Yaykoob 3 - Kuumeet Sinɔ Tɔɔnuk Ad Majaŋeeroŋk

Ikomiit Kaɗatoŋk

¹ Iinak manyaak eeta sigɛ dooytaanakik, kat kɔne rɔɔriytaanak joop a ɓɔɔkaaŋ, agut sinɔ ɗegerari kɛ eteŋk sigɛ rɔɔriytaanakik boŋiikoy pirdi sinɔ kaalɛ joope ɔgɔɔkɛŋɔŋk.

² Babadii olaatɛ sigɔɔgɛ ɓɔɔkaaŋɔŋk eteŋk baŋɛ. Iɗit sinɔ ki badɛ waasiyɛɛkɛk, iɗit sinɔ daktan a oolɛ ikomiit ɛɛk nɛɛk baŋɛ.

³ Saa rokopɛɛɗii awɛytiir ada masoyoŋk takanak, nɛ oolii a ikomii ɛɛk nɛɛk a tina tiiɗi a kɛɛ saana ɗɛyiikiŋ.

⁴ Kɛygun ɓɔrɛ emɗakɔɔk boobɛrkɛŋ ɛ kɛygun dire sɛɛg yoŋgoy sinɔ obiiŋɔŋkuŋ, nɛ iɗit sinɛ kɛɛwuɗik kɛɛwɛ emɗakɔ gɛɛŋ ant sinaanɛ tɛmŋɔŋk kɛɛwɛɛtoŋk gɔɔta sinaana ɗɛyɛk.

⁵ Maɓɔrɛ kaɗat kɛygun aasi ɛɛk naŋk soon tɛmŋɔŋkuŋ, nɛ meri ɛɛk olaatɛ sigɔɔgɛ boobɛrŋɔŋk. Moɗɛɛ ɗuk sinɔ obiiŋɔŋk maɗ sinɔɔnɛ tɛmŋɔŋk.

⁶ Maɓɔrɛ ito kaɗat maɗ. Dakɛɓa a sɛɛn ɗoo sinɔ ŋɛɛwɛnŋɔŋk eek naŋk takik, ari ɛɛk naŋk baŋɛ a somkan, moɗɛ ŋawit beeɗit naŋkik oko maɗ siiooluk.

⁷ Keegu baŋɛ a teetɔ, a ola sigɛ pupuuter ɗookuk a ŋawiiter goroo takik baŋɛ oolɛr a lowur sɛɛg jooŋ, ɛ lolowar sɛɛg.

⁸ Mayakana kɛɛ iɗit sinɔ oolɛ a ikomu kaɗak. Any sinɔ lak korus sinɔ rɛɛrɛŋɔŋk, sinɔ ŋɛɛwɛnŋɔŋk a kiiɗɛ imiinyk.

⁹ Kaɗa pɔɔsɛɛɗii Baabɛɛ naŋk Waakoyo ɛ lamɛɛɗii iɗit sinɛɓa riiɓɛɛ a gayi a Waakoyok.

¹⁰ Ŋaararki pɔɔsiyɛɛk a lamɛ ad sinɔɔnɛ omoŋɔŋk. Iinak manyaakak eeta sigɛ dooytaanakik, ki ɗɛyɛ a ɓɛɛlɛ oko sinikiŋ.

¹¹ Tuny sinɔ omoŋɔŋk oolɛ a gonarkiɗ maawu sigɔ mentaanaŋɔŋk a sigɔ ŋɛɛwɛŋɔŋkuŋ?

¹² Iinak manyaakak eeta sigɛ dooytaanakik, kɛɛt bɛlɛɛsik oolɛ a riiɓe taamɛ wɛyraakiŋ? Maŋk wɛyin oolɛ a riiɓe taamɛ bɛlɛɛsikiŋ? Maɓɔrɛ kirki togon maaw sigɔ ŋɔlŋɔɔlarŋɔŋk maawɛ sigɔɔgɛ luuluwerŋɔŋk.

Ɗegerɔn Sinɔ Eekerkank

¹³ Ɔkɔn lakɛ iinakɛ kɔɔr iɗit sinɔ ɗeger ɛɛk ɛ lak koɓikiŋ, in yaaŋɛ beeɗit nɛɛkɛ sinɔɔnɛ mentanŋɔŋk a ijaag sinaanɛ ijaag ɗegerɔɔn sinɔɔnɛ rikiteeɗ ɛɛkik.

¹⁴ Mayakana ɔkɔn kone ɓɛɛlɛ ɓayɛtunɛɛkɛ goŋk ɓaaykaat, a nyeken, a pori ɛɛkoŋkuŋ nɛ kat meriir ɛɛk, ɛ kat tonɛɛ nyon eekeerɛ raŋk.

¹⁵ Degerɔn sinɔ ito sinik laŋɛɛkan ɗook raŋk a koɓiiɗ etoŋk, a setane, ma mokokan Waakoyote.

¹⁶ Soon lakiɗɛ nyeken a pori ɛɛkoŋkuk, nɛ lakɛ ɗaakan a ijaag sinɔ ŋɛɛwɛnŋɔŋk baŋɛ.

¹⁷ Mayakana ɗegerɔn sinɔ laŋɛɛ Waakoyotek mentanɓa a kiiɗɛ any sinɔ ŋɛɛwɛnŋɔŋk tuki, nɛ saadi poru bɔdɛ, ɛ mentan, ɛ tiiɗi, ɛ maariyɗi, ɛ lak taamɛ sigɔ mentaanaŋɔŋk. Ki pakaatɛ joop, ɛ kiiɗɛ tagay.

¹⁸ Joop sigɔ porur bɔdɛk soowɛr wɛykon bɔdɛɛɗoŋk, nɛkoy ɗootur taamɛ mentankaatoŋk.