sinɔ kɛ lakɛ iɗit sinɔkɔ ɓuuke taamɛ iɗit sinɔɓa ɓartɛɛ a motuk a tukiɗi saaɓa riiɓeeɗɛɛ ɗook.

³³ Iɗit sini ɔkɔn mokokan kus sooy lak Waakoyokuŋ, nɛgun kɛɛ any sinɔ oolɛ a ijaagŋɔŋk."

³⁴ Nɛɓa sɛɛk tonurgeeɗ kɛ, "Iin iɗit siniɓa ɓartɛɛ aɓa rɔmɛr tikiyɛɛk ɛɛk nɛɛk baŋɛk. Ɗɛyin a tin rɔɔriyinŋ?" Nɛɓa ɔɔyɛrki godeey tolɛɛɗoŋk Ayuuduk walasa.

Motikeen Ɓayaayoŋk

³⁵ Tiyɛɓa Yeese kɛ ɔɔyɛrkikɔ iɗit sinɛ godeey tolɛɛɗoŋk Ayuuduk walasa. Nɛ saaɓa lalaŋiɗik, nɛɓa tongeeɗ kɛ, "Ŋaadin Tɔɔn Etoŋkuŋ?"

³⁶ Nɛɓa sɛŋk tonu kɛ, "Suumi naakɛ, ma sɛɛn wooɗ nɔkɔɔ ŋaadiɗaak."

³⁷ Nɛɓa Yeese tongeeɗ kɛ, "Dɛninɓa ɗeeŋ, sɛɛn ɓɔrɛ sinɛ totoniikari sisɔk."

³⁸ Nɛɓa sɛŋk tongeeɗ kɛ, "Suumi naakɛ, ŋaadaaŋ." Nɛ ugumgeeɗiŋ.

³⁹ Nɛɓa Yeese tonu kɛ, "Kusaakan pirdiya ɗooka sineena kɛnɔ joop sigɛ kir dɛnɗiitik dɛnɗi, ma kɛnɔ motarar joop sigɛ dɛnɗiik."

⁴⁰ Saaɓak joop Paarisik sigɛɓa atu Yeesee jɔkuk tiyɛrɓa sini, nɛɓa tonurgeeɗ kɛ, "Anɛ eteŋk ɓɔrɛ motak?"

⁴¹ Nɛɓa Yeese tonu sɛɛga kɛ, "Ɔkɔn iinak motakiŋ gunkɔna ki dakɛ a tikiyɛ, yakana sisɔ agut sinɔ tonurɗɔ kɛ, 'Dɛnɗiikari nɔɔŋɔŋk,' nɛ dakɛɛr a iinak tikitaanak."