Tiito 2 - Kuumeet Sinɔ Tɔɔnuk Ad Majaŋeeroŋk

Rɔɔriyɔn Sinɔ Ɓɛɛlɛ Kɛ Ɗɔmk

¹ Yakana seŋk rɔɔriya rɔɔriyɔɔn sinɔɔnɛ ɓɛɛlɛ kɛ ɗɔmk.

² Rɔɔriy bɔɔlɔŋeer sigɔ moojakik kɛnɔ beeɗir kɛ ɗɔm, ɛ koorɛr eemɛyɔn nɛŋk, ɛ koorɛr ɛɛk, ɛ latu ŋaadiyɛ a mɛyin a leemikeen.

³ Ɛɓɔrɛ rɔɔriy bɔɔlɔŋeer sigɔ jartiyatɔkuk kɛnɔ latu ŋaadiyɛ sigɔ mentaanaŋɔŋk, ɛ koorɛr eemɛyɔn nɛŋk, ɛ kɛnɔ kat laaganyar joop, ɛ kɛnɔ kat sɛɛg ŋɔɗɔkaanak tuutoŋk, ma in rɔɔriya ant sinɔɔnɛ mentanŋɔŋk.

⁴ Jartiyatɔk sigɔ bɔɔlɔŋeerk in arir jartiyatɔk sigɔ tagooneerk kɛnɔ porur babuyk gɛŋk a tɔɔmɔk gɛŋk.

⁵ In rɔɔriyar sɛɛg kɛnɔ koorɛr ɛɛk, ɛ mentaana, ɛ ijaagɗi wɛykɔkɛ, ɛ tiiɗi babuyka gɛŋk, ɔkɔnkɔɔ ijaagir oko sinikiŋ kɛɛkɔɔ iɗit sinɔ nyɔɔn Pɛɛni Waakoyotoŋkuk.

⁶ Ɛɓɔrɛ rɔɔriyin atiinyi kɛnɔ beeɗir a koorɛr ɛkan gɛŋk.

⁷ Maɓɔre dak sɛɛga a rɔmɛ olaatɛ baŋɛ a ijaagin any sinɔ mentanŋɔŋk, yaaŋ sɛɛga eekeer rɔɔriyɔɔn a iin iɗit sinɔ ŋaadɛɛŋɔŋk.

⁸ Rɔɔriy sɛɛg rɔɔriyɔɔn sinɔɔnɛ ɓɛɛlɛ kɛ ɗɔmk. Latukɔɔ keeny joop sigɛ tin ɓooyurk saakɔɔ sanɛrɗ any sinɔ ŋɛɛwɛnŋɔŋk sinɔ tonur eteŋkɛɛk.

⁹ Rɔɔriy ijaageer kɛnɔ tiiɗi suumiyɛɛka gɛŋk olaatɛ baŋɛ, kɛnɔ arir a yaa sɛɛgaŋ, kɛnɔ kat palamɗi sɛɛga.

¹⁰ Rɔɔriy sɛɛg kɛnɔ kat agalɗi, in yaaŋɛr ŋaadiyɛɛkɛ kɛnɔ eemɛyɛɛ rɔɔriyɔn Ebɔdtan naŋk Waakoyotoŋk ant baŋɛ.

¹¹ Nɛɓa yaaŋɛ Waakoyot wookan nɛɛk sinɔ ebɔdɛɛɗ joop baŋɛk.

¹² Wookan sini rɔɔriytin kɛnɔ beeɗii ɗook raŋk eme sineene a kaadii beeɗit tikiyɛɛkɛɛk, a koɓi taaroŋk, a ɓalii ɛɛk naŋk, a beeɗit wɛɛŋakɛ ŋaadiyɛ sigɔ eekeerik.

¹³ koorɛr ŋaadiyɛ gaŋk sigiɓa geetɛɛk yaaŋɛɛt eemɛyɔn Waakoyo sinɛ Obiik naŋk ɛ Ebɔdtan naŋk, Yeese Kereseek.

¹⁴ Gaɓɛɓa Yeese ɛɛk nɛɛk agut eteŋk kɛnɔ tin ebɔdɛ tikiyɛɛkɛ sigaagɛ ɓɛɛlɛrk, kɛnɔ tin ari a mentankii taamɛkɛ Waakoyotoŋk a eteŋk joop sigɔ pakattaanak sɛɛnak a ijaagii any sinɔ mentanŋɔŋk.

¹⁵ Sisɔ rɔɔriya olaatɛ sigeege, koykoya ɓaŋkawukaat nookɛk baŋɛ sinaanɛ kanna gaɓɛɛk, ɛ goopaakin a kat lakɛ iɗit sinɔnu daraayɛk.