Yowanis 4 - Kuumeet Sinɔ Tɔɔnuk Ad Majaŋeeroŋk

Yeesee A Jarti Om Sɛmaariyaak

¹ Tiyɛrɓa joop Paarisik kɛ ijaagkɔnɔ Yeese joop a nomtaanak ɛ aadiɗi a kaalɛ Yowanis.

² Yakanaɓa aadiɗi nomtaanak gɛɛŋk, maɓa Yeese ki aadiɗiit.

³ Saaɓa Suumii tiyɛɛɗ sinik, nɛɓa ŋɔr ɗoo Yuudaak nɛ ŋaar Gɛlilaaka.

⁴ Saaɓa ŋaarɗi saanak gunɓa ɗoyu sinɔɔnɛ ɗoo Sɛmaariyaak.

⁵ Nɛɓa mɛlɛ katamɛya Sikaarik sinɔɔna ar Sɛmaariyaakek. Sikaar katamɛ sinɔ ar jɔk nyon sinɔɔnɛɓa gaɓɛ Yaykoob tɔɔna nɛɛka Yoosepaak.

⁶ Lakɛɓa saadi utul maawoŋk Yaykoobuk. Agut sinɔɓa Yeese bɔɔlaaɗ ŋawit gopan sinɔ jeeɗoŋɔŋkuk, nɛɓa dokuɗe utul nɛɛkɛ jɔk. Arɓa ɔɔtɛ nɛɛkɛ waawuy sayitiyɛɛkɛ sigɔɔgɛ tula omk.

⁷ Nɛɓa mɛlki jarti om ɗoo Sɛmaariyaak saana lak utul nɛɛkik kɛnɔ ɛɛkɛ maawu, nɛɓa Yeese tongeeɗ kɛ, "Tigiti maawu sigɔ utaaŋɔŋk."

⁸ Saaɓak kaarɓa nomtaanak gɛɛnɛ katamɛya kɛnɔ kaar ɓalirki ɗama.

⁹ Jarti sinɛ Sɛmaariyaak tonuɓa Yeeseya kɛ, "A iin iɗit Ayuuduk nɛ kalɛyin eet sini jarti Sɛmaariyaak kɛ tigiti maawu sigɔ utaaŋɔŋk ɛk?" Nɔɓa toniiɗ sinik joop Ayuuduk a joop Sɛmaariyaak kɛɛɓa sɛɛge omaayikeen.

¹⁰ Nɛɓa Yeese tongeeɗ kɛ, "Ɔkɔnkɔ ɗegerin tigi Waakoyotoŋk a iɗit sinɛna tonu kɛ, 'Tigiti maawu sigɔ utaaŋɔŋk,' kɛ wooɗuŋ gunkɔ kalɛyin sɛɛn. Nɛgun kɔnu sɛŋk gije maawu sigɔ gaɓɛr wɛɛŋak."

¹¹ Nɛɓa jarti sinɛ tongeeɗ kɛ, "Suumi naakɛ, kɛɛ iine any ɛɛkɛɛtoŋk, ma utul nɛɛkɛ ɓukuuruŋ. Nɛkɔɔ laŋin maawu sigɔ gaɓɛr wɛɛŋak eet?

¹² Kaalin ɔrɛɛ naŋk Yaykoob sinɛɓa tina gaɓɛ utul sinik? Sɛɛn ɔɗɔwa nɛɛka uterɓa maawu sigi sɛɛn a tɔɔmɔk gɛɛŋk a tɔgi gɛɛŋk."

¹³ Nɛɓa Yeese jumurgeeɗ kɛ, "Joop sigɛ uter maawu sigik baŋɛ latukɔɔ paar kɛkarŋ,

¹⁴ ma iɗit sinɔ ute maawu sigɔ gaɓa sɛɛg saakik, kiiɗɛkoy paar nɔkoy nɔkoyk. Maawu sigɛ gaɓa sɛɛg saakik, dakɛr sɛɛne tak a tuny maawu sigɔ gaɓɛr wɛɛŋa sigɛkoy nɔkoy nɔkoyk."

¹⁵ Nɛɓa jarti sinɛ tongeeɗ kɛ, "Suumi naakɛ, tigiti maawu sigi kɛnɔ a tukiɗi sisɔ kɛnɔkoy kat laka paar nɔkoy kusa ɛɛkɛɛta seena."

¹⁶ Nɛɓa Yeese tongeeɗ kɛ, "Ŋaarik nɔ kɛɛɗin ɗɔkun baabuy nook."

¹⁷ Nɛ jarti sinɛ jumurgeeɗ kɛ, "Kɛɛte baabuy." Nɛɓa sisa tongeeɗ Yeese kɛ, "Liki sinɛ tonun kɛ kɛɛte baabuyk,

¹⁸ agut sinɔ lakinkan babuyk a tuul, ma iɗit sinɛ sisɔ iin a sɛɛnik moko baabuy nook. Nɛ tonun eekeer."

¹⁹ Nɛɓa jarti sinɛ tongeeɗ kɛ, "Suumi naakɛ, ɗegera sisɔ kɛ iin iɗit pɛrkaakoŋk.

²⁰ Ugumerɓa ɔrɛyak gaŋk kurkum sineene raŋk, yakana sɔɔk iinak joop Ayuuduk toniir kɛ, 'Ɗɛyɛ joopa a ugumer Yorsaleeme dakɛɗa.' "

²¹ Nɛɓa Yeese tongeeɗ kɛ, "Iin jarti sini ŋaaditik, mɛlkikoy ɔɔtɛ sinɔkoy kirɗɔ ugumeet Baabɛya Waakoyota kurkum sineene raŋk maŋk Yorsaleemekiŋ."

²² Iinak joop Sɛmaariyaak ugumergiɗɔ Waakoyo sinɔ kiir ɗegerɔɔnuk, ma seek ugumguɗii Waakoyo sinɔ ɗegeriiŋɔŋk agut sinɔ bɔdɛ Ayuudeek.

²³ Mayakana joop sigɛ ugumergeeɗ eekeerɛk mɛlkikoy ɔɔtɛ sinɔkoy ugumerɗɔ Baabɛya Waakoyota wɛɛŋakɛ a eekeerɛkiŋ. Mɛlkikɔ ɓɔrɛ sisɔŋ. Ɗɛyɛ Baabɛ Waakoyot joop sigɔ ugumergeeɗ oko sinikik.

²⁴ Agut sinɔ ege Waakoyot Wɛɛŋak, nɛ joop sigɛ ugumergeeɗik ɗɛyɛ sɛɛga a ugumergeeɗ eekeerɛ a Wɛɛŋakɛ sigɔɔgɛ Geetitaanakik."

²⁵ Nɛɓa jarti sinɛ tongeeɗ kɛ, "Ɗegera kɛ mɛlkikoy Mɛsii sinɛ riyɛ kɛ Kereseekiŋ. Saakoy sɛŋk mɛlkiɗik tonukoy tina ola baŋɛ."

²⁶ Nɛɓa Yeese tongeeɗ kɛ, "Eet sɛɛn sinɛna totoniikaa sisɔk."

²⁷ Saaɓak mɛlɛrkiɓa nomtaana gɛɛnɛ saadiɓa kaargeeɗik. Nɛɓa reemɗi ɓayɛtun gɛŋk agut sinɔɓa dɛnɛrɗi Yeesee a totoni a jartik, yakana kɛɛ iɗit sinɔɓa tonu jartiya saa kɛ, "Ɗɛyin jikoŋk?" maŋk tonu Yeeseya kɛ, "Waasiɗiikari a jarti sinɛ agut jikonk?"

²⁸ Nɛɓa ŋɔr jarti sinɛ kebet nɛɛk, nɛ ŋaar katamɛya nɛ kɛɛ tonu joopa gɛɛna kɛ,

²⁹ "In kusɛɛ dɛnɛɛ iɗit sinɛ kɔta tonu any sinɛkan ijaagaak baŋɛk. Kaɗɛɛŋ sɛɛn Keresee yoo?"

³⁰ Agut sini ŋaararkiɓa joop katamɛɛ nɛ kaar son lak Yeeseek.

³¹ Ɔɔtɛ sinaanɛ kalɛyirɓa nomtaanak gɛɛnɛ Yeesee kɛ, "Rɔɔriytaano, ɗamte any om."

³² Yakanaɓa sɛŋk tonu sɛɛga kɛ, "Laka ɗama sinɔkɔɔ ɗamaaŋɔŋk sinɔ sɔɔk kiir ɗegerɔɔnuk."

³³ Nɛɓa nomtaanak gɛɛnɛ totoni ɛkanɛɛkɛ gɛŋk kɛ, "Anɛkɔ ɗɔkaageeɗ iɗit omaay ɗama?"

³⁴ Nɛ Yeese tonu sɛɛga kɛ, "Ɗama naak ijaag ɗɛyan Waakoyo sinɛ kanti wosɛykik, a dusanɛɛt ijaag nɛɛkik.

³⁵ Moko sɔɔk toniir kɛ, 'Dakɛɛtar ɛyɛker a aŋan nɛkɔɔ ɓaane toota.'? Ma saak tona kɔna kɛ, "In ɓɔŋgɔɔrɛɛ ɛɛk nɔ dɛnɛɛ tawunko, saakɔ gayɛɛɗ tootakik.

³⁶ Iɗit sinɛ ɗootiɗiik boŋu any sinɛ koyguɗɛɛkiŋ, tolɛ taamɛ wɛɛŋa sigɛkoy nɔkoy nɔkoyk. Agut sini iɗit sinɛ soowuɗik a iɗit sinɛ ɗootiɗiik yaa sɛɛga agut omoŋ.

³⁷ Agut sini eekeer rɔmɛ sinɛɓa tonɛɛ kɛ, 'Soowuɗi omaayiŋ, ma omaay ɗootiɗiiŋ.'

³⁸ Wosɛyakɔɔ saak kɔnu kɛnɔ ɗootiir any sinɔkɔ kirgiɗɔ bɔɔlaatik joop ɔgɔ bɔɔlaakɔ ijaag, ma sɔɔk kɔnyɛrɗɔ ɛɛk taamɛ any sinɛkɔ bɔɔlaageɗik."

³⁹ Nɛɓa ŋaadiɗi sɛɛne katamɛɛ sinaanɛ joop a ɓɔɔkaaŋ agut sinɔɓa jarti sinɛɓa Sɛmaariyaak waasɛɛɗ kɛ, "Tonukɔta any sinɛkan ijaagaak baŋɛk."

⁴⁰ Saaɓa joop kurakiɗ son lak Yeeseek, nɛɓa kalɛyir kɛnɔ gaala a sɛɛg agut omoŋ. Nɛɓa sɛŋk beeɗ saadi a ɗoŋ pɛɛy.

⁴¹ Ŋaadiɗiiɓa joop ɔgɔɔk a ɓɔɔkaaŋ sɛɛne agut pɛɛni nɛɛk.

⁴² Tonurɓa jartiya sinaana kɛ, "Moko ŋaadii sɛɛn sisɔ agut pɛɛni sinɛkɔ tina tonunk seŋkik dakɛɗa, ma agut sinɔkɔ ɓɔre tiyɛɗii ɗumaak. Nɛ ɗegerii kɛ sɛɛn ebɔdtan ɗookoŋk eekeerɛ."

Ebɔdɛ Yeese Tɔɔn Ɔɗɔwentoŋk

⁴³ Beeɗɓa Yeese Sɛmaariyaake a ɗoŋ pɛɛy, nɛ ŋaar Gɛlilaaka.

⁴⁴ Tonuɓa Yeese ɔɗɔwa nɛɛka jeemɛ kɛ, "Iɗit pɛrkaakoŋk kɛɛ eemɛyɔɔn ɗook nɛɛkɛɛk."

⁴⁵ Saaɓa Yeese kɛɛɗ Gɛlilaakaak, nɛɓa sɛɛn boŋur joop Gɛlilaak a mentanŋ agut sinɔɓa dɛnɛrɗi ola sigɛɓa ijaag saadik baŋɛ saaɓa atukuɗ Yorsaleeme Ba'aale Ɗoyiɗoŋk.

⁴⁶ Kɛɛɓa Yeese kɛkar saanaɓa ijaagiiɗ maawu a ogool wɛynik, katamɛya Kaanaak sinaana ar ɗook Gɛlilaak. Saaɓak lakɛɓa Kipirnahoome ɔɗɔwen om sinɔɓa gorgeeɗ tɔn nɛɛkɛkik.

⁴⁷ Nɛɓa sɛŋk tiyɛ kɛ Mɛlkikɔ Yeese ɗook Yuudaak Gɛlilaakaaŋ nɛɓa kegeɗiŋ. Nɛɓa kɛɛ kalɛyi Yeesee kɛnɔ kus Kipirnahooma kɛnɔ ebɔdgeeɗ tɔɔn nɛɛk sinɔ goru a ito rɛrŋɔŋk.

⁴⁸ Nɛɓa Yeese tongeeɗ kɛ, "Iinak ɔkɔn kiir taanta sɔɔriyɛ a ola sigɔ reemɗi ɓayɛkiŋ nɛ kiir ŋaadiɗiit."

⁴⁹ Nɛɓa ɔɗɔwen sinɛ tongeeɗ kɛ, "Suumi naakɛ, waɗiŋ a gorgor a in tɔn naakɛ ki rerin."

⁵⁰ Nɛɓa Yeese tongeeɗ kɛ, "Ŋaari nyaka nookaak, bɔdukukɔ tɔn nookɛɛŋ!" Ŋaadiɓa iɗit sinɛ pɛɛni sinɛɓa tongeeɗ Yeeseek nɛ ŋaar nyaka nɛɛkaak.

⁵¹ Saaɓa ŋaarɗik nɛɓa rookomar sɛɛn ijaager gɛɛnɛ gopɛ nɛ tonurgeeɗ, kɛ, "Bɔdukukɔ tɔn nookɛɛŋ."

⁵² Nɛɓa sɛŋk kɔɔniy sɛɛge sayiti sinɛkɔ bɔdukuɗ tɔn nɛɛkɛkik, nɛɓa sɛɛk tonurgeeɗ kɛ, "Ŋɔrkɔ sɛɛn paakan sinɛ ɛɛkoŋk alɛ ma sayitiyɛ tula pɛɛy."

⁵³ Ɗegerɓa ɛpɛna kɛ tongeeɗkɔ Yeese kɛ, "Bɔdukukɔɔ tɔn nookɛɛŋ." Ŋaadiɗiiɓa iɗit sinɛ sɛɛn a joop wɛy nɛɛkik baŋɛ Yeesee.

⁵⁴ Ege sigi sɔɔriyɛ pɛɛyeen nɛɛk sigɛɓa ijaag Yeese saaɓa kusuɗ Yuudaake Gɛlilaakaak.