Yowanis 17 - Kuumeet Sinɔ Tɔɔnuk Ad Majaŋeeroŋk

Ɗanɗamɔn Yeeseek

¹ Saaɓa Yeese toniiɗ sinik baŋiya, nɛɓa ɓɔŋgɔɔrɛ ɛɛk nɛ dɛnɗi dariya nɛ ɗanɗama kɛ, "Iin Baabɛɛ, gayɛkɔ ɔɔtɛ nɛɛkɛɛŋ. Kɛnɔnu eemɛy Tɔn nookɛ eemɛyi Tɔɔn nook,

² agut sinɔkan gagiɗin ɓaŋkawuka, joope sigaagɛ atu ɗook raŋk baŋɛk, kɛnɔ gaɓɛ wɛɛŋa sigɛkoy nɔkoy nɔkoyk sigɛkan gagiɗin sɛɛg baŋɛk.

³ Wɛɛŋa sigɛkoy nɔkoy nɔkoyk ɗegerɔn nook iin sinɛ Suumi sinɛ omoŋɔŋk sinɛ eekerkank, a Yeesee Keresee sinɛkan wosɛykin ɗookak.

⁴ Eemɛya kanni ɗook raŋk a ijaaga ijaag sinɛkanta gaɓunk.

⁵ Iin Baabɛɛ, sisɔ eemɛyi ɓɔrɛti sooy lak iinik, eemɛyɔɔn sinaanɛɓa laka a tukiɗi saaɓa riiɓeeɗɛɛ ɗook jeemɛk.

⁶ "Yaaŋakan kɛ iin wooɗ joopa sigaagakan daamun sɛɛg ɗook raŋk nɔkanta gaɓun sɛɛgkiŋ. Sɛɛg kan gooŋk, nɛ kanta gaɓun sɛɛgiŋ, koorɛrkan sɛɛk pɛɛni nookuŋ.

⁷ Ɗegerar sisɔ kɛ ar sooy lak iinik any sinɛkanta gaɓunk baŋɛ.

⁸ Gaɓaakan sɛɛga pɛɛni sinɛkanta gaɓunkuŋ nɛkan sɛɛk boŋurŋ. Ɗegerar eekeerɛ kɛ kusaakan sooy lak iinik, ŋaadir kɛ wosɛykin kanti iin.

⁹ Moko saak kalɛyɗiigiɗa ɗoo, ma kalɛyɗiika agut joop sigi kɔta gaɓun sɛɛgik, agut sinɔ gooŋkuk.

¹⁰ Any sinɔ naakik baŋɛ nɛ nook, ma sinɔ nookuk nɛ naak. Eemɛyarti sɛɛkiŋ.

¹¹ Kaakɔɔ saak beeɗit ɗook raŋk atukiɗi sisɔ, ma sɛɛk atu ɗook raŋk. Kɔra saak son lak iinik. Iin Baabɛɛ sinɛ Geetitank. Joop sigikanta gaɓun sɛɛgik kɛnɔ ɓɛɛlɛr a omoŋ oko eteŋk, kooru sɛɛg tiriyaakɛ sigaagɛkanta gaɓun sɛɛgik.

¹² Saakan eet a sɛɛgik, koorakan sɛɛg tiriyaakɛ goonɛ sigaagɛkanta gaɓun sɛɛgkiŋ. Koorakan sɛɛg agut sini kɛnɔ dusanɛɛ pɛɛni sinɛɓa taapɛɛ Wargatɛɛ Waakoyotoŋkuk kɛɛ iɗit sinɔkoy badɛ sɛɛgeek adaktan, toomoy sinɔɔnɛkoy badɛk sɔgɔɔsɔyk.

¹³ "Kɔra saak sisɔ son lak iinik. Saa arkiɗa ɗook sineene raŋk, kɛnɔ yaaka naakɛ bɛɛlɛ adaktan sooy lak sɛɛgik agut any sinɛ waasaak.

¹⁴ Gaɓaakan saak sɛɛga pɛɛni nookuŋ. Oko sinɛ moko eet iɗit ɗookoŋk, nɛ ɓɔrɛ moko sɛɛg joop ɗookoŋk nɛ ɓooyu sɛɛg ɗookuŋ.

¹⁵ Kalɛyaan kɛnɔ sɛɛg koorun setane mani kaa kalɛyit kɛnɔ sɛɛg boŋiirin ɗook walasa.

¹⁶ Oko sinɛ moko eet iɗit ɗookoŋk, nɛ moko ɓɔrɛ sɛɛg joop ɗookoŋk.

¹⁷ Geeti sɛɛg eekeerɛ goonɛk. Ege pɛɛni nookɛɛk eekeer.

¹⁸ Oko sinɛkanti wosɛykiɗin ɗookak, nɛkan ɓɔra wosɛya sɛɛg ɗooka.

¹⁹ Kɛnɔkɔɔ sɛɛg geetitaanak eekeerɛ, ara ɛɛk naak a eet geetitan.

²⁰ "Kalɛyaan goy pɛɛni nɛŋkik agut sinɔ ŋaadirɗi eetik, ma mokonu kalɛya agut sɛɛg dakɛɗa.

²¹ Iin Baabɛɛ, kalɛyaan kɛnɔ sɛɛg omoŋ baŋɛ, maɓɔrɛ oko sinɛ arkiɗin eeteek. Maɓɔra kalɛyaan oko sinɛ arkiɗa iinek kɛnɔ ɓɔrɛ sɛɛk atu eteŋkɛ kɛnɔ ŋaadi ɗook kɛ wosɛykin kanti iin.

²² Gaɓaakan sɛɛga eemɛyɔn sinɛkanta gaɓunk kɛnɔ sɛɛg omoŋ oko sinɛ eteŋk omoŋɔŋk.

²³ Kalɛyaan kɛnɔ sɛɛg omoŋ eekeerɛ, oko sinɛ arkiɗa sɛɛge, ɛ oko sinɛ arkiɗin eeteek. Saakoyk ɗegerkoy ɗook kɛ wosɛykinkantiŋ, ɛkoy ɗeger kɛ porun sɛɛg oko sinɛ poriiɗin eetik.

²⁴ "Iin Baabɛɛ, agut sinɔkanti poriiɗin a inɓa kɛɛ riiɓɛɛ ɗook kɛnɔ dɛnɛr eemɛyɔn sinɛkanta gaɓunk joop sigikanta gaɓun sɛɛgik, ɗɛya kɛnɔ beeɗir a eet agut omoŋ saadi arkiɗaak.

²⁵ "Iin Baabɛɛ sinɛ mentank, kirni ɗegerɔɔn joop ɗookoŋk ma saakini ɗegeraaŋ. Joop sigi ɗegerar kɛ wosɛykinkanti iin.

²⁶ Mɛyin sinɛti poriiɗink kɛnɔ ar sooy lak sɛɛgik, ɛ kɛnɔ arkaa sɛɛge, araakɔ sɛɛg kɛnɔ ɗegerar iin, ɛkɔɔ ara sɛɛg kɛnɔnu ɗegerar."