Yowanis 11 - Kuumeet Sinɔ Tɔɔnuk Ad Majaŋeeroŋk

Rer Alaajaarik

¹ Lakɛɓa iɗit sinɔ riyɛ kɛ Alaajaarik sinɔɓa goruŋɔŋk. Beeɗirɓa sɛŋk sɛɛn a Maariyam a manya Martaa mɛndɛre Bitaniyaak.

² Maariyam sinɛɓa buke Suumi reyaayek nɔɓa poosɛ amikɛ gɛɛnɛk derak gɛɛŋkik. Goruɓa Alaajaar sinɛɓa manya Maariyamaak.

³ Nɛɓa masiikeenak sigɛ pɛɛyk wosɛyɗi son lak Yeeseek, nɛ kɛɛɗɛɛ tonguɗɛɛ kɛ, "Suumi naŋk, gorure iɗit sinikɔ porunkuŋ."

⁴ Saaɓa Yeese tiyɛɛɗ sinik, nɛɓa tonu kɛ, "Moko ege sini gori sinɔ rɛɛrɛɛŋɔŋk. Mayakana kɛnɔ dakɛ a eemɛyɔn Waakoyotoŋk ɛ kɛnɔkɔɔ eemɛyɛɛ Tɔɔn Waakoyotoŋk agut any sini.

⁵ Poruɓa Yeese Martaa, a Maariyam, a manya nɛŋk Alaajaariŋ.

⁶ Yakana saaɓa tiyɛɛɗ gori Alaajaarik, nɛɓa beeɗ saadi arkiɗik a ɗoŋ pɛɛy.

⁷ Saadi baŋiya tonuɓa nomtaanaka gɛɛna kɛ, "Koy muurii ɗooka Yuudaak."

⁸ Nɛɓa nomtaanak gɛɛnɛ tonurgeeɗ kɛ, "Suumi naakɛ, ɔɔtɛ sinɔɔnɛ balaaŋɔŋk ɗɛyɛr kɔnu joop Ayuuduk baabaala. Anɛ muurun son kɛkar?"

⁹ Nɛɓa Yeese jumur sɛɛga kɛ, "Moko waawuy sinɔɔnɛ omoŋɔŋk lakɛ sayitiyɛ sigɔ pɛɗɛrkiɗ ɗɛɛk a aarin a pɛɛy? Iɗit sinɔ weeweri waawuyk ki gagaŋ agut sinɔkoy dɛnɛɛɗ pɛɗɛrka ɗoo sinikik.

¹⁰ Mayakana iɗit sinɔ weeweri kaaltik gagaŋ agut sinɔ kiiɗɛ pɛɗɛrkaak."

¹¹ Saaɓa Yeese toniiɗ sinik baŋiya, nɛɓa tonu sɛɛga kɛ, "Ɗeegar manya eteŋka Alaajaarŋ, nɛ kɛɛɗa ɓɔŋgɔrka ɗoŋɛ gɛɛnɛk."

¹² Nɛɓa nomtaanak gɛɛnɛ tonurgeeɗ kɛ, "Suumi naŋk, ɔkɔn ɗeegarŋ nɛ lageeɗ eeraaŋ."

¹³ Tonuɓa Yeese sini agut rer Alaajaarik, yakanaɓa sɛɛk koɓur kɛ tonu sɛɛga ɗoŋ.

¹⁴ Saaɓak tonuɓa sɛɛga Yeese kɛ ɗɔm kɛ, "Rɛrkɔrɔ Alaajarŋ.

¹⁵ Kɛnɔkɔɔtu ŋaadiir agut sini yaataaŋ agut sinɔ kɔtu kiiɗɛ saadik agut iinak. Nɛ sisɔ koy kɛɛɗii son lak sɛɛnik."

¹⁶ Saaɓak Toomaas sinɛɓa riyɛ kɛ Didimoosuk tonuɓa nomtaanaka sigaaga ɔgɔɔk kɛ, "Koy ɓɔre kɛɛɗii rɛɛrii a sɛɛn agut omoŋ."

Ege Yeese Ŋaarin Ret Walasak Ɛ Wɛɛŋa

¹⁷ Mɛlɛɓa Yeese Bitaniyaaka ma ɗoŋ aŋan sigɛkan kɔwuɗɛɛ Alaajaarik.

¹⁸ Ege Yorsaleeme Bitaniyaaka yowɛrka nɛɛkɛ kiilo meetera jiit.

¹⁹ Kurakɓa joop Ayuuduk a ɓɔɔkaaŋ son lak Martaa a Maariyamuk kɛnɔ gaanaanir sɛɛg agut rer manya nɛŋkik.

²⁰ Saaɓa Martaa tiyɛɛɗ mɛlɛɛ Yeeseek, nɛɓa kɛɛ kɛnɔ kɛɛ boŋuɗ, maɓa sɛŋk Maariyam dakɛ woy.

²¹ Nɛɓa Martaa tonu Yeeseya kɛ, "Suumi naakɛ, ɔkɔnkɔre ɓɛɛlin seediiŋ, gunkɔ manya eeta ki rerin.

²² Yakana ɗegera sisɔ kɛ any sinɛ kalɛyin baŋɛ gaɓɛkɔɔna Waakoyotuŋ."

²³ Nɛɓa Yeese tongeeɗ kɛ, "Ŋaarkikɔɔ masookooy ret walsaaŋ."

²⁴ Nɛɓa Martaa tongeeɗ kɛ, "Ɗegera kɛ ŋaarkikoy ret walasa waawuy sinaanɛkoy pediyoŋkuŋ."

²⁵ Nɛɓa tongeeɗ Yeese kɛ, "Eet iɗit sinɔ boŋku iɗit ret walasak ɛ eet wɛɛŋa. Iɗit sinɔ ŋaadi eetik, kɛygun rɛrkɛɛŋ beeɗkɔɔ wɛɛŋakɛ.

²⁶ Iɗit sinɔ beeɗ wɛɛŋakɛk ɛ ŋaadi eetik kikoy rerin adaktan. Ŋaadin siniŋ?"

²⁷ Nɛɓa tonu kɛ, "Ii, Suumi naakɛ. Ŋaada kɛ iin Keresee, Tɔɔn Waakoyotoŋk sinɛkoy mɛlki ɗookak."

²⁸ Saaɓa Martaa toniiɗ sinik baŋiya, nɛɓa weeri waa nɛ kɛɛ riyiri manya Maariyam, nɛ tongeeɗ dugeeɗ kɛ, "Mɛlkikɔ Rɔɔriytaaniŋ, ɗɛyɛniŋ."

²⁹ Saaɓa tiyɛɛɗ Maariyam any sinik, nɛɓa ŋaar raŋana a gorgorŋ nɛ kɛɛ son lak sɛɛnik.

³⁰ Arɓa Yeese saadikan sɛɛn boŋiiɗ Martak, a inɓa ki mɛlɛɛ mɛndɛra.

³¹ Joop Ayuuduk sigɛɓa gaanaanɛr Maariyam godeey takik saaɓa dɛnɛrɗi Maariyam a ŋaarki walasa a gorgorŋɔŋk, nɛ koɓur kɛ kɛɛ saanakan kɔwuɗɛɛ Alaajaarik kɛnɔ kɛɛ kuɗeɗ nɛɓa nomɛrɗiŋ.

³² Mɛlkiɓa Maariyam saana arkiɗ Yeesek. Nɛ saaɓa dɛnɛɛɗik, nɛɓa ɗiiri derakɛ gɛɛnɛ goyse ɗeek nɛ tongeeɗ kɛ, "Suumi naakɛ, ɔkɔnkɔre ɓɛɛlin seediiŋ, gunkɔ manya eeta ki rerin."

³³ Saaɓa Yeese dɛnɛɛɗ a wuɗaaŋɔŋk maɓɔrɛ joop Ayuuduk sigɛɓa kurak a sɛɛn agut omoŋɔŋk wuɗaŋ, nɛɓa sanɗi ɓayɛ nɛɛkɛ nɛ ɓakɛyɗi jɛt,

³⁴ nɛ tonu kɛ, "Kɔwarikɔ eet?" Nɛɓa sɛɛk tonurgeeɗ kɛ, "Suumi naŋk, waɗ dɛnik."

³⁵ Nɛɓa ɗiirarki Yeesee pileetaak.

³⁶ Nɛɓa joop Ayuuduk mermenar nɛ tonur kɛ, "In dɛnɛɛ soon kɛ porukɔnɔ ɛkik."

³⁷ Mayakana sɛɛge a omoŋ omoŋ tonur kɛ, "Iɗit sinikan ɓuuke taamɛ iɗit sinɔ motuk, anɛ gunkɔ ki oolɛ a ari iɗit sini a ki rerin?"

Boŋku Yeese Alaajaar Ret Walasa

³⁸ Kɛɛɓa Yeese saana lak pii nɛɛkik a sanɗiŋ jɛt. Pii nɛɛk kaakaaɓa sinɔɓa korɛɛ giɗetik.

³⁹ Nɛɓa Yeese tonu kɛ, "In ɓɔŋgɔɔrɛɛ giɗee nɛɛk." Nɛɓa manya eta sinaanaɓa rɛrk Martaa tongeeɗ kɛ, "Suumi naakɛ, ŋaareɓɔ sisɔɔŋ agut sinɔ ɗoŋ aŋan sinɛkɔ rɛrɗik."

⁴⁰ Nɛɓa Yeese tongeeɗ kɛ, "Kaa kɔna toniiɗ kɛ ɔkɔn ŋaadin, dɛninkɔɔ eemɛyɔn Waakoyotoŋkuŋ?"

⁴¹ Nɛɓa joop gɛɛnɛ ɓɔŋgɔɔrɛr giɗee nɛɛkiŋ. Nɛɓa Yeese dɛnɗi rakaaya nɛ tonu kɛ, "Iin Baabɛɛ, pɔɔsaniŋ agut sinɔta tiiɗiɗinŋɔŋk.

⁴² Ɗegera kɛ tiiɗikinta ɓɛɛnyɔwɛ gɛɛŋk baŋɛ. Mayakana nɔ toniiɗa sinik kɛnɔ joop sigɛ ɛtɛr seedik ŋaadir kɛ wosɛykin kanti iin."

⁴³ Saaɓa Yeese toniiɗ sinik baŋiya, nɛɓa tonu a ɗooruŋ kɛ, Alaajaar, teŋaara walasa!"

⁴⁴ Nɛɓa Alaajaar sinɛɓa rɛrk ŋaarki a ɓɛɛlɛr arin gɛɛnɛ a derak gɛɛŋk a taamɛ gɛɛŋk oko sinɛkan sɛɛg tuseeɗɛɛ abiye ɓuwaanoŋkuk. Nɛɓa Yeese tonu sɛɛga kɛ, "In woorɛɛ abii nɛɛk nɔ ŋɔɗɛɛ, nɔ ŋaar."

Waasiɗi Joop Ayuuduk Kɛnɔ Ɓokotur Yeesee

⁴⁵ Agut sini joop Ayuuduk a ɓɔɔkaaŋ sigɛɓa kurak kɛnɔ gaanaanir Maariyamuk ŋaadirɓa Yeeseeŋ saaɓa dɛnɛrɗi any sinɛɓa ijaagik.

⁴⁶ Yakanaɓa kaar a omoŋ omoŋ son lak joop Paarisik, nɛ kaar tonur sɛɛga any sinɛkɔ ijaag Yeesek.

⁴⁷ Nɛɓa ɔɗɔweer tapa ŋaadiyɛɛkoŋ a joop Paarisik tolɛr joop sigɔ gaɓɛr woorank nɛ tonur kɛ, "Iɗit sini dɔɔs a arɛɛ ɛk, agut sinɔ ijaagiiɗ sɔɔriyɛ a ɓɔɔkaaŋɔŋk?

⁴⁸ Ɔkɔnkɔɔ ŋɔɗii oko sinikiŋ, nɛkɔɔ joop baŋɛ ŋaadir sɛɛn, nɛkɔɔ kurak joop Roomuk, nɛkɔɔ aalɛr Gode naŋk sinɛ Geetitank a joop ɗoo naŋkik.

⁴⁹ Eme sinaanɛ ɔɗɔwen tapa ŋaadiyɛɛkoŋk sinɛ obiik Kɛyaapaa, tonuɓa kɛ, "Kɛɛ any sinɔ sɔɔk ɗegerarik.

⁵⁰ Ki kɔna mɛlɛɛ sinɔ kɛ ɔɔtɛ sinɔɔnɛ gun badɛrɗi joop ɗookoŋk baŋɛk, nɛ dɔɔs a rɛr iɗit sinɔ omoŋɔŋk agut joop baŋɛk?"

⁵¹ Mokoɓa tonu sini ɔɔtɛ nɛɛkɛɛk. Agut sinɔɓa eme sinaanɛ sɛɛn ɔɗɔwen tapa ŋaadiyɛɛkoŋkuk, maɓa waasɛ pɛrka kɛ rɛrkɔɔ Yeesee agut joop Ayuuduk.

⁵² Mokokoy rɛr agut joop sigɛ ɓɔɔkaak dakɛɗa, ma kɛnɔ ɓɔrɛ tolɛ tɔɔmɔk Waakoyotoŋk sigɛɓa kɛɛtiɗiik agut omoŋ.

⁵³ Nɛ agut sini a tukiɗi ɓeny sinaanɛ waasiɗiiɓa ɔɗɔweer Ayuuduk kɛnɔ ɓokotur Yeesee.

⁵⁴ Saadi son kiɓa Yeese ŋawit joope Ayuuduk kɔɔr a dɛnɛɛŋ. Nɛɓa ŋaar saadi nɛ kɛɛ katɛmɛya sinɔɔna ar paaton kɛntɛɛk sinɔɔna riyɛ kɛ Epireemuk, nɛɓa beeɗ saadi sɛɛn a nomtaanak gɛɛŋk.

⁵⁵ Wɔɔŋkuɓa Ba'aal Ɗoyiɗoŋk joop Ayuuduk. Joop a ɓɔɔkaaŋ a inɓa ki gayɛ Ba'aal Ɗoyiɗoŋk, kaarɓa ɗokanɛɛkɛ Yorsaleema kɛnɔ kaar arir ŋadɛɛ ɛkan gɛŋkik.

⁵⁶ Ɗɛyɛrɓa Yeesee, nɛɓa ɛtɛtɛɗar Godeey sinaanɛ Geetitank nɛ totoni kɛ, "Koɓiir ɛk? Kiikikɔɔ deran Ba'aala nɛɛkaak?"

⁵⁷ Maɓa ɓɔrɛ ɔɗɔweer tapa ŋaadiyɛɛkoŋk a joop Paarisik rɔɔrɔkar joopa kɛnɔ ɔkɔn lakɛ iɗit sinɔ ɗeger saan arkiɗ Yeesekiŋ, kɛnɔ yaaŋɛɗ kɛnɔ oolɛr gaamita.