Yowanis 2 - Kuumeet Sinɔ Tɔɔnuk Ad Majaŋeeroŋk

Weerɛ Yeese Maawu A Ogool

¹ Ɗoŋikɛ jiiteene nɛɛkɛɛk lakɛɓa waawan ɗook Gɛlilaak, katamɛɛ sinɔɔnɛ riyɛ kɛ Kaanaak. Nɛɓa ɓɔrɛ ɓɛɛlɛ ɛmɛsa Yeeseya saading.

² Maɓa ɓɔrɛ riyɛɛ Yeesee a nomtaanak gɛɛŋk waawana nɛɛkaang.

³ Nɛ saaɓa pedirɗi ogol wɛynik nyon sinaanɛ waawanoŋkuk, nɛɓa ɛmɛsa Yeeseya tonu Yeeseya kɛ, "Pedirkɔre sɛɛge ogolŋ."

⁴ Nɛɓa Yeese tongeeɗ kɛ, "Iin jarti sini, lakii eet a iin jikon? In ki gayɛɛ ɔɔtɛ naakɛk."

⁵ Saaɓak tonuɓa ɛmɛsa ijaageera sigaagaɓa atu saadik kɛ, "In ijaagɛɛ any sinɛ kɔna tonu sɛŋkik."

⁶ Lakɛɓa saadi gaaniyɛ sigɔɓa ijaagɛɛ sɛɛg giɗeek a tula om, joop Ayuuduk latuɓa ɔɔtɛ barɛ ŋaɗɛɗoŋk. Gaani sinɔ omoŋɔŋk gagiɗɛɛ maawu a kebetɔk pɛɛy maŋk jiit.

⁷ Nɛɓa Yeese tonu ijaageera gɛɛna kɛ, "In enyɛɛrɛɛ maawu gaaniyɛɛka gɛɛnaak." Nɛɓa sɛɛk enyɛɛrar sɛɛg kɛ rɛs.

⁸ Saadi baŋiya tonuɓa sɛŋk kɛ, "In ɛɛkikɛɛ sɛɛg sisɔ nɔ gaɓɛɛ sɛɛg ɔɗɔwenta sinaana wɔɔroŋk." Nɛ boŋur nɛ gaɓɛrgeeɗiŋ.

⁹ Saaɓa ɔɗɔwen sinɛ wɔɔroŋk paariiɗ maawu sigɛkan mɛyɛr a ogool wɛynik, nɛɓa ki ɗegerɔɔn kɛ ɗɔkɛɛkɔ sɛɛg eet, maɓa sɛŋk ijaager sigɛkan ɛɛkɛr maawu gɛɛŋkik ɗegerarŋ. Riyiriɓa ɔɗɔwen sinɛ wɔɔroŋk iɗit sinɛkɔ waawuguɗɛɛk,

¹⁰ nɛ tongeeɗ kɛ, "Widerki joop baŋɛ ɔɗɔɔkɛ ogool wɛynik taamɛ gɛɛŋk. Ma saa pɔyarɗi joop sigɛkɔ wɔɔrɛɛk baŋiya, nɛ widerki maawu gɛɛŋk. Yakanakɔ seŋk arin ogool sigɛ mentaanak sɛɛge baŋɛk a beeɗir mɛlɛɛɗa sisɔwa."

¹¹ Ijaagɓa Yeese sɔɔriyɛ sigi tuki sɔɔriyɛɛkoŋk baŋɛ tuki ɗook Gɛlilaak katamɛɛ Kaanaak. Yaaŋɛɓa eemɛyɔn nɛɛk oko sinik, nɛɓa nomtaanak gɛɛnɛ ŋaadiɗi sɛɛne.

¹² Saadi baŋiya ɓurɓuɗiɓa Yeesee a ɛmɛs a manyaakak a nomtaanak gɛɛŋk agut omoŋ Kipirnahooma. Nɛɓa kaar beeɗir saadi a ɗoŋ tekeriŋ.

Ɔɔyku Yeesee Joop Sigɔ Nagadɗi Godeey Sinaanɛ Geetitank

¹³ Saaɓa wɔɔŋkuɗ Ba'aal Ɗoyiɗoŋk Ayuuduk, nɛɓa Yeese kɛɛ Yorsaleema.

¹⁴ Nɛɓa dɛnɛ joop sigɔ ɓalɗiiɗ tɔgi a jiŋkuyɛ a kulɓeerakik Godeey sinaanɛ Geetitank. Nɛɓa ɓɔrɛ dɛnɛ joop sigɔ wonooyar worik a beebeɗar a atu wonooyan woriyoŋk.

¹⁵ Nɛɓa kɛny melt nɛ ɔɔyku joop baŋɛ a jiŋkuyɛ a tɔgi Godeey sinaanɛ Geetitank. Nɛɓa kɛɛtɛ wori joop sigɛ wonooyar worik, ɛɓa gupar tarbesɛyɛ gɛŋkiŋ.

¹⁶ Nɛɓa tonu joopa sigaaga ɓaɓali kulɓeerakɛk kɛ, "In boŋiirɛɛ ola sigi sɔ! Kat ijaagiir gode Baabɛɛk a gode nagadoŋk!"

¹⁷ Nɛɓa ɔɔtɛ sineene koɓurkuɓa nomtaanak gɛɛnɛ any sinɛɓa taapɛɛ Wargatɛɛ Waakoyotoŋk kɛ, "Moɗɛti nyeken sinɛ laka agut gode nookuk a ito maɗik."

¹⁸ Saadi baŋiya ɔɗɔweer Ayuuduk tonurɓa Yeeseya kɛ, "Ijaagin tina sɔɔriyɛ kɛ jikonak. Nɔkɔɔ ɗegerɗii kɛ lakin ɓaŋkawuka sinɔ ijaagiiɗin any sinik?"

¹⁹ Nɛɓa Yeese tonu sɛɛga kɛ, "In aalɛɛ Gode sini Geetitank, nɛkɔɔ saak kɛnya ɗoŋikɛ sigɔɔgɛ jiitik."

²⁰ Nɛɓa sɛɛk tonurgeeɗ joop Ayuuduk kɛ, "Saaɓa kɛnyɗɛɛ Gode sini Geetitank ruumeɓa emeyik a pɔlpɔlɛ joop pɛɛyk a tula om, anɛ seŋk kɛnyin ɗoŋikɛ sigɔɔgɛ jiitik?"

²¹ Yakanaɓa tonu Yeese kɛ Gode sinɛ Geetitank taar nɛɛk.

²² Saaɓa Yeese ŋaarkiɗ ret walasak, nɛɓa nomtaanak gɛɛnɛ koɓurku any sini. Nɛɓa ŋaadir pɛɛni sinɛɓa taapɛɛ Wargatɛɛ Waakoyotoŋkuk a sinɛɓa tonu Yeeseek.

²³ Saaɓa Yeese arkiɗ Yorsaleeme ɔɔtɛ Ba'aale Ɗoyiɗoŋk, nɛɓa joop a ɓɔɔkaaŋ ŋaadiɗi sɛɛne agut sinɔɓa dɛnɛrɗi sɔɔriyɛ sigɛɓa ijaagik.

²⁴ Yakana agut sinɔɓa Yeese ɗegerɗi joop baŋɛk, nɛɓa ki sɛɛg ŋaadit.

²⁵ Agut sinɔɓa sɛŋk ɗegerɗi any sinɔ ar ɓayaay etoŋkuk baŋɛk, nɛɓa kiigeeɗ ɗɛyɛ iɗit sinɔ waasigeeɗ ɔɔtɛ etoŋkuk.