Yowanis 5 - Kuumeet Sinɔ Tɔɔnuk Ad Majaŋeeroŋk

Ebɔdɛ Yeese Iɗit Om Sinɔ Nyɔŋtank Teel Beetɛ Jaataak

¹ Saadi baŋiya kɛɛɓa Yeese Yorsaleema agut sinɔɓa lakiɗɛ Ba'aal Ayuuduk.

² Lakɛɓa Yorsaleeme teel sinɔ riyɛ ad Ibiraystik kɛ Beetɛ Jaataak, Tugaat jiŋkuyɛɛkoŋk jɔk. Lakɛɓa saadi tugaateer a tuul sigɔ latu riik.

³ Ɗuɗuŋarɓaɗe tugaateerɛ gɛɛnɛk gortaanak, a motak, a joop sigɔ jɔɔlɛytaanak eekeer gɛŋkik, a nyɔŋtaanak a ɓɔɔkaaŋ. [Kookorarɓa kɛnɔ yikiɗi maawu gɛɛnɛk.

⁴ Agut sinɔ ɓɛɛnyɔwɛɛkɛ ɔgɔɔkɛ ɛnyɛnyɛkiɓa wosɛytan Suumiyoŋk teela nɛɛka nɛ yike maawu gɛɛŋk. Saa yikiɗiiɗ maawu gɛɛnɛkik baŋiya iɗit sinɛ gaɓɛɛr ɛɛk teela nɛɛka tukiik nɛɓa bɔduku goriɗakɛ sigaagɛ lakiŋ.]

⁵ Lakɛɓa saadi iɗit om sinɔ mooyk sinɔɓa goru a emeyi ruumer iɗit a aarin a tula jiitik baŋɛk.

⁶ Nɛɓa Yeese dɛnɛ iɗit sinɛ a ɗuɗuŋɗe saadi nɛ ɗeger kɛ goruɓa a jeeɗo ɔɔtɛ nɛɛkɛkiŋ, nɛ tongeeɗ kɛ, "Ɗɛyin bɔdɛɛŋ."

⁷ Nɛɓa iɗit sinɛ gortank tongeeɗ kɛ, "Suumi naakɛ, saa yikiɗiiɗ maawu gɛɛnɛkik, nɛ kɛɛ iɗit sinɔtu boŋu nɔtu gaɓɛɛr teela nɛɛkaakik. Saa kɔrurkɛɛɗaak, nɛte ɗoyu iɗit om ɔɗɔɔkɛ."

⁸ Nɛɓa Yeese tongeeɗ kɛ, "Ŋaar raŋana nɔ boŋun beeɗi nook nɔ ŋaarin."

⁹ Nɛɓa iɗit sinɛ bɔdɛ sisa. Nɛɓa boŋu beeɗi nɛɛk nɛ ŋaarŋ. Ijaagɛɛɓa any sini waawuy Sambatɛyoŋk Ayuuduk.

¹⁰ Agut sini tonurɓa ɔɗɔweer Ayuuduk eta sinaana kan bɔdukuk kɛ, "Ege ɓenyse waawuy Sambatɛyoŋk. Kina higii pɛgɛdɛɛt nɔ diilin beeɗi nook."

¹¹ Nɛɓa sɛŋk tonu sɛɛga kɛ, "Tonu kɔta iɗit sinɛ kɔtu ebɔdɛk kɛ, 'Boŋu beeɗi nook nɔ ŋaarin.' "

¹² Nɛ kɔɔniyar kɛ, "Wooɗ sinɛ kɔna tonu kɛ, 'Boŋu beeɗi nook nɔ ŋaarin'?"

¹³ Yakanaɓa ki ɗegerɔɔn kɛ ebɔdɛkɔ sɛɛn wooɗ agut sinɔɓa Yeese wideeɗ ɛɛk nɛɓa gumerkiɗ joopa sigɔɔga ɓɔɔkaaŋɔŋk takanaak.

¹⁴ Saadi baŋiya laŋkiɓa Yeese iɗit sinɛ Godeey sinaanɛ Geetitank nɛ tongeeɗ kɛ, "Bɔdukunkɔ sisɔŋ, nɛɓɔ kat ijaagin tikiyɛ a tukiɗi sisɔ kɛnɔ mokɔɔ laŋkin any sinɔ kaalɛ sinik."

¹⁵ Nɛɓa iɗit sinɛ ŋaar nɛ kɛɛ tonu ɔɗɔweera Ayuuduk kɛ ebɔdɛkɔ sɛɛn Yeesee.

¹⁶ Agut sinɔɓa Yeese ariiɗ any sini waawuy Sambatɛyoŋkuk, nɛɓa sɛɛn ɔɗɔweer Ayuuduk tuker epaayana.

¹⁷ Yakanaɓa Yeese tonu sɛɛga kɛ, "Ijaagɗi Baabɛ ɓɛɛnyɔwɛ gɛɛŋk baŋɛ, maɓɔra ijaagɗikaaŋ."

¹⁸ Waasiyɛ sigi moyurɓa ɔɗɔweer Ayuuduk a kaalɛŋ kɛnɔ ɓokotur Yeesee agut sinɔkan aalɛɛɗ waawuy Sambatɛyoŋkuk, ɛ agut sinɔɓa ariɗ ɛɛk nɛɛk a rɔma a Waakoyo a kaalɛŋɔŋk.

Ɓaŋkawuka Tɔɔn Waakoyotoŋkuk

¹⁹ Jumurɓa sɛɛga Yeese kɛ, "Eekeer tona kɔnaaŋ, ki oolɛ Tɔn Waakoyotoŋk a ijaag any om ɔɗɔwa nɛɛkaakiŋ. Ijaag any sinɔkɔ dɛnɛ saa ijaagiiɗ Ɛpɛnaak dakɛɗa. Any sinɛ ijaag Ɛpɛnaak baŋɛ, ijaag ɓɔrɛ Tɔn nɛɛkɛɛŋ.

²⁰ Agut sinɔ poru Ɛpɛna Tɔɔn nɛɛkiŋ, yaaŋgeeɗ any sinɛ ijaagik baŋɛ. Yaaŋgeeɗkoy Ɛpɛna ola sigɔ kaalɛr sigik nɛkoy reemɗi ɓayɛtun goŋk.

²¹ Oko sinɛ Ɛpɛna boŋkuɗ joop sigɛkan rɛrark nɛ sɛɛga gaɓɛ wɛɛŋak, nɛ ɓɔrɛ Tɔn nɛɛkɛ gaɓɛ wɛɛŋa eta sinaana ɗɛyɛk oko sinɛk.

²² Kɛɛ iɗit sinɔ pɛrɛdɛɛɗ Ɛpɛnaak gaɓɛɓa ɓaŋkawuka pirdiyoŋk baŋɛ Tɔɔna nɛɛkaak,

²³ kɛnɔ joop baŋɛ eemɛyar Ɛpɛn ɛ kɛnɔ ɓɔrɛ eemɛyar Tɔɔn nɛɛk. Iɗit sinɔ ki eemɛyɔɔn Tɔɔn nɛɛkik ki eemɛyɔɔn Ɛpɛn sinɛkan wosɛyki Tɔɔn nɛɛkik.

²⁴ "Eekeer tona kɔnaaŋ, iɗit sinɔ tiyɛ pɛɛni naak nɔ ŋaadi Waakoyo sinɛ kanti wosɛykik lak wɛɛŋa sigɛkoy nɔkoy nɔkoyk. Kɛɛkoy sɛɛne pɛrɛdɛɛt ekaŋkikɔ sɛŋk ret bɔdɛɛɗa.

²⁵ Eekeer tona kɔnaaŋ, mɛlkikoy ɔɔtɛ sinɔkoy joop sigɛɓa rɛrark tiyɛrɗi koŋgoy Tɔɔn Waakoyotoŋkuŋ, ɔɔtɛ nɛɛk sɛɛn sini sisɔk. Joop sigɛ tiyɛrk baŋɛ beeɗirkoy wɛɛŋakɛ.

²⁶ Oko sinɛ ege Baabɛ naŋk ɔɗɔwa nɛɛka tuny wɛɛŋakoŋkuk, nɛɓa ɓɔrɛ ijaag Tɔɔn nɛɛk a tuny wɛɛŋakoŋk.

²⁷ Gagiɗɛɛɓa ɓaŋkawuka kɛnɔ pɛrɛdɛɗ agut sinɔ sɛɛn Tɔɔn Etoŋkuk.

²⁸ Kat ŋaatɛɛ agut any sini. Mɛlkikoy ɔɔtɛ sinɔkoy joop sigɛ atu piyakɔɔkɛ takik tiyɛrɗi koŋgoy nɛɛk nɔ ŋaararkiɗ ret walasakiŋ.

²⁹ Joop sigɛɓa ijaagir any sinɔ mentanŋɔŋkuk ŋaararkikoy ret walasa nɛ beeɗir wɛɛŋakɛ, ma joop sigɛɓa ijaagir any sinɔ ŋɛɛwɛnŋɔŋkuk ŋaararkikoy ret walasa nɛ pɛrɛdɛɛ sɛɛgeeŋ."

Any Sinɛɓa Tonɛɛ Agut Yeeseek

³⁰ "Kɛɛ any sinɔ oola a ijaaga ɓaŋkawukaat naakɛkik. Ijaaga any sinɛkan tiyka sooy lak Baabɛɛk. Moko ijaaga koɓi naak, ma ijaaga koɓi Waakoyo sinɛkanti wosɛykik, nɛ ege pirdi naakɛ liki.

³¹ "Ɔkɔn waasa ɔɔtɛ naakiŋ, nɛ moko waasiyɛ gaanɛ eekeer.

³² Mayakana ɓɛɛlɛ iɗit omaay sinɔ waasiɗi agut eetikiŋ. Nɛ ɗegera kɛ eekeer any sinɛ tonu agut eetik.

³³ Wosɛyɛɛrɓa sɔɔk joop son lak Yowanisikiŋ, nɛɓa sɛŋk waasiɗi agut eekeer.

³⁴ Nɔ toniiɗa sinik moko agut sinɔta ɗɛyɛɛɗ waasiyɛ etoŋkuk, ma kɛnɔ bɔdɛɛriɗ.

³⁵ Yowanis itoɓa ɗaawan sinɔ lowu a ɗaawuŋɔŋk. Nɛɓa ɗɛyɛɛr kɛnɔ kɔna yaa pɛɗɛrkaat nɛɛkɛɛk ɔɔtɛya sinɔɔna balaaŋɔŋk.

³⁶ Mayakana laka saak waasiyɛ sigɔ kaalɛr waasiyɛ Yowanisik. Waasiyɛ gaaŋk ijaag sinɛɓata gaɓɛ Baabɛ kɛnɔ ijaagaak. Ijaag sini ijaagaak yaaŋɛti kɛ wosɛykikanti Baabɛɛ.

³⁷ Baabɛɛ sinɛkanti wosɛykik ɔɗɔwa nɛɛka waasɛkan ɔɔtɛ naakiŋ. Kiirkan sɔɔk weenta koŋgoy nɛɛk adaktan kiirkan taanta taamɛ gɛɛŋk adaktan,

³⁸ nɛ agut sinɔ kirɗɔ ŋaadit Sɛɛn sinɛkanti wosɛykik, nɛ ki beeɗit pɛɛni nɛɛkɛ sooy lak iinakik.

³⁹ "Mermenari sɔɔk Wargatɛɛ Waakoyotoŋk a koɓiir kɛ laŋiirkoy sɛɛge wɛɛŋa sigɛkoy nɔkoy nɔkoyk, ma Wargatɛɛ Waakoyotoŋk sigɛ waasɛr ɔɔtɛ naakik.

⁴⁰ Mayakana sɔɔk kirkɔ ɗɛyɛ ɛnyɛ son lak eetik kɛnɔ laŋiir wɛɛŋa.

⁴¹ "Kaa saak ɗɛyɛ eemɛyɔn ete.

⁴² Degera kɛ kɛɛ iinakɛ mɛyin Waakoyotoŋk.

⁴³ Kusaakan saak ɓaŋkawukaat Baabɛɛk, yakana kanti kiir boŋiiɗ. Ma ɔkɔn kus iɗit omaay ɓaŋkawukaat nɛɛkɛkiŋ, nɛ boŋiir sɛɛniŋ.

⁴⁴ Iinak sigi ɗɛyɛɛr ɛkanɛɛkɛ goŋk eemɛyɔn etek, ma kiir ɗɛyɛ eemɛyɔn sinɔ laŋɛɛ Waakoyote sinɔɔnɛ omoŋɔŋkuk, oolɛɛr a ŋaadiɗiikari eete ɛk?

⁴⁵ "Kat koɓiir kɛ daariyɗika kɔna taamɛkɛ Baabɛɛkiŋ. Daariyɗi kɔna Muusee sinɛ latukuɗɔ ŋaadiyɛ sigɛ kookorarik.

⁴⁶ Ɔkɔnɓa ŋaadiir Muuseeŋ, nɛ gunkan ɓɔrɛ ŋaadiir eetiŋ agut sinɔ taapɛɓa ɔɔtɛ naakiŋ.

⁴⁷ Ma ɔkɔn kiir ŋaadit any sinɛɓa taapɛkiŋ, nɛ ŋaadiir pɛɛni naak ɛk?"