Yowanis 18 - Kuumeet Sinɔ Tɔɔnuk Ad Majaŋeeroŋk

Gaamur Yeesee Gumaaker Gɛɛnɛk

¹ Saaɓa Yeesee toniiɗ sinik baŋiya, nɛɓa kaar a nomtaanak gɛɛŋk ɗɛɛgasɔ koor sinɔ kɛ Kediroonuk. Nɛɓa mɛlɛr Sɛɛn a nomtaanak gɛɛŋk nyona waayanakoŋk sinɔɔna ar saadik.

² Agut sinɔɓa totoliiɗ Yeese a nomtaanak gɛɛŋk ɓɛɛnyɔwɛ gɛɛŋk baŋɛ saadik, nɛɓa Yuudaa sinɛɓa gaɓɛ sɛɛnik ɗeger saaniŋ.

³ Nɛɓa Yuuda ɗɔku amaasiniyɛ a ijaageer sigɔɓa wosɛykɛɛ sɛɛg sooy lak ɔɗɔweer tapa ŋaadiyɛɛkoŋk a joop Paarisik nɛ kurak saana. Ɗɔkarkiɓa ola sigɔ ɗaawurŋɔŋk a payɛyiik a beyakak a aarɛɛ.

⁴ Ɗegerɓa Yeese any sinɛkɔɔ laŋkik baŋɛ, nɛ kɛɛ son lak sɛɛgik, nɛ tonu sɛɛga kɛ, "Ɗɛyɛɛr wooɗ?"

⁵ Nɛɓa sɛɛk tonurgeeɗ kɛ, "Ɗɛyii Yeesee kɔ Naajreetik." Nɛɓa sɛŋk tonu sɛɛga kɛ, "Eet sɛɛn." Ɛtɛtɛɗarɓa Yuuda sinɛɓa gaɓɛ sɛɛnik a sɛɛg agut omoŋ.

⁶ Saaɓa Yeese toniiɗ sɛɛga kɛ, "Eet sɛɛnik", nɛɓa murar baŋi takan nɛ ɗiirar ɗooka.

⁷ Nɛɓa Yeese kɔɔniy sɛɛg kɛkar kɛ, "Ɗɛyɛɛr wooɗ?" Nɛɓa sɛɛk tonurgeeɗ kɛ, "Ɗɛyii Yeesee kɔ Naajreetik."

⁸ Nɛɓa sɛŋk tonu sɛɛga kɛ, "Tonakɔ kɔna kɛ eet sɛɛn. Sisɔ ɔkɔn ɗɛyɛɛr eetiŋ, in ŋɔɗɛɛ joop sigi nɔ ŋaarar."

⁹ Nɔ ɓɛɛlɛɛɗ sinik kɛnɔ dusanɛɛ pɛɛni sinɛɓa tonu sɛŋk kɛ, "Iin Baabɛɛ joop sigɛ kanta gaɓun sɛɛgik kɛɛ aasi sinɔ omoŋɔŋk kante badɛk."

¹⁰ Saaɓak lakɓa Simion Petros aarɛ, nɛɓa koyowuku nɛ kɛtɛ nɛ yawuku weena ijaagen ɔɗɔwen tapa ŋaadiyɛɛkoŋkuk gɔɔ sinɛ ɗiɗikik. Riyɛɛɓa ijaagen nɛɛk kɛ Malkoos.

¹¹ Nɛɓa Yeese tonu Petrosa kɛ, "Jumuru aarɛ nook kokɛya nɛɛkaak. Koɓun kɛ kaa gun uteeɗ tuu rakatɛyoŋk sinɛ kanta gaɓɛ Baabɛɛk?"

Wideer Ɛɛk Yeese Son lak Ɔɗɔwen Tapa Ŋaadiyɛɛkoŋk Sinɛ Obiik Haanaak

¹² Saadi baŋiya amaasiniyɛ gɛɛŋk a ɔɗɔwen nɛŋk a ɔɗɔweer koortaanakoŋk Ayuuduk gaamurɓa Yeesee nɛ korkodarŋ.

¹³ Nɛɓa tuki nɛɛkɛ diiler son lak Haanaak. Egeɓa Haanaa keerɛɛk Kɛyaapaa sinɛ ɔɗɔwen tapa ŋaadiyɛɛkoŋkuk sinɛ obiik eme sinaanɛɓak.

¹⁴ Tonuɓa Kɛyaapa ɔɗɔweera Ayuuduk kɛ, "Dɔɔs a rɛr iɗit a omoŋ agut joop sigɛ ɓɔɔkaak."

Kaadɛ Petros Yeesee

¹⁵ Simion Petros a nomtan om nomɛrɓa Yeesee. Nomtan sinɛ omk agut sinɔɓa ɗegerɗɛɛ sɛɛn sooy lak ɔɗɔwen sinɛ tapa ŋaadiyɛɛkoŋkuŋ, nɛɓa guugunyar a Yeesee agut omoŋ keera sinaana ɔɗɔwen tapa ŋaadiyɛɛkoŋkuk,

¹⁶ maɓa sɛŋk Petros ɛtɛ walas tugaat nɛɛkɛ jɔk. Nɛ mɛlki nomtan sinɛɓa ɗegerɛɛ sooy lak ɔɗɔwen tapa ŋaadiyɛɛkoŋkuk, nɛ kus tonu peeta sinaana kookor tuga nɛɛkik nɛ gaɓɛɛr Petros takana.

¹⁷ Nɛɓa peet sinɛ kookor tugaak tonu Petrosa kɛ, "A moko ege omaay iin nomtaanakɛ iɗit sinik?" Nɛɓa sɛŋk tonu kɛ, "Moko eet sɛɛn."

¹⁸ Maɓa ijaager gɛɛnɛ a ɔɗɔwer koortaanakoŋk adir maɗ loolomikoŋk nɛ ɗiiɗiri ɛtɛɗɔɔgɛ agut sinɔɓa salokuɗŋɔŋk. Nɛɓa ɓɔrɛ Petros ɛtɛtɛr nɛ ɗiira a sɛɛg agut omoŋ.

Kɔɔniy Ɔɗɔwen Sinɛ Tapa Ŋaadiyɛɛkoŋk Yeesee

¹⁹ Saaɓak kɔɔniyɓa ɔɗɔwen sinɛ tapa ŋaadiyɛɛkoŋk Yeesee agut nomtaanak gɛɛŋk a rɔɔriyɔn nɛɛk.

²⁰ Nɛɓa Yeese tongeeɗ kɛ, "Tonɗiikaakan joopa ɗookoŋk a mɛlɛŋ, rɔɔriyaakaakan ɓɛɛnyɔwɛ gɛɛŋk baŋɛ saadikan tolɗiiɗ joop Ayuuduk godeey tolɛɛɗoŋk Ayuuduk maŋk Godeey sinaanɛ Geetitank. Kɛɛ any sinɔkan tona dugeeɗik.

²¹ A nɛti kɔɔniyin agut jikon? Kɔɔniyi joop sigɛkan tiyɛr saakan tonɗiiɗa sɛɛgaak. Ɗegerar sɛɛk any sinɛkan tonaakiŋ."

²² Saaɓa Yeese toniiɗ sinik, nɛɓa ɔɗɔweerɛ koortaanakoŋk sigaagɛkan ɛtɛtɛɗar saadik tonu omaay Yeeseya kɛ, "Jumurun ɔɗɔwenta tapa ŋaadiyɛɛkoŋk sinaana obiik oko sinɛk?" nɛ paaŋiŋ.

²³ Nɛɓa Yeese tongeeɗ kɛ, "Ɔkɔnkɔ tona any sinɔ moko likik, nɛtɔ waasi any sinɛkɔ tonaak. Mayakana ɔkɔn liki any sinɛkɔ tonaakiŋ, nɛti paaŋin agut jikon?"

²⁴ Saadi baŋiya wosɛyɛɓa Haanaa Yeesee a ɓɛɛlɛ oko sinɛkɔ korkorɗɛɛk son lak Kɛyaapaa sinɛ ɔɗɔwen tapa ŋaadiyɛɛkoŋk sinɛ obiik.

Kaadɛ Petros Yeesee Kɛkar

²⁵ Saaɓak ɛtɛtɛrɓa Simion Petros a ɗiiɗir maɗ, nɛɓa tonurgeeɗ joop ɔgɔɔk kɛ, "Moko ege omaay iin nomtaanakɛ Yeeseek?" Nɛɓa sɛŋk kaadɛ a tonu kɛ, "Moko eet sɛɛn."

²⁶ Ijaageerɛ sigaagɛ ɔɗɔwen tapa ŋaadiyɛɛkoŋkuk om, iɗit sinɔɓa tekaan iɗit sinɛɓa yawuku Petros weena nɛɛkik, nɛɓa kɔɔniy kɛ, "Moko tonu dɛna a iin a sɛɛn nyon sinaanɛ waayanakoŋk?"

²⁷ Nɛɓa Petros kaadɛ kɛkar, nɛ sisa ɗooru koogele.

Wideer Ɛɛk Yeese Taamɛka Pilatoosuk

²⁸ Saadi baŋiya diilerɓa Yeesee woy Kɛyaapaak keera suumi Roomuk. Egeɓa ɔɔtɛ nɛɛkɛ kolɛ. Agut sinɔɓa ɗɛyɛɛɗɛɛ a ɗamar joop Ayuuduk jiŋkuy Ba'aal Ɗoyiɗoŋk, nɛɓa kir guugunyɔn keera sinaana suumiyoŋk kɛnɔ kat dakɛr a somkaanak.

²⁹ Nɛɓa Pilatoos ŋaarki son lak sɛɛgik nɛ kɔɔniy sɛɛg kɛ, "Widerkɔɔkɔ ete sineene daari kɛ jikon?"

³⁰ Nɛɓa sɛɛk jumurargeeɗ kɛ, "Ɔkɔnkɔ moko sini iɗit sinɔ ijaag tikiyɛɛkiŋ, nɛ gunkɔna kii gaamit."

³¹ Nɛɓa Pilatoos tonu sɛɛga kɛ, "In diilɛɛ nɔ kaar pɛrɛdɛrdɔ oko higi noŋk." Nɛɓa tonurgeeɗ ɔɗɔwer Ayuuduk kɛ, "Kɛɛɓa tina pɛgɛdɛɛt kɛnɔ ɓokotii iɗititk."

³² Nɔ ɓɛɛlɛɛɗ sinik kɛnɔ dusanɛɛ pɛɛni sinɛɓa tonu Yeese kɛ rɛrkɔɔ rer sinɔ ɓɛɛlɛ ɛkik.

³³ Weeriiɓa Pilatoos kɛkar nɛ guuguny keera nɛɛkaak, nɛɓa riyki Yeesee nɛ kɔɔniy kɛ, "Iin tapaɗ Ayuuduk?"

³⁴ Nɛɓa Yeese tongeeɗ kɛ, "Tonun sini aɗoy nookɛ, maŋk kɔna tonur ɔɔtɛ naak joop ɔgɔɔk?"

³⁵ Nɛɓa Pilatoos tongeeɗ kɛ, "Ma eet iɗit Ayuuduk? Gaɓɛrkɔtaani joop gooŋk a ɔɗɔweer tapa ŋaadiyɛɛkoŋk. Makɔ ijaagin jikon?"

³⁶ Nɛɓa Yeese jumur kɛ, "Moko ar burɛ naakɛ ɗook sineene raŋk. Ɔkɔn burɛ naak ɗook sineene raŋk, nɛ gunta kaarar ijaager gaanɛ kɛnɔ kat ɗiirira ariita ɔɗɔweer Ayuuduk. Yakana moko ar burɛ naakɛ ɗook sineene raŋk."

³⁷ Nɛɓa Pilatoos tongeeɗ kɛ, "Anɛ iin Tapaɗ?" Nɛɓa Yeese jumurgeeɗ kɛ, "Eet Tapaɗ oko sinɛ toniiɗink, ɓartɛɛɓati nɔ kusa ɗooka kɛnɔ waasa eekeer, iɗit sinɔ ar eekeerɛk tiyɛ koŋgoy naakiŋ."

³⁸ Nɛɓa Pilatoos tonu kɛ, "Eekeer jikon?" Saadi baŋiya ŋaarkiɓa Pilatoos nɛ kɛɛ son lak joop Ayuuduk nɛ tonu sɛɛga kɛ, "Kɛɛ tikiyɛ sigɔkɔ saak laŋkiɗa sɛɛgik.

³⁹ Mayakana oko barɛ noŋk Ba'aalakɛ Ɗoyiɗoŋk baŋɛ woorka kɔna iɗit a omoŋ. Nɛ ɗɛyɛɛr a kɔna woorka tapaɗ Ayuudukuŋ?"

⁴⁰ Yakanaɓa sɛɛk ooyɛr kɛ, "Woora tina Bɛrbaan, ma moko iɗit sini!" Maɓa sɛŋk Bɛrbaan iɗit sinɔ sɔɔsɔk ɓɛɛlɛtik.