Yaykoob 1 - Kuumeet Sinɔ Tɔɔnuk Ad Majaŋeeroŋk

¹ Ege sini wargatɛ sinɔ wosɛyɛɛrɛɛ seey lak eet Yaykoob sinɔ laaŋoyen Waakoyotoŋk a Suumi Yeese Kereseek dooytaanaka gaanak Ayuuduk komoyeera sigaaga aarin a pɛɛyk sigaagaɓa kɛɛtiɗii ɗoo baŋɛk, in kɔna dakɛ a bɔdɛ.

Ɗegerɔn A Ŋaadiyɛ

² Iinak manyaakak eeta sigɛ dooytaanakik, saa laŋirkiɗɔ rakatɛyɛ sigɔ ɓɛɛlɛr kundiyaakɛk nɛ in boŋɛ a itokɔna yaaŋ baŋɛ.

³ Agut saa paariɗɛ ŋaadiyɛ goŋkuk nɛ ɗegerari kɛ laŋiirkɔɔ ɓaŋkaawurɔn oolaanik.

⁴ In dusanɛ ijaag nɛɛk, ɓaŋkaawurɔn noŋk oolaanik, nɔkɔɔ iinak daktaanak a kɛɛ any sinɔ kɔne bitakɗiik.

⁵ Ɔkɔn lakɛ iinakɛ kɔɔr iɗit sinɔ bitakaaɗ ɗegerɔɔnkuŋ, in kalɛyi Waakoyo sinɛ gije joop baŋɛ yaakaat a ki worɛɛk gageeɗkɔɔŋ.

⁶ Yakana in kalɛyi ŋaadiyɛɛkɛ a kiigiɗɛ koɓiiɗak pɛɛy. Iɗit sinɔ lak koɓiiɗak a pɛɛyk ito beliyaŋɛ gɔrɔ sinɔ obiiŋɔŋk sigɔ dire ɛ yike sɛɛg yoŋgoyk.

⁷ Iɗit sinɔ ito sinik kat gayigeeɗ a ito lakɛ any sinɔ laŋi sooy lak Suumikiŋ.

⁸ Agut sinɔ lakiɗ koɓiiɗak a pɛɛyk nɛ ki gayɛ a ŋawite taamɛ takan gopɛ sinɔɔnɛ omoŋɔŋkuŋ.

Ɔɔtɛ Iɗit Sinɔ Sankank A Iɗit Sinɔ Worikank

⁹ Dooytan sinɔ sankank in yaageeɗ, agut sinɔ sɛɛn Waakoyot ɓɔŋgɔɔrɛɗŋɔŋk.

¹⁰ In yaa eta sinɔɔna lak worik, saa sɛɛn rikitkiɗ Waakoyotuk. Agut sinɔkɔɔ badɛɛɗ wori nɛɛkɛ a ito makɛɛk.

¹¹ Saa mɛlkiɗ waawuy a paakan nɛɛkik nɛ paalorar ŋɔnyik, nɛ roorowɛ makɛ nɛŋkiŋ, nɛ badɛ mentanka nɛɛkɛŋ. Nɛ ɓɔrɛ badɛ iɗit sinɔ lak worik oko sinik saa arkiɗ gopɛ nɛɛkɛkik.

Paariit Sinɔ Laŋki Iɗik

¹² Geetitan iɗit sinɔ ɓaŋkaawur paariyɛɛkɛk agut sinɔ saakɔɔ paariɗɛ sɛɛnik baŋiya, nɛkoy boŋu dooroy eemɛyɔɔnoŋk wɛɛŋakoŋk sinɛkoy gaɓɛ Waakoyot joopa sigaaga poru sɛɛgik oko sinɛɓa kuumɗiiɗik.

¹³ Saa iɗit laŋkiɗ paariyɛɛk kat tonu kɛ, "Paarti Waakoyo," agut sinɔ ki Waakoyot paariit iɗit ant sinɔɔnɛ ŋɛɛwɛnŋɔŋk, maɓɔrɛ kɛɛ iɗit sinɔ paari sɛɛn ant sinɔɔnɛ ŋɛɛwɛnŋɔŋk.

¹⁴ Mayakana iɗit a omoŋ omoŋ paarɛɛ sɛɛn saa puruuteɗ sɛɛn ɛ raamɛɛɗ sɛɛn ɗɛyan nɛɛkɛkik.

¹⁵ Gamɛ ɗɛyaan nɛ ɓartɛ tikiyɛ, nɛ ɓɔlɔɔrɛr tikiyɛɛk, nɛ ɓartɛr rer.

¹⁶ Iinak manyaakak eeta sigɛ porɛɛk, kat kɔnu raaramɛɛ.

¹⁷ Ola sigɔ mentaanaŋɔŋk baŋɛ a geetiyɛ sigɔ pedtaanakik mɛlɛrkikoy sigi baŋɛ sooy lak Waakoyo sinɛɓa riiɓe pɛɗɛrkaatak sigɛ atu darik sinɛ kiiɗɛ weeweer ɛɛkoŋk a ito tipiik.

¹⁸ Ariɓa tin Waakoyot a eteŋk tuktaanak Pɛɛnii eekeeroŋk kɛnɔ eteŋk taamɛ sigɛ tuktaanak olaatɛ sigaagɛɓa riiɓek baŋɛ.

Tiyɛɛ Pɛɛni Nɛɛk Nɛ Ijaagɛɛŋ

¹⁹ Iinak manyaakak eeta sigɛ porɛɛk, kat monɗiikɛɛ sineene, joop baŋɛ in gorgoorar tiyaana, ma in aayɛr toniiɗa a ŋadiiɗa.

²⁰ Ŋadi etoŋk kiiki diilɛ mentanka sinɛ ɗɛyɛ Waakoyotuk.

²¹ In ŋɔɗɛɛ somakɔ a ɓɔɔkaaka tikiyɛɛkoŋk sigɛ kɔne atu takik baŋɛ. In boŋɛɛ rikiteet ɛɛkoŋk Pɛɛni sinɛkoy ebɔdɛ wɛɛŋa goŋkuk sinɛɓa takoyɛ Waakoyot ɓayɛtunɛɛkɛ goŋkuk.

²² In koorɛɛ Pɛɛni nɛɛk, ma kat raamɛɛr ɛkan goŋk a tiiɗikari dakɛɗa.

²³ Iɗit sinɔ tiyɛ Pɛɛni nɛɛk nɛ ki koorɛɛtik ito iɗit sinɔ mermen ɛɛk nɛɛk ɓɛɛrawoyk.

²⁴ Iɗit sini mermen ɛɛk nɛ ŋaarŋ, ma oko saaykiŋ monɗi nɛ ki ɗegerɔɔn kɛ ɓɛɛlɛkɔ ɛk.

²⁵ Mayakana iɗit sinɔ mermen higi sinɔ daktank sinɔ boŋɗiik yaakataak, nɛ ɓaŋkaawur sɛɛnek, iɗit sinɔ tiyɛ nɛ koorɛ a moko monɗiiɗŋɔŋk sɛɛn geetitan ijaag nɛɛkɛk baŋɛ.

²⁶ Iɗit sinɔ tonu kɛ ara Waakoyo a yaageeɗiŋ ma ki ikomiit kaɗa nɛɛkik raamɛ ɛɛk nɛɛk, ege ŋaadiyɛ gɛɛnɛ kanysɛya.

²⁷ Ege sini beeɗit sinɛ mentan a ari Baabɛɛ naŋk Waakoyo a yaageeɗŋɔŋk, tɔkɔny sinɔ kɔnyɛɛɗɛ rakatɛyɛɛkɛ gɛŋk tɔɔmɔk sigɔɓa rɛrar ɛpɛnaakak a ɛmɛsaakak, a jartiyatɔk sigɔɓa rɛrar babuy gɛŋkik ɛ koorɛɛ ɛɛk somakɔɔkɛ ɗookoŋk.