Yowanis 15 - Kuumeet Sinɔ Tɔɔnuk Ad Majaŋeeroŋk

Ege Yeesee Kɛɛt Wɛynik Sinɔ Eekerkank

¹ "Eet kɛɛt wɛynik sinɔ eekerkank, ma ijaagen sinɛ waayanakoŋk Baabɛɛ.

² Rɛkɛnan sinɛ ar eete nɛ ki gaamit taamɛk baŋɛ, yawɛkoy Baabɛ nɛ oruŋ. Ma rɛkɛnan sinɛ gaɓɛ taamɛk, isiisekɔɔ kɛnɔ gaɓɛ taamɛ a kaalɛŋ.

³ Sisɔ iinak mentankari agut pɛɛni sinɛkɔ kɔna tonaak.

⁴ In beeɗɛɛ eete, maɓɔra beeɗaa iinakɛ. Oko sinɛ ɔkɔn rɛkɛnant kɛɛt wɛynik moko ar keet nɛɛkɛkiŋ, nɛ ki oolɛ a riiɓe taamɛ ɔɔtɛ nɛɛkɛ mowanŋɔŋk. Nɛ ɔkɔn ɓɔrɔ kiir beeɗit eeteeŋ, kiir oolɛ a gaɓɛɛr taamɛŋ.

⁵ "Eet kɛɛt wɛynik, ma iinak rɛkɛnak. Iɗit sinɔ beeɗ eete, ɛ ɓɔra beeɗaa sɛɛnek, gaɓɛ iɗit sinɛ taamɛ a ɓɔɔkaaŋ. Agut sinɔ kɛɛ any sinɔ oolɛɛr a ijaagiir a kiiɗɛ eetik.

⁶ Iɗit sinɔ ki beeɗit eeteek ito rɛkɛnan sinɔ oriirɛɛ walasa nɛ paalorŋɔŋk. Nɛkɔɔ tolɛɛ nɛ oriirɛɛ maɗa nɛ ɗamŋ.

⁷ Ɔkɔn beeɗiir eeteeŋ ɛ pɛɛni naakɛ beeɗ iinakɛɛŋ, any sinɛ kalɛyiirik baŋɛ laŋiirkɔɔŋ.

⁸ Ɔkɔn gaɓɛɛr taamɛ a ɓɔɔkaaŋ, ɛ yaaŋɛɛr kɛ iinak nomtaanak gaaŋkiŋ, nɛ eemɛyɛɛ Baabɛɛ agut any sini.

⁹ "Poraɓa saak kɔnu oko sinɛɓati poriiɗ Baabɛɛk. Nɛ in beeɗɛɛ mɛyin naakɛk.

¹⁰ Kooraɓa sekiyɛ Baabɛɛk, ɛ beeɗaa mɛyin nɛɛkɛɛk, nɛ ɔkɔn ɓɔrɔ koorɛɛr sekiyɛ gaaŋkiŋ, nɛkɔɔ beeɗiir mɛyin naakɛk.

¹¹ Tonakan kɔna sini kɛnɔ kɔna yaa yaakat sinaanɛkan gaɓaak, ɛ kɛnɔ in enya yaaka noŋk.

¹² Sekiyɛ gaaŋk sinɔ kɛ in poporiikɛɛ ɛkanɛɛkɛ goŋk oko sinɛ kɔnu poriiɗaak.

¹³ Kɛɛ ete mɛyin sinɔ kaalɛ a gaɓɛ wɛɛŋa gɛɛŋk agut tekaaneer gɛɛŋkik.

¹⁴ Ɔkɔn ijaagiir any sinɛ kɔna sekaakiŋ, nɛ iinak tekaaneer gaaŋk.

¹⁵ A tukiɗi sisɔ kaakɔɔ kɔnu tirii kɛ ijaageer agut sinɔ ijaagent kiiɗ ɗegerɔɔn any sinɛ ijaag suumi nɛɛkɛkik. Nɛ kɔnu riya kɛ joop sigɔ pora sɛɛgŋɔŋk. Agut sinɔkan kɔna yaaŋɛɛɗa any sinɛkan tiyka sooy lak Baabɛɛkiŋ.

¹⁶ Mokokanti daamari iinak, makan kɔnu daama eet, suumakan kɔnu kɛnɔ ŋaarari nɔ kaar gaɓɛɛr taamɛ a ɓɔɔkaaŋ kɛnɔkoy beeɗir taamɛ sigɛ gaɓɛɛrik ɓɛɛnyɔwɛ gɛɛŋk baŋɛ. Nɛ any sinɛ kalɛyiir Baabɛye tiriyaakɛ gaanɛk baŋɛ gaɓɛkɔɔ kɔnaaŋ.

¹⁷ Sisɔ sinɛ kɔna sekaak kɛnɔ poporiikɛɛ ɛkanɛɛkɛ goŋk.

Tonɗi Yeese Agut Ɓooyan Ɗookoŋk

¹⁸ "Ɔkɔn kɔnu ɓooyur joop ɗookoŋkuŋ in ɗegerɛɛ kɛ ɓooyurkan jeemɛ eet.

¹⁹ Ɔkɔn iinak joop ɗookoŋkuŋ, nɛ gun kɔnu ɗook poruŋ. Yakana agut sinɔ moko iinak joop ɗookoŋkuk, ɛ agut sinɔkan kɔnu pakatkiɗa ɗook nɔkan kɔnu daamaak, nɛ kɔnu ɓooyu ɗookuŋ.

²⁰ In koɓukɛɛ any sinɛkan kɔna tona kɛ, 'Ijaagen ki kaalɛt suumi nɛɛkik.' Ɔkɔnkanti epaayarŋ, nɛkɔɔ ɓɔrɛ kɔnu epaayarŋ. Ɔkɔnkan koorɛr pɛɛni naakiŋ, nɛkɔɔ ɓɔrɛ koorɛr pɛɛni noŋkuŋ.

²¹ Agut sinɔ kirɗi ɗegerɔɔn Baabɛɛ sinɛkanti wosɛykik, nɛkɔɔ kɔna ijaagir any sini baŋɛ agut tiriya gaaŋk.

²² Ɔkɔnkan kiika deran nɔ kusa tona sɛɛga, gunkoy sɛɛga ki dakɛ a tikiyɛ, yakana sisɔ kirkɔɔ oolɛ a tonur kɛ, 'Moko tikiyɛ any sinɛkan ijaagiikiŋ'.

²³ Iɗit sinɔ ɓooyu eetik ɓooyu ɓɔrɛ Baabɛɛŋ.

²⁴ Ɔkɔnkan kaa ijaagɛ sɛɛge kɔɔr any sinɔkan ki ijaagɛ iɗit omaayk, gunkoy sɛɛga ki dakɛ a tikiyɛ. Yakana sisɔ saakɔ dɛnɛrɗi ola sigik, nɛ ɓooyur eet ɛ ɓooyur Baabɛɛ.

²⁵ Nɔ ɓɛɛlɛɛɗ sini kɛnɔ dusanɛɛ pɛɛni sinɛɓa taapɛɛ Wargatɛɛ Waakoyotoŋk kɛ, 'Ɓooyurtu higii nɛŋk sɔkɔnk.'

²⁶ "Yakana wosɛykaakɔɔ kɔna Gaanantan, Wɛɛŋa sigɔ Geetitaanakik eekeeroŋk. Kurakkɔɔ sɛɛk sooy lak Baabɛɛk nɛkɔɔ sɛɛk waasɛr ɔɔtɛ naak.

²⁷ Maɓɔrɛ iinak agut sinɔɓa iinak a eet a ŋaarki tuki nɛɛkɛkik waasɛɛrkɔɔŋ.