Yowanis 8 - Kuumeet Sinɔ Tɔɔnuk Ad Majaŋeeroŋk

Jarti Sinɔ Laŋkɛɛ Maakɔ Ibiɗiiŋɔŋk

¹ Saaɓak ŋaarɓa Yeese Dɛbirɛ Jɛyta.

² Nɛɓa alɛ nɛɛkɛ romiɗ gibi weeriki nɛ mɛlki Godeya sinaana Geetitank kɛkar. Nɛɓa joop sigɛ ɓɔɔkaak kurak son lak sɛɛnik, nɛɓa sɛŋk dokuɗe nɛ rɔɔriy sɛɛgiŋ.

³ Nɛɓa rɔɔriytaana higi Muuseek a joop Paarisik ɗɔkarki jarti sinɔkan laŋkɛɛ makan ibiɗiiŋɔŋk, nɛ arir a ɛtɛ joope gɛɛnɛ kɔɔr,

⁴ nɛɓa tonur Yeeseya kɛ, "Rɔɔriytaano, gaamkɛɛkɔ jarti sini maakɔ ibiɗiiŋ.

⁵ Rɔɔrɔkɓa Muuse higii naŋk kɛ jarti sinɔnɔɔ ito sinik innɔɔ baabaalɛ giɗeekɛ nɔ rɛr, ma seŋk tonun ɛk agut sɛɛn?"

⁶ Nɔɓa kɔɔniyarɗi oko sinikik paarirɓa sɛɛn kɛnɔ laŋirkiɗ any sinɔ daariyɗigeeɗŋɔŋk, yakanaɓa Yeese ruuɗe ɛɛk nɛ taatap ɗoo polpolt nɛɛkɛɛk.

⁷ Saaɓa kɔniniyarɗi a totoparŋɔŋk, nɛɓa ɓɔŋgɔɔrɛ ɛɛk nɛ tonu sɛɛga kɛ, "Iinakɛ kɔɔr iɗit sinɔ kiiɗɛ tikiyɛɛk, in tuki nɛɛkɛ baalɛ giɗet."

⁸ Nɛ saadi baŋiya ruuɗe ɛɛk kɛkar nɛ taatap ɗoo.

⁹ Saaɓa joop gɛɛnɛ tiyɛrɗi sinik, nɛɓa ŋaaŋarar saadi sɛɛg baŋɛ a omoŋ omoŋ a tukiɗi gutarɛyɛɛkɛ, nɛɓa Yeese dakɛ mowan sɛɛn a jarti sinɛ.

¹⁰ Saadi baŋiya ɓɔŋgɔɔrɛɓa Yeese ɛɛk nɛ tongeeɗ kɛ, "Iin jarti, sini joop sigɛ kɔna daariyɗiik atu eet? Kɛɛ iɗit sinɛ kɔne pɛrɛdɛk?"

¹¹ Nɛɓa sɛŋk tongeeɗ kɛ, "Suumi naakɛ, kɛɛ ara." Nɛɓa Yeese tongeeɗ kɛ, "Kaa ɓɔra ne pɛrɛdɛɛt. Ŋaarik nɛ kat kɛɛɗin ijaagin tikiyɛ kɛkar."

Yeesee Pɛɗɛrka Ɗookoŋk

¹² Tonuɓa Yeese joopa gɛɛna kɛkar kɛ, "Eet pɛɗɛrka ɗookoŋk. Iɗit sinɔ nomɛ eeteek ki weeweriit nyuugur, laŋkoy pɛɗɛrka sinɔ gaɓɛ wɛɛŋak.

¹³ Nɛɓa joop Paarisik tonurgeeɗ kɛ, "Waasinre ɔɔtɛ nook, moko waasiyɛ goonɛ eekeer."

¹⁴ Nɛɓa Yeese jumur sɛɛga kɛ, "Kɛygun waasa ɔɔtɛ naakiŋ agut sinɔ ɗegerɗa kɛ kusa eet ma kɛɛɗa etenakiŋ, ege waasiyɛ gaanɛ eekeer. Mayakana sɔɔk kiir ɗegerɔɔn kɛ kusa eet, ma kɛɛɗa etena.

¹⁵ Pɛrɛdɛɛr sɔɔk koɓiiɗ etoŋk, ma kɛɛ iɗit sinɔ saak pɛrɛdɛɛɗaak.

¹⁶ Ma ɔkɔn pɛrɛdaaŋ, nɛ ege pirdi naakɛ eekeer, moko eet mowan agut sinɔ Baabɛɛ sinɛkanti wosɛykik sɛɛn a eet agut omoŋ.

¹⁷ Taapɛɛɓa higii noŋk kɛ waasiyɛ joop sigɔ pɛɛyk eekeer.

¹⁸ Waasiɗiikaa agut ɔɔtɛ naak, waasiɗi ɓɔrɛ Baabɛ sinɛkanti wosɛykik agut eet."

¹⁹ Nɛɓa sɛɛk kɔɔniyar kɛ, "Ma ɓaaɓa eet?" Nɛɓa Yeese jumur sɛɛga kɛ, "Kɛygun eet, kɛygun Baabɛɛ kiir ɗegerɔɔn. Ɔkɔn ɗegerari eetiŋ, nɛgun ɗegerari Baabɛɛŋ."

²⁰ Tonuɓa Yeese pɛɛni sini saaɓa rɔɔriyaaɗ Godeey sinaanɛ Geetitank, sanduke sinaanɛ gagaɓguɗɛɛ worik jɔkuk. Kɛɛ iɗit sinɔɓa gaamu sɛɛnik agut sinɔɓa kiiɗ ɔɔtɛ nɛɛkɛ gayɛɛk.

Kiirkɔɔ Oolɛ A Mɛlɛɛtaarɔ Saana Kegiɗaakiŋ

²¹ Tonuɓa Yeese kɛkar kɛ, "Ŋaara saakiŋ, nɛ kɔɔtu sɔɔk warɛɛriŋ, yakanakɔɔ rɛrari a tikiyɛ goŋk. Kiirkɔɔ sɔɔk oolɛ a mɛlɛɛtaarɔ saana kegiɗaakiŋ."

²² Totoniɓa ɔɗɔwer Ayuuduk ɛkanɛɛkɛ gɛŋk kɛ, "Nɔ toniiɗ kɛ, 'Kiirkɔɔ oolɛ a mɛlɛɛtaarɔ saana kegiɗaakiŋ,' ɓokotukɔɔ ɛɛk?"

²³ Tonuɓa sɛɛga Yeese kɛ, "Atukari sɔɔk ɗook, ma saak arkaa rakaay. Atukari sɔɔk ɗook sineene raŋk, ma moko saak arkaa ɗook sineene raŋk.

²⁴ Tonakɔ kɔna kɛ rɛrarikɔɔ a tikiyɛ goŋk agut sini. Ɔkɔn ɗegerari kɛ eet wooɗ ɛti kiir ŋaadiitiŋ, rɛrarikɔɔ a tikiyɛ goŋk."

²⁵ Nɛɓa sɛɛk tonurgeeɗ kɛ, "Ma iin wooɗ?" Nɛɓa Yeese tonu sɛɛga kɛ, "Oko sinɛkan kɔna tukeeɗa toniiɗa tukiik.

²⁶ Laka ola a ɓɔɔkaaŋ sigɔ gun waasa ɛ pɛrɛda sɛɛgik agut iinakik, yakana eekerkan Baabɛɛ sinɛkanti wosɛykik. Tona saak joopa ɗookoŋk any sinɔkɔ tiyka sooy lak sɛɛnik."

²⁷ Yakanaɓa sɛɛga ki mɛlɛɛ any sinɛ sɛɛga tonu agut Ɛpɛnik.

²⁸ Nɛɓa Yeese tonu sɛɛga kɛ, "Saakoy laalawarɗɔ Tɔɔn Etoŋk rakaayk, ɗegerarikoy kɛ eet wooɗuŋ, a kɛɛ any sinɔ ijaaga ɓaŋkawukaat naakɛ mowank, saakoyk ɗegerarikoy kɛ tona any sinɛkanti rɔɔriyɗi Baabɛɛk.

²⁹ Baabɛɛ sinɛkanti wosɛykik sɛɛn a eet agut omoŋ. Agut sinɔ ijaagiiɗa ɓɛɛnyɔwɛ gɛɛŋk baŋɛ any sinɔ yaa sɛɛnaŋɔŋk, kiti toŋoɗ mowan."

³⁰ Saaɓa Yeese toniiɗ sinik, nɛɓa sɛɛn ŋaadir joop a ɓɔɔkaaŋ.

Yeesee A Abraham

³¹ Tonuɓa Yeese joopa Ayuuduk sigaaga ŋaadir sɛɛnik kɛ, "Ɔkɔn sɔɔk beeɗiir pɛɛnii naakɛɛŋ, iinak nomtaanak gaaŋk eekeerɛ.

³² Ɗegerarikɔɔ eekeeriŋ, boŋurku kɔnu eeker yaakata."

³³ Yakanaɓa sɛɛk tonurgeeɗ kɛ, "Eteŋk seek komoy Abrahamuk. Inɓa kɛɛ iɗit sinɔɓa dakgiɗii a laaŋoyenk, anɛ seŋk tonun tina kɛ, 'Ŋaararkɔɔkɔɔ yaakata,' ɛk?"

³⁴ Nɛɓa Yeese tonu sɛɛga kɛ, "Eekeer tona kɔnaaŋ, iɗit sinɔ ijaag tikiyɛɛk laaŋoyen tikiyɛɛkoŋk.

³⁵ Ki beeɗit laaŋoyent ɓɛɛnyɔwɛ gɛɛŋk baŋɛ godeey tak. Ma sɛŋk tɔn beeɗ ɓɛɛnyɔwɛ gɛɛŋk baŋɛ godeey tak.

³⁶ Agut sini ɔkɔnkɔɔ kɔnu Tɔn nɛɛkɛ boŋku yaakataaŋ, nɛkɔɔ ɓɛɛlɛɛr yaakat eekeerɛ.

³⁷ Ɗegera kɛ iinak komoy Abrahamukuŋ. Yakana agut sinɔ kirɗɔ boŋiiɗ pɛɛni naakik, nɛti ɗɛyɛɛr ɓokotiita.

³⁸ Tona saak any sinɔkan dɛnka sooy lak Baabɛɛk. Ma sɔɔk ijaagiir any sinɛkan dɛnɛrkɔɔ sooy lak ɓaaɓa noŋkuk."

³⁹ Nɛɓa jumurargeeɗ kɛ, "Baabɛɛ naŋk Abraham." Nɛɓa Yeese jumur sɛɛga kɛ, "Ɔkɔn iinak tɔɔmɔk Abrahamukuŋ, gun ijaagiir any sinɛɓa ijaag Abrahamk.

⁴⁰ Tona saak kɔna eekeer sigɛkan tiyka sooy lak Waakoyok, nɛti ɗɛyɛɛr ɓokotiita. Kiɓa sɛŋk Abraham ijaagɛ oko sinik.

⁴¹ Sisɔ ijaagiir sɔɔk ijaag ɓaaɓa noŋkuk." Nɛɓa sɛɛk tonurgeeɗ kɛ, "Moko eteŋk joop sigɔkan tin ɓartɛɛ a lukakik. Lakii Baabɛɛ a omoŋ Waakoyo."

⁴² Nɛɓa Yeese tonu sɛɛga kɛ, "Ɔkɔn ege Waakoyot Ɓaaɓa noŋkuŋ, guntu poriiriŋ. Agut sinɔ mokokan kusa ɔɔtɛ naakɛk, kusaakan sooy lak sɛɛnik. Nɔ ɓɛɛlɛɛɗa seedik, wosɛykikanti sɛɛn.

⁴³ Kikɔna mɛlɛɛ toni naakɛ agut jikon? Agut sinɔ kirɗɔ ɗɛyɛ boŋiiɗa pɛɛni naakik.

⁴⁴ Iinak tɔɔmɔk ɓaaɓa noŋkuk, setanik. Ɗɛyɛɛr a ijaagiir any sinɛ ɗɛyɛ ɓaaɓa noŋkuk. Sɛɛnɓa sɛŋk iɗit sinɔ ɓokotɗiiŋɔŋk a tukiɗi tuki nɛɛkɛɛk. Kɛɛ sɛɛne lalaŋ a eekeerik agut sinɔ kiiɗɛ sɛɛne eekeerik. Saa toniiɗ nyonuk tonu any sinɔ boŋku aɗoy nɛɛkɛkik agut sinɔ sɛɛn nyonkan ɛ sɛɛn ɛpɛn nyonaak.

⁴⁵ Agut sinɔ saak toniiɗa eekeerk, nɛti kiir ŋaadit.

⁴⁶ Iinakɛ wooɗ sinɛta tonu kɛ, 'Iin tikitank?' Ɔkɔn tona eekeeriŋ, nɛti kiir ŋaadit agut jikon?

⁴⁷ Iɗit sinɔ ar Waakoyoteek tiyɛ pɛɛni Waakoyotoŋk. Sisɔ nɔ kirɗɔ weent pɛɛni Waakoyotoŋkuk agut sinɔ moko atukuɗɔɔ Waakoyotek."

⁴⁸ Tonurɓa joop Ayuuduk Yeeseya kɛ, "A mokosu liki sinina tonii kɛ iin iɗit Sɛmaariyaak nɛ lakin setank?"

⁴⁹ Nɛɓa Yeese jumur sɛɛga kɛ, "Kɛɛte setan. Eemɛya saak Baabɛɛ, ma sɔɔkti daraayɛɛriŋ.

⁵⁰ Kaa saak ɗɛyɛ eemɛyɔn ɛɛk naakik, ma ɓɛɛlɛ Waakoyo sinɔ ɗɛyɛ eemɛyɔn naakik ɛkoy pɛrɛdɛkiŋ.

⁵¹ Eekeer tona kɔnaaŋ, iɗit sinɔ koorɛ pɛɛni naakik kikoy rerin adaktan."

⁵² Nɛɓa joop Ayuuduk tonurgeeɗ kɛ, "Ɗegerii sisɔ kɛ lakin setan. Rɛrɓa aasi Abraham, maɓɔrɛ rɛrarɓa joop pɛrkaakoŋkuŋ. Ma seŋk tonun kɛ iɗit sinɔ koorɛ pɛɛni naakik kikoy rerin adaktan.

⁵³ A kaalin ɔrɛɛ naŋk Abraham sinɛɓa rɛrkiŋ? Rɛrarɓa joop pɛrkaakoŋkuŋ, anɛ seŋk tonun ɛɛk nook kɛ iinnɔ wooɗ?"

⁵⁴ Nɛɓa Yeese jumur sɛɛga kɛ, "Ɔkɔn saak ɗɛya eemɛyɔn naakiŋ, nɛ eemɛyɔɔn naakɛ kɛɛ ɔɔtɛ. Sinɛti eemɛyk Baabɛɛ, sɛɛn sinɛ riyari kɛ, 'Waakoyo naŋkik.'

⁵⁵ Yakana sɔɔk kiir sɛɛn ɗegerɔɔn, ma saak ɗegeraaŋ. Ɔkɔn tona kɛ kaa ɗegerɔɔnuŋ, nɛ eet nyonkan oko iinak. Yakana saak ɗegeraaŋ, koora pɛɛni nɛɛkiŋ.

⁵⁶ Ɗɛyɛɓa ɔrɛɛ noŋk Abraham dɛnɛɛɗa ɓɛɛnyɔ naak kɛnɔ yaageeɗ, nɛɓa dɛnɛ nɛ yaageeɗiŋ."

⁵⁷ Ɔɔtɛ sineene tonurgeeɗɓa joop Ayuuduk kɛ, "In emeyi goonɛ kir gayɛɛ pɔlpɔlɛ joop pɛɛyk a aarin," anɛ tonun kɛ, "Dɛnaaɓa Abrahamuŋ!"

⁵⁸ Nɛɓa Yeese tonu sɛɛga kɛ, "Eekeer tona kɔnaaŋ, ɓɛɛlaɓa a inɓa kɛɛ ɓartɛɛt Abraham.

⁵⁹ Nɛɓa joop Ayuuduk boŋur giɗeek kɛnɔ gun baabaalar, yakanaɓa Yeese dugiɗi sɛɛge nɛ ŋaarki Godeey sinaanɛ Geetitank walasa nɛ ŋaarŋ.