Yaykoob 5 - Kuumeet Sinɔ Tɔɔnuk Ad Majaŋeeroŋk

Rɔɔrɔkɔn Sinɛ Gaɓɛɛ Worikaanakak

¹ Sisɔ in geleewɛɛ iinak joop sigɛ worikaanakik, in kuɗɛɛ a ɗooruŋ agut rakatɛ sinɔ ɓaŋkawuŋɔŋk sinɛkɔɔ kɔna mɛlkik.

² Wori noŋk sɔɔkiɗikɔ baŋɛ, maɓɔrɛ abiyak goŋk ɗamkɔ sɛɛg kuukut.

³ Worke noŋk a awɛytiir ɔgɔ sigɛ obi gati nɛŋkik uuterkɔŋ. Nɛ uutan nɛŋk yaaŋɛ ɛɛk iinakɛ. Maɓɔrɛ buusɛɛ goŋk ɗam a ito maɗ. Tolɛɛrkɔ wori emeyikɛ sigeege pediyaak.

⁴ Nɛ a ɓɛɛlɛ oko sinik agut sinɔkɔ kirɗɔ koyiiɗ tɔkiyan ijaageera sigaagakɔ kɔna ɗootiɗiik nɛ tiyɛɛ ooyan nɛŋkiŋ. Tiyɛkɔ Waakoyo sinɛ Obiik duri joop sigɛkɔ kɔna ɗootiɗiikiŋ.

⁵ Ariirɓa ɛkan goŋk beeɗit sinɔɔnɛ kɛɛ any sinɔ sanɛɛrik a yaakaat, a goontu a ito keegun sinɔkɔ ragadɛɛ ŋɔɔlɛtaak.

⁶ Pɛrɛdɛɛrɓa sɔɔk ete sinaanɛ mentanŋɔŋk, nɛɓa ɓokotiiriŋ, nɛɓa Sɛŋk ki kɔnu ɓooyɛ.

Ɓaŋkaawurɔn Oolaanik A Ɗanɗamɔn

⁷ Iinak manyaakak eeta sigɛ dooytaanakik, in koorɛɛ mɛlɛ Suumiyoŋk ɓaŋkaawurɔɔn oolaanik nɔkoy mɛlkiɗik. In dɛnɛɛ ijaagen taawak ko sinɔ ɗɛyɛ taamɛ sigɔ mentanŋɔŋk ɗook nɛɛkɛkik nɔkoy laŋiɗik, a sinɔ koorɛ tul sinɛ tukik a sinɛ pediyaak ɓaŋkaawurɔɔn oolaanik.

⁸ In ɓɔrɔ ɓaŋkaawurɛɛ oolaan oko sinɛk, ɛ in arɛɛ ɓayɛtun goŋk a ɓaŋkaawarŋ, agut sinɔ wɔŋkuɗu mɛlɛ Suumiyoŋkuk.

⁹ Iinak manyaakak eeta sigɛ dooytaanakik, kat palalamiikɛɛ ɛkanɛɛkɛ goŋk kɛnɔ mokɔɔ kɔne pɛrɛdɛɛ. Iɗit sinɛkɔɔ kɔne pɛrɛdɛk mɛlkikɔ nɛ ɛtɛtɛr tugaat.

¹⁰ Iinak manyaakak eeta sigɛ dooytaanakik, in dɛnɛɛ rɔmɛ joop pɛrkaakoŋk sigɛɓa tonɗi tiriyaakɛ Suumiyoŋk sinɔ boŋurɗu rakatɛ ɓaŋkaawurɔɔn oolaanik.

¹¹ Joop sigɛ ɓaŋkaawurar oolaanik riyii sɛɛg kɛ geetitaanak. Tiyɛɛrɓa Iyob kɛ ɓaŋkaawurɓa oolaan ɛkiŋ, ɛɓa dɛnɛɛr any sinɔ mentanŋɔŋk sinɛɓa ijaaggeeɗ Waakoyot pediyaakiŋ. Nɛ ɗegerari sineene kɛ Waakoyo maariyɗi ɛ sanɗigeeɗ iɗiŋ.

¹² Iinak manyaakak eeta sigɛ dooytaanakik, olaatɛ sigaagɛ ɓɛɛlɛr baŋɛ kat wogoyɛɛ dari maŋk, ɗook, maŋk olaatɛ ɔgɔɔkɛ. Ɔkɔn kɛ 'Ii', nɛ in 'Ii' eekeerɛ, ma ɔkɔn kɛ mokoŋ nɛ in moko eekeerɛ, ma ɔkɔnkɔɔ moko ɓɛɛlɛ oko sinikiŋ, nɛkɔɔ kɔne pɛrɛdɛɛŋ.

¹³ Ɔkɔn lakɛ iinakɛ kɔɔr iɗit sinɔ laŋki rakatɛkiŋ, in ɗanɗama, ma ɔkɔn lakɛ iɗit sinɔ yaa ɓayɛ nɛɛkɛŋɔŋkuŋ, nɛ in iiliya a pɔɔsɛ Waakoyo.

¹⁴ Ɔkɔn lakɛ iinakɛ kɔɔr iɗit sinɔ goruŋɔŋkuŋ, in riyki gutarɛyɛ gode Sambatɛyoŋk son lak sɛɛnik. Nɔ ɗanɗamaaɗ a ɗonyɛr diikuy tiriyaakɛ Suumiyoŋk.

¹⁵ Ɗanɗamɔn sinɔ ito sinik sinɔ wideerɛɛ ŋaadiyɛɛkɛk ebɔdɛ iɗit sinɛ gorukuŋ, ebɔdɛkɔɔ sɛɛn Suumii goriɗ nɛɛkɛŋ. Ɛɓɔrɛ ɔkɔn lakɛ tikiyɛ sigɔkan ijaagŋɔŋkuŋ ŋɔɗurkuɗɛkɔɔ sɛɛgiŋ.

¹⁶ Agut sini in totonɛɛ tikiyɛ goŋk ɛkanɛɛkɛ goŋk, in iɗit ɗanɗama mɛŋka kɛnɔkɔɔ bɔdɛrkɔɔ. Ɗanɗamɔn iɗit sinɔ mentan taamɛkɛ Waakoyotoŋk lak ɓaŋkawuka sinɔ obiiŋɔŋk, sinɔ ijaag any sinɔ reemɗi ɓayɛk.

¹⁷ Eliyaas iɗitɓa oko eteŋk, nɛɓa ɗanɗama kɛnɔ kat ɛɛkɛ tul. Nɛɓa ki ɛɛkɛɛt ɗook raŋk a emeyi jiit a ɛyɛkeer tula om.

¹⁸ Nɛɓa ɗanɗama kɛkar nɛ ɛɛkik tul dari, nɛ gaɓɛ ɗook ɗama.

¹⁹ Iinak manyaakak eeta sigɛ dooytaanakik, ɔkɔn iinakɛ iɗit omaay ŋaarki gopɛ eekeeroŋkuŋ, ɛ iɗit omaay jumurku sɛɛn gopana eekeeroŋkuŋ,

²⁰ nɛ iɗit sinɛkɔ jumurku iɗit sinɛ tikitank gopɛ sinaanɛkɔ badɛɛɗik, in ɗeger kɛ ebɔdɛkɔ wɛɛŋa iɗit sinɛ tikitank ret ɛkɔ ari a laŋi tɔŋɔɗ tikiyɛ gɛɛŋk sigɔ ɓɔɔkaaŋɔŋk.