Yowanis 10 - Kuumeet Sinɔ Tɔɔnuk Ad Majaŋeeroŋk

Ege Yeese Koortan Sinɔ Mentanŋɔŋk

¹ Tonuɓa Yeese kɛ "Eekeer tona kɔnaaŋ, iɗit sinɔ guuguny keera jiŋkuyɛɛkoŋk goy omalte a moko tugaat nɛɛkɛkik, ege iɗit sinɛ agalt ɛ iɗit sinɔ muujik.

² Ma iɗit sinɔ guuguny tugaat nɛɛkɛkik koortan jiŋkuyɛɛkoŋk.

³ Tayɗi koortaana saa jiŋkuyɛɛkoŋk koortan sinɛ tuga nɛɛkkiŋ. Tiyɛr jiŋkuyɛ gɛɛnɛ wɛɛŋa gɛɛŋkiŋ. Nɛ sɛŋk riy jiŋkuyɛ gɛɛŋk tiriyaakɛ gɛŋk nɛ diile sɛɛg walasa.

⁴ Saa boŋkuɗ jiŋkuyɛ gɛɛŋk walasak baŋɛk nɛ ŋawite sɛɛge ɔɗɔɔkɛ, nɛ nomɛrɗiŋ agut sinɔ jiŋkuyɛ gɛɛnɛ ɗegerarɗi wɛɛŋa gɛɛŋkik.

⁵ Yakana jiŋkuyɛ gɛɛnɛ kir nomɛɛ ete omalte, ma gonarɗiŋ agut sinɔ kirɗi ɗegerɔɔn wɛɛŋa gɛɛŋkik."

⁶ Tonuɓa sɛɛga Yeese rɔmɛ sini, yakanaɓa sɛɛga ki mɛlɛɛ any sinɛ tonu sɛɛgaak.

⁷ Nɛɓa Yeese tonu sɛɛga kɛkar kɛ, "Eekeer tona kɔnaaŋ, eet tuga jiŋkuyɛɛkoŋk.

⁸ Agut sini joop sigɛkan mɛlɛrki eete jeemɛk baŋɛ agaltiir a mujik. Kirɓa sɛɛga tiiɗit jiŋkuyɛ gɛɛnɛk.

⁹ Tuga nɛɛk eet. Iɗit sinɔ guuguny eeteek bɔdɛkoyŋ. Guugunyŋ nɛ ŋaarkiŋ, laŋi nyon sinɔ ireeɗɛ sɛɛnŋɔŋkuŋ.

¹⁰ Kus agalt agɛya, a ŋɔɔlɛɛta a sɔɔkiyɛɛka dakɛɗa. Makan saak kusa kɛnɔ laŋir jiŋkuyɛ gɛɛnɛ wɛɛŋa, kɛnɔ latu wɛɛŋa sigɔ ɓɔɔka a ŋaaŋayiikŋɔŋk."

¹¹ "Eet koortan sinɔ mentanŋɔŋk. Koortan sinɔ mentanŋɔŋk gaɓɛ wɛɛŋa gɛɛŋk agut jiŋkuyɛ gɛɛŋkiŋ.

¹² Iɗit sinɔ ijaagɗi woriyaak, moko jiŋkuyɛ gɛɛnɛ gɛɛŋk, sɛɛn koortan. Saa dɛnɛɛɗ tuwooku, nɛ ŋɔr jiŋkuyɛ gɛɛŋk nɛ gonŋ. Nɛ tuwoo nɛɛkɛ ŋakiɗi jiŋkuyɛɛkɛ gɛɛnɛ nɛ kɛɛtɛ sɛɛgiŋ.

¹³ Nɔ koortan nɛɛkɛ gonɗuk agut sinɔ sɛɛn iɗit sinɔ ijaagɗi woriyaak, nɛ ki koɓiit jiŋkuyɛɛka gɛɛnaak.

¹⁴ "Eet koortan sinɔ mentanŋɔŋk. Ɗegera saak jiŋkuyɛ gaaŋkiŋ, maɓɔrɛti jiŋkuyɛ gaanɛ ɗegerarŋ,

¹⁵ ɗegera sɛɛg oko sinɛti ɗegerɗi Baabɛɛk ɛ oko sinɛ ɗegerɗa Baabɛɛk. Gaɓa wɛɛŋa gaaŋk agut jiŋkuyɛ gaaŋkiŋ.

¹⁶ Laka jiŋkuyɛ ɔgɔ sigɔ moko atu keer sineenekiŋ. Nɛta ɗɛyɛ a ɓɔrɛ ɗɔka sɛɛgiŋ. Tiyɛr sɛɛk wɛɛŋa gaaŋkiŋ. Ɓɛɛlɛrkɔɔ a pony omoŋ, egekɔɔ koortan nɛŋk omoŋ.

¹⁷ "Porutu Baabɛɛŋ agut sinɔ gaɓɛɛɗa wɛɛŋa gaaŋk, sigɛkɔɔ murka kɛnɔ kusa boŋa sɛɛgkiŋ.

¹⁸ Kɛɛ iɗit sinɔte boŋu wɛɛŋa gaaŋkik. Laka ɓaŋkawuka sinɔ gaɓɛɛɗa wɛɛŋa gaaŋk ɛ boŋa sɛɛg kɛkarkiŋ. Boŋkaakan sekiyɛ sigi sooy lak Baabɛɛk."

¹⁹ Any sinɛɓa ŋaarki waasiyɛɛkɛ sigeegek, nɛɓa lakɛ pakakat kɛkar joope Ayuuduk kɔɔr.

²⁰ Sɛɛge joop a ɓɔɔkaaŋ tonurɓa kɛ, "Lak setan, maraatikan. Tiiɗigiɗɔ agut jikon?"

²¹ Ma ɔgɔɔk tonur kɛ, "Waasiyɛ sigi kirki ŋaarin ad iɗit sinɔ lak setank! Setan oolɛ a ɓuuke taamɛ motakoŋkuŋ?"

Tonu Yeese Kɛ Eet Tɔɔn Waakoyotoŋk

²² Gayɛɓa ɔɔtɛ sinɔ eemɛyɗɛɛ Ba'aal ijaag a tɔɔnuk Gode sinɛ Geetitank Yorsaleeme. Egeɓa ɔɔtɛ nɛɛkɛ ɛyɛkeer baŋgiyoŋk.

²³ Weeweriiɓa Yeese Godeey sinaanɛ Geetitank, nyon Ŋawiitoŋk Salamoonuk.

²⁴ Saaɓak tolɗiiɓa joop Ayuuduk sɛɛne tookɛɛta nɛ tonurgeeɗ kɛ, "Arinkoy tin a lakii koɓiiɗak a pɛɛy mɛlɛɛɗa okoɗa? Ɔkɔn iin Kereseeŋ tonte tina kɛ ɗɔm."

²⁵ Nɛɓa Yeese jumur sɛɛga kɛ, "Tona kan kɔnaaŋ, nɛ kiir ŋaadit. Sɔɔriyɛ sigɛ ijaaga tiriyaakɛ Baabɛɛkik waasɛ ɔɔtɛ naak.

²⁶ Yakana sɔɔk kiirti ŋaadit agut sinɔ moko iinak jiŋkuyɛ gaaŋkik.

²⁷ Jiŋkuyɛ gaaŋk tiyɛr wɛɛŋa gaaŋkiŋ. Ɗegera sɛɛgiŋ nɛ sɛɛk nomɛr eeteeŋ.

²⁸ Gaɓaakoy sɛɛga wɛɛŋa sigɛkoy nɔkoy nɔkoyk, kirkoy badɛ adaktan. Kɛɛ iɗit sinɔkoy boŋku sɛɛg ariit naakɛkik.

²⁹ Baabɛɛ sinɛkanta gaɓɛ sɛɛgik kaalɛ ola baŋɛ. Kɛɛ iɗit sinɔkoy boŋku sɛɛg ariit Baabɛɛkik.

³⁰ Eet a Baabɛɛ eteŋk omoŋ."

³¹ Nɛɓa joop Ayuuduk boŋur giɗeek kɛkar kɛnɔgun baabaalar.

³² Nɛɓa Yeese tonu sɛɛga kɛ, "Yaaŋakɔ kɔna ijaagaak sigɔ mentaanaŋɔŋk a ɓɔɔkaaŋ sigɔ kanta gaki sɛɛg Baabɛɛk. Anɛti baabaalari agut ijaag won?"

³³ Nɛɓa sɛɛk jumurargeeɗ joop Ayuuduk kɛ, "Baabaaliini agut sinɔ nyɔɔnɗun Waakoyok, mokonu baabaalii agut any sinɛkɔ ijaagink mentanŋɔŋk, agut sinɔ ariiɗin ɛɛk nook a Waakoyo, ma iin iɗitik."

³⁴ Nɛɓa Yeese tonu sɛɛga kɛ, "Mokoɓato taapɛɛ higii noŋk kɛ, 'Tona kɛ iinak suumiyɛ.'

³⁵ Joop sigɛɓa sɛɛga mɛlki pɛɛni Waakoyotoŋkuk ɔkɔn sɛɛg riy kɛ, 'jookakiŋ,' nɛ ɗegerɛɛ kɛ kɛɛkoy aalɛt Pɛɛni Waakoyotoŋk.

³⁶ Ɔkɔn ɓɛɛlɛ oko sinikiŋ anɛ iɗit sinɔɓa geeti Baabɛɛk nɔɓa wosɛyki ɗookak agut sinɔ toniiɗ kɛ, 'Eet Tɔɔn Waakoyotoŋkuk,' nɛ toniir kɛ, 'Nyɔɔnun Waakoyo.'

³⁷ Ɔkɔn moko ijaaga ijaag Baabɛɛkiŋ, nɛ katti ŋaadɛɛ.

³⁸ Ma ɔkɔn ijaaga ijaag Baabɛɛkiŋ, nɛ kɛygun aasi kiir ŋaadit eetiŋ ma in ŋaadɛɛ ijaag naak. Ɗegerarikɔɔ ant sineene kɛ ɗɔm kɛ Baabɛɛ a eet maɓɔrɛ eet a Baabɛɛ.

³⁹ Nɛɓa sɛɛk ɗɛyɛr gaamita kɛkar, yakanaɓa sɛŋk bɔdɛ sɛɛge ariit nɛ ŋaarŋ.

⁴⁰ Ekaŋɛɓa Yordanoos kɛkar nɛ mɛlɛ saanaɓa sɛɛn aadiiɗ Yowanis sinɛ a'aadiik tuki nɛɛkɛkik, nɛɓa beeɗ saadi.

⁴¹ Nɛɓa kurak joop a ɓɔɔkaaŋ son lak sɛɛnik nɛ tonur kɛ, "Kiɓa Yowanis ijaagɛ sɔɔriyɛ, mayakana any sinɛɓa tonu Yowanis agut iɗit sinik baŋɛ eekeer."

⁴² Nɛɓa saadi ŋaadir sɛɛn joop a ɓɔɔkaaŋ.