Yowanis 7 - Kuumeet Sinɔ Tɔɔnuk Ad Majaŋeeroŋk

Kɛɛ Yeese Yorsaleema Ba'aala Paapɛyoŋk

¹ Saadi baŋiya weeweriiɓa Yeese sinɔɔnɛ Gɛlilaak. Maɓa ki ɗɛyɛ a weeweri sinɔɔnɛ Yuudaakiŋ agut sinɔɓa ɔɗɔwer Ayuuduk ɗɛyɛrɗi ɓokotiitak.

² Wɔɔŋkuɓa Ba'aal Paapɛyoŋk.

³ Agut sini wideetarɓa ɛɛk manyaakak Yeeseya son lak sɛɛnik nɛ tonurgeeɗ kɛ, "Kɛ nɔkɔɔ dɛnɛr nomtaanak goonɛ any sinɛ ijaagink ŋaari seedi nɔ kɛɛɗin ɗooka Yuudaak.

⁴ Iɗit sinɔ ɗɛyɛ a ɗegerɛɛ sɛɛn kɛ ɗɔmk ki ijaagɛ ijaag nɛɛk dugeeɗ. Nɛ ɓɔrɛ saa ijaagiiɗin ola sigi baŋɛk, ɗɛyɛ a yaaŋin ɛɛk nook joopa ɗookoŋkuŋ."

⁵ Nɔɓa tonurɗu sinik agut sinɔɓa aasi kirɗi sɛɛn ŋaadit manyaakak.

⁶ Nɛɓa Yeese tonu sɛɛga kɛ, "In ki gayɛ ɔɔtɛ naakɛk sinɛ kɛɛɗaak, ma sɛŋk ɔɔtɛ noŋk yaa ɓɛɛnyɔwɛ gɛɛŋk baŋɛ.

⁷ Joop ɗookoŋk kir oolɛ a ɓooyur iinakiŋ, ma sɛŋk ɓooyur eetiŋ agut sinɔ saak waasɛɗa ijaag nɛŋk kɛ tikiyɛɛk.

⁸ In sɔɔk kɛɛɗɛɛ Ba'aala nɛɛka. Ma eet agut sinɔ ɔɔtɛ naakɛ sinɛ kɛɛɗaak, in kiiɗi gayɛɛk kaa deran Ba'aala sinaana."

⁹ Tonuɓa sɛŋk sini, nɛ dakɛ Gɛlilaake.

¹⁰ Yakana saaɓa manyaaka kaarɗi Ba'aala nɛɛkaakik baŋiya, nɛɓa sɛŋk kɛɛ Ba'aala nɛɛka dugeeɗ a mokoɓa kɛɛ a dɛnɛɛŋ.

¹¹ Nɛɓa warɛr joop Ayuuduk Ba'aale nɛɛkɛɛk kɛ, "Ar eet?"

¹² Joop sigɛ ɓɔɔkaak totoniiɓa yɛɛyɛgɛɛt agut sɛɛn. Tonurɓa ɔgɔɔk kɛ, "Ege sini iɗit sinɔ mentanŋɔŋk," ma ɔgɔɔk tonur kɛ, "Moko, iɗit sini ari joop a babadarŋ."

¹³ Yakanaɓa ɓurer ɔɗɔweer Ayuuduk, nɛ kɛɛ iɗit sinɔɓa tonɗi agut sɛɛn a ɗegerɛɛŋɔŋk.

Rɔɔriya Yeese Ba'aale Paapɛyoŋk

¹⁴ Ba'aale nɛɛkɛ kɔɔr kɛɛɓa Yeese Godeya sinaana Geetitank nɛ rɔɔriyaaŋ.

¹⁵ Ɔɗɔweer Ayuuduk reemɗiɓa ɓayɛtun gɛŋk nɛ tonur kɛ, "Iɗit sini aɓa ki tamaarɛɛt nɛ ɗeger ola sigi baŋɛ ɛk?"

¹⁶ Nɛɓa Yeese jumur sɛɛga kɛ, "Moko ar any sinɛ rɔɔriyaaɗaak sooy lak eetik, ma ar sooy lak Waakoyo sinɛkanti wosɛykik.

¹⁷ Ɔkɔn lakɛ iɗit sinɔ ɗɛyɛ a ijaag any sinɛ ɗɛyɛ Waakoyotukuŋ, nɛ ɗeger kɛ laŋkɛɛɓa rɔɔriyɔn sini sooy lak Waakoyok maŋk kɛ tonɗiika eet dakɛɗa.

¹⁸ Iɗit sinɔ tonɗi ɔɗɔwa nɛɛkaakik ɗɛyɛ eemɛyɔn ɔɗɔ nɛɛkik, ma iɗit sinɔ ɗɛyɛ eemɛyɔn iɗit sinɛkan sɛɛn wosɛykik eekerkan, kiiɗɛ nyon.

¹⁹ Kiɓa kɔna Muuse gaamit higi? Nɛ yakana iinakɛ kɛɛ iɗit sinɔ ijaag higi nɛɛkik. Ɗɛyɛɛrti ɓokotiita agut jikon?"

²⁰ Nɛɓa joop gɛɛnɛ tonurgeeɗ kɛ, "Lakinre setan. Ɗɛyɛni ɓokotiita wooɗ?"

²¹ Nɛɓa Yeese jumur sɛɛga kɛ, "Ijaagaakɔ any a omoŋ sinɔ reemɗi ɓayɛk, nɛkɔ kɔnu reemɗi ɓayɛtun iinak baŋɛ.

²² Agut sinɔɓa gaɓɛɛɗ kɔna Muuse higi yawɛɛɗoŋkuŋ, nɛ sɔɔk yawɛɛr sasalɛ waawuy Sambatɛyoŋk Ayuudukuŋ. Laŋkɛɛɓa higi sini sooy lak ɔrɛyakik, ma mokoɓa sooy lak Muuseek.

²³ Sisɔ kɛnɔ kat sɔɔkɛɛ higi Muuseek, ɔkɔn yawɛɛ sasalɛ waawuy Sambatɛyoŋkuŋ, anɛ agut sinɔ saak ebɔdɛɛɗa iɗit ɛɛk nɛɛk baŋɛ waawuy Sambatɛyoŋkuk, nɛti ɓooyiir agut jikon?

²⁴ In pɛrɛdɛɛ ete raŋk any sinɔ likik, ma kat pɛrɛdɛɛ any ete raŋk ma dɛnɛɛ taamɛ gɛɛŋk.

Ege Yeese Keresee

²⁵ Joope Yorsaleemuk a omoŋ omoŋ tonurɓa kɛ, "A mokokɔ ɗɛyɛr ɓokotiita iɗit sini Ayuuduk?"

²⁶ Tonɗi sɛŋk sisɔ a ɗegerɛɛŋ, nɛ sɛɛk kɛɛ any sinɔ tonurgeeɗik. Ɗegerar ɔɗɔwer eekeerɛ kɛ ege iɗit sini Kereseeŋ?

²⁷ Yakana seek ɗegerii kɛ kusɓa iɗit sini eetiŋ, ma sɛŋk Keresee saa mɛlkiɗik kɛɛ iɗit sinɔ ɗegeera kɛ kus eetik.

²⁸ Tonuɓa Yeese a ɗooruŋ saaɓa rɔɔriyaaɗ Godeey sinaanɛ Geetitank kɛ, "Ɗegerari eetiŋ ɛ ɗegerari kɛ kusaakan eetiŋ. Mayakana mokokan kusa ɓaŋkawukaat naakɛk. Eekerkan Waakoyo sinɛkanti wosɛykik kiir sɔɔk ɗegerɔɔn.

²⁹ Ma saak ɗegeraaŋ agut sinɔkan kusuɗa sooy lak sɛɛnik ɛ kanti wosɛyki sɛɛnik.

³⁰ Saaɓak ɗɛyɛrkɛɓa gaamita, yakana agut sinɔɓa kiiɗ gayɛɛ ɔɔtɛ nɛɛkɛkik nɛ kɛɛ iɗit sinɔɓa gaamɗiik.

³¹ Joope gɛɛnɛ ŋaadirɓa sɛɛn a ɓɔɔkaaŋ, tonurɓa kɛ, "Saakoy mɛlkiɗ Kererseek ijaagkoy sɔɔriyɛ a kaalɛ sigi ijaag iɗit sinik?"

Wosɛyɛɛ Amaasiniyɛ Kɛnɔ Gaamur Yeesee

³² Tiyɛrɓa joop Paarisik a totoni joop yɛɛyɛgɛɛt agut Yeesee, nɛɓa ɔɗɔwer tapa ŋaadiyɛɛkoŋk a joop Paarisik wosɛyɛr amaasiniyɛ kɛnɔ gaamur sɛɛn.

³³ Saaɓak tonuɓa sɛɛga Yeese kɛ, "Beeɗiikɔɔ eet a iinak a bala ɔɔtɛ nɛɛkɛɛŋ, makɔɔ saadi baŋiya ŋaara son lak Waakoyo sinɛkanti wosɛykik.

³⁴ Iinak warɛɛr kɔɔtuŋ, yakana kɔɔtu kiir laŋiiɗ kiirkɔɔ oolɛ mɛlɛɛtaarɔ saana arkiɗaak."

³⁵ Ɔɗɔweer Ayuuduk totoniiɓa ɛkanɛɛkɛ gɛŋk kɛ, "Iɗit sini ŋaarkɔɔ etena nɔkɔɔ kiɗii laŋiiɗik? Kaɗɛɛŋkɔɔ kɛɛ son lak tekaaneer gaŋk sigɛɓa kɛɛtiɗi nɔ beeɗir sinɔɔnɛ Giriikik nɔ kɛɛ rɔɔriy joop Giriikik?

³⁶ Saa toniiɗ kɛ, 'Iinak warɛɛrkɔɔtuŋ, yakanakɔɔtu kiir laŋiiɗ. Kiirkɔɔ oolɛ a mɛlɛɛtaarɔ saana arkiɗaak' sinɔ kɛ ɛkik?"

Maawu Wɛɛŋakoŋk

³⁷ Ba'aale nɛɛkɛ pediya waawuy sinaanɛɓa obiik sɛɛge baŋɛk, ɛtɛɓa Yeese nɛ tonu a ɗooruŋ kɛ, "Ɔkɔn lakɛ iɗit sinɔ lak paar maawoŋkuŋ, in kus son lak eetik nɔ utiɗi.

³⁸ Iɗit sinɔ ŋaadiɗi eeteek gonarkiɗ tuny maawu wɛɛŋakoŋkuk oko sinɛɓa toniiɗ Wargatɛ Waakoyotoŋkuk."

³⁹ Tonuɓa sini agut sinɔkɔɔ boŋurɗu Wɛɛŋa sigɔ Geetitaanakik sigɛ ŋaadir sɛɛnŋɔŋk. Inɓa kɛɛ gaamit Wɛɛŋa sigɔ Geetitaanakik agut sinɔ inɓa kiiɗi gayɛ ɔɔtɛ sinɔ eemɛyɗɛɛ Yeeseek.

Lakɛ Pakakat Joope Kɔɔr

⁴⁰ Joope gɛɛnɛ a omoŋ omoŋ saaɓa tiyɛrɗi pɛɛni sinik, nɛɓa tonur kɛ, "Ege sini Iɗit Pɛrkaakoŋk eekeerɛ."

⁴¹ Tonurɓa ɔgɔɔk kɛ, "Ege sini Keresee." Ma ɔgɔɔk tonur kɛ, "Kus Kerese Gɛlilaake?

⁴² Moko ɓato taapɛɛ Wargatɛɛ Waakoyotoŋk kɛ ɓartɛɛkoynɔ Keresee komoy Daawitik, ɛkoynɔ kus katamɛɛ Daawitik Beeteleheeme?' "

⁴³ Nɛɓa lakɛ pakakat joope gɛɛnɛ kɔɔr agut sɛɛn.

⁴⁴ Joop a omoŋ omoŋ ɗɛyɛrkɛɓa gaamita, yakanaɓa kɛɛ iɗit sinɔ gaamɗiik.

Kir Ŋaadiɗiit Ɔɗɔwer Ayuuduk Yeesee

⁴⁵ Saadi baŋiya weeriikɓa amaasiniyɛɛk son lak ɔɗɔweer tapa ŋaadiyɛɛkoŋk a joop Paarisik, nɛɓa sɛɛk tonur sɛɛga kɛ, "Kirkɔɔkɔ diilɛ agut jikon?"

⁴⁶ Nɛɓa amaasiniyɛ gɛɛnɛ tonur kɛ, "Inɓa kɛɛ iɗit sinɔɓa tonɗi oko sini tonɗiiɗ iɗit sinik."

⁴⁷ Nɛɓa joop Paarisik tonur kɛ, "Ari ɓɔrɛ iinak a babadariŋ?

⁴⁸ Lakɛ sɛɛn ɔɗɔweerɛ maŋk joope Paarisik joop sigɔ ŋaadir sɛɛnikiŋ?

⁴⁹ Joop sigi kir ɗegerɔɔn higi Muuseek, koonykaanak eekeerɛ."

⁵⁰ Joope Paarisik om Nikodimoos sinɛɓa kɛɛ jeemɛ son lak Yeeseek tonuɓa sɛɛga kɛ,

⁵¹ "Higii naŋk iɗit om a inkɔ kɛɛ weenta any sinɔkɔ daariyɗiiɗɛɛk, a in ki ɗegerɔɔn kɛ ijaagkɔ jikon nɛ pɛrɛdɛɗɛɛŋ?"

⁵² Nɛɓa tonurgeeɗ kɛ, "Iin ɓɔrɛ iɗit Gɛlilaak? Mermeni nɔ ɗegerin kɛ kiikikoy ŋaarin iɗit pɛrkaakoŋk Gɛlilaake."

⁵³ [Nɛɓa ŋaaŋarar nyakika gɛŋk a omoŋ omoŋ.]